Matie 3

Zään Badisö ci Laagɔwälɩ

(Makö 1.2‑8; Lukö 3.1‑6; Zään 1.19‑28)

1'Tänyɩ ‑kʋ ‑lɔɔ 'nɩ Zään Badisö ‑kʋ bhä ‑mɔɔ Zudee' 'popie 'mnö, 'nɩ ɔ pä bhä wälɩ, 2ɔ lä a 'cɩcɩ anyɩa' nʋnʋgbɩɩ ‑mä Laagɔɔ' 'Leyiduu' yi‑tänyɩɛ yä yëku 'mɛ! 3Zään Badisö nä, ɔmɔɔ 'plɔfɛtɩ Ezayii sä bhlä nynä

Nyɩkpɔ woo ‑mɔɔ 'popie 'mnö 'nɩ

Ɔ ci nynä ‑mä,

A göglä Kwlienyɔɔ' ‑dʋdʋkʋ ‑yä

A gëë ɔɔ' ‑blɔɔ 'yii! # 3.3 Ɩ bha Eza 40.3.

4Zään ‑plä bhä mnɛku‑kotu 'nɩ ɔ ‑nɛɛ bhä mnɛku‑bɛtʋ 'mnö. Ɔ lü bhä ‑kɔkɔnʋkpö, 'nɩ ɔ mɛɛ bhä ‑nogokpü. 5'Nɩ Zolizalɛmʋduu' ɩyä Zudee‑bhlɩɛ 'mnö ɩyä Zludɛɛ‑nyie yëkuu' nyɩkpaa 'fɩɩn, wa yinöɔ bhä 6'nɩ wa zɛɛ bhä waa' nyenyii' ‑za. 'Nɩ ɔ 'ŋʋnʋwa bhä ‑mɔɔ Zludɛɛ‑nyie 'mnö 'nyu 'wlu. 7‑Mä ɔ ni bhlä Falizɩɛnyʋa ‑yä Sadisɩɛnyʋa 'yi 'nɩ wa yio bhlä yëku 'nyu 'wlu 'ŋʋ kää nä, kɔ ‑sonʋwa, ɔ lä anyɩ, ‑bhoomnä‑nyɩkpanyɩ‑! ‑Ɔ ‑sonö'anyɩ bhä ‑pɛɛ nynä ‑mä, a ‑guu Laagɔɔ' gbʋgblɛylʋʋ? 8Anyɩa' nʋnʋgbɩɩ 'mnö, a pana nynä ‑mä a yä 'cɩcɩ! 9A 'nä kʋ lä 'flɛ ‑lɔɔ, 'nɩ a 'kä ci nynä ‑mä ‑anyɩ, ‑a tötɔ‑ plöö‑ lä Ablaamʋ! Kä n mʋ'anyɩ yɩ soo ‑kää nynä ‑mä Laagɔ kä ‑waa nä, ʋ yi cɛkʋbhünö 'kʋ 'bhlü 'nɩ ʋ yi Ablaamʋʋ' 'yuë wlʋa. 10A ni ‑dobhɛɛ yä wɛzä suu 'mnö 'ŋʋ. Kɛ 'kʋ ylä sikplii 'kʋ ‑sä! Suu' lʋʋ‑ tlʋ ‑wʋ lä 'bhü 'nänö nä, wa yiu 'kʋ ‑döö 'nɩ wa yiu ‑kosuu' 'ŋʋ. 11‑Amʋ nä, kä n ŋʋ'anyɩ lä 'nyu 'wlu nynä a 'kä anyɩa' gbenyenyii 'fɩɩn 'yi ‑taa. Mä nyɩkpɔɔ‑ yi'i lä klë nä, ɔ ‑kä 'tɛtɩ 'nɩ ɔ ‑zi'i. Nn' ‑wʋ 'kʋ ‑ŋwa nynä n 'tɔsɔ sää 'titi ɔɔ' 'süü 'bhliye. Ɔmɔ nä, Kplɔɔkplɔɔ‑wugɔ ‑yä ‑kosu 'sɔ ɔ 'kanyɩ lä 'wlu 'ŋʋ. 12Ɔ bhɛɛ‑ ɔɔ' bɩtɛɛ ‑yä ɔ 'kä 'mʋ poo, ɩyä flɩɩ ‑yä 'yʋʋ 'sɔ, ɔ 'kɩ ‑säsä. 'Yʋʋ, ɔ 'kʋ wëlüklüü' 'ŋʋ, ɩyä flɩɩ, ɔ 'kɩ ‑kosuu' 'pä ‑yä ɩ 'kä si. ‑Lɔɔ' ‑kosuu nä, ʋʋ' ‑lä 'kɔɔn ŋomo.

Zään Badisö ŋʋʋ‑ Zozii 'nyu 'wlu

(Makö 1.9‑11; Lukö 3.21‑22; Zään 1.29‑34)

13'Tänyɩ ‑kʋ ‑lɔɔ 'nɩ Zozii ‑bha Galilee' 'nɩ ɔ yi Zludɛɛ‑nyie yëku yi ‑yä Zään 'kɔ 'nyu 'wlu 'ŋʋ. 14Zään ‑wʋ 'fɩa ŋoo. Zään lä ‑mɔɔ gä'ä lä 'nyu 'wlu 'ŋʋ nä, ‑mɔɔ ci nynä ‑mä ‑amʋʋ‑ ‑lä 'ŋʋ‑ʋ 'nyu 'wlu ‑a! 15Zozii lä ‑mɔɔ ‑lä ŋʋ'ʋ 'nyu 'wlu! Sɔɔ ɩ ‑ŋwa lä 'kʋ nynä ‑mä a nʋ 'Bäɔɔ lebhee. Zozii cii‑ ylä sɔɔ nä, kä Zään ŋoo yɩ. 16‑Mä 'tänyɩɛ 'mnö ɔ ŋʋʋ‑ lä Zozii 'nyu 'wlu 'nɩ Zozii ‑bha ylä 'nyiglu nä, kä ‑laagɔɔ' ‑känöɔ 'klʋ, 'nɩ Laagɔɔ' 'Wugɔɔ yio 'kʋ kwlii. Ʋ kwlinöɔ‑ 'kʋ nynä 'kpaakpu. 17'Nɩ nuwälɩ ‑ghlää ‑laagɔɔ' 'nɩ ɩ cii‑, ɩ lä ‑nɔnɔ, ɔmɔɔ‑ plöö‑ lä 'naa ‑Wawayuo! Kä ɔɔ' plɛkʋ mɛnö'ö kpänyɩ!

Արդեն Ընտրված.

Matie 3: god

Ընդգծել

Կիսվել

Պատճենել

Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք

Իմացեք ավելին GOD - u2-ի մասին

Matie 3

Աստվածաշնչի հայտնի հատվածներ
Matie 3
-ից

Լսել Matie 3

Աստվածաշունչ:

Godié

Տարբերակ: GOD - u2 - god

Matie 3

Matie 3

Աստվածաշնչի հայտնի հատվածներ Matie 3-ից

Լսել Matie 3

Աստվածաշունչ:

Godié

Տարբերակ: GOD - u2 - god

Matie 3

Աստվածաշնչի հայտնի հատվածներ
Matie 3
-ից