Naiˍ htangˍ 1
1
Ang hkawˍ laˉ sa luiˍ biˍ naeˍ uiˉ awˍ lawng
1Htawˉhpiˆluˆ veuˉ, Yeˍsuˆ ang buinˉ kanˉ tangˍ yao vaˍ jiˍ maˍ jiˍ veu ca yao tawngˍ tin veu hkeu nae buingˍ htaˍ htaˍ veu ta laengˉ laeˍ jiˍ awˍ lawng uiˉ kaˉ huˍ veu htiˍ pap hingˉ hkaoˉ veu ga nawng na taemˉ nga laˍ byaˇ. 2Buingˍ htaˍ htaˍ veu yang baˍ ta laengˉ laeˍ beu, Ang hkawˍ laˉ ang seungˍ sangˉ mangˉ na cuˉ yao, yang cheˉ yuˉ jiˉ naiˍ htangˍ uiˍ na ang tangˍ piˍ saˍ jiˍ. 3Yang hkamˉ siˉ jiˉ nawngˍ ngeu, hanˍ cheˍ nuing hkaoˉ veu, ta peˍ uiˍ na yang ang to hingˉ piˉ myangˉ yao, Hpaˍcaoˍ beu ang meungˉ lawng hingˉ upˍ yao maˍ biˍ jiˍ. Yang a sak teˍ yaˍ yao caˉ suing ngaeˉ lawng na yumˉ naeˉ uiˉ saˍ laiˍ sak seˍ ang byaˍ ceuˍ ha yao piˉ myangˉ jiˉ. 4Yawng hpawm lang yao ca beu, Yeˍsuˆ yawng na ha biˍ jiˍ hingˉ ngaˍ, Yeˍruˆsaˍlaemˍ vengˍ hkaoˍ veu baˍ awkˍ taw aeˉ beun jo. Ga kawngˉ nawng ya kyaˍ peunˍ jiˉ A vangˉ beu saˉ caˉ tangˍ hingˍ puing kawˉ laˉ beu tiˍ hkeu nawng hawˍ yao ca voˍ. 5Yoˉhanˍ nawˍ langˉ hkaoˉ veu baˆtiˆsamˍ piˍ laˍ naeˍ. Hta yao muiˉ, nawng ngaˍ baˍ mangˍ nae Ang hkawˍ laˉ ang seungˍ sangˉ hkaoˉ veu baˆtiˆsamˍ ya hkamˉ buˉ naeˉ nae Yeˍsuˆ yawng na ha biˍ jiˍ.
Yeˍsuˆ buingˍ htaˍ htaˍ veu lae laeˍ jiˍ
6Haeˉ mae yawng hpawm lang yao ca beu, yawng ciˍ jiˍ hingˉ ngaˍ, Ang suingˉ veuˉ, ya muiˉ naˇ Iˉsaˍreˍlaˆ changˉ ceuˉ uiˉ na ang meungˉ hingˉ piˍ laeˍ naeˍ la nae Yeˍsuˆ na naˉ jiˉ. 7Yeˍsuˆ yawng na ha laeˍ biˍ jiˍ. Hpaˍcaoˍ tanˉ hkoˇ hkaoˉ veu kuitˆ chae yao chiˉ jiˉ ang nyamˍ hingˍ na nawng ya bae naeˉ uiˉ aˉ hkvangˍ na baˍ loˍ. 8Hta yao muiˉ, Ang hkawˍ laˉ ang seungˍ sangˉ mangˉ nawng htaˍ veu hkeu lui nae ca beu, nawng laˍ htiˍ tanˉ hkoˇ na ya naeˉ yaˇ. Haeˉ mae beu, Yeˍruˆsaˍlaemˍ vengˍ veu tangˍ yao Yuˉdaˆ ang meungˉ, Saˍmaˍriˆ ang meungˉ nae nuingˉ chaˍ htaˍ ningˉ keung cawtˍ ga beu awˍ lawng ningˉ sak seˍ hkamˉ naeˉ uiˉ changˉ ya hpeuˍ naeˍ yaˇ nae Yeˍsuˆ yawng na ha biˍ jiˍ. 9Yang haeˉ mae ciˍ peunˍ yao, ta peˍ uiˍ yang na hu yao ca beu, Hpaˍcaoˍ yang na chiˍ ta laeˍ yao, yawng hu myangˉ lin lin beu tiˍ hkeu buingˍ hkaiˍ uiˍ yang na htumˉ yaˍ yao suiˍ ta laengˉ jiˉ. 10Yeˍsuˆ ta yao lae naeˉ na ta peˍ uiˍ buingˍ htaˍ veu hu laeˍ yao ca beu, pawˍ lawˍ chawnˍ nae uiˉ hkaˍ lao tum nga laeˍ jiˍ uiˉ changˉ nyiˍ hu htiˍ chitˍ nae taw laˉ yao yawng htang veu cung lui jiˉ. 11Yaˉ yetˍ ciˍ jiˍ yang, Gaˍliˉlaeˉ changˉ yawng veuˉ, ba ceuˉ ha yao nawngˍ ngaˍ buingˍ htaˍ veu hu laeˍ ngaeˇ. Nawng na hpakˍ lang yao buingˍ htaˍ veu chiˍ ta laeˍ jiˍ Yeˍsuˆ ningˉ maˇ nawng mae nuing suiˍ huˍ veu buingˍ htaˍ veu ta laengˉ laeˍ jiˍ ningˉ lawˉ htiˍ cangˍ lui laeˍ naeˍ yaˇ nae ha biˍ jiˍ.
