Yokaana Enyanjula

Enyanjula

Ekitabo AMawuliro aMasa ngʼoYokaana oweyagawandiikire, kimo oku bitabo ebina ebiri omu Ndagaano eMpyaka ebisonzola oku bwomi bwa Yesu Kurisito. Buli kitabo ekimo kwebyo bakyeta bati, “Mawuliro agʼaMazima,” amakulu gaakyo “mawuliro amasa.” AMawuliro aMasa ago bagawandiikire ngʼoYesu amalire okufa, era abagawandiikire babbaire Matayo, nʼoMaako, nʼoLuuka, nʼoYokaana.

Omutume oYokaana, eyabbaire omoiza oku beegi ba Yesu niiye eyakiwandiikire, era yakiwandiikire nga wabitirewo emyanka ooti-so 90 okuzwera nakimo oku kubyala oYesu Kurisito. Newankubbaire ngʼekitabo tikikoba kiti oYokaana niiye eyakiwandiikire, iyo empandiika efaananira nakimo nʼebbaluwa eya Yokaana esooka, nʼeyokubiri, nʼeyokusatu. Abawandiiki abamo abʼeira babbutula bati oYokaana omu kiseera ekyo yabbaire mu kibuga Efeeso, kale kyezyeka okubba ngʼekitabo kinu bakiwandiikiire mwEfeeso.

OYokaana alaga kusani ekigendererwa kyʼekitabo kinu ati kubbeera bantu kwikirirya bati oYesu niiye oKurisito ogubasukireku amafuta. Era ati niiye oMwana wa Kibbumba agabira abantu abamwikirirya, obwomi obutawaawo (20:31).

Ekitabo kinu bakiwandiikiire bantu bonabona aBayudaaya nʼaBatali Bayudaaya. Omu ngeri egimo, kyawukana ino oku bitabo bidi ebisatu ebyʼaMawuliro aMasa. Mu kinu ikyo amaani agateeka ku byamagero oYesu ebiyakolere okukiraku engero. Ebintu ebindi ebikulu ngʼokubatiza oYesu, nʼokumukema omwidungu byona oYokaana tiyabiwandiikireku.

Engeri egibyecaanamu

1. Enyanjula (1:1-18)

2. Ebyamagero ebya buli ngeri oYesu ebiyakolere (1:19–12:50)

3. Ebyafaayo bya Yesu okutuukira nakimo oku kufaakwe nʼokuzuukirakwe (13:1–20:31)

4. Ogumo oku mirundi oYesu egiyabonekeire abantu ngʼamalire okuzuukira, era nʼekigendererwa kyʼekitabo kinu (21:1-25)

Արդեն Ընտրված.

Yokaana Enyanjula: GWR

Ընդգծել

Կիսվել

Պատճենել

Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք

Իմացեք ավելին Bbaibbuli y'oLugwere-ի մասին