San Lucas 15

Jnco³ va³rre² xi³ qui³cha³

(Mt. 18:10-14)

1Ji³cho²čhian³-le⁴ Jesús nca³tsˀi³ cho⁴ta⁴ xi³ vˀe¹ña³ taon⁴va³sen³ cao⁴ cho⁴ta⁴je¹ nca³ cjoi⁴nčhˀoe¹-le⁴. 2Tjio¹si¹cˀa³xqui⁴che¹ cho⁴ta⁴ fariseos cao⁴ cho⁴ta⁴ scribano xi³ tˀa³tsˀe⁴ Jesús, qui³tso²: Je²-vi⁴ nta³ fa²cao⁴ cho⁴ta⁴tsˀen⁴, cˀoa⁴ cjen²cao⁴. 3Cˀia⁴ Jesús qui³tso²-le⁴ je² cjoa⁴xco¹son²-vi⁴. 4ˀya¹ xˀin⁴ xi³ jon²-vi⁴ xi³ tjin¹-le⁴ jnco³ ciento va³rre², cˀia⁴ tsa² jnco³ va³rre²-ve⁴ cha⁴, a³ tsi² si⁴²ca³tio¹ xi³ ño³can³ cao⁴-ni³ čhja³ˀaon²ño³-ve⁴ ya⁴ jin³jña¹-ve⁴, cˀoa⁴ coai⁴ ca¹sjai³ xi³ ca²cha³ jo³ sa³ˀnta³ coan⁴sjai³-le⁴. 5Cˀia⁴ nca³ coan⁴sjai³-le⁴, coa⁴²ntjai²čhja³ cao⁴ cjoa⁴tsjoa³. 6Cˀia⁴ nca³ cjoa⁴ˀai¹ ntˀia³-le⁴ coi⁴nchja⁴ma³ña³-le⁴ mi²yo⁴-le⁴ cao⁴ xi³ čhian³ ntˀia³-le⁴, coi⁴tso⁴-le⁴: Ca²ta³ma³tsjoa³-no³ cao⁴ an³, nca⁴ je³ca²ma³sjai³ va³rre²-na⁴ xi³ qui³cha³. 7Cˀoa⁴xin³-no³ nca³ cˀoa⁴-sˀin² nqui²sa⁴ tse³ cjoa⁴tsjoa³ sˀe⁴ ya⁴ ncˀa³jmi³ xi³ tˀa³tsˀe⁴ jnco³ cho⁴ta⁴tsˀen⁴ xi³ si⁴²cˀa³ntjai²ya³ cjoa⁴fa³ˀai³tsjen³-le⁴ cao⁴-ni³ tsa² ño³can³ cao⁴-ni³ čhja³ˀaon²ño³ xi³ tjin¹-le⁴ cjoa⁴qui²xi⁴, xi³ tsi² tsa² ma³chjen¹-le⁴ nca³ si⁴²cˀa³ntjai²ya³ cjoa⁴fa³ˀai³tsjen³-le⁴.

Jnco³ ˀnti¹taon⁴čhoa³ xi³ qui³cha³

8A³xo⁴ ˀya¹ chjon⁴²-ni³ xi³ ti¹jna³-le⁴ te³ ˀnti¹taon⁴čhoa³, cˀia⁴ tsa² jnco³ ˀnti¹taon⁴čhoa³ si⁴²cha³, a³ tsi² coa⁴ca² lˀi¹, cˀoa⁴ cˀoe⁴²cha³ ntˀia³-le⁴, nˀion¹ nta³ coa⁴²sjai³ jo³ sa³ˀnta³ nca³ coan⁴sjai³-le⁴. 9Cˀia⁴ nca³ je³coan³sjai³-le⁴, coi⁴nchja⁴ma³ña³-le⁴ mi²yo⁴-le⁴ cao⁴ ya¹nchjin¹ xi³ čhian³ ntˀia³-le⁴, coi⁴tso⁴-le⁴: Ca²ta³ma³tsjoa³-no³ cao⁴ an³, nca⁴ je³ca²ma³sjai³-na³ je² ˀnti¹taon⁴čhoa³-vi⁴ xi³ qui³si³cha²³. 10Cˀoa⁴xin³-no³ nca³ cˀoa⁴-sˀin² tjin¹ cjoa⁴tsjoa³ nqui³xcon⁴ a²ncje⁴-le⁴ Ni³na¹ xi³ tˀa³tsˀe⁴ jnco³ cho⁴ta⁴tsˀen⁴ xi³ si⁴²cˀa³ntjai²ya³ cjoa⁴fa³ˀai³tsjen³-le⁴.

