Акълова 4

4 къаьм

Абос насигьатла

1Абола малъилахъа энекзи ба̄хъ, оьжда,

ахо энекзи ба̄хъ, мизолзу аᵸкъло мокъалъгъа.

2КӀетӀа̄ аᵸкълова до мизол нийацца.

Дие амрона миже шоъла̄къа.

3До зукъойо диела абос итӀино оьжо,

диела ийос гьоᵸс гаьгьийо атӀийо къована.

4Або дил аᵸкъло нилӀна, гьолцо дӣхъа ниса̄гьийо:

Дие йаьжбо йакӀиъ йеᵸйагьа;

диела амролакьа уьᵸхо-аьᵸхеда, чӀаго гьихлъас ми.

5Аᵸкъиллъи тӀалаб йова, аᵸкъло-насигьат тӀалаб бова.

Диела сикӀаъкьа̄ гувагьийа̄ йаьжбо шоваъла̄къа,

до малъзи йо̄ва жойлакьас тарзи ахъа̄къа.

6Аᵸкъиллъи тӀутӀна йечаннейа̄къа, гьолълъо ми цӀуми о̄с;

дул гьули йатӀ, гьолълъо ми цӀуми о̄с.

7Аᵸкъиллъилас авал йахъца аᵸкъло бокӀоллолъи,

дибо бечелъина йиᵸсона, ми аᵸкъло-насигьат боха.

8Аᵸкъиллъилас ми гьуьрмат бова, гьолълъо мина кьодда̄кӀца;

ми гьолълъол аᵸлъо йоцӀа, гьолълъо дибо къадро-къимат кьодда̄кӀца.

9Дибола къаьмкьа кьодо кӀетӀо матӀайиᵸцо гулца гьолълъо,

кьухъийо тажна#4:9 Таж – парчагьлис ханлъилас кьакъало (корона). ницца дул.

10Йе дие оьжо, дӣхъа энекзи ахъ ми,

дие йаьжбо аьᵸдалаъ йеᵸйагьа –

гьолълъохъа дибо оьмро бихалолъца.

11До дул йегалца аᵸкъиллъилас гьино,

йаᵸкъойцӀойо шагьейалаъкьа̄ йежеш до ми.

12Эᵸкьешлаъ, хаьба багъал загьмат бахъаъас дул,

чӀанагъона эᵸкьешлаъна хаьба къе̄ мехаъас.

13Малъ-хъайла̄хъа энекзи ахъ, гьолло̄л йакӀиъ цӀуми йовагьа –

вагьли дибо чӀаголъи гей.

14Лъаькъейа̄ аьдамла̄ла гьидна ми хаьба гухъла̄къа,

чикейа̄ сукӀоба̄ла гьидкьалакьа̄на эᵸкье-гова̄къа.

15Вагьли гьино ата̄ йоха,

гьолълъокьа кьодолакьа̄на эᵸкьа̄къа,

гьули гаьлъгъа йечаннегьна, шеблаъкьа̄ эᵸкье.

16Кешлъи йоваъда гьоллос гьаьйда йиᵸйабацаъас,

гьоᵸсдана сукӀо къаьм лӀийода̄ эклаъда, гьоллос малӀо йоᵸкъаъас!

17Кешлъи йо̄с гьолло баьба муьхъчалаъцой,

Зулму бо̄с гьолло гъино хулӀослаъцой!

18Муъмилла̄с гьино йеᵸлъейо йахъца бихъола канлъилалъ,

хискьалакьа̄ лӀобакьал гьули йилӀа бабалолъца.

19Лъаькъейа̄ аьдамла̄ш гьино гьаьъ хаьлӀейо колӀлӀо йахъца,

на̄ хаьба гьидеш мехецасна бикъаъас гьоллол.

20Йе дие оьжо, дие йаьжбо аьᵸдалаъ йеᵸйагьа,

диела каламлихъана энекзи ахъ.

21Ми гьаьгъа аьᵸйда̄ш гьолло̄л йоваъла̄къа,

йакӀила оᵸкьаъ цӀуми йовагьа.

22Вагьалло̄л йаьжбо гьидел йиᵸйахъова̄л чӀаголъи йиᵸхъос,

гьоллола магъол дарулъилаъна йа̄хъца.

23Дибола хазиналгъана ахо цӀуми йова дибо йакӀо,

гьулиъкьа̄йаъ гувагьца чӀаголъилас лъӣбо.

24СикӀас гьилла-макро дудойс цацакӀзи йова,

мицас мекълъи-тӀекълъина дудойс ата̄кӀа.

25Дибо гьаьйда йаᵸкъойцӀо гувабацӀала,

дибо говацӀо̄лъина йаᵸкъойцӀо аьᵸйда̄ говацӀо̄лъи йахъала.

26Дибола гьид аᵸкъойцӀо эᵸкьеда,

бадло къацӀцӀола гьинода̄кьана гьичӀейолъи гьаъа дул.

27Йа кӀетӀакьалаъда̄, йа оᵸкьакьалаъда̄ кӀаьй уьᵸха̄къа ми;

дибозу хаьба кешлъиладойс ата̄кӀа.

Pilihan Saat Ini:

Акълова 4: KapPROLUK

Sorotan

Berbagi

Salin

Акълова 4

Ayat-ayat Alkitab Ternama dari
Акълова 4

Alkitab:

бежкьалас миц

Versi: Анкълова, Лука - KapPROLUK