Yohanese 10
10
O Yesusu Una gea o Domba ma Gogoana ma Rorahai
1O Yesusu wohiketero wotemo wato, “Naa duru tagou-goungu tinihingahu nginika, o nyawa abe o domba ma kurungaika yowohama ma, ko ma kurunga ma ngoraninoua yowohama, ona gea ko yodadiua o domba ma gogoana. Abe ona ma homoaino dika yoboa hiadono ma goronaika yowohama ho o nyawa gea yotobatohiki de yotobaora-ora. 2Masara una abe wowohama waniiki o kurunga ma ngorana, una gea o domba ma gogoana ma dutu. 3Ho ka de una woboa o kurunga ma ngoranino de womatengoli abe naga wogoana ma ngoranoka, una ka wibelenga o ngorana la wowohama dika o domba ma gogoana ma dutu gea. Ho de womahiadonika ma ngoranino de ai ilingi o domba gea iwigihene. De ahao to una ai domba ma romanga homoi-homoi wafetongo de homoi-homoi ikokiboaino de ahao wohihira-hira la wohihupu ma kurungaino. 4Ho ka de ai domba wohikokihupuoka de ahao wohihira-hira de ai domba mata-mata iwikokiniiki angamoi duru ai ilingi ihioriki. 5Masara ai domba gea nako o homoaino ma nyawa duru ko yaniikua. Angamoi ko ma gogoanua ho to ona manga ilingi ko ihiorikua ho ko yaniikua, ka iloara dika ma domba angamoi ko ihiorikua manga ilingi.” 6Hokogea o Yesusu wohiketero la wahitararono abe Una hoka onangua abe yoboa yotobabudi. Masara o Yesusu ai hiketero gea ko yataokua ma titi.
7Ho o Yesusu ka wotemohi onangika wato, “Naa duru tagou-goungu tinihingahu nginika, ma ngorana abe ka idadi o domba yowohama o kurunga ma goronaika, gea Ngohi naa. 8Ma dodihirainohi, Ngohi ko toboauahi de naga ona abe yoboa o guru abe yodotoko ko ma gou-goungua. Ho abe ma dihira yoguru hokogea, ona mata-mata yotobatohiki de yotobaora-ora. Masara o domba gea ko yahigihenua to ona manga ilingi. 9Ngohi naa ma ngorana, ho onagona dika Ngohino yoboa la yowohamika, ona gea ko yoboditoua. De ka idadi yohupu yowohama de yomamake o inomo. 10Masara nako ona gea yotobatohiki yoboaino la ato yotohiki de yotoma de yahibinaaha, gea dika to ona manga hininga ma dumutu. Masara Ngohi hokogenangua. Ngohi toboa la ahi domba-domba o wowango ma ngango yamake ka hiado-adonika. De manga wowangoka gea ka ihikaika yamake o hiowa ma hohailoa.”
11De o Yesusu ka womahiketerohi wato, “Ngohi naa o domba ma gogoana ma rorahai. De o domba ma gogoana ma rorahai gea Una abe womahidoaka ai wowango la ai domba ka yowango. 12Ma nako o nyawa abe iwihewa dika la o domba wagoana, una ka woara dika ma oraha wamake o fuhuku ma kaho iboaino, ho o domba gea wanoaika angamoi una o gogoana ko idodutua, iwihewa dika. Ho o fuhuku ma kaho iboa la o domba yagoli de o domba ma duduono gea ihikabarihoka. 13O nauru gea ka woara de ma domba wodogunoaika angamoi iwihewa dika de ma domba gea ko wodoraua.”
14“Ngohi naa o domba ma gogoana ma rorahai ho to Ngohi ahi domba duru tahikokioriki de ahi dombaoo ihihioriki Ngohi. 15Gea mimahikoriki Ngohi de ahi domba imaketero hoka o Baba de Ngohi duru mimahikoriki abe Una duru wohihioriki Ngohi de Ngohioo duru tihioriki o Baba. De gea ma titi hiadono tomahidoaka ahi wowango la ahi domba ka yowango. 16De to Ngohi ahi domba utuohi naga abe ko iwainohi o duduonino naa. De onangoo kiani taoino la to Ngohi ahi ilingi ihigihene. Ho ahao ahi domba mata-mata idadioka o duduono moi de manga gogoana Unangoo ka womatengo dika. 17De hokonaa ma titi hiadono ahi Baba duru wohidora, mangale tomahidoaka ahi wowango la ngaro hokogea tohonenge ma ahi wowango ka iwangoli. 18Ko moiua abe ihiora ahi wowango, ma, Ngohi dika ahi mau hiadono tomahidoaka. De angamoi to Ngohi ahi kuaha de ma buturungoka hiadono ka idadi takunu ahi wowango takelengauku jai-jai. De nagali abe ka takunu tohigilioli ahi wowango, de enangoo ma titi ahi kuaha de ma buturungoka. De gea taniiki todiai angamoi ahi Baba wohihibehehongoka Ngohino wato, ‘Hokonaa ahao Ngona nodiai.’”
