Markus 12
12
Rampeang mampatu: pumpingkamaꞌ i kinete: anggoroꞌ
(Mat. 21:33-46, Luk. 20:9-19)
1Mupatidoluangna‑mi ti Yesu mampake rampeang mao i kapala-kapala imang, ung si manarangna i aluku pang ung si matua:-tuana tu Yahudi mène: tee, “Ara besa tau ung mallamùngi kinete: anggoroꞌ, màli: na hering‑i mimpaling. Ladu to, mangkekena‑mi hàlo: kaoneang mamparra anggoroꞌ pang mampatèdeꞌ tanno:. Ladu nai anto, na pupisaro ti kinete: to mao i pira-pira pumpingkamaꞌ, màli: na lumehoꞌ. 2Tòna tempona‑mo muratu, na pantuyu‑mo ti besa pangkoringna mao mantarima umpana. 3Hampoꞌ pumpingkamaꞌ to‑i se mantingkang pangkoring to. Na panaꞌinna‑mi se pang na suo:‑i se sumule: mubaba. 4Na pantuyunna‑mi ho pole ampunna kinete: ti besa pangkoringna. Hampoꞌ pumpingkamaꞌ mangkoyòngi bakàna, màli: na pasahu‑i se na pasianu mampakadia:-dia:‑i. 5Ampunna kinete: mampantuyu kang ho besa pangkoringna. Hampoꞌ na patei‑i se ti pangkoring to. Pang mène:‑mo teng to tùrung ti ung na pukauꞌ pumpingkamaꞌ to‑i se mao i boso: pangkoring sintàna:. Ara ti ung si nipanaꞌi pang ara ho ti ung si nipatei. 6Besa‑ràngi tau ti ung mading na pantuyu ampunna kinete:, dea‑mo anakàna ung na pulemu. Jadiꞌ, tampàkang na pantuyu ti anakàna to mao i pumpingkamaꞌ, sàbaꞌ na tangaꞌ teꞌ, ‘Manassa na sangadii: se ti anakàku.’ 7Hampoꞌ pumpingkamaꞌ to silàha:-làha: teꞌ, ‘Hoda‑mi o ti ung mampumanaꞌa o. Hàme:, patei‑ke se, mangking kìta: se ti ung mangala manaꞌna!’ 8Na tingkangna‑mi se, màli: na patei‑i se. Dea ti hatang puntinna na tibe‑i se teng mao i sòhongna kinete:.”
9Mingkutikìna‑mi ti Yesu moa teꞌ, “Ya:, aka ti ung na pukauꞌa ampunna kinete: to? Manassa bùruꞌa pang mampatei pumpingkamaꞌ to‑i se, màli: na hengi‑ing pumpingkamaꞌ sintàna: ti kinetena to. 10Ha u basa‑mo: se naꞌ ti sua: tee i Suraꞌna Puang? teꞌ,
‘Hatu ung na tibe puntamming
miluhali‑mo hatu ung kamìnang parallu.
11Nasang te, Puang‑da ti ung mampukauꞌ,
pang belo: tungka nihele.’*#12:10-11 Mas. 118:22-23.”
12Mambùruꞌ‑ing, ung si nipiama: i tu Yahudi to, mangokaꞌ dalang mantingkang Yesu, sàbaꞌ na ìsang‑i se teꞌ rampeang to, mampatu: dei: se. Hampoꞌ mariaꞌ‑i se mao i tau boso:. Jadiꞌ, malai‑i se mampalii: Yesu.
Tau ung mampukàrang Yesu mingkutiki teꞌ, “Parallu naꞌ mambayaꞌ sima?”
(Mat. 22:15-22, Luk. 20:20-26)
13Ara pira-pira tu Parisi pang tau ung mui Datu: Herodes nipantuyu lumao mangking mampakala Yesu mangola: pingkutìkang. 14Mai: se i Yesu pang musua: moa teꞌ, “O Tungguru, ki ìsang teꞌ Ta mahulo: pang hang mariaꞌ‑Ke mao i isai-sai. Sàbaꞌ hang mampasàrilaing‑Ke tau, sangadinna Ta mahulo: mupaturo: mampatu: pampuinahanna Puang mao i tau. Deanna‑mo to, konai:‑ingnang, manuruꞌ atorang alukùta, tongang naꞌ ni mambayaꞌ sima mao i Kaisar? hari:‑rika. Parallu naꞌ ta mambayaꞌ sima to? hari:‑rika.”
