Jon 8
8
Bisei saw hapat kuu tit Jisas ohe pat pihipa ohe meng oh
1Gahan Jisaso nuhur Orip yeinong ruhpa. 2Rusa timorimdapat kutwi it wandasa Got ohe ap yawar doho dahnong oh ruhpa. Royaoh kuuhan trun ti apris patingopa. Patimdapat ohe pat duupnong hatperhan Jisas oh tongnoma meng oh am deingop. 3Am deipatin sawa meng am mat pisapti han ihirsi; Parisi ihirsi ihir kuu han inap tit bisei saw hapatin ama wamtipa oh. Wandeipti Gin dir Jisas ohe boknong meng mar imtinmat uhnong ambur ohe patnong pisaprohemur. Pisus mama bisei saw hah kuu moh nuhur kinmatper por dahamtiprohemur. Dahamar oh Gur uhnong sutipri. Mandatinmur naporhan Dir go Moses ohe sawa meng na amrapat han ma hapat por meng oh ohe boknong matiprohemur. Oh Gur sutinmur rihanoh dir Go nure kak han Rom ire pohon sawa mengnong amkar giri moho por meng ohe boknong matiprohemur gosham meng wanin mar Got ohe ap yawarnong moh pamrongopa. Pamrasa hanip mutuh mandama 4Jisas ohnong Tisa. Kuu han inap mauh bisei saw hapatin wamtiriri. 5Sawa meng oh Moses oh mihya kuu ihirnong kweisi suyarit ha haputinoh rim brak matipmur. Gin go kian meng napotiproho rim nuhur gwe pat dahnong moh pamrayamur pongopa.
6Potperhan Jisas oh mem hama bessi mongnong brak deingop. 7-8Brak deipatin ihir dahandeiptiwi deingopa. Indeiptin oh tandaptuhus rim ihirnong Guragur tit han tit Nohri da duungsi hatwi pat hanmur. Noh er danong na hapat hanmur ma dahat pat han gori uhnong kweisi tahe por sutinmur porpat it mem ham mongnong brak deingop. 9Brak deipatin han nanipir san ohri hat ma pat han ohri Jisas ohe boknong matin meng oh timbas moho rim uhnong mandam kot rongop. Roporhan komdapat ma ohe hrepdapat hat pat han oh ama da orhor hama rongop. Roporhan ohe komdapat ma hat pati han ihir tap da orhor ham rongopa. Ihat tit tit tahat kuu uhnong Jisas ohe duup oh mandama rongopa.
10Mandam roperhan oh tandaptuhus rim wamara We. Kuua. Gorhe patda. Dahanaham inahatin han ihir gosi ti na patida. Gonong Er kuu moh sutpera na daham namdam sayaheda pongop. 11Potporhan uh Hanipyaha. Ihir namdam sayamur potporhan oh Ihir gonong Go er hapat kuumur na napor namdam saya ohoh ihan nohhe ire ma gonong na inahayaru hat orhor gonong na inahatiprohmur. Gin go sona. Susa it ernonghe hapra pongop. Potporhan uh sangop.
Jisas oh At nutanut tit dawi ham tit mengwi naporiptimur ritip ohe meng oh
12Gahan Jisas oh Noh kakdah han gonsi gure has han oh nohmur. Norhe danong ma haya han gur kwitem dus na saptimur. Eimat paten dasi nahapat ohe has teiwi saptimur napongop. 13Napotporhan Parisi ihir Wa. Yot han ihit tap meng riyahanoh Moh arpin meng riya ma hapat dahaptimur. Tit han orhap ihat mengirhanoh Oh orhe damdapat dasuh meng ripat ma hapat dahaptimur. Ihat dahapti ohoh ihan go gorhap ihat mengripat oh dasuh han ma hapat dahaptimur pongopa.