19Ka de hokogea o Yesusu ai demo yoihene de o Yahudi ma nyawa duru yomaketeliliarokali. 20Abe naga manga ngoe yotemo ato, “Ou, Una gea iwikitokata, abeika, iwitogohangoka ho ngaro ibootohi hihigihene.” 21Masara naga utu yomaketetaere ato, “Iya gea, masara to Una ai demo imakohowono de abe yakitokata manga demo. De sarakia, ka idadi o tokata idiai hiadono o nyawa yorafioka de ka idadi yomahioriki? Koua, o tokata ko idadiua idiai hokogea.”
O Yahudi ma nyawa o Yesusu iwioluku
22De adonoka ma oraha o maata de o Yerusaleeme ma kotaka naga o rame-rame moioli ma romanga Ma Jou ai Tau Iwidingakoka ma rame-rame abe yomahohininga ma oraha Ma Jou ai Tau iwidingakoka Unangika ho ma titi gea ihirame-rame. 23Ho o Yesusu naga genangoka Ma Jou ai Tau ma honongaka abe ihiromanga o Saloomo ma punga, de genangoka wotagi-tagi o Yesusu. 24Ai dodagi ma goronaka de o Yahudi ma nyawa yamuruono naga iwimake ho yoboa de iwihigilolitoka. De ahao iwileha o Yesusika ato, “Adodoa ho naa ma dekanino Ngona nomihipongonohi ma titi ma gou-goungu abe Ngona igoungu o Mesia eko ko o Mesiaua? Kiani de ani demo ma gou-goungu nomihingahu ngomino la ufa hiadono miataoko ani demo ma titi ko itiaiua.”
25De o Yesusu wapaluhu onangika wato, “Ngohi tinihingahuoka masara ahi demo gea ngini ko nioigoua niangaku. Abeika o heheranga todiaioka, gea todiai duru imaketero hoka ahi Baba wato kiani todiai, ho o heheranga gea ihihitaanoka nginika. 26Masara gea ngini ko nioigoua niangaku angamoi ngini ko to Ngohiua ahi domba. 27Nako to Ngohi ahi domba ona gea duru tahikokioriki de ahi ilingi ona ihigihene ho ihiniiki Ngohi. 28De onangika tahikokidoakoka o wowango ka hiado-adonika ho ona duru ko idadiua yobinaaha. De angamoi ona naga ahi giama ma hoatoka ho ko moiua yakunu ihiora ahi giama ma hoatino. 29Angamoi Una abe wahidoaka ona Ngohino, Una gea ahi Baba. De to Unangohi ai buturungu imahilaku ho ko moiua yakunu iwiora ahi Baba ai giamoka abe womahitounangoka. 30De Ngohi naa de o Baba ngomi hoimoi.”
31Ka de o Yesusu ai demo gea yoihene wato, “Ngohi naa de o Baba ngomi hoimoi,” de o Yahudi ma nyawa gea ma moioli o hakaru yagorakino la ato iwihakaru hiadono wohonenge. 32Masara o Yesusu waleha onangika wato, “Ngohi naa tinihimatokokau o heheranga ma ngoe abe o Babaka de aino, ho ma titi ahi heheranga o kia hiadono niato kiani nihihakaru?”
33De ona yopaluhu ato, “Koua, ko ma titiua ani heheranga masara, ma titi ani ngelo angamoi Ngona duru o nyawa biaha dika ma gea ani demo hoka nomahidadi Ma Jou. Hokogea Ngona ningelo Ma Jou ho gea ma titi hiadono kiani nohonenge.” Hokogea ona ihititi la ato o Yesusu iwitoma.
34Masara o Yesusu wapaluhu wabole-bole onangika wato, “Sarakia, mode ko niohiningakaua Ma Jou ai Demo-demo moi abe naga ti ngini nia pareta ma bukuoka? Angamoi naga genangoka Ma Jou wotemo onangika abe yatobauru-urusu o nyawa, wato,
‘Ngohi tinihiromanga tato ngini naa o jou-jou.’ # 10:34
Higiriiri 82:6
.