15Hampoꞌ na ìsang Yesu ti matengkona pingkutikìna‑i se. Na sùmuinna‑mi teꞌ, “Aka ti sàbaꞌna u Mi kakaꞌi se? Moi mène: to, hengi‑ingNaꞌ se besa seeng peraꞌ tu Roma, Ku hele‑i.” 16Na henginNa‑ming se ti besa seeng peraꞌ. Mingkutikìna‑mi ti Yesu moa teꞌ, “Gambaraꞌna pang konana isai ti tee?”
Na sùmui‑i se teꞌ, “Kaisar.”
17Na oanna‑mi Yesu moa teꞌ, “Baꞌ, ìna mène: to, hengi‑ing mao i Kaisar aka ti ung sipatu: mao i Kaisar, pang mao i Puang aka ti ung sipatu: mao i Puang.” Mimàha‑i se mampisàdìngi sùmunna Yesu.
Tu Saduki mingkutiki kara-kara tuho: pole
(Mat. 22:23-33, Luk. 20:27-40)
18Ara pira-pira tu Saduki mao i Yesu. (Tau to‑i se dea‑mo sallaoang pahang ung mangkonai: teꞌ tau ung mate hang tuhoi:‑da pole.) 19Mingkutiki‑i se mao i Yesu mangking marràsang‑ing moa teꞌ, “O Tungguru, Musa marronno: atorang tee mangking nitoroꞌi moa teꞌ, ‘Ìna muane mate pang hari: anakàna, mantàdina parallu mampubahine to ipaꞌna, mangking mampaara hatiꞌna mao i mantàdina to ung mate‑mo.’*#12:19 Ul. 25:5-6. 20Ara patidoluangna pitu tau ung mantaladi:. Anaka lihoa: kibahine, hampoꞌ hara‑mi anakàna, mate‑moda. 21Na pubahinena‑mi anaka ung kaidua ti ipaꞌna to, hampoꞌ ha pakala‑mi ara anakàna, mate‑moda ho. Mène: ho mao i anaka ung kaitàlu, 22pang tùrung deaꞌ mao i anaka ung kapitu. Tampàkang mate‑da ho ti bahine to. 23Jadiꞌ, ìna tempona nipatuho: pole ti tau ung mate, ummannaa nai àlaꞌna‑i se to ti kàle: muanena? Sàbaꞌ nai pitu‑i se mantaladi: to, lòsoꞌ‑mo mampubahine‑i.”
24Na sùmuinna‑mi Yesu moa teꞌ, “U sisa: dosse:, sàbaꞌ ha u ìsang‑ko se tungka ti isinna Suraꞌna Puang pang kuasanNa. 25Sàbaꞌ tempona tau ung mate tuho: pole, ha sipubahine‑ida hura:, sangadinna tuho:‑i se mène: malaikaꞌ i suruga. 26Pang mampatu: nipatuhona pole ti tau ung si mate, ha u basa‑mo: se naꞌ i Suraꞌ Musa ti ung mampatidolu làmaka ung kisura ung hùrong? I anto, Puang musua: mao i Musa moa teꞌ, ‘Koi:‑mo ti Puangna ampe-ampemu Abraham, Isak pang Yakub.’*#12:26 Kel. 3:6. 27Jadiꞌ, dea ti Puang, handei:‑Da Puangna tau ung mate, sangadinna Puangna‑Da tau ung tuho:. U sisa: tungka dosse:!”
Parenta ung parallu tungka
(Mat. 22:34-40, Luk. 10:25-28)
28Bùruꞌna‑mi ti besa ung manarangna i aluku tu Yahudi pang mampisàdìngi‑i se ung silàha: sitòkoꞌ. Na tangaꞌ teꞌ belo:‑mo ti pisùmunna Yesu mao i tu Saduki. Mingkutikìna‑mi mao i Yesu moa teꞌ, “Umma ti parenta ung parallu tungka nai nasang parenta?”
