Yùxanà 3

Yesù ko Nikodɛmùn nè kaangoo

1Àyìwà, Faridziɲɛn rèè ɲàn, kpiri sɔn na ni, à tsoo ci Nikodɛmùn, è bà na Dzyèèsìbee mòdzin neè jɔundzian sɔn. 2Tɔ̀ kpir'la yè nà Yesù rè fene, è nà dzin à ra ci: «Kàrànfaà, ɲe y'à tɔ̀, ci Ŋaabla rii wo ka naɔ, wo yè nà ɲe kàràn, kàtsu, wo yɛ kabagoo goo niì reè faa, Ŋaablà na ni mòò riì ka fyeu à tsìfa fa dzi tɔ̀ tsuru ì fa waa.»

3Yesù yè dzin à ra ci: «Sààben na, mun nì ci a ra, mòò riì ma seè kere yeu fyeu, tɔ̀ tsìfa na dzia Ŋaablà re Màsàbee ɲɛn e jaara waa.»

4Nikodɛmùn yè dzin à ra ci: «Mòdzian bɔrɔunmaà shɔ̀ùn nòn, tɔ dzia sèè kere yeu dzùrù kɔn ? À kpɛ̀yn fa dzi seè e naà duùn, è bà ni kere kpɛrɛ waa ?»

5Yesù yè sèè è dzin kɔn ci: «Sààben na, mun nì ci a ra, mòò riì ma kere yuà ko Ŋaablà re Dzia baraka rɔ̀n fyeu, tɔ̀ tsìfa na dzia dɔ̀n Ŋaablà re Màsàbee doùn waa. 6Mòò riì kereu, è bo kpiri ko tàan ɲan, tɔ mòdzin neè kuru, mòò riì to kereu Ŋaablà re Dzi rɔn, tɔ Ŋaablà re Dzia kuru. 7Tà doùn, mun dzin nìi fau, ci fɔ e sèè kere yeu, tɔ̀ goomaa mà ji a dzii tsɛ waa. 8Min niì ye fyɛɛn dzibe, à boò mɔn nì. Wo y'à vuà rìì myɛ̀ɛn, ŋà, à daàn min niì ò, à to bèe min niì ò, wo na tɔ̀ tɔ̀ waa. Mòò riì kereu Ŋaablà re Dzi rɔn, tɔ̀ tsìfa ni tɔ̀ rii tsuru.»

9Nikodɛmùn yè Yesù tey tɔ̀un ci: «Tɔ dzia fa dzùrù ?»

10Yesù ci: «Wo rìi tɔɔ̀ Isirayɛlì kàrànfa brìsi, wo na tɔ̀ tɔ̀ ɔ̀ ? 11Sààben na, mun nì ci e ra, ɲe nìi tɔ̀, ɲe tɔ̀ rii gooma deè. Ɲe to nìi jàu, ɲe tɔ̀ rii shɛɛrɛbe faa. Ŋà, ye sàò na ni ye yè ɲɛn ɲe re shɛɛrɛbee rà waa. 12Goo nìì reè faa dzɔ̀nxɔɔ̀ tsɛ, min ba twɛy gooma deè ye ra, ye na ɲɛɛn à ra waa. Nìì reè to faa jìrànxɔɔ̀ rà, mun ye twɛy gooma de ye ra, ye nà dzi ɲɛn tɔ̀ ra dzùrù ? 13Mòò pɛn na teyn jà jìrànxɔ rɔ̀n ŋe waa, fɔ mòò riì jàà bou mɔn, nìi Adamà dziàn !

14 # Dɛk 21.9. Dan Ŋaablà re kɛɛra Musà nèe goo rèe fau jènjàà kor'nà doùn: à myɛn danɲànmaa dèroun gɔɔ̀ rà mòdzian sapɛ jaa ra, à ɲan yeè bà seòn. Tɔ̀ fau'n kuru soo rà, Adamà dziàn sa wù à ɲan yeè sen jìran nɔ̀n, 15sànko mòò o moò ye dzi ɲɛn à ra, tɔ̀ yeè jaamabe dziù dòbɛɛ tàrà. 16Ɔ̀ɔn, Ŋaabla dziɲan modzian kɛ̀niun, à yè è kɛ̀n, fɔ è Dzin Kpiri soo sìn saaka, sànko mòò o moò ye ɲɛn tɔ̀ ra, tɔ̀ tsìfa mà bara waa, ŋà, è jaamabe dziù dòbɛɛ tàrà.»

17Àwà, Ŋaablà na e Dzin Kpir'la bàji na ci è nà kitsi mɛɛy dziɲan modzian tsɛ dɛ, ŋà, à y'à bàji nau ni, ci è nà dziɲan modzian tsi e re gooɲaan nà. 18Mòò riì ye ɲɛn à ra, kitsi na mɛrɔɔn tɔ̀ tsɛ waa, ŋà, mòò riì ma ɲɛn à ra, kitsia mɛrɔɔn tɔ̀ tsìfa tsɛ nòn, kàtsu à na ɲɛn Ŋaablà Dzin Kpiri soo rà waa. 19Kitsia mɛɛy kùàn nì siin à tsɛ: Vyevyeè nàu dziɲaan doùn, ŋà, tsitsiɛ̀ dzibeu mòdzian nà è geren vyevyeè tsɛ, kàtsu è faadziɛ ɲaan. 20Mòò o moò ni gooɲaan fyɛ̀ùn, vyevyeè xɔ tɔ̀ mà. È bonboò vyevyeè rà, kàtsu, à shiɔ̀ ci vyevyeè mà nà wò faadzii ɲaan kpàdè waa. 21Mòò riì faadzii tereòn, tɔ̀ yeè e raa goò sapɛ faa vyevyeè rà, sànko y'à jà, y'à tɔ̀ ci à nìi sapɛ faa, Ŋaablà ci tɔ̀ rii tsuru.

Mòdzìn Jààràfoobaa Yùxanà nìi dèu Yesù raa goò tsɛ

22Tà shɔ̀ùn, Yesù ko e re kàràndzin neè yè bo Yerusalɛmùn wɔ̀ rɔ̀n, yè dɔ̀n be gàne sɔn ɲan. Tɔ̀ gàneè sa ni tɔ̀ màr'lɔ̀ùn, nìi kir'là Yude mar'la. È to è ka mɔn, è waatsi dan fa, è bà mòdzian jaara foo Ŋaablà re shia goo rèè rà. 23Tɔ̀ y'a tàrà, Yùxanà sa na mòdzian jaara foo gàne sɔn ɲan, ci Enɔ̀n, kàtsu yuà na giri mɔn. Enɔ̀n ni wɔ̀ sɔn tɛyn ci Salimùn. Mòdzian nàa mɔn, è jaara yeè fòo Ŋaablà re shia goo rèè rà. 24#Mat 14.3; Mar 6.17; Luk 3.19,20.Tɔ fau, tɔ̀ y'a tàrà Yùxanà naà jiɔ̀ kàsoò doùn ŋe waa. 25Àwà, sɔ̀swɛy yè nà fù Yùxanà rè kàràndzin neè swey ko Dzyèèsìbee mòdzin sɔn fi. Mòo dzia fɛnɛbe nìi tsuru, è bè làndà shià tsɛ, è na tɔ̀ rii gooma deè. 26Kàràndzin neè yè bè Yùxanà rè, yè bè dzin à ra ci: «Kàrànfaà, kpir'liì na ni wo ka Yuridɛn baa kɛ̀yn nɔn, wo yè bà na à shɛɛrɛbe faa, wo taa n'a re o ? Àwà, à sa mòdzian nì jaara foo dòònuùn, mòò giri to bèe wò rii lè.»

27Yùxanà yè dzin è ra ci: «Mòò na dzia goo sɔn pɛn tàrà, Ŋaablà na nìi ɲɛɔ̀n à tsìfa ra waa. 28#Yux 1.20.Ye sa mun shɛɛrɛ n ne gooma deuma rèe doùn, nìi yɛ ci: "Mun na Ŋaablà Jaara Modzìàn waa, ŋà, mun bàji naɔ à jɔun ni." 29Kɔnɲɔn taàn kɔnɲɔn kpir'là rìì laa. Ŋà, kɔnɲɔn kpir'là dzunwɛynsia, tɔ ni kɔnɲɔn kpir'là tààkuùn nì, è toro wɔ tsùù à re. À y'a gooma vuà myɛ̀n, à taama dzibe cɛyn. Tɔ̀ taamadzibe rèe ni a ci mun naa taamadzibeè rìì, à dzii to tsyɛun dòònuùn. 30Àwà, fɔ wò raa goo rèè rìì yè fààn tarà sa, mun naà yè dzyɛ̀nbe.

31Mòò riì boo jìrànxɔ rɔ̀n, tɔ ni gè sapɛ kuùn. Nìi to dzɔ̀nxɔ̀ tsɛ̀ dzin, tɔ dzɔ̀nxɔɔ̀ raa rìì, è bà dzɔ̀xɔɔ̀ tsɛ raa goo rèè gooma deè. Mòò riì kpɛ̀yn daɔn jìrànxɔ rɔ̀n, tɔ ni gè sapɛ kuùn. 32À nìi jàu, à y'à myɛ̀n, à tɔ̀ rii shɛɛrɛbe faa, ŋà, mòò giri na e tsiì à re shɛɛrɛbee rà waa. 33Mòò riì yè e tsiɛ à re shɛɛrɛbee rà, tɔ̀ tsìfa y'à kpàdèe à y'à fyɛ, ci Ŋaabla sààben ni dèe. 34Ŋaabla mòò riì kaɔ, tɔ Ŋaablà raa goomaa nì dèe, kàtsu, Ŋaablà yeè e re Dzia jàa à tsìfa tsɛ, à na à gɔ̀ngɔɔn waa. 35#Mat 11.27; Luk 10.22.Fà Ŋaablà Dzin Kpir'la goo dzi à ra, à to gè sapɛ wɔɔ à suun. 36Àwà mòò riì ye ɲɛn Ŋaablà Dzin Kpir'la rà, tɔ̀ tsìfa jaamabe dziù dòbɛɛ tàrau. Mòò riì to ma ɲɛn à ra, tɔ̀ fa tɔ̀ jaamabee tàrà waa, Ŋaablà re vununtaà to fa bo à tsìfa tsɛ waa.»

Արդեն Ընտրված.

Yùxanà 3: BDZU

Ընդգծել

Կիսվել

Պատճենել

Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք

Իմացեք ավելին Bible Dzùùngoo Unicode-ի մասին