मत्ती 23
23
पडीतहोन अरु फरीसीहोन की आलोचनो
(मरकुस 12:38,39; लूका 11:43,46; 20:45,46)
1तब यीशु ने गर्दी से अरु अपना सेवक होन से बोल्यो, 2“पंडीत अरु फरीसी मूसा कि गद्दी पर बठ्या हुया व्यवस्था को अर्थ बतास हइ. 3येका लिये वे तुम से जो कुछ बोल्ये उ करणू, अरु माननु, पन ओका जसो काम मत करणु. क्युकी वे बोलस हइ पर कर्हे नी. 4उ एक असो भारी बोझ खे जेखे उठानो कठीन हइ, बाधीखे उनखे इन्सानहोन का खांदा पर रखस हइ. पन तुम ओखे अपनी उगली से भी सरकानो नी चास. 5वे अपना सब काम खे दुन्याहोन खे बतान का लिये करस हइ वे अपनी ताबीज खे चौडी करस, अरु अपना कपडा की झालर खे बडास हइ. 6खाना मे मुख्य-मुख्य जगा, अरु आराधनालयहोन मे मुख्य-मुख्य जगा, 7अरु बजार मे नमस्कार अरु इन्सान मे गुरु बोलनो उनखे भास हइ. 8पन तुम गुरु नी बोलस, क्युकी तुमारो एक ही गुरु हइ अरु तुम एक ही भैइ अरु भैइन हुये. 9अरु पृथ्वी पर कोय खे अपनो बाप नी बोलनु, क्युकी तुम्हारो एक ही बाप हइ, जो स्वर्ग मे हइ. 10अरु स्वामी भी नी बोलनु, क्युकी तुमारो एक ही मास्तर हइ, यानेकी मसीह. 11जो तुम मे से बडो हुय खे उ तुमारो सेवक बन्ये. 12जो कोय अपना आप खे बडो बनाये, उ छोटो कऱ्यो जाये अरु जो कोय अपना आप खे छोटो बनाये, उ बडो कऱ्यो जाये.
यीशु का द्वारा कपटीहोन की नीन्दा
(मरकुस 12:40; लूका 11:39-42,44,52; 20:47)
13“हे कपटि पंडीतहोन अरु फरीसीहोन तुमारा पर हाय! तुम इन्सानहोन का बदल मे स्वर्ग का राज्य को दरवाजो बन्द करस हइ, नी ते खुद मे ओमे प्रवेश करस हइ अरु नी ओमे प्रवेश करण आला खे प्रवेश करण देस हइ. 14हे कपटी पंडीतहोन अरु फरीसीहोन, तुम पर हाय! तुम विधवा होन का घर खे जास हइ, अरु बतान का लिये बडि देर तक प्रार्थना करतो ऱ्हेस हइ येका लिये तुमखे जादा दण्ड मील्ये.
15“हे कपटि पंडीतहोन अरु फरीसीहोन तुम पर हाय! तुम एक जन खे अपना मोत मे लान का लिये सब नदी अरु थल मे फिरस; अरु जब उ मोत मे ए जास हइ, ते उ अपना से डबल नरक का लिये बनी जास हइ.
16“हे अंधा सेवकहोन, तुम पर हाय! ‘जो बोलस हइ कि अगर कोय मन्दिर की कसम खास ते कुछ नी, पन अगर कोय मन्दिर का सोन्ना की कसम खास ते ओकासे बंधय जास.’ 17हे मुर्ख, अरु अंधो, कोन बडो हइ, सोन्नो या उ मन्दिर जेका से सोन्नो पवित्र होस हइ? 18फिर बोलस हइ कि अगर कोय वेदी कि कसम खाये ते कुछ नी, पन जो दान ओका पर हइ, अगर कोय ओकी कसम खाये ते बंधय जाह्ये. 19हे अंधा, कोन बडो हइ, दान या वेदी जेका से दान पवित्र होस हइ? 20येका लिये जो वेदी की कसम खास हइ, उ ओकी, अरु जो कुछ ओका पर हइ, ओकी भी कसम खास हइ. 21अरु जो मन्दिर कि कसम खास हइ, उ ओकी अरु ओमे र्हेनआला परमेश्वर की भी कसम खास हइ. 22अरु जो स्वर्ग कि कसम खास हइ, उ परमेश्वर की राजगद्दी की अरु ओका पर बठनआला की भी कसम खास हइ.
