मत्ती 1

यीसू गो वंस

(लूका 3:23-38)

1यीसू मसी गी पीढी इंया चाली है। अबरहाम ऊं दाऊद अर दाऊद ऊं यीसू।

2अबरहाम गो बेटो इसहाक अर इसहाक गो बेटो याकूब पैदा होयो। फेर याकूब ऊं यहूदा अर बिंगा भाई पैदा होया। 3यहूदा गा बेटा फिरिस अर जोरह हा, आंगी मां गो नाम तामार हो। फिरिस गो बेटो हिसरोन हो। हिसरोन ऊं एराम पैदा होयो। 4एराम अम्मीनादाब गो पिता हो अर अम्मीनादाब ऊं नहसोन अर नहसोन ऊं सलमोन पैदा होयो। 5सलमोन ऊं बोआज पैदा होयो, बोआज गी मां गो नाम राहाब हो। बोआज अर रूत ऊं ओबेद पैदा होयो। ओबेद ऊं यिसै पैदा होयो। 6अर यिसै ऊं राजा दाऊद पैदा होयो।

अर दाऊद ऊं सुलेमान पैदा होयो, अर झिको बिं लुगाई ऊं पैदा होयो बा पेलां उरियाह गी घराळी ही। 7सुलेमान ऊं रहबाम पैदा होयो अर रहबाम ऊं अबियाह पैदा होयो अर अबियाह ऊं आसा पैदा होयो। 8आसा ऊं यहोसाफात पैदा होयो, यहोसाफात ऊं योराम अर योराम ऊं उजियाह गो जन्म होयो। 9उजियाह ऊं योताम पैदा होयो अर योताम ऊं आहाज अर आहाज ऊं हिजिकिय्याह पैदा होयो। 10हिजिकिय्याह ऊं मनसेह पैदा होयो अर मनसेह ऊं आमोन पैदा होयो। फेर आमोन ऊं योसे पैदा होयो। 11फेर इसराएल गै लोगां नै बंदी बणागे बेबिलोण ले जावंता टेम, योसियाह ऊं यकुन्याह अर बिंगै भाईयां गो जन्म होयो।

12बेबिलोण जाणै गै बाद यकुन्याह सालतिएल गो पिता बण्यो अर फेर सालतिएल ऊं जरुबाबिल गो जन्म होयो। 13जरुबाबिल ऊं अबिहूद पैदा होयो। अबिहूद ऊं इल्याकिम गो अर इलयाकीम ऊं अजोर गो जन्म होयो। 14अजोर ऊं सदोक अर सदोक ऊं आखिम अर आखिम ऊं इलिहूद गो जन्म होयो। 15इलिहूद ऊं इलियाजर अर इलियाजर ऊं मतान अर मतान ऊं याकूब गो जन्म होयो। 16अर याकूब ऊं युसुफ पैदा होयो झिको मरियम गो घराळो हो अर मरियम ऊं यीसू पैदा होयो झिको मसी कुहायो।

17ईं तरियां अबरहाम ऊं लेगे दाऊद तांई चौवदा पीढी होगी। अर दाऊद ऊं बेबिलोण बंदी होण तांई चौवदा पीढी अर बंदी होगे बेबिलोण जाण गै टेम ऊं लेगे यीसू मसी तांई चौवदा पीढी होगी।

यीसू गो जन्म

(लूका 1:26-38; 2:1-7)

18यीसू मसी गो जन्म इंया होयो कै जद मरियम गो रिस्तो यूसफ ऊं होयड़ो हो। ब्या होणूं पेलां ई ठा लागग्यो कै पवितर आत्मा ऊं मरियम पेट ऊं है। 19पण युसुफ आच्छो आदमी हो अर बो मरियम गै बारै में लोगां नै बतागे बिनै बदनाम कोनी करणो चावै हो। जद बण चुपकै सी रिस्तो तोड़ण गी सोची। 20जद बो आं बातां नै सोचण ई लागरयो तो सपनै में बिनै सुरगदूत आ'गे केयो, ओ दाऊद गा बेटा युसुफ, मरियम नै बहु बणाण में ना डर। झिको टाबर बिंगै पेट में है बो पवितर आत्मा गो है। 21जद बो पैदा होवै तो तूं बिंगो नाम यीसू राखी क्यूंकै बो आपगै लोगां नै पापां ऊं मुकती दैयगो।

22ओ सारो कीं ईंखातर होयो कै प्रभु परमेसर गी बात बताण आळा नै झिको केयो बो पूरो होवै। 23“एक कुंवारी छोरी एक टाबर नै जन्म देवैगी बिंगो नाम इम्मानुएल#यसयाह 7:14 राखीज्यैगो,” झिकै गो मतलब है “परमेसर आपणै सागै है।”

24जद युसुफ जाग्यो तो बिंयाई करयो जिंया सुरगदूत बिनै केयो। बो मरियम नै आपगै घरे ल्यायो। 25अर जद तांई टाबर गो जन्म ना होयो जद तांई युसुफ बिंगै कनै कोनी गेयो। अर युसुफ आपगै बेटै गो नाम यीसू राख्यो।

Արդեն Ընտրված.

मत्ती 1: BGQ

Ընդգծել

Կիսվել

Պատճենել