29Na sùmui Yesu moa teꞌ, “Ara idua. Parenta ung parrara dea‑mo, ‘Pisàdìngi‑ko se tu Israel! Puangta, besa‑ida. 30Deanna‑mo to, pulemu‑i ti Puang, dea‑mo Puangmu, nai nasang isinna pinanahammu sola: nasang kedomu.’*#12:29-30 Ul. 6:4-5. 31Parenta ung kaidua dea‑mo, ‘Pulemu‑i ti solamu mène: u mampulemu kalaemu.’*#12:31 Im. 19:18. Hari: hura: parenta sintàna: ung làbi parallu nai idua parenta to.”
32Musuana‑mi ti ung manarangna i aluku to mao i Yesu teꞌ, “Malleo: tungka Tungguru. Tongang‑da ìnang ti ung Ta konai: teꞌ, Puang besa‑i, pang hari:‑da Puang sintàna:. 33Pang tulino parallu mampulemu Puang, nai nasang isinna pinanahanna sola: nasang kedona, pang parallu ho mampulemu solana, mène: mampulemu kalaena. Làbi belo:‑da ti to, nai none: mampinomba‑ing nasang laoangna pimmalaꞌ mao i Puang.”
34Na hele Yesu moa teꞌ paìsang‑mo misùmu ti ung manarangna i aluku to, musuaNa‑mi moa teꞌ, “Sangkìdoꞌ kang u miluhalia‑mo taunna Puang i pinanahammu.” Ladu nai anto, hari: hura: ung harani mangkakaꞌi Yesu.
Yesu massalai: ung si manarangna i aluku tu Yahudi
(Mat. 22:41-46, 23:5-7, Luk. 20:41-47)
35Tempona one: maang i kaoneang Tamming Kabussùngang mupaturo: ti Yesu, mingkutiki moa teꞌ, “Mangaka ti ung si manarangna i alukùta hela mangkonai: teꞌ dea ti Datu: Pipasalamaꞌ, hatiꞌna teng Daud? 36pambàtiꞌ Daud kalenanna, mangola: Pinanaha Malìsong, musua: teꞌ,
‘Puang musua: mao i Tuangku teꞌ,
Mesong‑Ko mui konangKu,
deaꞌ Ku mampukauꞌ poni:-poniMu
one: i hoiꞌna palaꞌ kokoꞌMu.’*#12:36 Mas. 110:1.
37Daud kalenanna miTuang mao i Datu: Pipasalamaꞌ to. Jadiꞌ, aka pùna hatiꞌnaa‑da ho teng Daud?” Tau boso: ung one: i anto masannang tungka mampisàdìngi pipaturona Yesu.
38Mupaturo: kang ho ti Yesu mao i dei: se moa teꞌ, “Hele-hele‑ko se na? Hau mangulaꞌ ung na pukauꞌ ung si manarangna i aluku. Pampuroana‑i se ti mammulao-lao mampake juba pang nitabeꞌ pai pasaꞌ. 39Na puroa:‑i se ti i kaoneang-kaoneang ung nisangadi i tamming kapinombaang pang i pampukauꞌ. 40Mantangkasi:‑i se ung si pali: deaꞌ-deaꞌ marrampaꞌi rasangna. Pang musumbayang balanto-lanto, mangkapelai: pòteng mangking na ita tau. Deanna‑mo to, làbi matìmia ti hukungangna‑i se i hunni.”
Pinombanna bahine ung pali: ung mase-mase
(Luk. 21:1-4)
41Lumao mesong ti Yesu mangheleꞌi panti pangànaang pinomba pang mampumahele mangaka ti tau boso: mampatama doinna i laling panti to. Boso: tau ung si sukiꞌ mampatama doinna si maranga. 42Bùruꞌna‑mida ho ti besa bahine ung pali: ung mase-mase pang mampatama idua seeng bassi ung kàle: i hoiꞌna. 43Na hàngona‑mi Yesu ti pasikolaNa pang Na silàha:‑ing moa teꞌ, “Hele‑ko se mai! Matantu te ung Ku pusua: matung e teꞌ Ung pali: tee mampatama làbi boso: nai nasang tau ung mampatama doinna i laling panti pangànaang pinomba. 44Sàbaꞌ nasang‑i se miàdo: nai làbinna kaaraangna, hampoꞌ ung pali: tee, miàdo:‑da nai kakurangangna, nasang aka ung ara i dea, ung na paralluinna i laling katuhoangna.”
Արդեն Ընտրված.
Markus 12: skx
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք