Intaliko 5
5
Ikwata lyakwe Adamu
(1 Imilandu 1:1-4)
1Wee we kalata wikwatwa lyi wuvi lyakwe Adamu. Pano Leza welewuzile umuntu wamwelewulizile ku wukola wakwe. 2Welewuzile umonsi nu mwanachi, awapepa awita ni zina lya wuntu pano wawelewuzilenye. 3Pano Adamu walinji ni myaka umwanda wonga ni myaka amakumi yatatu (130), apano wapafile umwana-monsi ku wukola wakwe, akolana nawe, amwita izina ati we Seti. 4Pansizi yankwatwa yakwe Seti umwanakwe, Adamu walinji ni myaka imyanda kananimonsi (800); swinya wapafile na wana wanji awonsi na wanachi. 5Achaleka Adamu wamazile imyaka imyanda mufundikambali ni myaka amakumi yatatu (930) apano afwa.
6Walanga pano Seti wawa ni myaka umwanda wonga ni myaka yisano (105) apapa Enosi. 7Pansizi ya nkwatwa yakwe Enosi, Seti walinji ni myaka imyanda kananimonsi ni myaka munenulambali (807), walinji na wana wanji awonsi na wanachi. 8Achaleka Seti walinji ni myaka imyanda mufundikambali ni myaka ikumi na yiwili, apano afwa (912).
9Walanga pano Enosi wawa ni myaka amakumi mufundikambali (90), apapa Kenani. 10Pansizi ya nkwatwa yakwe Kenani Enosi walinji ni myaka imyanda kananimonsi ni myaka ikumi lyonga na yisano (815), walinji na wana wanji awonsi na wanachi. 11Achaleka Enosi walinji ni myaka imyanda mufundikambali ni myaka yisano (905); apano afwa.
12Walanga pano Kenani wawa ni myaka amakumi munenulambali (70) apapa Mahalalele. 13Pansizi ya nkwatwa yakwe Mahalalele Kenani walinji ni myaka imyanda kananimonsi ni myaka amakumi yani (840), walinji na wana wanji awonsi na wanachi. 14Achaleka Kenani walinji ni myaka imyanda mufundikambali ni myaka ikumi (910); apano afwa.
15Walanga pano Mahalalele wawa ni myaka amakumi mutanda ni myaka yisano (65), apapa Yaredi. 16Pansizi ya nkwatwa yakwe Yaredi Mahalalele walinji ni myaka imyanda kananimonsi ni myaka amakumi yatatu (830), walinji na wana wanji awonsi na wanachi. 17Achaleka Mahalalele walinji ni myaka imyanda kananimonsi ni myaka amakumi mufundikambali na yisano (895); apano afwa.
18Walanga pano Yaredi wawa ni myaka umwanda wonga ni myaka amakumi mutanda na yiwili (162), apapa Enoki. 19Pansizi ya nkwatwa yakwe Enoki, Yaredi walinji ni myaka imyanda kananimonsi (800), walinji na wana wanji awonsi na wanachi. 20Achaleka Yaredi walinji ni myaka imyanda mufundikambali ni myaka amakumi mutanda na yiwili (962); apano afwa.
21Walanga pano Enoki wawa ni myaka amakumi mutanda ni myaka yisano (65), apapa Metusela. 22Pansizi ya nkwatwa yakwe Metusela, Enoki wakonkanga Leza imyaka imyanda yitatu (300), walinji na wana wanji, awonsi na wanachi. 23Achaleka Enoki walinji ni myaka imyanda yitatu ni myaka amakumi mutanda na yisano (365). 24Enoki akonka Leza; asowa na pano walyata, amuno Leza wamusenzile.
25Walanga pano Metusela wawa ni myaka umwanda wonga ni myaka amakumi kananimonsi na munenulambali (187), apapa Lameki. 26Pansizi ya nkwatwa yakwe Lameki Metusela walinji ni myaka imyanda munenulambali ni myaka amakumi kananimonsi na yiwili (782). Walinji na wana wanji awonsi na wanachi. 27Achaleka Metusela walinji ni myaka imyanda mufundikambali ni myaka amakumi mutanda na mufundikambali (969); apano afwa.
28Walanga pano Lameki wawa ni myaka umwanda wonga ni myaka amakumi kananimonsi na yiwili (182), apapa umwana monsi, 29amwita izina ati, we Nowa, ati, Alitusansamusya ku milimo yakuzunkuntika kwa makasa yitu, wee alilima umusili nkani wuno Imfumu e Leza watifile. 30Pansizi ya nkwatwa yakwe Nowa, Lameki walinji ni myaka imyanda yisano ni myaka mufundikambali na yisano (595). 31Achaleka Lameki walinji ni myaka imyanda munenulambali mmyaka amakumi munenulambali na munenulambali (777); apano afwa.
32Walanga pano Nowa wawa ni myaka imyanda yisano (500), apapa Shem, Ham nu Jafeti.
Արդեն Ընտրված.
Intaliko 5: WWN82
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Chinamwanga Bible © United Bible Societies, 1981.