ወንጌል ዘማቴዎስ 10
10
ምዕራፍ 10
ዘከመ ተጸውዑ ሐዋርያት
1 #
ማር. 6፥7-13፤ ሉቃ. 9፥1-5። ወጸውዖሙ ለዐሠርቱ ወክልኤቱ አርዳኢሁ ወወሀቦሙ ሥልጣነ ዲበ መናፍስት ርኩሳን ከመ ያውፅእዎሙ ወይፈውሱ ኵሎ ድዉያነ ወሕሙማነ። 2ወለዐሠርቱ ወክልኤቱ ሐዋርያት ከመዝ አስማቲሆሙ ቀዳሚ ስምዖን ዘተሰምየ ጴጥሮስ ወእንድርያስ አኁሁ። ወያዕቆብ ወልደ ዘብዴዎስ ወዮሐንስ እኁሁ። 3ፊልጶስ ወበርተሎሜዎስ ቶማስ ወማቴዎስ መጸብሓዊ ወያዕቆብ ወልደ እልፍዮስ ወልብድዮስ ዘተሰምየ ታዴዎስ። 4#ማር. 3፥13-20፤ ሉቃ. 6፥12-17። ወስምዖን ቀነናዊ ወይሁዳ አስቆሮታዊ ዘአግብኦ። 5እሎንተ ዐሠርተ ወክልኤተ ፈነዎሙ እግዚእ ኢየሱስ ወአዘዞሙ እንዘ ይብል ውስተ ፍኖተ አሕዛብ ኢትሑሩ ወሀገረ ሳምር ኢትባኡ። 6#15፥24፤ ግብረ ሐዋ. 13፥46። ወሑሩ ባሕቱ ኀበ አባግዕ ዘተኀጕላ እምቤተ እስራኤል። 7#4፥17። ወሐዊረክሙ ስብኩ እንዘ ትብሉ ቀርበት መንግሥተ ሰማያት። 8#ግብረ ሐዋ. 20፥33። ድዉያነ ፈውሱ ሙታነ አንሥኡ እለ ለምጽ አንጽሑ አጋንንተ አውፅኡ በጸጋ ዘነሣእክሙ በጸጋ ሀቡ በከንቱ ዘነሣእክሙ በከንቱ ሀቡ።#ቦ ዘኢይጽሕፍ «በከንቱ ዘነሣእክሙ በከንቱ ሀቡ» 9ኢታጥርዩ ለክሙ ወርቀ ወብሩረ ወኢ ጸሪቀ ውስተ ቅናውቲክሙ። 10#1ቆሮ. 9፥8-15፤ 1ጢሞ. 5፥18። ወኢጽፍነተ ለፍኖት ወኢ ክልኤ ክዳናተ ወኢ አሣእነ ወኢ በትረ እስመ ይደልዎ ዐስቡ#ቦ ዘይቤ «ሲሳዩ» ለዘይትቀነይ። 11ወውስተ ሀገር እንተ ቦእክሙ ወእመኒ አብያት ተሰአሉ ወበሉ ለመኑ ይደልዎ ሰላም በውስቴታ ወህየ ኅድሩ እስከ አመ ትወፅኡ። 12#ሉቃ. 10፥5-7። ወበዊአክሙ ውስተ ቤት ተአምኅዎሙ፤ 13#ኢሳ. 52፥7። ወለእመ ይደልዎ ለውእቱ ቤት ይኅድር ሰላምክሙ ላዕሌሁ ወእመሰ ኢይደልዎ ይግባእ ሰላምክሙ ላዕሌክሙ። 14#ሉቃ. 10፥11፤ ግብረ ሐዋ. 13፥51። ወለዘሰ ኢተወክፈክሙ ወኢሰምዐክሙ ነገረክሙ ወፂአክሙ አፍኣ እምይእቲ ቤት ወእምይእቲ ሀገር ንግፉ ጸበለ እገሪክሙ። 15#ሉቃ. 10፥14፤ ሕዝ. 16፥48-53። አማን እብለክሙ ከመ ይረክባ ሣኅተ ምድረ ሰዶም ወገሞራ አመ ዕለተ ደይን ፈድፋደ እምይእቲ ሀገር። 16#ሉቃ. 10፥3፤ ሮሜ 16፥19፤ ኤፌ. 5፥15። ወናሁ አነ እፌንወክሙ ከመ አባግዕ ማእከለ ተኵላት ኩኑ እንከ ጠቢባነ ከመ አርዌ ምድር ወየዋሃነ ከመ ርግብ። 17#24፥9፤ ማር. 13፥9-13፤ ሉቃ. 21፥12-17። ወተዐቀቡ እምሰብእ እኩያን እስመ ያገብኡክሙ ውስተ አዕዋዳት ወይቀሥፉክሙ በምኵራባቲሆሙ። 18#24፥14፤ ግብረ ሐዋ. 25፥23፤ 24፥9። ወያገብኡክሙ ኀበ መሳንፍት ወነገሥት በእንቲኣየ ከመ ይኩን ስምዐ ላዕሌሆሙ ወላዕለ አሕዛብ። 19#ሉቃ. 12፥11። ወሶበ ያገብኡክሙ ኢተኀልዩ ዘትነብቡ ወዘትትናገሩ እስመ ይትወሀበክሙ በይእቲ ሰዓት ዘትትናገሩ። 20እስመ ኢኮንክሙ አንትሙ ዘትትናገሩ አላ መንፈሱ ለአቡክሙ ሰማያዊ ውእቱ ይትናገር በላዕሌክሙ። 21ወያገብእ እኍ እኅዋሁ ለሞት ወአብኒ ውሉዶ ወይትነሥኡ ውሉድ ላዕለ አዝማዲሆሙ ወይቀትልዎሙ። 