35Hokogea Ma Jou ai Demo-demo itemoka ho nako naga abe Ma Jou wahiromanga wato ona o jou-jou, gea angamoi ai Demo-demo naga onangoka. De gea ko o ngeloua ma demo, ho done hokokia de ngini nihititi de niato Ngohi tingelo Ma Jou? Angamoi to Una ai demo moioo de ko iwa abe ko idadiua.”
36“Ho abeika nimafikirohi ma titi naa Ngohi. Abe Ngohi naa o Baba womadingakoka Unangika de wohihidingoto o duniauku naa. Ma, ka de tinihingahu tato, ‘Ngohi naa Ma Jou ai Ngofaka,’ de ngini niato tingelo Ma Jou. Adodoa ho nihitae niato tingelo Ma Jou? 37De nako Ngohi ko todiaiua gea abe ahi Baba dika ka idadi wodiai, gea ufa nihingaku Ngohino. 38Masara ngaro ngini ko nihingakua, ma nako todiai gea abe o Baba wohihikarajaanga, kiani niangaku ahi karajaangika gea. Abe ka idadi nimadotoko ahi karajaangino gea hiadono nihioriki abe Ngohi naga o Babaka de o Baba naga Ngohioka ho ngomi hoimoi.” 39Ka de o Yesusu ai demo gea ona yoihene de ma moioli ihitaili iwitaoko masara ngaro yomulaenge iwitaoko ma ka itodokanino de ka aiaho angamoi wogila-gilaka.
40De ahao o Yesusu wolio doka o Yorodani ma akere ma honongaika, ma ngiika abe ma dihira o Yohanese genangoka womahidodogumu de o nyawa waohiki, genangika woiki. Ho o Yesusu womahiadonika o ngioka gea de ahao genangoka wogogere. 41De ahao naga o nyawa ko manga ngoe yokokiboaino o Yesusu ai ngiino gea. De ona abe yoboaino yomakoketemo ato, “O Yohanese ko wodiaiua o dodunguu abe inahiheranga. Masara Una naa ai dodunguu ma ngoe ho duru igoungu o Yohanese ai demo mata-mata abe ma titi o Yesusu Una Ma Jou ai Mesia.” 42Hokogea manga demo de naga o nyawa manga ngoe genangoka abe iwingaku o Yesusika.
Արդեն Ընտրված.
Yohanese 10: MJDD
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Gereja Firman Allah, Yayasan Misi Masyarakat di Pedalaman
Yohanese 10
10
O Yesusu Una gea o Domba ma Gogoana ma Rorahai
1O Yesusu wohiketero wotemo wato, “Naa duru tagou-goungu tinihingahu nginika, o nyawa abe o domba ma kurungaika yowohama ma, ko ma kurunga ma ngoraninoua yowohama, ona gea ko yodadiua o domba ma gogoana. Abe ona ma homoaino dika yoboa hiadono ma goronaika yowohama ho o nyawa gea yotobatohiki de yotobaora-ora. 2Masara una abe wowohama waniiki o kurunga ma ngorana, una gea o domba ma gogoana ma dutu. 3Ho ka de una woboa o kurunga ma ngoranino de womatengoli abe naga wogoana ma ngoranoka, una ka wibelenga o ngorana la wowohama dika o domba ma gogoana ma dutu gea. Ho de womahiadonika ma ngoranino de ai ilingi o domba gea iwigihene. De ahao to una ai domba ma romanga homoi-homoi wafetongo de homoi-homoi ikokiboaino de ahao wohihira-hira la wohihupu ma kurungaino. 4Ho ka de ai domba wohikokihupuoka de ahao wohihira-hira de ai domba mata-mata iwikokiniiki angamoi duru ai ilingi ihioriki. 5Masara ai domba gea nako o homoaino ma nyawa duru ko yaniikua. Angamoi ko ma gogoanua ho to ona manga ilingi ko ihiorikua ho ko yaniikua, ka iloara dika ma domba angamoi ko ihiorikua manga ilingi.” 6Hokogea o Yesusu wohiketero la wahitararono abe Una hoka onangua abe yoboa yotobabudi. Masara o Yesusu ai hiketero gea ko yataokua ma titi.
7Ho o Yesusu ka wotemohi onangika wato, “Naa duru tagou-goungu tinihingahu nginika, ma ngorana abe ka idadi o domba yowohama o kurunga ma goronaika, gea Ngohi naa. 8Ma dodihirainohi, Ngohi ko toboauahi de naga ona abe yoboa o guru abe yodotoko ko ma gou-goungua. Ho abe ma dihira yoguru hokogea, ona mata-mata yotobatohiki de yotobaora-ora. Masara o domba gea ko yahigihenua to ona manga ilingi. 9Ngohi naa ma ngorana, ho onagona dika Ngohino yoboa la yowohamika, ona gea ko yoboditoua. De ka idadi yohupu yowohama de yomamake o inomo. 10Masara nako ona gea yotobatohiki yoboaino la ato yotohiki de yotoma de yahibinaaha, gea dika to ona manga hininga ma dumutu. Masara Ngohi hokogenangua. Ngohi toboa la ahi domba-domba o wowango ma ngango yamake ka hiado-adonika. De manga wowangoka gea ka ihikaika yamake o hiowa ma hohailoa.”
