Matius 22
22
Rampeang pampukauꞌ kasilopàkang
(Luk. 14:15-24)
1Yesu musua: kang ho mao i dei: se i laling rampeang teꞌ, 2“Kadatuang suruga niala rampeang besa datu: ung mampatokana pampukauꞌ kasilopàkang mao i anaka muanena. 3Datu: to mampantuyu pangkoring-pangkoringna mao manghàngo tau ung si nihàngo‑mo i pampukauꞌ to, hampoꞌ haranna‑i se ung mio: bùruꞌ.
4Na pantuyunna‑mi ho pole datu: to ti pangkoring-pangkoringna sintàna: mampadeaꞌ‑ing se to ung si nihàngo moa teꞌ, ‘Tokana‑mo ti pampukauꞌ. Sapiꞌ laki pang ana-anaka sapiꞌ ung si malompo: nirereꞌ‑mo. Tokana‑mo nasang. Hàme:‑mo se!’ 5Hampoꞌ tau ung si nihàngo to mampakaliung teng. Ara ti ung mao i kinetena, ara ti ung mao i kamaꞌangna àlo-àlo. 6Ara ho ti ung mantingkang pangkoringna to, na panaꞌi, pang ara ho ung na patei. 7Lalakàna‑mi ti datu: to, pang mampantuyu pasukangna mao mampatei tau ung si papateang to pang massohe lipuna‑i se.
8Ladu to, musua: mao i pangkoring-pangkoringna teꞌ, ‘Pampukauꞌ kasilopàkang tokana‑mo, hampoꞌ mao i tau ung si nihàngo to, hang sipatu:‑i hura:. 9Deanna‑mo to, nao: se pai dalang pang iaka-aka pang hàngo‑ko se mai i pampukauꞌ kasilopàkang tee ti tau ung nu korai: se.’ 10Lumanna‑mi se ti pangkoring-pangkoring to pang mangkobu:‑i se nasang tau ung na korai:‑i se pai dalang pang iaka-aka, belo: tau ung si mahulo:, belo: tau ung si làsi:, dea pùna pùno: tubùruꞌ ti kaoneang pampukauꞌ kasilopàkang to.
11Tòna mintama‑mo ti datu: mantadoꞌi tubùruꞌna, mangita besa tau ung dang mipakeang pampukauꞌ. 12Na kutikìna‑mi teꞌ, ‘O Mantàdi:, mangaka‑do pu u hela mintama mai dang mipakeang pampukauꞌ?’ Hampoꞌ mimmànaꞌ teng ti tau to. 13Musuana‑mi ti datu: to mao i pangkoring-pangkoringna teꞌ, ‘Pungu‑ko se ti kokoꞌna pang kangkangna tau tee, pang pitibe‑ko se mao i sòhongna, i kamakarinnìngang. I anto mantalihuhua kumàraka pang sikùriki ti sisena.’ ”
14Na pakapodiꞌ Yesu ti rampeang to mène: tee, “Boso: ti ung nihàngo, hampoꞌ sangkìdoꞌ‑i ti ung nipirarai:.”
Tau ung mampukàrang Yesu mingkutiki teꞌ, “Parallu naꞌ mambayaꞌ sima?”
(Mrk. 12:13-17, Luk. 20:20-26)
15Malainna‑mi se ti tu Parisi pang silàha:-làha: mangokaꞌ dalang marràsang‑ing Yesu nai pingkutìkang. 16Na pantuyu ti pira-pira pasikolana‑i se sola: tau ung mui Datu: Herodes mingkutiki mao i Yesu teꞌ, “O Tungguru, ki ìsang teꞌ Ta mahulo: pang mahulo: mupaturo: mampatu: pampuinahanna Puang mao i tau. Hang mariaꞌ‑Ke mao i isai-sai sàbaꞌ hang mampasàrilaing‑Ke tau.*#22:16 Tau mui Datu: Herodes massannaꞌi moa teꞌ parallu mambayaꞌ sima mao i Kaisar, hampoꞌ tassereꞌna tu Parisi mao i atorang-atorang Musa mangkonai: moa teꞌ, “Sala: ti mambayaꞌ sima mao i datu: i sòhongna ung mangkuasai‑ke.” Jadiꞌ, sikeboꞌi ti pantangaꞌna‑i se idua kalompoꞌ to. 17Deanna‑mo to, konai:‑ingnang, manuruꞌ atorang alukùta, tongang naꞌ ni mambayaꞌ sima mao i Kaisar? hari:‑rika.”
18Hampoꞌ na ìsang Yesu ti matengkona pingkutikìna‑i se.*#22:18 Patuna pingkutìkang dea‑mo, ìna misùmu “Ayyo” ti Yesu, mamburerei konaNa miluhali nabi i heleꞌna tu Parisi pang tau boso:. Pang, ìna misùmu “Hari:,” mading na tannaꞌ mui Datu: Herodes moa teꞌ gorombolang‑Da. Na sùmuinna‑mi teꞌ, “E tau ung belo: i rupa teng, aka ti sàbaꞌna u Mi kakaꞌi se? 19Moi mène: to, èneꞌ‑ingNaꞌ se ti seeng ung nu pambayaꞌ‑ing se sima!” Na henginNa‑ming se ti besa seeng peraꞌ. 20Mingkutikìna‑mi ti Yesu moa teꞌ, “Gambaraꞌna pang konana isai ti tee?”
21Na sùmui‑i se teꞌ, “Kaisar.”
Na oanna‑mi Yesu teꞌ, “Baꞌ, ìna mène: to, hengi‑ing mao i Kaisar aka ti ung sipatu: mao i Kaisar, pang mao i Puang aka ti ung sipatu: mao i Puang.”
22Massàding aka to, mimàha‑i se pang malai mampalii: Yesu.
Tu Saduki mingkutiki kara-kara tuho: pole
(Mrk. 12:18-27, Luk. 20:27-40)
23Àlo dea ho teng to, pira-pira tu Saduki mao i Yesu mingkutiki mangking marràsang‑ing. (Tau to‑i se dea‑mo sallaoang pahang ung mangkonai: teꞌ tau ung mate hang tuhoi:‑da pole.) 24Na konai:‑i se moa teꞌ, “O Tungguru, Musa mangkonai:‑mo mène: tee, ‘Ìna muane mate pang hari: anakàna, mantàdina parallu mampubahine to ipaꞌna, mangking mampaara hatiꞌna mao i mantàdina to ung mate‑mo.’*#22:24 Ul. 25:5. Hele ho i Par. 38:8. 25Ara pummesa, i àlaꞌ-àlaꞌna ampeta, ara pitu tau ung mantaladi:. Anaka lihoa: kibahine, hampoꞌ hara‑mi anakàna, mate‑moda. Jadiꞌ, na palii:‑ing mantàdina ti bahinena to. 26Mantàdina to, hang pakala‑mi ara anakàna, mate‑moda ho. Mène: ho mao i anaka ung kaitàlu, pang tùrung deaꞌ mao i anaka ung kapitu. 27Tampàkang mate‑da ho ti bahine to. 28Jadiꞌ, ìna tempona nipatuho: pole ti tau ung mate, ummannaa nai àlaꞌna‑i se to ti kàle: muanena? Sàbaꞌ nai pitu‑i se mantaladi: to, lòsoꞌ‑mo mampubahine‑i.”
29Na sùmuinna‑mi Yesu teꞌ, “U sisa: dosse:. Ha u ìsang‑ko se tungka ti isinna Suraꞌna Puang pang kuasanNa. 30Sàbaꞌ tempona tau ung mate tuho: pole, hang sipubahine‑ida hura:, sangadinna tuho:‑i se mène: malaikaꞌ i suruga.
31Pang mampatu: nipatuhona pole ti tau ung si mate, ha u basa‑mo: se naꞌ aka ti ung na pusua: Puang matung? teꞌ, 32‘Koi:‑mo ti Puangna ampe-ampemu Abraham, Isak pang Yakub.’*#22:32 Kel. 3:6. Jadiꞌ, dea ti Puang, handei:‑Da Puangna tau ung mate, sangadinna Puangna‑Da tau ung tuho:.” 33Tau boso: ung massàding pipaturona Yesu to, mimàha tungka.
Parenta ung parallu tungka
(Mrk. 12:28-34, Luk. 10:25-28)
34Hampoꞌ to na sàding‑mi se tu Parisi teꞌ tu Saduki mimbosi: mannang na pukauꞌ Yesu, mukobuna‑mi se pole ti tu Parisi, màli: na lumai: se mangheleꞌi Yesu. 35Aranna‑mi besa nai àlaꞌna‑i se, dea‑mo ung manarangna i aluku, mangkakaꞌi Yesu nai besa pingkutìkang teꞌ, 36“Tungguru, umma ti parenta ung parallu tungka i laling atorang-atorang Musa?”