23“हे कपटि पंडीतहोन, अरु फरीसीहोन, तुम पर हाय! तुम पुदीना अरु सौफ अरु जीरा को दसवा भाग देस हइ, पन तुम ने व्यवस्था की गम्भीर बात यानेकी न्याय, अरु दया, अरु विश्वास खे छोडी दियो हइ. चातो थो की या बात खे भी करस ऱ्हेस, अरु वा बात खे भी नी छोडनु. 24हे अंधा अगुवाहोन, तुम माखा खे ते छानी डालस हइ, पन उट खे गिली लेस हइ.
25“हे कपटि पंडीतहोन, अरु फरीसीहोन, तुम पर हाय! तुम कटोरा अरु ठाटी खे उपर उपर से ते मांजस हइ पन वे अंदर से अंधारा अरु लालच से लुटी हूइ बात से भरी हुइ हइ. 26हे अंधा फरीसी, पैयले कटोरा अरु ठाटी खे अंदर से मांज कि वे बाहेर से भी अच्छी हुये.
27“हे कपटि पंडीतहोन, अरु फरीसीहोन, तुम पर हाय! तुम चुना से पोती हुइ कब्र का जसा हइ जो उपर से ते अच्छी दिखइ देस हइ, पन अंदर मुर्दा की हड्डीहोन अरु सब प्रकार की गंदकी से भरी हइ. 28या रिती से तुम भी उपर से इन्सानहोन खे धर्मी दिखइ देस हइ, पन अंदर से कपट अरु बुरा से भऱ्या हुया हइ.
फरीसीहोन की शिक्षा
(लूका 11:47-51)
29“हे कपटि पंडीतहोन,अरु फरीसीहोन, तुम पर हाय! तुम भविष्यव्दक्ताहोन कि कब्र बनास हइ अरु धर्मीहोन कि कब्र सजास हइ. 30अरु बोलस हइ, अगर हम अपना बापदादा का दिन मे होस ते भविष्यव्दक्ताहोन कि खुन मे उनका सात मे नी होस. 31येका से ते तुम अपना हि खिलाप मे गवइ देस हइ, की तुम भविष्यव्दक्ताहोन खे मारनआलो का बेटा हुये. 32तुम अपना बापदादा को पाप को घडो भरी दे. 33हे साप, अरु साप का बच्चाहोन, तुम नरक का दण्ड से कसा बच्ये? 34येका लिये देख, मी तुमारा पास भविष्यव्दक्ताहोन अरु दिमाकआला अरु शास्त्रिहोन खे भेज्यो हइ. अरु तुम ओमे से कुछ खे मारी डाल्ये, अरु क्रुस पर चेढाये. अरु कुछ खे अपना आराधनालयहोन मे कोडा मार्ये, अरु एक नगर से दुसरा नगर मे भाकता फिरे. 35जेका से धर्मी हाबिल से लीखे बिरीक्याह को बेटो जकर्याह तक, जेखे तुम ने मन्दिर अरु वेदी का बीच मे मारी डाल्यो थो, जेने धर्मीहोन को खुन जमीन पर बोहय गो थो, उ सब तुमारा माथा पर आह्ये. 36मी तुम से सच्ची बोलुस हइ, या सब बात या कुटुम्ब का दुन्याहोन पर ए गीरे.
यीशु को यरुशलेम गाव पर प्रेम
(लूका 13:34,35)
37“हे यरुशलेम, हे यरुशलेम! तू जो भविष्यव्दक्ताहोन खे मारी डालस हइ, अरु जो तरा पास भेज्यो गयो, उनखे पत्थराव करस हइ केतना ही बार मेने चायो की जसा मुर्गी अपना बच्चाहोन खे अपना पंख का नीचे जमा करस हइ, असो ही मी भी तरा बच्चाहोन खे जमा करी खे, पन तुम ने नी चायो#23:37 नगर खे दुन्या खे . 38देख, तुमारो घर तुमारा लिये उजाड छोड्यो जास हइ. 39क्युकी मी तुम से बोलुस हइ, की अभी से जब तक तुम नी बोले धन्य हइ उ ‘जो प्रभु नाम से आस हइ तब तक तुम मेखे फिर कभी नी देखनका.’”
Արդեն Ընտրված.
मत्ती 23: Gnn25
Ընդգծել
Կիսվել
Համեմատել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
The Gowlan Bible ©The Word for the World International and Gawlan Translation Samiti, Telkhar, Maharashtra, India, 2025.