11De o Yesusu ka womahiketerohi wato, “Ngohi naa o domba ma gogoana ma rorahai. De o domba ma gogoana ma rorahai gea Una abe womahidoaka ai wowango la ai domba ka yowango. 12Ma nako o nyawa abe iwihewa dika la o domba wagoana, una ka woara dika ma oraha wamake o fuhuku ma kaho iboaino, ho o domba gea wanoaika angamoi una o gogoana ko idodutua, iwihewa dika. Ho o fuhuku ma kaho iboa la o domba yagoli de o domba ma duduono gea ihikabarihoka. 13O nauru gea ka woara de ma domba wodogunoaika angamoi iwihewa dika de ma domba gea ko wodoraua.”
14“Ngohi naa o domba ma gogoana ma rorahai ho to Ngohi ahi domba duru tahikokioriki de ahi dombaoo ihihioriki Ngohi. 15Gea mimahikoriki Ngohi de ahi domba imaketero hoka o Baba de Ngohi duru mimahikoriki abe Una duru wohihioriki Ngohi de Ngohioo duru tihioriki o Baba. De gea ma titi hiadono tomahidoaka ahi wowango la ahi domba ka yowango. 16De to Ngohi ahi domba utuohi naga abe ko iwainohi o duduonino naa. De onangoo kiani taoino la to Ngohi ahi ilingi ihigihene. Ho ahao ahi domba mata-mata idadioka o duduono moi de manga gogoana Unangoo ka womatengo dika. 17De hokonaa ma titi hiadono ahi Baba duru wohidora, mangale tomahidoaka ahi wowango la ngaro hokogea tohonenge ma ahi wowango ka iwangoli. 18Ko moiua abe ihiora ahi wowango, ma, Ngohi dika ahi mau hiadono tomahidoaka. De angamoi to Ngohi ahi kuaha de ma buturungoka hiadono ka idadi takunu ahi wowango takelengauku jai-jai. De nagali abe ka takunu tohigilioli ahi wowango, de enangoo ma titi ahi kuaha de ma buturungoka. De gea taniiki todiai angamoi ahi Baba wohihibehehongoka Ngohino wato, ‘Hokonaa ahao Ngona nodiai.’”
19Ka de hokogea o Yesusu ai demo yoihene de o Yahudi ma nyawa duru yomaketeliliarokali. 20Abe naga manga ngoe yotemo ato, “Ou, Una gea iwikitokata, abeika, iwitogohangoka ho ngaro ibootohi hihigihene.” 21Masara naga utu yomaketetaere ato, “Iya gea, masara to Una ai demo imakohowono de abe yakitokata manga demo. De sarakia, ka idadi o tokata idiai hiadono o nyawa yorafioka de ka idadi yomahioriki? Koua, o tokata ko idadiua idiai hokogea.”
O Yahudi ma nyawa o Yesusu iwioluku
22De adonoka ma oraha o maata de o Yerusaleeme ma kotaka naga o rame-rame moioli ma romanga Ma Jou ai Tau Iwidingakoka ma rame-rame abe yomahohininga ma oraha Ma Jou ai Tau iwidingakoka Unangika ho ma titi gea ihirame-rame. 23Ho o Yesusu naga genangoka Ma Jou ai Tau ma honongaka abe ihiromanga o Saloomo ma punga, de genangoka wotagi-tagi o Yesusu. 24Ai dodagi ma goronaka de o Yahudi ma nyawa yamuruono naga iwimake ho yoboa de iwihigilolitoka. De ahao iwileha o Yesusika ato, “Adodoa ho naa ma dekanino Ngona nomihipongonohi ma titi ma gou-goungu abe Ngona igoungu o Mesia eko ko o Mesiaua? Kiani de ani demo ma gou-goungu nomihingahu ngomino la ufa hiadono miataoko ani demo ma titi ko itiaiua.”