37Na sùmui Yesu moa teꞌ, “ ‘Pulemu‑i ti Puang, dea‑mo Puangmu, nai nasang isinna pinanahammu sola: nasang pantangaꞌmu.’*#22:37 Ul. 6:5. 38Dea‑mo to ti parenta ung parallu tungka. 39Pang parenta ung kaidua ung sibali to dea‑mo, ‘Pulemu‑i ti solamu*#22:39a solamu. Sua: Yunani sidungkuꞌmu. Tempona Musa mampadeaꞌ parenta te, mampatu: santuIsraelna pang tubùruꞌ ung leta: i àlaꞌ-àlaꞌna‑i se. Pantangaꞌna panitia mampatengka: sua: tu Padang dea‑mo moa teꞌ sua: solamu làbi sileo: mao i palleona to nai none: sua: santulinomu dea‑raka padammu. mène: u mampulemu kalaemu.’*#22:39b Im. 19:18. 40Nai idua parenta tee ti ung miluhali toaꞌna nasang atorang-atorang Musa pang Suraꞌ Nabi-nabi.”
Kasiumpuꞌangna Datu: Pipasalamaꞌ pang Daud
(Mrk. 12:35-37, Luk. 20:41-44)
41Tòna one:‑i se maang ti tu Parisi, mingkutiki ti Yesu mao i dei: se teꞌ, 42“Mangaka ti pantangaꞌmu se mampatu: Datu: Pipasalamaꞌ? Isai hatiꞌna ti to?”
Na sùmui‑i se teꞌ, “Hatiꞌna‑da Daud.”
43Musuana‑mi ti Yesu mao i dei: se teꞌ, “Ìna mène: to, mangaka ti Daud mangola: Pinanaha Malìsong hela mangkonai:‑I tuangna? tòna musua: teꞌ,
44‘Puang musua: mao i Tuangku teꞌ,
Mesong‑Ko mui konangKu,
deaꞌ Ku mampukauꞌ poni:-poniMu
one: i hoiꞌna palaꞌ kokoꞌMu.’*#22:44 Mas. 110:1. Sua: Tuang manturo: Datu: Pipasalamaꞌ.
45Jadiꞌ, ìna Daud miTuang mao i Datu: Pipasalamaꞌ to, baꞌ aka pùna hatiꞌnaa‑da ho teng Daud?”
46Hari: moi besa tau ung hela massùmui‑I. Pang na rara àlo to, hari: hura: ung harani mangkakaꞌi Yesu.
Արդեն Ընտրված.
Matius 22: skx
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Matius 22
22
Rampeang pampukauꞌ kasilopàkang
(Luk. 14:15-24)
1Yesu musua: kang ho mao i dei: se i laling rampeang teꞌ, 2“Kadatuang suruga niala rampeang besa datu: ung mampatokana pampukauꞌ kasilopàkang mao i anaka muanena. 3Datu: to mampantuyu pangkoring-pangkoringna mao manghàngo tau ung si nihàngo‑mo i pampukauꞌ to, hampoꞌ haranna‑i se ung mio: bùruꞌ.
4Na pantuyunna‑mi ho pole datu: to ti pangkoring-pangkoringna sintàna: mampadeaꞌ‑ing se to ung si nihàngo moa teꞌ, ‘Tokana‑mo ti pampukauꞌ. Sapiꞌ laki pang ana-anaka sapiꞌ ung si malompo: nirereꞌ‑mo. Tokana‑mo nasang. Hàme:‑mo se!’ 5Hampoꞌ tau ung si nihàngo to mampakaliung teng. Ara ti ung mao i kinetena, ara ti ung mao i kamaꞌangna àlo-àlo. 6Ara ho ti ung mantingkang pangkoringna to, na panaꞌi, pang ara ho ung na patei. 7Lalakàna‑mi ti datu: to, pang mampantuyu pasukangna mao mampatei tau ung si papateang to pang massohe lipuna‑i se.
8Ladu to, musua: mao i pangkoring-pangkoringna teꞌ, ‘Pampukauꞌ kasilopàkang tokana‑mo, hampoꞌ mao i tau ung si nihàngo to, hang sipatu:‑i hura:. 9Deanna‑mo to, nao: se pai dalang pang iaka-aka pang hàngo‑ko se mai i pampukauꞌ kasilopàkang tee ti tau ung nu korai: se.’ 10Lumanna‑mi se ti pangkoring-pangkoring to pang mangkobu:‑i se nasang tau ung na korai:‑i se pai dalang pang iaka-aka, belo: tau ung si mahulo:, belo: tau ung si làsi:, dea pùna pùno: tubùruꞌ ti kaoneang pampukauꞌ kasilopàkang to.
