Matius 20
20
Rampeang tau ung si missaro i kinete: anggoroꞌ
1“Sàbaꞌ kadatuang suruga niala rampeang besa tau ung mangampu kinete: anggoroꞌ. Mingkakaꞌ i miluhengi missòhong mao mangokaꞌ tau ung mingkamaꞌa i kinete: anggoroꞌna. 2Tòna sikàtui‑mi se sola: tau ung mingkamaꞌ ti saro sangàlo dea‑mo besa seeng peraꞌ, na suo:‑mo mingkamaꞌ‑i se. 3Kira-kira mulummu: tumukaꞌ kùlaꞌ, ampunna kinete: to missòhong pole, pang mangita pira-pira tau ung lonna-lonna pai pasaꞌ. 4Musuana‑mi mao i tau to‑i se teꞌ, ‘Nao: se mingkamaꞌ i kinete: anggoroꞌku. U ku bayaꞌa dosse: saro ung sipatu:.’ 5Lumanna‑mi se.
Na làsuku kùlaꞌ pang mulummu: ho sumòloꞌ kùlaꞌ, ampunna kinete: to missòhong pole pang mampukauꞌ ung sibali. 6Pang kira-kira sassonnoꞌ‑rai: ti kùlaꞌ, missòhong kang ho pang mangita ara kang tau ung si lonna-lonna. Na kutikìna‑mi teꞌ, ‘Aka pu u lonna-lonna se teng i ante na ìsiꞌ àlo?’
7Na sùmui‑i se teꞌ, ‘Tiꞌ hari:‑da tau ung mampupingkamaꞌ‑kang.’
Musuana‑mi ti ampunna kinete: to teꞌ, ‘Baꞌ nao: dosse: ho mingkamaꞌ i kinete: anggoroꞌku.’
8Mangkonai:‑mo makarinning, ampunna kinete: to musua: mao i mandoroꞌna teꞌ, ‘Hàngo‑mi se ti tau ung mingkamaꞌ pang bayaꞌ ti sarona‑i se, na rara nai tau ung tampakàna mintama deaꞌ mao i tau ung parrara mintama.’ 9Bùruꞌna‑mi se ti ung marrara mingkamaꞌ nai sassonnoꞌ kùlaꞌ. Pantang‑i se mantarima besa seeng peraꞌ. 10Bùruꞌna‑mi dasse: ho ti ung mingkamaꞌ nai miluhengi. Na konai:‑i se làbi bosoa na tarima‑i se, pambàtiꞌ pantang‑i dasse: ho teng nihengi‑ing besa seeng peraꞌ.
11Hampoꞌ tòna mantarima‑i se sarona, mutuntu:‑i se pàli i ampunna kinete: teꞌ, 12‘Tau ung si bùruꞌ tampakàna, sanjaang‑i teng mingkamaꞌ, u pasibalia‑do mambayaꞌ‑kang ung na ìsiꞌ àlo mingkamaꞌ pang na làtang kùlaꞌ?’
13Na sùmuinna‑mi ampunna kinete: to mao i besanna‑i se teꞌ, ‘Hang masala:‑kaꞌko matung Mantàdi:. Ta sikàtui‑mo le ti saro sangàlo, besa seeng peraꞌ. 14Ala‑mido ti saromu pang u malai‑ko. Ku manghengi‑ing saro mao i tau ung tampakàna mintama sibali ti ung ku hengi‑ingko se, sàbaꞌ ìnang malemungku‑ko. 15Hang mading‑kaꞌko naꞌ mampukauꞌ siulaꞌ pampuinahangku mao i aka ti ung ku ampui? dea‑raka u mapaꞌ se sàbaꞌ ku malemu.’ ”
16Musuana‑mi ti Yesu mao i pasikolaNa teꞌ, “Mène:‑da ho to ti tau ung i hoiꞌ i latenna, miluhalia ung iaho, pang ung iaho miluhalia ung i hoiꞌ.”
Ung kapintàlung Yesu mampupiìsang kamaparriꞌangNa
(Mrk. 10:32-34, Luk. 18:31-34)
17Tòna làngang mao i Yerusalem ti Yesu, i pallummuna dalang Na hàngo sala: ti sampulo: idua pasikolaNa. MusuaNa‑mi mao i dei: se teꞌ, 18“Pisàdìngi‑ko se! I latenna ta làngang se mao i Yerusalem. I anto Anaka Tulino nipeheaa mao i kapala-kapala imang pang ung si manarangna i aluku. Na kasitoroꞌii: se teꞌ parallu nipatei, 19màli: na pehei: se mao i tau ung dang dea tu Yahudi. Na pengei: se, nisasa: pang nipai oròngang. Hampoꞌ àlo ung kaitàlu, nipatuhoa pole.”