Jnco³ ti³ xi³ qui³cha³

11Cˀia⁴ Jesús qui³tso²: Jnco³ cho⁴ta⁴ xi³ jao² ma³ xti³xˀin⁴-le⁴. 12Je² xi³ ma³ˀnti¹ qui³tso²-le⁴ nˀai³-le⁴: Nˀai³, tˀai²-nai¹³ cjoa⁴tjao²-na⁴ jo³ tjin¹ xi³ an³ vˀa³cao⁴-na³ i⁴ nqui³chao³-vi⁴. Cˀoa⁴ nˀai³-le⁴ qui³si³xcoa⁴-le⁴ nqui³chao³-ve⁴. 13Li²coi³ ncjin² ni⁴čhjin³ coan³scan³-ni³, je² ti³ xi³ ma³ˀnti¹ tsa³cˀe¹xco¹ nca³yi³je³ tso³jmi²-le⁴. Qui³tˀa³xin² jnco³ ˀnte³ xi³ cjin³tˀa³. Ya⁴ qui³si³cji³tson¹ xi³ qui³tsˀai²cjoa⁴tjao²-le⁴, to⁴ña³qui³ chˀao³ qui³cao⁴ yao³-le⁴. 14Cˀia⁴ nca³ nca³yi³je³ je³qui³si³cje³ya³, jnco³ cji³nčha¹ xi³ nˀion¹ ja³ˀai³ ya⁴ˀnte³. Ñˀain³ tsa³cˀe²jna³ nca³ je². 15Qui³, qui³tˀa³jnco³-le⁴ cho⁴ta⁴ na⁴xi⁴na³nta¹ ya⁴ ˀnte³-ve⁴. Je² qui³si³ca³sen¹ ti³-ve⁴ ya⁴ nqui³chao³-le⁴, jme¹-ni³ nca³ coai⁴ si⁴²cjen²-si¹ni³ chi⁴nca⁴. 16Cˀoa⁴ coan³me³-le⁴ ti³-ve⁴ nca³ qui³si³tse³ tsˀoa⁴ cao⁴ xca⁴ xi³ cjen² chi⁴nca⁴, cˀoa⁴ ni⁴ˀya³-jin² xi³ tsjoa¹-le⁴. 17Cˀia⁴ nca³ je³coan³nta³ya³-ni³ cjoa⁴fa³ˀai³tsjen³-le⁴, qui³tso²: Jo¹ tjin¹ ma³-ni³ cho⁴ˀnta³-le⁴ nˀai³-na⁴ xi³ cjai¹nca³ tjin¹-le⁴ nio⁴xti²la⁴ sa³ˀnta³ njen³nqui³-le⁴, cˀoa⁴ an³-ˀni³ ti²vi³ya³-nia¹³ cji³nčha¹ i⁴-vi⁴. 18Coi²so⁴tjen⁴, cjoi¹con³-le⁴ nˀai³-na⁴, cˀoa⁴xin¹-le⁴: Nˀai³, tsa³jnquia³ je¹ xi³ tˀa³tsˀe⁴ ncˀa³jmi³, cˀoa⁴ xi³ tˀa³tsi⁴. 19Li²coi³ ti⁴va³quin²-ni³na³ nca³ ˀnti¹-li⁴ cˀoin¹-na³, cˀoa⁴-sˀin² ti⁴cao⁴-nai¹³ jo³-ni³ tsa² jnco³ cho⁴ˀnta³-li⁴. 20Cˀia⁴ tsa³qui³so¹tjen⁴, ji³nčhoa³nčhˀoe² nˀai³-le⁴. Cˀia⁴ nca³ cjin³-sa³ ti¹jna³, nˀai³-le⁴ tsa³ve³ coan³ma⁴que³, qui³to²ca³nˀion¹, qui³tsoa³cja¹, nˀion¹ tsa³cˀe¹ntso³ˀa². 