25De o Yesusu wapaluhu onangika wato, “Ngohi tinihingahuoka masara ahi demo gea ngini ko nioigoua niangaku. Abeika o heheranga todiaioka, gea todiai duru imaketero hoka ahi Baba wato kiani todiai, ho o heheranga gea ihihitaanoka nginika. 26Masara gea ngini ko nioigoua niangaku angamoi ngini ko to Ngohiua ahi domba. 27Nako to Ngohi ahi domba ona gea duru tahikokioriki de ahi ilingi ona ihigihene ho ihiniiki Ngohi. 28De onangika tahikokidoakoka o wowango ka hiado-adonika ho ona duru ko idadiua yobinaaha. De angamoi ona naga ahi giama ma hoatoka ho ko moiua yakunu ihiora ahi giama ma hoatino. 29Angamoi Una abe wahidoaka ona Ngohino, Una gea ahi Baba. De to Unangohi ai buturungu imahilaku ho ko moiua yakunu iwiora ahi Baba ai giamoka abe womahitounangoka. 30De Ngohi naa de o Baba ngomi hoimoi.”
31Ka de o Yesusu ai demo gea yoihene wato, “Ngohi naa de o Baba ngomi hoimoi,” de o Yahudi ma nyawa gea ma moioli o hakaru yagorakino la ato iwihakaru hiadono wohonenge. 32Masara o Yesusu waleha onangika wato, “Ngohi naa tinihimatokokau o heheranga ma ngoe abe o Babaka de aino, ho ma titi ahi heheranga o kia hiadono niato kiani nihihakaru?”
33De ona yopaluhu ato, “Koua, ko ma titiua ani heheranga masara, ma titi ani ngelo angamoi Ngona duru o nyawa biaha dika ma gea ani demo hoka nomahidadi Ma Jou. Hokogea Ngona ningelo Ma Jou ho gea ma titi hiadono kiani nohonenge.” Hokogea ona ihititi la ato o Yesusu iwitoma.
34Masara o Yesusu wapaluhu wabole-bole onangika wato, “Sarakia, mode ko niohiningakaua Ma Jou ai Demo-demo moi abe naga ti ngini nia pareta ma bukuoka? Angamoi naga genangoka Ma Jou wotemo onangika abe yatobauru-urusu o nyawa, wato,
‘Ngohi tinihiromanga tato ngini naa o jou-jou.’ # 10:34
Higiriiri 82:6
.
35Hokogea Ma Jou ai Demo-demo itemoka ho nako naga abe Ma Jou wahiromanga wato ona o jou-jou, gea angamoi ai Demo-demo naga onangoka. De gea ko o ngeloua ma demo, ho done hokokia de ngini nihititi de niato Ngohi tingelo Ma Jou? Angamoi to Una ai demo moioo de ko iwa abe ko idadiua.”
36“Ho abeika nimafikirohi ma titi naa Ngohi. Abe Ngohi naa o Baba womadingakoka Unangika de wohihidingoto o duniauku naa. Ma, ka de tinihingahu tato, ‘Ngohi naa Ma Jou ai Ngofaka,’ de ngini niato tingelo Ma Jou. Adodoa ho nihitae niato tingelo Ma Jou? 37De nako Ngohi ko todiaiua gea abe ahi Baba dika ka idadi wodiai, gea ufa nihingaku Ngohino. 38Masara ngaro ngini ko nihingakua, ma nako todiai gea abe o Baba wohihikarajaanga, kiani niangaku ahi karajaangika gea. Abe ka idadi nimadotoko ahi karajaangino gea hiadono nihioriki abe Ngohi naga o Babaka de o Baba naga Ngohioka ho ngomi hoimoi.” 39Ka de o Yesusu ai demo gea ona yoihene de ma moioli ihitaili iwitaoko masara ngaro yomulaenge iwitaoko ma ka itodokanino de ka aiaho angamoi wogila-gilaka.
40De ahao o Yesusu wolio doka o Yorodani ma akere ma honongaika, ma ngiika abe ma dihira o Yohanese genangoka womahidodogumu de o nyawa waohiki, genangika woiki. Ho o Yesusu womahiadonika o ngioka gea de ahao genangoka wogogere. 41De ahao naga o nyawa ko manga ngoe yokokiboaino o Yesusu ai ngiino gea. De ona abe yoboaino yomakoketemo ato, “O Yohanese ko wodiaiua o dodunguu abe inahiheranga. Masara Una naa ai dodunguu ma ngoe ho duru igoungu o Yohanese ai demo mata-mata abe ma titi o Yesusu Una Ma Jou ai Mesia.” 42Hokogea manga demo de naga o nyawa manga ngoe genangoka abe iwingaku o Yesusika.
Արդեն Ընտրված.
:
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Gereja Firman Allah, Yayasan Misi Masyarakat di Pedalaman