Ka Baibala Hemolele © Partners Development Foundation, 2018.

¶ I kinohi ka Logou, me ke Akua ka Logou, a ʻo ke Akua nō ka Logou.
Me ke Akua nō hoʻi ia i kinohi.
Hana ʻia ihola nā mea a pau e ia; ʻaʻole kekahi mea i hana ʻia i hana ʻole ʻia e ia.
I loko ona ke ola, a ʻo ua ola lā ka mālamalama no nā kānaka.
Puka maila ka mālamalama i loko o ka pouli, ʻaʻole naʻe i hoʻokipa ka pouli iā ia.
¶ Hoʻouna ʻia maila e ke Akua kekahi kanaka, ʻo Ioane kona inoa.
Hele maila ʻo ia i mea hōʻike, i hōʻike ai ia no ua mālamalama lā, i manaʻoʻiʻo ai nā kānaka a pau ma ona lā.
ʻAʻole nō ʻo ia ka mālamalama; akā, ua hele mai ia e hōʻike i ka mālamalama.
¶ ʻO ka mālamalama ʻiʻo ia, ka mea nāna e hoʻomālamalama nā kānaka a pau e hele mai ana i ke ao nei.
I ke ao nei ʻo ia, a i hana ʻia kēia ao e ia, ʻaʻole naʻe ko ke ao nei i ʻike iā ia.
Hele maila ia i kona iho, ʻaʻole kona poʻe i mālama iā ia.
Akā, ʻo ka poʻe i mālama iā ia me ka manaʻoʻiʻo i kona inoa, hāʻawi maila ia i ka pono no lākou e lilo ai i poʻe keiki na ke Akua;
ʻo ka poʻe i hānau ʻia, ʻaʻole na ke koko, ʻaʻole na ka makemake o ke kino, ʻaʻole hoʻi na ka makemake o ke kanaka, na ke Akua nō.
¶ Lilo maila ka Logou i kanaka, a noho ihola me kākou, a ʻike kākou i kona nani, i ka nani o ka hiwahiwa a ke Akua, ua piha i ka lokomaikaʻi a me ka ʻoiaʻiʻo.
Hōʻike akāka maila ʻo Ioane, ʻī maila, “ʻO ia ka mea nona wau i ʻōlelo ai, ‘ʻO ka mea e hele mai ana ma hope oʻu, ma mua oʻu ia; no ka mea, ua mua ia noʻu.’”
No loko mai o kāna mea i piha ai, ua loaʻa iā kākou nā mea maikaʻi a nui loa.
Ua hāʻawi ʻia mai ke Kānāwai ma o Mose lā; akā, ʻo ka lokomaikaʻi a me ka ʻoiaʻiʻo ma o Iesū Kristo lā ia.
ʻAʻole loa i ʻike pono kekahi i ke Akua; ʻo ke Keiki hiwahiwa, aia ma ka poli o ka Makua, ʻo ia kai hōʻike mai iā ia.
¶ Eia kā Ioane i hōʻike mai ai, i ka wā i hoʻouna aku ai nā Iudaio i nā kāhuna, a me nā Levi no Ierusalema aku, e nīnau aku iā ia, “ʻO wai ʻoe?”
Haʻi akāka maila ia, ʻaʻole i hōʻole, ʻī maila, “ʻAʻole ʻo wau ka Mesia.”
Nīnau akula lākou iā ia, “ʻO wai hoʻi? ʻO ʻElia anei ʻoe?” ʻĪ maila ia, “ʻAʻole.” “ʻO kēlā Kāula anei ʻoe?” ʻĪ maila ia, “ʻAʻole.”
Nīnau hou akula lākou iā ia, “ʻO wai lā hoʻi ʻoe? I haʻi aku ai mākou i ka poʻe nāna mākou i hoʻouna mai; he aha kāu ʻōlelo nou iho?”
Haʻi maila ia, “ʻO wau nō «ka leo e kala ana i ka wao nahele, ‘E hoʻopololei i ke alanui no Iēhova»,’ e like me kā ʻIsaia ke kāula i ʻōlelo ai.”
ʻO nā mea i hoʻouna ʻia aku, no ka poʻe Parisaio lākou.
Nīnau akula lākou iā ia, ʻī akula iā ia, “No ke aha lā hoʻi ʻoe i bapetizo ai, ke ʻole ʻoe ka Mesia, ʻaʻole hoʻi ʻo ʻElia, ʻaʻole hoʻi ʻo kēlā Kāula?”
ʻŌlelo maila ʻo Ioane iā lākou, ʻī maila, “Ke bapetizo nei au me ka wai; akā, ke kū nei kekahi i waena o ʻoukou, ka mea a ʻoukou i ʻike ʻole ai.
“ʻO ia ka mea e hele mai ana ma hope oʻu, ma mua oʻu ia; ʻaʻole au e pono ke kala aʻe i ke kaula a kona kāmaʻa.”
Hana ʻia ihola kēia mau mea i Betabara ma kēlā ʻaoʻao o Ioredane, kahi a Ioane i bapetizo ai.
¶ A ia lā aʻe, ʻike aʻela ʻo Ioane iā Iesū e hele mai ana i ona lā, ʻī maila, “E nānā i ke Keiki Hipa a ke Akua, nāna e lawe aku ka hala o ke ao nei!
“ʻO ia nei ka mea nona wau i ʻōlelo ai, ‘E hele mai ana kekahi Kanaka ma hope oʻu, ma mua oʻu ia; no ka mea, ua mua ia noʻu.’
