Mateo 3
3
II. ESUSËN BEDANQUIN NABANAID
(3.1—4.25)
Uan acten mentoanquidën chuibanaid
(Madc. 1.1-8; Duc. 3.1-9, 15-17; Uan 1.19-28)
1Adash iuecquio ictanniashien Uan Nuquin Papa tantiabenquido acten mentoquid yampanëdash. Nidaid Udea caid yacno shubu nibëdacno capucuennequin chuibennequid nepanëdash. 2Adquid icquin naden Esus chote chuibampanëdash: Mimbi icsambuen naid ënash Nuquin Papa tantiec bëdambuec tabadta. Nuquin Papan namiaidquio choeque, quequin chuibampanëdash. 3Aden Uan chote chuiquin naden Nuquin Papan ambi oncamiaid Isayas dada uamepampic:
Shubu nibëdacno capuquin cumapenen cuënac matses chochosho:
Chuiquid tapambo choec, queshun podquied nacnenacbimbuen:
Nuquin Icbombo choeque.
Mimbi icsambuen naid ënash bëdambuec tabadta, quequin chuibanendac,
quequin Isayasën chuipampic.#3.3 Isa. 40.3 tantiaquin nëid dada uapanëdash. Aid istuidtanquin isbanta.
4Nadquid Uan nepanëdash. Aton dashcute nëish iua dapa camecho caidën bu daëdcaid dasiuidpanëdash. Tsipantebic nëish iua bitsi nacnenaid tsiupanëdash. Aton pete bacumbëd capishtobiecquid icpanëdash. 5Aidën Nuquin Papan Chiaid chuibansho tantianuec nëidted yacnocquido matses chochopanëdash. Nëidic shubu dadpen icquid Edusaden yacnocquido. Nëidic nidaid cuëshë Udea caid yacnocquido. Nëidic acte Odan caid cuëman tabadquido yec quec chochopanëdash. 6Adec chochoash tabadquin Uanën chuisho tantiash: Aden icsambuen naombique. Umbi icsambuen naid ënnu, quequin chuisho tantiashun Uanën acte Odan caidën mentobampanëdash.
7Adnubien padiseobobëd saduseobo#3.7 Padiseobobëd saduseobo: Padiseobo isadaidbo Moisesën chiampid namequido nepanëdash. Saduseobobic: Matses uënësaid uincuenenquio iquendac, quequido nepanëdash. Uanën acten mentosho isec chochopanëdash. Aido chochosho issun Uanën: Nisibimbuecquido yec mibitedi icsambocquido nec. Adquid icsho ¿tsuntsin: Nuquin Papan natiamequin cuidte anuenaneque. Tantiatan, quequin chiac chocho? 8Mentomete bunec Nuquin Papan Chiaid niac niacbuedi ënash Aid tantiec bëdambuec tabadta. 9Ubipadquid Abadauanën tsiuecquidouidtsëqui icsho Nuquin Papan ubi bëdambuen isec, quequin tantienda. Abadauanën nampicpaden abi tantiaquidien Nuquin Papan bëdambuen isec. Mimbi bëdambuen tantiatiapimbo icsho issun nëid cuënotebi matses uashun Nuquin Papan Abadauampadquid icmetsiashe. Nuquin Papambo tantiata, quepanëdash Uan. 10Aden chiashic: Cute bacuëesa icsho dëdshun cuidi mëteshun tsindoshon icbon nëdëncaic. Aden nëdëncacbimbuen icsambuen nabanquido chian annëdënquequid Nuquin Papan nësecaindac, quepanëdash Uan padiseobobëta saduseobo chiec.
11Adshumbic padpiden chuiquin: Umbi icsambuen naid ënash Nuquin Papa tantiaquid nebi, quequid mibi utsi utsiec icsho acten mentobanquin chuibanquid nebi. Umbi chuibannubi cun tsiuec utsi choshon aidëntsen chuibanendac. Aidi ubi udictsëcquidquio yec nadatiambocquin nabanquid icsho ubi icsaquid icquin abi tapucudaid chicnuec dacuëdtsiabi. Aidi choshon: Ubi tantiaquid nec, queshun cute nëdënquequidbimbuecnuc ismequin aton Mayan Bëda menendac.#3.11 Nuquin Papan tauaquin aton Mayan Bëda Esus tantiaquido menete iste bunquin E.Ch.N. 2.14 ista. 12Adosbiecquid tidico caid ëshë uashun icbon dayunuaic. Adoshombic bitsi tsindotanquin nëdëncaic. Adoacbimbuen abi tantiesabo icsho ënëdenquio yec chian annëdënquequid Nuquin Papan nësecaindac. Adoshombic abi tantiaquidotedi abi yacno puduedmendac, quepanëdash Uan acten mentoanquid.
Esus acten mentoaid
(Madc. 1.9-11; Duc. 3.21-22; Uan 1.32-34)
13Adec acten mentoanquid icquin acte Odan caidën matses mentobampanëdash Uanën. Adnubien Esus: Ma ubitsen Uanën acten mentono, quianec nidaid Cadidea yacnouësh choash: Ubitsen mento, quetuidpanëdash. 14Adshobien Uanën: Padi. Nuquin Papan Chomiaid icquin mimbi ubi nac bëdambo ictsiash. ¿Atotsi queshun ubi aden chie? queshobien: 15En na. Bëdambo iquec. Ubi mentoquin mimbi Nuquin Papan chiacpadombuen bëdambuen natsiaque. Ubi acten mento, quesho tantiashun Esus mentopanëdash Uanën.
16Aden mentoboc Esus pudundonobien abu canchedec shëcuë yampanëdash. Adnubien auëshquiobi oshpodcobimbuecquid budec Nuquin Papan Mayan Esusbëd icnuec budsho ispanëdash. 17Adnubien abucuëshquio Nuquin Papa onquepanëdash: Nëid umbi tantiaidquio Cun Madombo nec. Umbi chiacpadombuen nasho isash bëdambo iquebi, quepanëdash Esus caic.
Pilihan Saat Ini:
Mateo 3: mcfNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023, Wycliffe Bible Translators, Inc. All rights reserved.