11Tòna mintama‑mo ti datu: mantadoꞌi tubùruꞌna, mangita besa tau ung dang mipakeang pampukauꞌ. 12Na kutikìna‑mi teꞌ, ‘O Mantàdi:, mangaka‑do pu u hela mintama mai dang mipakeang pampukauꞌ?’ Hampoꞌ mimmànaꞌ teng ti tau to. 13Musuana‑mi ti datu: to mao i pangkoring-pangkoringna teꞌ, ‘Pungu‑ko se ti kokoꞌna pang kangkangna tau tee, pang pitibe‑ko se mao i sòhongna, i kamakarinnìngang. I anto mantalihuhua kumàraka pang sikùriki ti sisena.’ ”
14Na pakapodiꞌ Yesu ti rampeang to mène: tee, “Boso: ti ung nihàngo, hampoꞌ sangkìdoꞌ‑i ti ung nipirarai:.”
Tau ung mampukàrang Yesu mingkutiki teꞌ, “Parallu naꞌ mambayaꞌ sima?”
(Mrk. 12:13-17, Luk. 20:20-26)
15Malainna‑mi se ti tu Parisi pang silàha:-làha: mangokaꞌ dalang marràsang‑ing Yesu nai pingkutìkang. 16Na pantuyu ti pira-pira pasikolana‑i se sola: tau ung mui Datu: Herodes mingkutiki mao i Yesu teꞌ, “O Tungguru, ki ìsang teꞌ Ta mahulo: pang mahulo: mupaturo: mampatu: pampuinahanna Puang mao i tau. Hang mariaꞌ‑Ke mao i isai-sai sàbaꞌ hang mampasàrilaing‑Ke tau.*#22:16 Tau mui Datu: Herodes massannaꞌi moa teꞌ parallu mambayaꞌ sima mao i Kaisar, hampoꞌ tassereꞌna tu Parisi mao i atorang-atorang Musa mangkonai: moa teꞌ, “Sala: ti mambayaꞌ sima mao i datu: i sòhongna ung mangkuasai‑ke.” Jadiꞌ, sikeboꞌi ti pantangaꞌna‑i se idua kalompoꞌ to. 17Deanna‑mo to, konai:‑ingnang, manuruꞌ atorang alukùta, tongang naꞌ ni mambayaꞌ sima mao i Kaisar? hari:‑rika.”
18Hampoꞌ na ìsang Yesu ti matengkona pingkutikìna‑i se.*#22:18 Patuna pingkutìkang dea‑mo, ìna misùmu “Ayyo” ti Yesu, mamburerei konaNa miluhali nabi i heleꞌna tu Parisi pang tau boso:. Pang, ìna misùmu “Hari:,” mading na tannaꞌ mui Datu: Herodes moa teꞌ gorombolang‑Da. Na sùmuinna‑mi teꞌ, “E tau ung belo: i rupa teng, aka ti sàbaꞌna u Mi kakaꞌi se? 19Moi mène: to, èneꞌ‑ingNaꞌ se ti seeng ung nu pambayaꞌ‑ing se sima!” Na henginNa‑ming se ti besa seeng peraꞌ. 20Mingkutikìna‑mi ti Yesu moa teꞌ, “Gambaraꞌna pang konana isai ti tee?”
21Na sùmui‑i se teꞌ, “Kaisar.”
Na oanna‑mi Yesu teꞌ, “Baꞌ, ìna mène: to, hengi‑ing mao i Kaisar aka ti ung sipatu: mao i Kaisar, pang mao i Puang aka ti ung sipatu: mao i Puang.”
22Massàding aka to, mimàha‑i se pang malai mampalii: Yesu.
Tu Saduki mingkutiki kara-kara tuho: pole
(Mrk. 12:18-27, Luk. 20:27-40)
23Àlo dea ho teng to, pira-pira tu Saduki mao i Yesu mingkutiki mangking marràsang‑ing. (Tau to‑i se dea‑mo sallaoang pahang ung mangkonai: teꞌ tau ung mate hang tuhoi:‑da pole.) 24Na konai:‑i se moa teꞌ, “O Tungguru, Musa mangkonai:‑mo mène: tee, ‘Ìna muane mate pang hari: anakàna, mantàdina parallu mampubahine to ipaꞌna, mangking mampaara hatiꞌna mao i mantàdina to ung mate‑mo.’*#22:24 Ul. 25:5. Hele ho i Par. 38:8. 25Ara pummesa, i àlaꞌ-àlaꞌna ampeta, ara pitu tau ung mantaladi:. Anaka lihoa: kibahine, hampoꞌ hara‑mi anakàna, mate‑moda. Jadiꞌ, na palii:‑ing mantàdina ti bahinena to. 26Mantàdina to, hang pakala‑mi ara anakàna, mate‑moda ho. Mène: ho mao i anaka ung kaitàlu, pang tùrung deaꞌ mao i anaka ung kapitu. 27Tampàkang mate‑da ho ti bahine to. 28Jadiꞌ, ìna tempona nipatuho: pole ti tau ung mate, ummannaa nai àlaꞌna‑i se to ti kàle: muanena? Sàbaꞌ nai pitu‑i se mantaladi: to, lòsoꞌ‑mo mampubahine‑i.”