14Potperhan Jisas oh Nohe patdapat ma apdap teio norhe ma sapra teio oh norhor am hat patmur. Am hat pat ohoh ihan norhor Noh ihtin han hat patmur ma ripat oh noh arpin meng ripatmur. Noh arpin meng ripat orhor gur norhe patdapat ma apdap teio norhe ma sapra teio oh gur hanhan hat patimur. 15Gur guragure kakdah ohe dahapti da ohsi hanipnong Moh er hat sapat hanhe. Moh yah hanhe por saptimur. Noh gurnong Moh er hanhe moh yah hanhe napor na nasapatmur. 16Noh gurnong nasatpor dahahhanoh norhe da orhor na nasatiprohmur. Norhornong ma nadarhetip at ohsi nutanut tit dawi ham nasatiprohemur. Ihat tap da hat patim napapti ohoh ihan pomat orhor nasapti ma hapat dahenmur. 17Gure sawa meng oh Yot ihit tit tap meng orhor Ama han oh ihtirmur riyahanoh Moh arpin riya ma hapat dahenmur rim brak matpamur. 18Amaru hat orhor nohe boknong mar ma ripat meng oh at oh ama meng orhor ripatmur. Ritporhan nutanut tap meng orhor ripti ohoh ihan gur nohnong Oh arpin meng ripat ma hapat dahenmur pongop. 19Potporhan ihir Itap oh apris tap meng napotiprohkin daham Ita oh de tei pat. Nuhur na wandeiyamur potperhan oh Gur nohnongo at ohnongo gur hanhan hat patimur. Gur nohnonghe am hat patida ihan at ohnonghe am hatiprohe pongop.
20Mameng ma potip oh Got ohe ap yawar ohe mani oh Moh Got gwe nasariyamur por mani saripti ap dah kakduup amdapat pongop. Potporhan ihirdapat ohnong ambur sutpera dahatpa orhor ohe sutin dik oh kopen na apin patin ohoh ihan ihir ambur nang na atpangopa.
Kakdah han bap gur nohe sapra teinong oh gur na wanahatiprimur potip ohe meng oh
21Gahan Jisas oh noh son hahmur. Noh saporhan gur nohe ma sapra apteinong oh gur na aprin inasi hat pati ohoh ihan gur Oh dirnong ha napanggeitinoh daham nohnong angnahatipri orhor gur nohnong na wanaham er gapsi hat patimdapat orhor haputiprimur pongop.
22Potporhan Juda ihir Wa. Nohe pat teinong na aprin ina hat pati gurmur ma naporhe meng oh kian meng sa naporo. Orhornong tasum haputin meng naporkino ringopa. 23Ritperhan oh Gur kakdah han bap gurmur. Noh aw tei han nuhurmur. Gur kakdah morhor paten han bap gurmur. Noh kakdah moh paten han basmur. 24Ihtin ohoh ihan noh gurnong Gur er gapsi hat patim ohor haputiprimur mama napor ohmur. Gur nohnong Oh arpin ama hanhe na dahayahanoh er gapsi orhor patimdapat orhorwi haputiprimur pongop.
25Potporhan ihir Go de hana potperhan oh Noh ama han hat patmur ma naporpatgwer han norhorwa. 26Noh gurnong Gur mama ihat sapti oh ermur napor nasam napotin ohe meng oh ruumsan patmur. Ruumsan pat orhor norhornong ma nadarhetip han ohe meng oh nohnong napotporhan ameng ohwi gurnong naporpatmur. Ama han oh arpin hanmur pongop. 27Potporhan ihir Nadarhetip han ma ri moh itap Got orhor ma hapat na dahangopa. 28Na dahatperhan oh Gur kaput Hanip Brer nohnong irat boknong sur garnahatperhan noh it da apris masporhan gur Epe. Orhe Noh ihtin hanmur ma ripatgwer oh oh arpin ama han orhor ma hapat. Oh orhe mengnong na risuh han ma hapat. Itap ohe mengnongwi risuh han ma hapat daham am hatiprimur. 29Ginnong oh norhornong ma nadarhetip at oh norhorsi patmur. Nohnong namdatporhan norhap na patmur. Nutanut patim noh dipwi orhe da ohsi ihpatmur pongop.
