Jone 4
4
Jisasapa Samaria Tange Enda Dokopa Pii Leambino Doko
1Jisasame Jone ita minao endakali longo disaipolo nyepala, kaimbu pyakamailyamo lapae doko Parasi dupame silyaminona lao Jisasame masia. 2(Jisasanya disaipolo dupame kaimbu pyakamaiyaminopa, angi Jisasame kaimbu mende pyakamaiya naeya.) 3Dopa lao masetala, baa Judia yakinatala Galali pea. 4Baa Samaria-kaita pupenge jiamosa dokonya-kaita pea. 5#Jen 33:19; Jos 24:32Pupala yuu Samaria dokonya, taono Saikaa pao pyakamea. Taono Saikaa doko, Jekopeme baanya ikiningi Josepe yuu maiya dosa tengesa singi. 6Yuu dokonya Jekopenya endaki pete tombapae doko singi. Jisasa baa kaitini pao maka kaeyapala, kotaka etete dokonya endaki pete tombapae singi dosa petea.
7-8Peteamopa Jisasanya disaipolo dupa nee sambala taononya peami. Pateaminopa Samaria tange enda mende endaki pete tombapae dokonya endaki kamuala epea. Epeamopa Jisasame enda doko lamaiyoo, “Endaki mendatupa natoo kamuu dii” lea. 9#Esra 4:1-5; Nia 4:1-2Juu dupame Samaria tange dupanya penge dupa wandingima. Tenge dokonya, Jisasame dopa leamopa Samaria enda dokome yanu pyao, “Emba Juu dokome aipuma namba Samaria enda dakeme endaki natoo kamuu dii lelyepe?” lea. 10Dokopa Jisasame baanya pii yanu pyakamaiyoo, “Goteme dopale mende emba mee ditoo lao masilyamo doko embame masala naelyeno. Akali endaki kamuu dii lelyamo doko apimi lelyape lao masala naelyenoaka. Masipili doko, akali dokome endaki lete katenge doko dina lao tee lapinopa dipyalina” lea. 11Dopa leamopa enda dokome baa lamaiyoo, “Akali Andake, endaki kamualanya embanya penge mende naminalene-lamo. Endaki pete tombapae dake koko-wakana, embame endaki lete katenge doko anja-tae nyete? 12Naimanya yumbange Jekopeme endaki pete tombapae dake naima dia-pyaa. Baapi, baanya wanepi, sipisipipi, kaowapi dupa endaki dakenyaka neami-pyaana, embame baa ita minao kalyona lelyepe?” lea. 13Dokopa Jisasame baanya pii yanu pyakamaiyoo, “Endaki pete tombapae dakenya natami endakali dupa pitaka dee endaki nanu kaeyatami. 14Dopaka doko, nambame endaki maitopa natami endakali dupa tanga-tangapi dee endaki nanu nakaeyatami. Endaki nambame maitopa natami endakali dupa-kisa endaki doko pituu tumbatala lyoo ipao, endakali dupa lete etete katenge doko maitana” lea. 15Dopa leamopa enda dokome baa lamaiyoo, “Akali Andake, namba endaki nanu nakaeyao, dakenya kamuala naipaowaka pitopana, embame endaki doko namba kamuu dii” lea.
16Dokopa Jisasame enda doko lamaiyoo, “Embanya akalingi doko epena lanyala puu” lea. 17Dopa leamopa enda dokome yanu pyao, “Nambanya akalingi mende nakatengena” lea. Dokopa Jisasame baa lamaiyoo, “Embanya akalingi mende nakatengena lelyeno doko kiningi lelyeno. 18Wamba embame akali yungi nyii. Indupa akali pilyambino doko embanya akalingi daana, embame lelyeno doko kiningi lelyenona” lea. 19Dokopa enda dokome baa lamaiyoo, “Akali Andake, emba propeta mende-lamo lao nambame kandelyo. 20Naimanya yumbange dupame yuu manda dakenya katao Gote mambo piami-pyaa. Dopaka doko, endakali dupame Jerusalema katao mambo pyapengena lao nyakama Juu dupame lengemana” lea. 21Dopa leamopa Jisasame baa lamaiyoo, “Enda, nambanya pii lelyo dake kiningina lao embame masepe: Gii doko ipatamopa, manda dakenyapi, Jerusalemapi katao Takange doko mambo pyala naeyatami. 22Nyakama Samaria dupame angi doko nakandao mambo pingima. Dopaka doko, endakali pyoo nyingi doko Juu dupa-kisa epelyamo dokonyana, naima Juu dupame angi doko kandao mambo pingi. 23Takange doko angi mambo pingi endakali dupame Spirita dokopa, kiningi pii dokopa, dolapome Takange doko mambo pyapenge gii ipupenge doko indupa ipatelyamo. Endakali dopale dupame baa mambo pina lao Takange dokome kutao kalyamo. 24Gote baa spirita. Baa mambo pyatami dupame Spirita dokopa, kiningi pii dokopa, dolapome laminatambinopa mambo pyapengena” lea. 25Dokopa enda dokome Jisasa lamaiyoo, “Mesaeya doko ipatana lao nambame masilyo. Ipata gii dokopa, baame dupa pitaka naima panao langitana” lea. (Mesaeya doko Kraisa lengema.) 26Dokopa Jisasame enda doko lamaiyoo, “Embame Mesaeya lelyeno doko, emba-pipa pii lao pilyambino dokona” lea.