“ʻAʻole naʻe au i ʻike pono iā ia; akā, i hōʻike ʻia ʻo ia i kā ʻIseraʻela; no laila au i hele mai nei e bapetizo ana me ka wai.”
Hōʻike maila ʻo Ioane, ʻī maila, “Ua ʻike au i ka ʻUhane e iho mai ana mai ka lani mai, e like me ka manu nūnū, a e noho ana ma luna iho ona.
“ʻAʻole naʻe au i ʻike pono iā ia; akā, ʻo ka Mea nāna au i hoʻouna mai e bapetizo me ka wai, ʻo ia kai ʻōlelo mai iaʻu, ‘Aia ʻike aku ʻoe i ka ʻUhane e iho mai ana ma luna ona, a e noho ana ma luna ona, ʻo ia ka mea, nāna e bapetizo me ka ʻUhane Hemolele.’
“A ua ʻike au, e hōʻike mai hoʻi, ʻo ia ke Keiki a ke Akua.”
¶ A ia lā aʻe, kū hou aʻela ʻo Ioane, me nā haumāna āna ʻelua.
A ʻike akula iā Iesū e hele aʻe ana, ʻī maila ia, “E nānā i ke Keiki Hipa a ke Akua!”
A lohe aʻela nā haumāna ʻelua i kāna ʻōlelo ʻana, a hahai akula lāua iā Iesū.
Hāliu aʻela ʻo Iesū, ʻike maila iā lāua e hahai ana, ʻī maila iā lāua, “He aha kā ʻolua e ʻimi mai nei?” ʻĪ akula lāua iā ia, “E Rabi, (ma ka hoʻohālike ʻana, e ke Kumu,) ma hea kou wahi i noho ai?”
ʻĪ maila kēlā iā lāua, “E hele mai, e ʻike.” A hele akula lāua, a ʻike i kona wahi i noho ai; a noho ihola lāua me ia ia lā; ua kokoke ka ʻumi o ka hora.
ʻO ʻAnederea, ke kaikaina o Simona Petero, ʻo ia kekahi o ua mau haumāna lā ʻelua i lohe i kā Ioane, a hahai akula iā Iesū.
Loaʻa mua iā ia kona kaikuaʻana iho, ʻo Simona, a ʻī akula iā ia, “Ua loaʻa iā māua ka Mesia,” ma ka hoʻohālike ʻana, ʻo Kristo ia.
A alakaʻi akula kēlā iā ia i o Iesū lā. A ʻike maila ʻo Iesū iā ia, ʻī maila, “ʻO ʻoe nō ʻo Simona, ke keiki a Iona; e kapa ʻia ʻoe ʻo Kepa,” ma ka hoʻohālike ʻana, he Pōhaku.
¶ Ia lā aʻe, manaʻo ihola ʻo Iesū e hele i Galilaia, a loaʻa iā ia ʻo Pilipo, ʻī maila iā ia, “E hahai mai ʻoe iaʻu.”
A ʻo Pilipo no Betesaida ia, no ke kūlanakauhale o ʻAnederea, a me Petero.
Loaʻa iā Pilipo ʻo Natanaʻela, ʻī akula ʻo Pilipo iā ia, “Ua loaʻa iā mākou ka mea a Mose i loko o ke Kānāwai, a me nā Kāula i palapala ai, ʻo Iesū, no Nazareta, ke keiki a Iosepa.”
Nīnau maila ʻo Natanaʻela iā ia, “E hiki mai anei kekahi mea maikaʻi no Nazareta mai?” ʻĪ akula ʻo Pilipo iā ia, “E hele mai, e ʻike.”
ʻIke aʻela ʻo Iesū iā Natanaʻela e hele mai ana i ona lā, e ʻōlelo maila ia nona, “E nānā i kā ʻIseraʻela ʻoiaʻiʻo, ʻaʻole he hoʻopunipuni i loko ona!”
Nīnau akula ʻo Natanaʻela iā ia, ʻī akula, “Ināhea ʻoe i ʻike mai ai iaʻu?” ʻŌlelo maila ʻo Iesū iā ia, ʻī maila, “Ma mua o kā Pilipo kāhea ʻana aku iā ʻoe, ua ʻike au iā ʻoe e noho ana ma lalo o ka lāʻau fiku.”
ʻŌlelo akula ʻo Natanaʻela iā ia, ʻī akula, “E Rabi, ʻo ʻoe ke Keiki a ke Akua, ʻo ʻoe ke Aliʻi o kā ʻIseraʻela.”
ʻŌlelo maila ʻo Iesū iā ia, ʻī maila, “No kaʻu haʻi ʻana aku iā ʻoe, Ua ʻike au iā ʻoe ma lalo o ka lāʻau fiku, ke manaʻoʻiʻo nei anei ʻoe? E ʻike auaneʻi ʻoe i nā mea nui ʻē aku i kēia.”
ʻŌlelo maila ʻo ia iā ia, “ʻOiaʻiʻo; he ʻoiaʻiʻo kaʻu e ʻōlelo aku nei iā ʻoukou, Ma hope aku e ʻike ʻoukou i ka lani e hāmama ana, a me nā ʻānela o ke Akua e piʻi aku ana, a e iho mai ana ma luna iho o ke Keiki a ke Kanaka.”

Dengarkan KA ʻEUANELIO I KĀKAU ʻIA AI E IOANE 1