30Ameng oh porpatin trun ihir Ohwi arpin inahatin hatin han ma hapat dahangopa.
Jisas oh Gur arpin mengnong dindeiya ohe pe oh er da oh nang natpat napapat hrepnong mandaptimur potip ohe meng oh
31Gahan Jisas oh orhornong Oh arpin ama hanhe ma dahaya Juda ihirnong Gur nohe meng amram marim orhorwi ma papti bap guroh arpin norhe namgit napisapat han hat pati bap gurmur. 32Ama ihat pati bap guroh arpin da mengnong oh am haprimur. Arpin da mengnong ma am hapti ohe pe oh dasuh meng ohe er da hrepnong nahat napapat da oh arpit namdatipramur pongop. 33Potporhan ihir Wa. Nuhurra Epraham ohe puh nuhur ohoh ihan nuhur tit han ohe hrepnong nahat napapatin nuhur nang tatpat napapat han bap hatin hat patida. Basra. Nuhur tit han ohe hrepdapat hat na patem yah hat orhorwi hat patesheru patiru gin mama pati ohmur. Nuhur ihat pati ohoh ihan go nuhurnong kianorim Gur arpin meng am hapti ohe pe oh nang arpit namdatipramur napor pongopa.
34Potperhan Jisas oh Es. Noh arpin meng napotiprohmur. Er da hat ma sapti han bap guroh ama er da ohe nang natpat napapat hrepdapat hat patim ihat sapti bap gurmur. 35Tit han ohdapat tit han ohnong Go nohe natamrein han hat patenmur porhanoh ama han oh orhe brer ham ihit taman pateprida. Basra. Orhe brer oh pokwi itait taman pateprimur. 36Ihtin ohoh ihan brer noh er hat sapti da ohe hrepdapat hat pati gurnong nang arpit namdama namburhan gur arpin Got ohe brer ham yah hatwi pateprimur. 37Gur arpin Epraham ohe puh hat pati orhora; gur nohe mengnong kom nasara na amratin ina hat pati ohoh ihan gur nohnong garnaham kom nasara nitin danong ohwi hat patimur. 38Noh norhe at ohe ihpatin wandeipat meng ohwi ripatmur. Gur guragure ita er han ohe ihpatin wandeipti danong ohwi haptimur pongop.
Jisas oh Gur Got orhe brer na hat patim nohe mengnong na amraptimur potip ohe meng oh
39Juda ihir Nuhur Epraham ohe puh nuhurmur pongopa. Potperhan Jisas oh Gur Epraham ohe puhneng gur ohe ma hat patesuhru hat patinengmur. 40Gur ohe ma hat patesuhru hat na pati ohoh ihan noh at ohe meng amram napotporhan gur nohnong nitperim ihaptimur. Ma ihapti oh Epraham oh gure mama haptiru na hasuhmur. 41Gure mama ihapti oh ita er han ohe ma ihasuh danong dimar ihaptimur pongop. Potporhan ihir Wa. Nuhur bisei saw brer hat patida. Nure at ohra tit han Got oh pokwimur pongopa.
42Potperhan oh Noh Got ohsi tap hat patdapat orhor apdapmur. Ma apdap oh noh norhe da orhor apripora daham na apdapmur. Got orhor nadarherit apdapmur. Ihat apdap ohoh ihan gure ita oh arpin Got ohneng nohnonghe Got oh darhetip han ma hapat daham bopor nahaptinengmur. 43Gur nohnong Itap Got oh darhetip han ma hapat na daham nohe mengnong na amratin inasi hat pati ohoh ihan nohe ma naporpat ohe mutuh mengnonghe na amram na dahaptimur. 44Ihan ihat pati bap gure ita oh Satan ohmur. Gure ita Satan ohe Ihir ihat ha sashengwe naporpat danong ohwi hat saptimur. Ama han oh mong kopenat darpa tei orhor Noh hanip surit ha haputingwe daham hanipnongwi sum patesuhru pat han ohmur. Oh arpin dasi hat na pat han ohoh ihan arpin danong kom asar ihat sapat han ohmur. Dasuh da oh ohe bokdapatwi tarpam apripat ohoh ihan dasuh da ohe itap hat ma pat oh Satan orhormur. Dasuh da oh orhe bokdapatwi tarpapat han ohoh ihan dasuh meng rihanhe orhe pohon meng ohwi ripatmur. 45Gur ama dasuh han ohe brer hat pati ohoh ihan noh gurnong arpin meng moh napotporhan gur na amraptimur. 46Gur nohnong Oh ihat er hapatgwer hanmura; ihat er hapatgwer hanmur napotin meng oh ti patda. Norhe boknong nahatin meng oh ti na patmur. Ti na pat ohoh ihan noh gurnong arpin meng orhorwi napotporhan gur kianorim na amrapti. 47Got orhe brer hat pati ihir itap orhe mengnongwi amraptimur. Gurnong oh Got ohe brer na hat pati ohoh ihan gur orhe brer nohe mengnong na amraptimur pongop.
