JOHANA 5

Bethesda dîla damlo tihdam

1Chûng thil hnuah chuan Juda-te kût pakhat a awm a; Isua chu Jerusalem khuaah a han kal a. 2Tin, Jerusalem-ah chuan Berâm Kawngkhâr kiangah dîl a awm a, chu chu Hebrai ṭawngin Bethesda an ti a, hulhliap panga a nei nghe nghe a. 3Chûngah chuan damlo te, mitdel te, kebai te, zeng te tam tak an mu hlawm a. #5.3: Kutziak bu ṭhenkhatah chuan châng 4 thu, “Dîlah chuan vântirhkoh a zuk kal ṭhîn a, tui a tifâwn ṭhîn; tichuan, tui a lo fâwn huna zuang lût hmasa ber chu eng natnaa na pawh ni se, a lo dam ṭhîn a ni,” hi a chuang. 5Tin, chutah chuan kum sawmthum leh kum riat nâ mi tu emaw a awm a. 6Tin, Isuan a mu chu a hmu a, chutiang chuan rei tak a awm tawh tih a hria a, a hnênah, “Tihdam i duh em?” a ti a. 7Tin, damlo chuan, “Ka pu, tui a fâwnin dîla mi dahtu ka nei lo va, ka kal chhûngin mi dangin mi pên thlâk khalh ṭhîn,” a ti a, a chhâng a. 8Tin, Isuan a hnênah, “Tho la, i âwngphah la la, kein kal tawh rawh,” a ti a. 9Tin, thâwklehkhatan chu mi chu a dam ta nghâl a, a âwngphah chu a la a, a kal ta a.

Chumi ni chu Chawlhni a ni a. 10Chutichuan, Juda-ten a dam taa hnênah chuan, “Chawlhni a nih hi, i âwngphah i lâk a thiang lo ve,” an ti a. #Neh 13.19; Jer 17.21 11Tin, ani chuan an hnênah, “Mi tidamtu ngeiin ka hnênah, ‘I âwngphah la la, kein kal tawh rawh,’ mi ti a ni,” a ti a, a chhâng a. 12Tin, anni chuan a hnênah, “ ‘I âwngphah la la, kein kal tawh rawh,’ i hnêna titu chu tu nge ni?” an ti a, an zâwt a. 13Nimahsela, a dama chuan tu nge a nih a hre lo va, chutah chuan mipui an awm avângin Isua a kal bo ta si a.

14Nakinah chuan Isuan ani chu Pathian biak inah a hmu a, a hnênah, “Ngai rawh, i dam tâk hi, thil tisual leh tawh suh; chuti lo chuan, thil ṭha lo lehzual i chungah a lo awm dah ang e,” a ti a. 15Tin, chu mi chu a va kal a, Juda-te hnênah chuan a tidamtu chu Isua a ni tih a hrilh a. 16Chutichuan, Chawlhnia chûng thilte chu a tih avângin Juda-ten Isua an tiduhdah ta a. 17Nimahsela, Isuan anni chu a bia a, an hnênah, “Ka Pain tûn thleng pawhin hna a thawk reng a, kei pawhin ka thawk ve a ni,” a ti a. 18Chutichuan, Juda-ten tihhlum an tum lehzual a, Chawlhni a bawhchhiat avâng chauh pawh a ni lo va, Pathian ama Paah a vuaha, Pathian tluka a insiam avâng pawhin a ni.

Fapa thuneihna

19Tin, Isuan an hnênah, “Tihtak meuhin, tihtak meuhvin ka hrilh a che u, Fapain mahniin eng mah a ti thei lo, Pa thiltih a hmuh chauh lo chu; thil a tih ang apiang chu Fapa pawhin a ti ve ṭhîn. 20Pain Fapa a hmangaih a, a thiltih apiang a hnênah a entîr ṭhîn; hêng aia thiltih ropui zâwk hi a hnênah a la entîr ang, mak in tih atân. 21Pain mitthite a kai tho va, a tinung ṭhîn angin, Fapa pawhin a duh apiang a tinung ṭhîn. 22Pain tu ma thu a rêlsak ngai lo, thu zawng zawng Fapa a rêltîr ta zâwk; 23mi zawng zawngin Pa an zah angin, Fapa pawh an zahna tûrin. Tu pawh Fapa zah lo chu, Pa a tîrtu pawh chu zah lo a ni.