Yuˉdaˆ Iˉsaˍkaˍriˍokˆ na hpeuˍ tang naeˉ mangˉ na cheˉ yuˉ jiˉ
12Haeˉ mae beu, ta peˍ uiˍ Saˍlongˍ nae maengˉ jiˉ miˉ kuingˍ veu ca yao Yeˍruˆsaˍlaemˍ vengˍ veu lui laeˍ jiˍ. Miˉ kuingˍ hingˍ nga Yeˍruˆsaˍlaemˍ vengˍ na baˍ veuˍ lang ga. Vanˍ sing nuing veu ya yawˍ naeˍ laˉ mawk#1:12 htiˍ kiˍloˍ laˉ mawk naˇ veuˍ lang naeˉ. 13Yawng vengˍ hkaoˍ veu lui lae yao hpawm lang myang jiˉ yumˉ ang htaˍ htaiˍ hingˍ veu ta yao lae jiˉ. Changˉ hingˉ uiˉ aˍ Peˍtruˆ, Yoˉhanˍ, Yaˍkok, Anˍdreˍ, Hpiˆliˆpuˆ, Htoˉmaˆ, Baˍhtawˉlaˍmaeˉ, Maˍhtaeˍ, Aˍlaˍhpaeˉ beu ang yaˍ Yaˍkok, Siˉmunˍ Zeˍluˆ changˉ ang muˉ nae Yaˍkok beu awˍ htaˍ veu ang yaˍ Yuˉdaˆ yawng yaˇ. 14Yawng hkaˉ hko laˉ hko uiˉ nae hkaˍ ba yaˍ htiˍ baˍ uiˍ ta ta, Yeˍsuˆ beu ang muing Maˍriˆ nae yang beu ang hpaeˉ htiˍ baˍ uiˍ ta ta, nuing ba htuˍ yaˍ laˉ mae yawng aˉ lawˍ beun muiˉ ang buinˉ paˉ jiˉ. 15Hingˉ nyamˍ hkaoˍ veu yumˉ naeˉ saˉ naeˉ uiˉ changˉ htiˍ pakˍ nyiˍ cheˍ hu laˉ mae hpawm lang yao ca jiˉ changˉ kawngˉ nuingˉ veu Peˍtruˆ hta laˉ yao hkai jiˉ yang, 16Yaˍ changˍ mawngˉ namˉ yawng veuˉ, Camˉ lik hkaoˉ veu taemˉ yao chiˉ jiˉ ningˉ ngaˍ ya puing laˉ naeˉ maˉ manˉ yaˇ. Hingˉ ngaˍ aˉ lumˍ nae baoˉ vaˍ, Yeˍsuˆ na hpui naeˉ uiˉ changˉ na kaˉ ba maˍ biˍ naeˍ mangˉ Yuˉdaˆ lawng hingˉ na kaˉ huˍ veu muiˉ Ang hkawˍ laˉ ang seungˍ sangˉ Daˍvet beu miˍ tu na cuˉ yao ciˍ saˍ jiˍ hingˉ tangˍ yaˇ. 17Yuˉdaˆ nawˍ gu muˉ kawngˉ htuˍ yaˍ laˉ mae ca yao gu kawngˉ htuˍ yaˍ laˉ mae kanˉ vaˍ naeˍ changˉ htiˍ hu yaˇ. 18(Changˉ hingˉ maˇ baˍ sui baˍ pawng nae uiˉ kanˉ na vaˍ yao, ya jiˉ ang huˍ hingˍ nuingˉ chaˍ htiˍ tawngˍ vuiˉ yao, yang heung yao siˉ yao, hpaˍ pawng hpa yao ang uˉ uiˉ taw hko lui biˍ jiˍ. 19Hingˉ lawng hingˉ na Yeˍruˆsaˍlaemˍ vengˍ veu ca naeˉ changˉ uiˉ hkaˉ hko laˉ hko ya bae yao, nuingˉ chaˍ hingˍ na yawng tangˍ nae Aˍkeˍdaˍmaˍ nae maengˉ biˍ jiˍ. A tekˆ paeˍ yangˍ shiˍ nuingˉ chaˍ nae ha naeˉ yaˇ).