Jisas oh Norhe winnong oh at oh naisip deipatmur ritip ohe meng oh
48Jisas oh ameng oh potporhan Juda ihir Nuhur gonong Oh Samaria ihirmur. Oh mongsup oh ohe mutuh oh da ban mat papatin ihat sapat hanmur ma naporipti oh go arpin ihtin han hat patmur pongopa. 49Potperhan oh Noh mongsup oh nohe mutuh patin ihat sapat handa. Basra. Noh at orhe winnong dapsi mar isip mat apisapat hanmur. Imat dapsi mat apisapat orhor gurdapat nohnong dasei naham win timbas bisei han hatin nahaptimur. 50Norhordapat norhe winnong isip mar na tandaptuhurpatmur. Norhornong norhe ma ihat sapat danong nasam Go yah hat sapat hanmur ma naporpat at Got orhordapat Kuuhan ihiroh norhe mon orhe winnongwi isip mat ha apisashengwe dahapatmur. 51Noh arpin meng naporpatmur. Nohe meng amram ma dindeipti bap guroh haputinhe na haputiprimur pongop.
52Potporhan ihir Wa. Epraham oh na haputipda. Propet ihir na hapurisheda. Ihir hapurishe orhor go Nohe meng amram dindeipti bap gur na haputiprimur ma ripat oh go arpin mongsup oh gwe mutuh oh da ban nahat napapatin ohoh go ihat meng ripatmur. 53Propet ihirhe hapurishemur. Dire aw Epraham ohhe haputipmur. Go Noh ama han ire kasipnong oh nohe hrepnong mar ambapte mat papatmur daham giripatda por indeingopa.
54Por imtiperhan Jisas oh Noh norhe winnong isip mar daptuhut pisahanoh oh be ina teimdapat norhe winnong daptuhut pisaprohmur. Norhordapat na daptuhurpatmur. Gure ma Nure Gotmur ma poripti han orhordapat nohe winnong nadaptuhur isip deipatmur. 55Gur Nure Gotmur poripti orhor gur ohnong hanhan hat patimur. Norhor ohnong am hat patmur. Nohdapat Ohnong hanhan hat patmur rihanoh nohhe dasuh han gur hatin hatiproh basda. Noh ohnong am hat pat ohoh ihan noh ohe mengnong amram dindeipatmur. 56Gure ra Epraham oh Kaput Krais oh apirit noh wamtiprawa daham amam hat orhor patesuhmur. Gahan noh arpin apriporhan Epraham oh wanaham da yah hatirmur pongop. 57-58Potporhan ihir Epe. Go han paser na hat pat moh Epraham ohnong kinmat wamar am hat pat potperhan oh Noh arpin Epraham oh na it patin orhor nohri patesuh hanmur pongop. 59Potporhan ihir Epe. Han moh dasuh meng isip tit hah moh dir kweisi sutper gosham kopen kwei dara sutperim ihaptin oh ire bes teidapat orhor tarpir kotnong ros sangop.
Pilihan Saat Ini:
Jon 8: opmNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1992, Wycliffe Bible Translators, Inc. All rights reserved.