22#24፥13። ወትከውኑ ጽሉኣነ በኀበ ኵሉ ሰብእ በእንተ ስምየ ወዘሰ አዝለፈ ትዕግሥቶ ውእቱ ይድኅን። 23#16፥28። ወሶበ ይሰድዱክሙ እምዛቲ ሀገር ጕዩ ውስተ ካልእታ አማን እብለክሙ ኢይትፌጸማ አህጉረ እስራኤል እስከ ሶበ ይመጽእ ወልደ ዕጓለ እመሕያው። 24#ሉቃ. 6፥40፤ ዮሐ. 13፥16፤ 15፥20። አልቦ ረድእ ዘየዐቢ እምሊቁ ወኢገብር ዘየዐቢ እምእግዚኡ። 25#12፥24፤ ዮሐ. 8፥28-49። መጠኑ ለረድእ እምከመ ኮነ ከመ ሊቁ ወለገብርኒ ከመ እግዚኡ ወለእመ ኮነ ይቤልዎ ለበዓለ ቤት በብዔል ዜቡል ያወፅኦሙ ለአጋንንት እፎ ፈድፋደ ለሰብአ ቤቱ። 26#ሉቃ. 12፥2-7። ኢትፍርህዎሙኬ እንከ እስመ አልቦ ክዱን ዘኢይትከሠት ወአልቦ ኅቡእ ዘኢይትዐወቅ። 27#ማር. 4፥22፤ ሉቃ. 8፥17። ዘነገርኩክሙ በጽልመት ንግርዎ በብርሃን ወዘኒ አልኈሰስኩ ውስተ እዝንክሙ ስብክዎ በዲበ አንሕስት። 28ኢትፍርህዎሙኬ ለእለ ይቀትሉ ሥጋክሙ ወለነፍስክሙሰ ኢይክሉ ቀቲሎታ ወባሕቱ ፍርህዎ ለዘቦ ሥልጣን ወይክል እምድኅረ ቀተለ#ቦ ዘኢይጽሕፍ «እምድኅረ ቀተለ» ነፍሰ ወሥጋ ኅቡረ አኅጕሎ በውስተ ገሃነም። 29አኮኑ ክልኤቲ አዕዋፍ ይሠየጣ በክልኤ ጸሪቀ አሶርዮን ወአሐቲ እምኔሆን ኢትወድቅ ውስተ ምድር ዘእንበለ ያእምር አቡክሙ ሰማያዊ። 30ወለክሙሰ ሥዕርተ ርእስክሙኒ ኵሉ ኍሉቍ ውእቱ። 31ኢትፍርሁኬ እስመ እምብዙኅ አዕዋፍ ትኄይሱ አንትሙ። 32#ማር. 8፥38፤ ሉቃ. 12፥8፤ ሮሜ 10፥9-10። ኵሉ እንከ ዘየአምን ብየ በቅድመ ሰብእ አነሂ አአምኖ በቅድመ አቡየ ዘበሰማያት። 33#ሉቃ. 9፥26፤ 2ጢሞ. 2፥12። ወለዘሰ ክሕደኒ በቅድመ ሰብእ አነሂ እክሕዶ በቅድመ አቡየ ዘበሰማያት። 34#ሉቃ. 12፥51-53። ኢይምሰልክሙ ዘአምጻእኩ ሰላመ ለምድር አላ መጥባሕተ። 35ወመጻእኩሰ እፍልጥ ብእሴ እምአቡሁ ወወለተኒ እምእማ ወመርዓተኒ እምሐማታ። 36ወሰብአ ቤቱ ይፃረሮ ለሰብእ። ዘያፈቅር አባሁ ወእሞ እምኔየ ኢይደሉ ሊተ ወኢይክል ይፀመደኒ። 37#ዘዳ. 33፥9፤ ሉቃ. 14፥26። ወዘያፈቅር ወልዶ ወወለቶ እምኔየ ኢይደሉ ሊተ ወኢይክል ይፀመደኒ።#ቦ ዘኢይጽሕፍ «ወኢይክል ይፀመደኒ» 38#16፥24-25፤ ማር. 8፥34-38። ዘኢያጥብዐ ወዘኢነሥአ መስቀለ ሞቱ ወዘኢተለወኒ ድኅሬየ ኢይደሉ ሊተ ወኢይክል ይፀመደኒ። 39#ሉቃ. 17፥33፤ ዮሐ. 12፥25። ዘረከባ ለነፍሱ ለይግድፋ ወዘሰ ገደፋ ለነፍሱ በእንቲኣየ ይረክባ። 40#18፥5፤ ሉቃ. 10፥16፤ ዮሐ. 13፥20። ዘኪያክሙ ተወክፈ ኪያየ ተወክፈ ወዘኪያየ ተወክፈ ተወክፎ ለዘፈነወኒ። 41ዘተወክፈ ነቢየ በስመ ነቢይ ዐስበ ነቢይ ይነሥእ ወዘተወክፈ ጻድቀ በስመ ጻድቅ ዐስበ ጻድቅ ይነሥእ። 42#25፥40። ወዘአስተየ ለአሐዱ እምእሉ ንኡሳን ጽዋዐ ማይ ቈሪር ባሕቲቶ በስመ ረድእየ አማን እብለክሙ ኢየኀጕል ዐስቦ።
Pilihan Saat Ini:
ወንጌል ዘማቴዎስ 10: ሐኪግ
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk