If you have would like a copy of this version please contact info@davaraudiobibles.org

Text: Deukhuri New Testament, CC-BY-SA-4.0, The Love Fellowship. -- Audio: Deukhuri New Testament Audio Bible, CC-BY-SA-4.0, Davar Partners International, The Love Fellowship, 2023

Deukhuri New Testament

Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.

येशू कलाँ, “दोसुर जहनहे दोष जिन लगाऊ, तब् तुहुरिन्हे फेन दोष नै लगाजाई। काकरेकी तुहुरे दोसुर जहनहे दोष लगैबो कलेसे परमेश्वर तुहुरिन्के न्याय करहीँ। ऊ तुहुरिन्के लग ओस्तेहेँ नियम प्रयोग करहीँ, जसिके तुहुरे दोसुर जहनके लग प्रयोग करथो।”
“तैँ अपन विश्वासी दादू या भैयक किल छुटीछुटी गल्ती देख्थे, पर अपन बर-बर गल्ती भर तैँ नै देख्थे। जब तोरिक अपने बर-बर गल्ती बा कलेसे कसिके तैँ अपन विश्वासी दादू-भैयक छुटीछुटी गल्तीहे सुधारे सेक्बे! ए कपटी! आघे तैँ अपन बर-बर गल्ती सुधार, तब् तैँ अपन विश्वासी दादू या भैयक छुटीछुटी गल्तीहे मजासे सुधारे सेक्बे। ओइन्हे परमेश्वरके वचन ना सुनाऊ, जेने यिहिहे सुने नै चहथाँ। यदि तुहुरे असिके करबो कलेसे पवित्र चिज कुकरीनके आघे फेँकाइल हस हुई, या सुरिनके आघे हिरामोती फेँकाइल हस हुई, जेने उहिहे गोरालेके किच्लादिहीँ। और घुमके तुर्हिनेहे हमला करहीँ।”


येशू कलाँ, “तुहुरिन्हे ज्या चाही उ तुहुरे परमेश्वरसे माँगो और ऊ तुहुरिन्हे दैदिहीँ। खोजो ते तुहुरे भेटैबो, ढकढकाऊ ते तुहुरिन्के लग खोलजाजाई। काकरेकी जे माँगत, उहिहे मिलत। जे खोजत, उ भेटाइत। जे ढकढकाई, ओकर लग दवार खोलजाजाई।”
“यदि तोहाँर छावा तुहिन्से रोटी मागी कलेसे, तुहुरिन्मेसे कौनो मनैया फेन असिन नै हुई, जे उहिहे पठरा दि। अस्तेके, कौनो मनैया फेन मच्छी मंग्लेसे अपन छावाहे बिखार सँप्वा नै दि। तबेकमारे तुहुरे दुष्ट होके फेन अपन लर्कनहे मजा चिज देहे जन्थो कलेसे, स्वर्गमे रहुइया तुहुरिन्के बाबा उहिन्से मँगुइयनहे आकुर कतरा धेउर मजा चिज दिहीँ। मनै तुहुरिन्से जसिन व्यवहार करिँत् कना तुहुरे चहथो, तुहुरे फेन ओइन्के संग ओस्तेहेँक व्यवहार करो। काकरेकी मोशक नियम कानुन और परमेश्वरके अगमवक्तनके लिखल लेखके सारांश यहे हो।”


“तुहुरे साँकिर दवार सोज किल परमेश्वरके राजमे जाई सेक्बो। काकरेकी विनाशमे पुगैना दवार चाकर और डगर सहजिल रहत, और यम्नेसे भित्तर जउइयन बहुत्ते रथाँ। काकरेकी सदाकालके जीवनमे पुगैना दवार साँकिर रहत, और डगर कर्रा रहत। और साँकिर डगरमे नेगुइयन गोड्गात मनै किल रथाँ।”


“झूँटा अगमवक्तनसे हौश्यार बैठो। ओइने बवाँसक जसिन हुइताँ। जेने तुहुरिन्के थेन भेँरवक खाल ओहोँरके अइथाँ, ताकि मनै विश्वास करिँत कि ओइने भेँरवा हुइँत। पर जात्तिकमे ओइने मनैनहे हमला करुइया बवाँसा रथाँ। ओइन्के कामसे तुहुरे ओइन्हे चिहिन्जिबो। झर्कत्तीमेसे अंगुर नै फरत और सेहुँरमेसे अञ्जीर नै फरत। ओस्तेहेँके हर मजा रुख्वा मजा फारा फराइत। पर खराब रुख्वा खराब फारा फराइत। मजा रुख्वा खराब फारा फराई नै सेकत। ना ते खराब रुख्वा मजा फारा फराई सेकत। मजा फारा नै फरैना हर रुख्वा काटके और ढलाके आगीमे फेँकाइल हस झूँटा अगमवक्तनहे फेन अस्तेके दण्ड देजाई।”

“असिके तुहुरे उ झूँटा अगमवक्तनहे ओइन्के कामसे चिहिन्बो।”
“महिन्हे ‘प्रभु, प्रभु’ कहुइया सक्कु जाने स्वर्गक राजमे जाई नै भेटैहीँ। स्वर्गमे रहुइया मोरिक बाबक इच्छा पालन करुइया मनैया किल परमेश्वरके राजमे जाई भेटाई। न्यायक दिनमे बहुत्ते जाने महिन्हे कहिहीँ, ‘प्रभु, प्रभु, का हम्रे अप्निक अधिकारसे अगमवाणी नै बोल्ली? अप्निक देहल अधिकारसे भूत्वनहे नै खदेरली। और अप्निक देहल अधिकारसे मेरमेरके शक्तिशाली काम नै कर्ली का?’ तब् मै ओइन्हे फरछ्वारसे कहम, ‘मै तुहुरिन्हे कबु नै चिन्हल हुइतुँ। ए अधर्म काम करुइयन, महिन्से दूर होजाऊ।’”


येशू कलाँ “तबेकमारे जे मोरिक बात सुनत, और पालन करत। मै ओकर तुलना एकथो बुद्धिमान मनैयासे करथुँ, जे अपन घरक जग चट्टानमे दारल। तब् पानी बर्सल। और बहार आइल। और आँधी आइल। और उ घरेम ठक्कर खाइल। तभुन फेन उ घर नै ढलल। काकरेकी उ चट्टानमे बैठाइल रहे। जे मोरिक यी वचन सुनके फेन पालन नै करत, ओकर तुलना एकथो मूर्ख मनैयासे करजाजाइत, जे अपन घर बालुमे बनाइल। पानी बर्सल। और बहार आइल। और आँधी आइल। और उ घरेम ठक्कर खाइल। और उ घर ढलगिल। तब् ओकर पूरा नोकसान होगिलिस।”

येशू यी बात कहिके सेक्लाँ ते भीड़के मनैनहे हुँकार शिक्षा सुनके अचम्म लग्लिन। काकरेकी ऊ यहूदी कानुनके गुरुनके हस शिक्षा नै दिँत। पर असिन गुरुक हस सिखाइँत, जेकर थेन सच्चा अधिकार बा।

Dengarkan मत्ती 7