29Na sùmuinna‑mi Yesu teꞌ, “U sisa: dosse:. Ha u ìsang‑ko se tungka ti isinna Suraꞌna Puang pang kuasanNa. 30Sàbaꞌ tempona tau ung mate tuho: pole, hang sipubahine‑ida hura:, sangadinna tuho:‑i se mène: malaikaꞌ i suruga.
31Pang mampatu: nipatuhona pole ti tau ung si mate, ha u basa‑mo: se naꞌ aka ti ung na pusua: Puang matung? teꞌ, 32‘Koi:‑mo ti Puangna ampe-ampemu Abraham, Isak pang Yakub.’*#22:32 Kel. 3:6. Jadiꞌ, dea ti Puang, handei:‑Da Puangna tau ung mate, sangadinna Puangna‑Da tau ung tuho:.” 33Tau boso: ung massàding pipaturona Yesu to, mimàha tungka.
Parenta ung parallu tungka
(Mrk. 12:28-34, Luk. 10:25-28)
34Hampoꞌ to na sàding‑mi se tu Parisi teꞌ tu Saduki mimbosi: mannang na pukauꞌ Yesu, mukobuna‑mi se pole ti tu Parisi, màli: na lumai: se mangheleꞌi Yesu. 35Aranna‑mi besa nai àlaꞌna‑i se, dea‑mo ung manarangna i aluku, mangkakaꞌi Yesu nai besa pingkutìkang teꞌ, 36“Tungguru, umma ti parenta ung parallu tungka i laling atorang-atorang Musa?”
37Na sùmui Yesu moa teꞌ, “ ‘Pulemu‑i ti Puang, dea‑mo Puangmu, nai nasang isinna pinanahammu sola: nasang pantangaꞌmu.’*#22:37 Ul. 6:5. 38Dea‑mo to ti parenta ung parallu tungka. 39Pang parenta ung kaidua ung sibali to dea‑mo, ‘Pulemu‑i ti solamu*#22:39a solamu. Sua: Yunani sidungkuꞌmu. Tempona Musa mampadeaꞌ parenta te, mampatu: santuIsraelna pang tubùruꞌ ung leta: i àlaꞌ-àlaꞌna‑i se. Pantangaꞌna panitia mampatengka: sua: tu Padang dea‑mo moa teꞌ sua: solamu làbi sileo: mao i palleona to nai none: sua: santulinomu dea‑raka padammu. mène: u mampulemu kalaemu.’*#22:39b Im. 19:18. 40Nai idua parenta tee ti ung miluhali toaꞌna nasang atorang-atorang Musa pang Suraꞌ Nabi-nabi.”
Kasiumpuꞌangna Datu: Pipasalamaꞌ pang Daud
(Mrk. 12:35-37, Luk. 20:41-44)
41Tòna one:‑i se maang ti tu Parisi, mingkutiki ti Yesu mao i dei: se teꞌ, 42“Mangaka ti pantangaꞌmu se mampatu: Datu: Pipasalamaꞌ? Isai hatiꞌna ti to?”
Na sùmui‑i se teꞌ, “Hatiꞌna‑da Daud.”
43Musuana‑mi ti Yesu mao i dei: se teꞌ, “Ìna mène: to, mangaka ti Daud mangola: Pinanaha Malìsong hela mangkonai:‑I tuangna? tòna musua: teꞌ,
44‘Puang musua: mao i Tuangku teꞌ,
Mesong‑Ko mui konangKu,
deaꞌ Ku mampukauꞌ poni:-poniMu
one: i hoiꞌna palaꞌ kokoꞌMu.’*#22:44 Mas. 110:1. Sua: Tuang manturo: Datu: Pipasalamaꞌ.
45Jadiꞌ, ìna Daud miTuang mao i Datu: Pipasalamaꞌ to, baꞌ aka pùna hatiꞌnaa‑da ho teng Daud?”
46Hari: moi besa tau ung hela massùmui‑I. Pang na rara àlo to, hari: hura: ung harani mangkakaꞌi Yesu.
Արդեն Ընտրված.
:
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք