Genesis 9
9
1Dan Gado blesi Noa nanga de manpikin fu en. A taigi den taki: “Un meki furu pikin. Meki den furu grontapu. 2Ala meti sa frede en skreki gi unu. Den meti na grontapu, den fowru di e frei na loktu, den meti di e kroipi na gron nanga den fisi ini a se. Den sa de ini un makti. 3Now un kan nyan ala meti di e libi èn di e beweigi neleki fa Mi ben gi unu a grun wiwiri fu nyan. 4Ma yu no mus nyan meti di abi brudu ete na ini. Bika a libi de ini a brudu. 5Mi sa aksi frantwortu na a sma di meki wan trawan brudu lon. Efu wan meti srefi meki wan sma brudu lon a o abi fu frantwortu en, noso te wan sma meki wan trawan brudu lon. 6Efu wan sma meki wan tra sma brudu lon, wan trawan o meki a brudu fu a sma dati lon baka. Bika Gado meki libisma, fu de leki en. 7Ma un mus meki furu pikin. Meki den furu grontapu.”
8Dan Gado taigi Noa nanga den manpikin fu en taki: 9“Arki, Mi o meki wan ferbontu nanga yu, nanga ala den bakapikin fu yu, 10èn nanga ala den meti di ben de nanga yu ini a boto. Den fowru, den meti di yu man kweki nanga den krasi meti. 11Mi e meki wan ferbontu nanga yu taki noiti moro Mi sa meki wan bigi frudu kiri ala sani di e libi, èn taki noiti moro wan bigi frudu sa kon fu kiri ala sani na grontapu.” 12Gado taigi en moro fara taki: “Nanga disi Mi o stampu a ferbontu san Mi meki nanga yu, nanga ala libisani èn nanga ala den bakapikin fu yu. 13Mi o poti mi bo na ini den wolku. So Mi o stampu a ferbontu di Mi meki nanga grontapu. 14Ala leisi te Mi meki den wolku kon na wan abra grontapu èn a bo de fu si na ini den wolku, 15Mi sa memre a ferbontu di Mi ben meki nanga yu èn nanga ala libisani. Dan a watra no sa tron wan bigi frudu baka fu kiri ala sani di e libi. 16Te a bo de na ini den wolku, Mi sa si en, dan Mi sa memre a têgo ferbontu fu Gado nanga ala libi sani na grontapu.” 17Dan Gado taigi Noa taki: “Na so Mi e stampu a ferbontu di Mi meki nanga yu èn nanga ala libi sani na grontapu.”
18Den manpikin fu Noa di ben kmoto nanga en ini a boto ben de Sem, Ham nanga Yafet. Ham ben de a p'pa fu Kanaan. 19Disi ben de den dri manpikin fu Noa. Na den bakapikin fu den furu heri grontapu.
20Noa ben de wan man di e prani gron èn a bigin prani droifi fu meki win. 21Wan dei Noa dringi fu a win, a kon drungu, dan a puru en krosi ini en tenti. 22Ham, a p'pa fu Kanaan, si en p'pa sondro krosi dan a go ferteri den tu brada fu en di ben de na dorosei. 23Ne Sem nanga Yafet teki wan langa dyakti, den bradi en abra den skowru dan den waka nanga baka go tapu den p'pa skin. Den ben drai den fesi fu den no si den p'pa sondro krosi. 24Di Noa kisi ensrefi, a kisi fu yere san a moro yongu manpikin fu en ben du nanga en. 25Ne a taki:
“Mi e fluku Kanaan.
A sa de a moro lagi knekti fu den brada fu en.
26Ma mi e blesi MASRA, a Gado fu Sem.
Kanaan sa de en knekti.
27Meki Gado gi Yafet furu gron.
A sa libi makandra nanga Sem.
Ma Kanaan sa de en knekti.”
28Noa libi ete dri hondro nanga feifitenti yari baka a frudu. 29Ala nanga ala Noa libi neigi hondro nanga feifitenti yari, dan a dede.
Արդեն Ընտրված.
Genesis 9: SB16
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Tekst © Surinaams Bijbelgenootschap 2016