24Tihtak meuhvin, tihtak meuhvin ka hrilh a che u, tu pawh ka thu hriaa mi tîrtu ring chuan chatuana nunna a nei tawh, thiam lohvin a awm lo va, thihna ata a chhuak a, nunnaah a lût ta zâwk a ni. 25Tihtak meuhvin, tihtak meuhvin ka hrilh a che u, a hun a thleng dâwn ta, tûnah pawh a thleng tawh mêk, chutih hunah chuan mitthiten Pathian Fapa aw an hria ang a, a hria apiang an nung ang. 26Pain mahnia nun a nei ang bawkin, Fapa pawh mahnia nun neiin a siam; 27tin, Mihring Fapa a nih avângin a hnênah rorêl tûr thu a pe.

28Hêng hi mak ti suh u, a hun a thleng dâwn ta, chutih hunah chuan thlâna awm zawng zawngin a aw an hria ang a, an chhuak vek ang; 29thil ṭha titute chu nunna changin an tho leh ang a, thil sual titute chu thiam loh changin an tho leh ang. #Dan 12.2

Isua thuhretute

30Keimahin eng mah ka ti thei lo: benga ka hriat ang zêlin ro ka rêl ṭhîn; ka rorêl chu dik tak a ni, keima thû thûin awm ka tum lo va, mi tîrtu thû thû zâwka awm ka tum ṭhin avângin. 31Mahni chanchin hriattîr ila, ka thu hriattîr a dik lo vang. 32Ka chanchin hriattîrtu chu mi dang a ni; ani chuan ka chanchin a hriattîr chu a dik tih ka hria.

33Nangnin Johana hnênah mi in tîr a; tin, ani chuan thutak chanchin a lo hriattîr kha. #Joh 1.19-27; 3.27-30. 34Thuhriattîr ka pawm erawh chu mihring thu a ni lo; nimahsela, in damna tûrin hêng thu hi ka sawi a nih hi. 35Chu Johana chu khâwnvâr alh tak leh êng tak chu a ni, a êngah chuan hlim rih in duh kha.

36Nimahsela, hriattîrna ka neih hi Johana hriattîrna thu ai khân a ropui zâwk a ni: Pain thiltih zawh tûra mi pêk, ka thiltih ngei hian Pain mi tîr tih ka chanchin a hriattîr a ni. 37Pa mi tîrtu pawh chuan ka chanchin a hriattîr tawh. Nangnin eng tikah mah a aw in hre ngai lo va, a hmêl pawh in hmu ngai hek lo. #Mt 3.17; Mk 1.11; Lk 3.22 38A thu pawh in rilruah in pai reng lo, a tirha hi in rin loh avângin. 39Pathian Lehkha in chhiar ngun ṭhîn, a chhûngah chatuana nunna awma in rin avângin; chûng Lehkha chu ka chanchin hriattîrtu chu a ni si a. 40Nimahsela, nunna nei tûrin ka hnênah in lo kal duh si lo.

41Mihring chawimawina ka zawng lo. 42Nimahsela, nangni ka hria a che u, Pathian hmangaihna in rilruah in nei lo ve. 43Ka Pa hmingin ka lo kal a nih hi, nangnin mi lâwm si lo; mi dang mahni hmingin lo kal sela, ani chu in lâwm ang. 44Nangni inchawimawi tawn lâwmte u, engtin nge in rin theih ang? Pathian tak chauhva chhuak chawimawina chu in zawng si lo. 45Keiin Pa hnêna ka hêk che u ring suh u; nangmahni hêktu chu pakhat a awm, in rin Mosia hi. 46Mosia in rin chuan kei pawh mi ring tawh tûr in ni; ani chuan keima chanchin asin a ziak ni. 47Nimahsela, a thuziak chu in rin si loh chuan, engtin nge ka thu in rin ang?” a ti a.

Pilihan Saat Ini:

JOHANA 5: MIZOVBSI

Sorotan

Berbagi

Salin