Pampalaunna inanna Yakobus pang Yohanes
(Mrk. 10:35-45)
20Nai anto bùruꞌ ti bahinena Sebedeus sola: ana-anakàna mao i Yesu, mukalimuntuꞌ tumunnuku i heleꞌNa mingkalemu. 21Na kutikìna‑mi Yesu teꞌ, “Aka ti ung nu kapelai:?”
Na sùmui bahine to teꞌ, “Ku kapelai: ti idua anakàku tee mesong, besa mui konang, besa mui kairimMu ìna U mesong‑mo i kadatuangMu.”
22Hampoꞌ na sùmui Yesu teꞌ, “Ha u ìsang‑ko se aka ti ung parallu u pukauꞌ, mangking u korai:‑ko se aka ti ung nu palau se. U helaa se naꞌ menung nai enùngangKu, dea‑mo mangola: kamaparriꞌang ung Ku olaa‑mo?”
Na sùmui‑i se idua anaka to teꞌ, “Ayyo, ki helaa.”
23Musuana‑mi ho pole ti Yesu teꞌ, “Ìnang u menùnga se nai enùngang kamaparriꞌang ung Ku enùnga. Hampoꞌ mampatu: isai ti ung mesònga mui konang pang mui kairingKu, hang Koi:‑kaꞌko ti ung mampatantu to. Esòngang dea to nihengiing mao i isai-sai ti ung na patantu‑mo AmangKu.”
24To na sàding‑mi se sampulo: pasikolana Yesu to aka to, lalaka‑mi se mao i idua ung mantaladi: to. 25Hampoꞌ na hàngo nasang Yesu ti pasikolaNa pang musua: teꞌ, “U ìsang‑mo se teꞌ ampu parenta i lino ung dang mangìsang Puang mampène: kaunang rayaꞌna. Pang mène: ho ti tau ung iaho i àlaꞌna‑i se, lupu ho mambeloꞌ-beloꞌ tau. 26Hampoꞌ hang mading‑i u mène: se to! Sangadinna, isai-sai nai àlaꞌmu se ti ung mangkapelai: miluhali ung iaho i heleꞌna Puang, parallu mapangae: mène: pangkoring. 27Pang isai-sai ti ung mangkapelai: miluhali nipiama: i àlaꞌmu se, parallu miluhali mène: kaunangmu se. 28Mène:‑da ho to ti Anaka Tulino. Hang mai‑Ida mangking nilayani, sangadinna bùruꞌ‑Da mai mulayani pang mampehea pinanahanNa mangking mantoloꞌ boso: tau nai dosanna.”
Yesu mampumatalete: idua tau ung buta
(Mrk. 10:46-52, Luk. 18:35-43)
29Tòna mampalii:‑mi se lipu: Yeriko ti Yesu pang pasikolaNa, boso: tau mangulaꞌ‑I. 30Pang ara idua tau ung buta, ung tuho: kapalau-lau, mesong i minanaꞌ dalang. To na sàding‑mi se nai tau teꞌ liung ti Yesu, mikakoang‑i se teꞌ, “O Tuang, Hatiꞌna Daud, pulemu‑kangka!”
31Tau boso: i anto marràho‑i se mangking mimmànaꞌ. Hampoꞌ sa: na pilabu:-labuina‑i se sule: ti mikakoang teꞌ, “O Tuang, Hatiꞌna Daud, pulemu‑kangka!”
32Tontona‑mi ti Yesu pang manghàngo‑i se. Na kutikìna‑mi Yesu teꞌ, “Aka ti ung nu kapelai: se Ku pukauꞌ matung?”
33Na sùmui‑i se teꞌ, “Ki palea:‑ka paita Tuang.”
34Malemu ti Yesu mao i tau to‑i se. Na tokaꞌna‑mi Yesu ti matanna‑i se. Pang tempo dea ho teng to, paita‑mi se. Mangulaꞌna‑mi se Yesu.
Արդեն Ընտրված.
Matius 20: skx
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք