APAN AQAO: 11
11
Babelon Gyebyu Zaung
1Sao qhid' re mug: myid geim" mae" byu qe wa myan" daja: za: jhau mung:- dao: re: daja: za: ci: ako". 2Yao: bam wa ba thug' shad' khyo du" lae" ye: zo" re Babelon mung" mae" pa: din" khyo joe" ye: mung: aimae yete" na: ako". 3Yao: bam wa lo geri: zhogam: kad' mung: qao sho' phad' gelang: ga: yao: cao: jho" ta" ako: Airumung: yao: bam wa zao nae" qhid' mae" zhogam: jham we' aijham re zaui" zham: to: nae" qhid' mae" nhai: daja: re qo" yu: ako". 4Yao: bam wa ngonhaung" yao" mang qo" nae" we' myid gaung byang" sho' mabyo: sin" lo" nae" qhid' mae" mug:gaung myhi: ra" gyebyu zaung bo: ra" vogaung: mo" dalam: zao: to' gelang: ga: ta" ako".
5Ailao" Asang wa ai: byu qere zao: to" ra" gyebyu zaung re we' vogaung: mo" re qu" nae" qhid' mae" gyo" li" ra". 6Amung: yao: wa ana" cebam damyu" za: ngad mung: yao: bam myan" daja: za: jhau: ako". Ceru wa yao: bam kad' genae" ra" mau" aqhid shi" ngad: ra". Dazab lao" yao: bam o: ra" ja: pe" rere: yao: bam qo" kad' li" genae". 7Ngonhaung" wa gyo" ye: mung: yao: bam yao: cao: majho" ba: gyo: genae" qhid' mae" yao: bam: myan" re lhau: lhag' pye' byid: gelang:- ga: ta" ra". 8Airumung: Asang wa yao: bam re mug: myid geim" khyo byo: sin" lo" nhao mung: yao: bam wa ai: vogaung: mo" zao: ra" mau" re thang: pye' ako". 9Ai: vogaung: mo" wa Babelon ga: mhang" ru ngad: ra"- pe"mung:ga"re ai: mae Asang wa byu alhab' mo, re myan" lhau: lhag' pye' byid: yang: ngad: ra". Ai: tau mae" yao: wa myid gaung: geim" khyo yao: bam re byo: sin" lo" nhao: ra".
Shem Nho Myid:zo: Qe
(1 Kho:kham mhomyi: 1.24-27)
10Cebam wa Shem nho: myid:zo: qe ngad: ako". Daqid shi: thao shid' zin kyo thao Shem apyad 100 zin ngad lao" yauggai zo: Arpakshad re myhung: ra". 11Ai: thao yao: wa 500 zin daui: na mung: gatau yauggai zo: myiqe: zo: qere: myhung: ra".
12Arpakshad wa apyad 35 zin ngad lao" yauggai zo: Shela re myhung: ra". 13Ai: thao yao: wa 403 zin daui: na mung: gatau yauggai zo: myiqe: zo: qere myhung: ra".
14Shela wa apyad 30 zin ngad lao" yauggai zo: Eber re myhung: ra". 15Ai: thao yao: wa 403 zin daui: na: mung: gatau yauggai zo: myiqe: zo: qere myhung: ra".
16Eber wa apyad 34 zin ngad lao" yauggai zo: Peleg re myhung: ra". 17Ai: thao yao: wa 430 zin daui: na mung: gatau yauggai zo: myiqe: zo: qere myhung: ra".
18Peleg wa apyad 30 zin ngad lao" yauggai zo: Reu re myhung: ra". 19Ai: thao yao: wa 209 zin daui: na mung: gatau yauggai zo: myiqe: zo: qere myhung: ra".
20Reu wa apyad 32 zin ngad lao" yauggai zo: Serug re myhung: ra". 21Ai: thao yao: wa 207 zin daui: na mung: gatau yauggai zo: myiqe: zo: qere myhung: ra".
22Serug wa apyad 30 zin ngad lao" yauggai zo: Naho re myhung: ra". 23Ai: thao yao: wa 200 zin daui: na mung: gatau yauggai zo: myiqe: zo: qere myhung: ra".
24Naho wa apyad 29 zin ngad lao" yauggai zo: Tera re myhung: ra". 25Ai: thao yao: wa 119 zin daui: na mung: gatau yauggai zo: myiqe: zo: qere myhung: ra". 26Tera wa apyad 70 zin ngad thao yao: wa Abram- Naho- Haran tao ho' nho: yao: pho" boe" lo: ra".
Tera Nho: Myid:zo: Qe
27Cebam wa Abram- Naho- Haran tao ho' yao: pho" Tera nho: myid:zo: qe ngad: ako". Haran wa Lod nho: yao: pho" ngad: ra". 28Haran wa yao: pho" daui: na shi" au:- Babelon mung" mae" yao" co' nyhab' vogaung: Ura mae shid: lo" ra". 29Abram wa Sarai re lo, xo' yu: ra". Naho wa Isakha nho: yao: pho" Haran nho: myiqe: zo: Milkha re lo, xo' yu: ra". 30Sarai wa zo: dau makhau ngad: ra".
31Tera wa Yao: zo: Abram- Haran nho: yauggai zo: ngad: ra" yao: myid: Lod- Abram nho: yham sang myhi"- yao" dau mo" Sarai bam re yao: we' daga" jhui: mung: Babelon mung" Ura vogaung: re to: co' mung: Khanan mung" khyo ye" lo" ra". Yao: bam wa- Haran khyo joe" sho' ye: mung: ai: mae yena: ako". 32Tera wa apyad 205 zin re shid: lo" ra".
Արդեն Ընտրված.
APAN AQAO: 11: LHCL
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Bible Society of Myanmar 2009