21Je² ˀnti¹-le⁴ qui³tso²-le⁴: Nˀai³, tsa³jnquia³ je¹ xi³ tˀa³tsˀe⁴ ncˀa³jmi³, cˀoa⁴ xi³ tˀa³tsi⁴. Li²coi³ ti⁴va³quin²-ni³na³ nca³ ˀnti¹-li⁴ cˀoin¹-na³. 22To⁴nca³ nˀai³-ve⁴ qui³tso²-le⁴ cho⁴ˀnta³-le⁴: Chˀa⁴sjao³ na³jño³ xi³ na⁴sca¹ cjoan³, ti⁴cˀa³cjao¹³ nca³ je², cˀoa⁴² tˀe²yao³ jnco³ taon⁴nco³ na⁴jma¹ntsja³, cˀoa⁴-ti⁴ tja³ya³-lao⁴³ jte¹. 23Nčhoa¹cao⁴³ nčha⁴ja⁴ˀnti¹ xi³ nchja¹, ti⁴cˀaon³. Chi⁴ne⁴², cˀoa⁴ sˀoi¹ coi⁴no⁴sje³². 24Nca⁴ je² ˀnti¹-na⁴ je²-vi⁴ je³cˀen³ tsa²cai³, cˀoa⁴ ti¹jna³con³ nqui²jnco³cˀa²-nca¹ni³. Je³qui³cha³ tsa²cai³, to⁴nca³ je³²coan³sjai³-ni³ˀni³, cˀoa⁴ tsa³cˀe¹tsˀia⁴cao⁴ sˀoi¹. 25Je² ˀnti¹-le⁴ xi³ ma³jchi¹nca³ ti¹jna³ nqui³chao³-jan¹, cˀoa⁴ qui³nčhˀoe¹-le⁴ čhjao³ cao⁴ xi³ tjio¹te², cˀia⁴ nca³ ti¹nčhoa¹čhian³ ntˀia³. 26Qui³nchja⁴-le⁴ jnco³ cho⁴ˀnta³, qui³tsi²na³nqui³-le⁴ jme¹-ni³ je²-ve⁴. 27Je² qui³tso²-le⁴: Ntsˀai³ ja³ˀai³-ni³, cˀoa⁴ nˀai³-li⁴ ca²si¹cˀen³ je² nčha⁴ja⁴ˀnti¹ xi³ nchja¹, nca⁴ to⁴cˀoa⁴²nta³ ca²tjoe¹tjao² nqui²jnco³cˀa²-ni³le⁴ ˀnti¹-le⁴. 28Cˀia⁴ coan³jti³-le⁴, cˀoa⁴ cai³-le⁴ ja³ˀa³sˀen³. Coi³ cjoa⁴ ji³tjo³-ni³ nˀai³-le⁴, cˀoa⁴ tsa³cˀe¹tsˀoa³-le⁴ nca³ cjoa⁴ˀa³sˀen³. 29To⁴nca³ je² qui³tso²-le⁴ nˀai³-le⁴: Coe⁴-ni³ coan³ ncjin² no¹ nca³ si³xa¹-le²³, ni⁴jnco³cˀa²-jin² ti²fa²ˀa⁴to³-le⁴ cjoa⁴te¹xo³ma³-li⁴. Ni⁴cˀia³-jin² tsa³cˀai²-nai¹³ ˀnti¹ti²ntso⁴ˀnti¹, jme¹-ni³ nca³ cˀoa³sje²-nia³ sˀoi¹ cao⁴ mi²yo⁴-na⁴. 30To⁴nca³ cˀia⁴ nca³ ja³ˀai³ je² ˀnti¹-li⁴ je²-vi⁴ xi³ qui³si³cje³ cjoa⁴tjao²-li⁴ cao⁴ ya¹nchjin¹sca¹, qui³ni²cˀain³ xi³ tˀa³tsˀe⁴ je² ˀnti¹nčha⁴ja⁴ˀnti¹ xi³ nchja¹. 31Cˀia⁴ nˀai³-le⁴ qui³tso²-le⁴: Ji³ ˀnti¹, i⁴² ti³jna³cao⁴ntsjai²-nai¹³vi⁴, cˀoa⁴ nca³yi³je³ xi³ tsˀan⁴ tsi⁴ ni¹. 32To⁴nca³ ma³chjen¹ nca³ sˀoi¹ coi⁴no⁴sje³², cˀoa⁴ cˀoai⁴-le⁴² cjoa⁴tsjoa³ yao³-na¹, nca⁴ je² ntsˀai³-vi⁴ je³cˀen³ tsa²cai³, cˀoa⁴ ti¹jna³con³ nqui²jnco³cˀa²-nca¹ni³. Je³qui³cha³ tsa²cai³, to⁴nca³ je³coan³sjai³-ni³ˀni³.

Pilihan Saat Ini:

San Lucas 15: mauDBL

Sorotan

Salin