27Dopa lao peteambinopa, Jisasanya disaipolo dupa epeami. Ipupala, Jisasa enda dokopa pii lao pitalambini-lamo lao kandatala walu leami. Dopa petala dupanya mendaipi mendeme baa lamaiyoo, “Emba aki setao pitale? Aipuma enda dokopa pii lao pitalambipi?” lao tipa napiami. 28Dokopa enda dokome baanya endaki penge doko dosa setapala taononya pea. Pupala endakali dupa lamaiyoo, 29“Nambame pyoo petenge dupa pitaka akali mendeme langyomona, baa Kraisa dokope lao kanja ipupa” lea. 30Dopa leamopa endakali dupa taono doko yakinatala, Jisasa katea dokonya kanja peami.
31Endakali dokaita ipa naeyaminopa, disaipolo dupame Jisasa lamaiyoo, “Mana Lenge, nee napoko” leami. 32Dopa leaminopa Jisasame dokaita lamaiyoo, “Nambanya nee napenge silyamo dupa nyakamame masala naelyaminona” lea. 33Dopa leamopa disaipolo dupame nyakama-lapo laloo pyoo, “Endakali mendeme baa nee nena lao maiya ipata aipape?” leami. 34Dokopa Jisasame dokaita lamaiyoo, “Namba puu lea Akali dokonya masingili pyoo, kalai pyoo etasakamaipenge doko nambanya nee doko. 35‘Kana kitomende patatamopa, nee dupa wambu pitamopa manditamana’ lao nyakamame lengema. Salapape! Nambame nyakama dapa langilyo: Indupa nee wambu pimupa mandipenge jilyamona, nyakama lenge tapala kanjepa. 36Eenya nee wambu petae dupa mandyoo mau pingi doko baa yole nyoo, lete etete katenge dokonya dii dupa mandyoo mau pingi. Dopa pingi dokonya, ee pokenge dokopa, nee mandyoo mau pingi dokopa, dolapo lapota eteke pyapenge. 37Tenge dokonya, akali mendeme ee wai pokatelyamopa, akali waka mendeme mandyoo mau pingina lapae singi pii doko kiningi. 38Akali waka mendapuame lekeleke tao ee pokeami dupanya dii dupa nyakamame mandyoo mau pyala pupa leo. Wakamanya kalai petae dupanya nyakamame dii dupa mandyoo mau piamina” lea.
39Enda doko taono dokonya pupala endakali dupa lamaiyoo, “Nambame pyoo petenge dupa pitaka akali mendeme langyomona” lao, lao paneamopa, endakali Samaria tange longome enda dokonya pii doko sepala, Jisasa tungi piami. 40Dopa petala, Samaria tange dupa Jisasa katea dokonya pupala, baa nyakama-pipa katamana kaena lao kongo leaminosa, yuu gii lapoma baa dupa-pipa yuu dokonya kateami. 41Dokopa endakali longome apata baanya pii doko sepala, baa tungi piamiaka. 42Dopa petala endakali dupame enda doko lamaiyoo, “Embanya pii lapino doko iki naimame sepala baa tungi napilyamano. Indupa naimame baanya pii lapumu doko sepala, baa kiningi isa yuu dakenya endakali dupa pitaka Pyoo Nyepenge Kraisa doko-lamo lao masetala, baa tungi pilyamanona” leami.
Gapomanenya Kalai Akali Mendenya Ikiningi Nisiamo Doko
43Jisasa baa yuu gii lapoma Samaria katapala Galali pea. 44#Matyu 13:57; Make 6:4; Luku 4:24(Wamba Jisasame lao pituu, “Propeta mende baanya yuu dokonya kalyamopa, baa tata dupame baa anda-anda semaiya naengemana” lao, lao panea.) 45#Jone 2:23Nee andake nenge gii dokonya Galali tange dupa Jerusalema peaminopa, Jisasame kalai pia dupa pitaka kandeami dokonyana, baa pao Galali pyakameamopa, endakali dupame auu kaeyao lanyiami.
46 #
Jone 2:1-11
Dokopa endaki waene jina lea yuu Galali, taono Kena dokonya Jisasa dee epea. Epeamopa kiŋi dokonya kalai akali mendenya ikiningi doko Kapename dokonya yaina sia. 47Wane doko kumapenge joo siamopa, Jisasa baa Judia katao Galali ipamo lapae doko gapomanenya kalai akali dokome sia. Sepala baa Jisasa katea dokonya pupala, wane dokonya yaina doko mee jakamaiya lanao epena lao tee lea. 48Dopa leamopa Jisasame baa lamaiyoo, “Nyakamame mirakolopi, kalai paka pipaepi, dupa kanja naeyatamino doko, namba tungi napyatamina” lea. 49Dopa leamopa, kiŋi dokonya kalai akali dokome Jisasa lamaiyoo, “Akali Andake, nambanya wane doko kumala naelyamo dokopa, nisakatale yapa lanao ipupoko” lea. 50Dokopa Jisasame baa lamaiyoo, “Embanya wane doko saka paapomona puu” lea. Dopa leamopa, akali dokome pii doko kiningina lao masetala baa andaka pea. 51Lanao peamopa, kaitinisa baanya kalai akali mendapuame kandanyetala baa lamaiyoo, “Embanya wane doko saka pupyana” leami. 52Dopa leaminopa baame dokaita tipa pyoo, “Kiloko andukunya saka pupyape?” lea. Dopa leamopa dokaitame baa lamaiyoo, “Kuaka kotaka, 1 kiloko dokonya yonge itaita pipumu dokome baa yakinapyana” leami. 53“Embanya wane doko saka paapomona” lao Jisasame lamaiya gii etete dokonyaka baanya wane doko saka pupya-lumu lao takange dokome masia. Masetala baapi, baanya palupi, dupa pitakame Jisasa tungi piami. 54Jisasa baa Judia katao Galali ipupala, mirakolo dakeme lapo pyoo pia.
Արդեն Ընտրված.
Jone 4: Enga
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2023 Wycliffe Bible Translators, Inc. All rights reserved.