20Chiˍ mawng naeˉ ang laiˍ uiˍ hkaoˍ veu ningˉ mae taemˉ saˍ jiˍ.
Yang ca kyaˉ hingˉ ngaˍ changˉ ang kyap piˉ hpeuˍ vo. Changˉ htiˍ hu na muiˉ baˍ piˍ ca. Yang beu aˉ yaˍ hingˍ na muiˉ hao na ya piˍ laeˍ biˍ vo nae taemˉ saˍ jiˍ.
21-22Camˉ lik hkaoˉ veu taemˉ saˍ jiˍ lawˉ, Yeˍsuˆ teˍ laˉ laeˍ naeˍ uiˉ awˍ lawng gu hkaoˉ veu saˉ hkiˉ hkamˉ naeˉ uiˉ changˉ htiˍ hu loˉ naeˉ. Changˉ hiˉ maˇ, Ang suingˉ Yeˍsuˆ Yoˉhanˍ kawngˉ baˆtiˆsamˍ hkamˉ yuˉ jiˉ hingˉ nuing veu tangˍ yao, gu kawngˉ htuˍ yaˍ laˉ mae aeˉ laˉ naeˉ ang nyamˍ hkaoˍ veu ca yao gu na hpakˍ nga saˍ laˍ yao buingˍ htaˍ veu ta laengˉ laeˍ beu tiˍ hkeu gu kawngˉ ca naeˉ uiˉ changˉ htiˍ hu ya hpeuˍ naeˍ yaˇ nae Peˍtruˆ ciˍ jiˍ. 23Haeˉ mae yao, yawng changˉ nyiˍ hu beu ang maengˉ na haoˉ jiˉ. Yoˉsaep nae maengˉ jiˉ htiˍ hu maˇ hao yang na Yuˉtuˆ nae muiˉ haoˉ yao htiˍ baˍ baˍ yang na Baˍsaˍbaˆ nae maengˉ jiˉ. Nyiˍ hu htiˍ hu maˇ Maˍhtiˆ nae maengˉ jiˉ. 24-25Yawng ang buinˉ paˉ yao ciˍ jiˍ yang, Changˉ yaˍ hkaˉ hko laˉ hko beu nuing ba na bae yao ca naeˉ mangˉ Hpaˍcaoˍ veuˉ, Yuˉdaˆ maˇ ta peˍ beu aˉ yaˍ na paek taw saˍ yao yang ca kyaˉ hingˉ keung laengˉ laeˍ yao siˉ byaˇ. Yang beu kanˉ na vaˍ laeˍ naeˍ uiˉ saˍ laiˍ, ta peˍ beu aˉ yaˍ hingˍ na ya naeˉ uiˉ saˍ laiˍ nyiˍ hu ningˉ hkaoˉ veu nang cheˉ yuˉ yao chiˉ jiˉ htiˍ hu mangˉ na maˍ lao nae ang buinˉ paˉ jiˉ. 26Haeˉ mae beu, yaˉ yetˍ beu ang maengˉ hingˉ na taemˉ yao ang laiˍ cawk yao Maˍhtiˆ beu ang maengˉ hingˉ na cawk ya jiˉ. Haeˉ mae yao, ta peˍ htiˍ cheˍ htiˍ hu uiˉ kawngˉ yang awngˉ yao lae jiˉ.
Pilihan Saat Ini:
Naiˍ htangˍ 1: pyy
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2022, Wycliffe Bible Translators, Inc. All rights reserved.