Luuka 23
23
ɄYɨɨsʉ ihɨgwa kwa Pilato
(Mataayo 27:1-2, 11-14; Maliko 15:1-5; Yohana 18:28-38)
1Kʉmbele, avavaha va Vayahudi valya vooni vakɨɨma, vakammɨlɨka ʉYɨɨsʉ kwa Pilato. 2Vakatengʉla ʉkʉtsova itsa kʉmmɨga valɨkʉta, “Ʉmuunu ʉjʉ, tʉkambwene wʉ imanyiisa ikulongwi itsʉ tsikʉvavɨɨka avaanu ʉkʉjɨsambʉkɨla ɨsilikali mu kɨlʉnga kiitu. Ibeetsa avaanu ʉkʉsonga ɨsongo kwa Kaisali, ikange itsova ʉkʉta ʉmwene vɨ Kɨlɨsiti, ʉNkʉlʉdeeva.”
3ɄPilato akambʉʉtsa ʉYɨɨsʉ akata, “Ndeeti, ʉve veeve Nkʉlʉdeeva va Vayahudi?” ɄYɨɨsʉ akamwanda akata, “Ʉve veeve ʉtsovile.” 4Apo, ʉPilato akavavʉʉla avavaha va vateeketsi, paninie nɨ kɨpʉga kya vaanu akata, “Nandikʉvʉvona ʉvʉnangi kʉ muunu ʉjʉ.” 5Avaanu valya vakasimiilitsa vakata, “Mbona imanyiiso tsa mwene tsikʉvapelela avaanu ʉkʉjɨsambʉkɨla ɨsilikali! Akwɨtsiitse imanyiiso tsa mwene mu kɨlʉnga ɨkɨ kyoni ɨkya Yuuda, aatengwe kʉ Galilaya ʉkʉsikila ʉpwʉ asiike nakʉ kʉnʉ.”
6ɄPilato wʉ apʉliike ago, akavʉʉtsa alʉmanye ʉYɨɨsʉ nda muunu va kʉ Galilaya. 7Wʉ alʉmanyile ʉkʉta muunu va kʉ Galilaya, ihʉma mu vʉtwa wa Helode, akammɨlɨka kwa Helode ʉlwakʉva isigono isyo, ʉHelode aale baaho pa Yelusalemu.
ɄHelode ikʉmbʉʉtsa ʉYɨɨsʉ
8ɄHelode wʉ ambwene ʉYɨɨsʉ, akahovoka siitso, ʉlwakʉva aapʉlɨkaga ikulongwi tsa mwene, ikange isigono syongosu alɨkʉnogwa ʉkʉmbona. Pwʉ lɨno, alɨkʉhʉʉvɨla ʉkʉta ikɨlolela jyʉmwene ɨkɨdego ɨkyʉ ʉYɨɨsʉ iweesa ʉkʉvomba. 9Pwʉ ʉHelode akambʉʉtsa ʉYɨɨsʉ amamenyu mongosu, ʉmwene ʉYɨɨsʉ naamwande kɨɨnu. 10Avavaha va vateeketsi na vamanyisi va ndagɨlo vakɨɨma nʉ kʉtsova siitso itsa kʉmmɨga ʉYɨɨsʉ.
11Pwʉ ʉHelode na vasikali va mwene vakatengʉla ʉkʉnkinila ʉYɨɨsʉ nʉ kʉnʼjejevʉla. Vakanswalɨtsa ɨmisabwa gya lʉtogo nʉ kʉmmeka. Pwʉ ʉHelode akankilivula ʉYɨɨsʉ kwa Pilato. 12Ʉkʉhʉma ɨkɨgono ɨkyo, ʉHelode nʉ Pilato vakava vamanyaani, nʉpwʉ jɨngave isigono isyalʉtɨngʼiinie vaasʉʉliine.
ɄYɨɨsʉ ihɨgwa kwa Pilato
(Mataayo 27:15-26; Maliko 15:6-15; Yohana 18:38–19:16)
13Kʉmbele, ʉPilato akavalʉndamania avavaha va vateeketsi, na valongotsi va Vayahudi, paninie na vaanu avange. 14Akavavʉʉla akata, “Mwitsile nave kwane ʉmuunu ʉjʉ, nʉ kʉtsova ʉkʉta imanyiisa avaanu ʉkʉta vajɨhambʉkɨle ɨsilikali. Lɨno pa kulongwi itsʉ mukʉmmɨga, ndɨmbʉʉtsiitse pavʉlongolo paanyie, napeene nandɨvʉweeni ʉvʉnangi nʉvʉpamato kʉ mwene. 15Najyʉ Helode navʉweeni ʉvʉnangi kʉ mwene, kyʉ mene ankiliwe kwawe. Lɨno mulʉmanye vʉnonu ʉkʉta, ʉmuunu ʉjʉ, nakɨkʉli ɨkɨɨnu ɨkyʉ avombile, ɨkya kʉmpelela abudwe. 16Kwʉ kʉta, jiitowa isikoti, pwʉ ndikʉmbopola.” 17Lwale lwiho ɨkɨgono kya kyaka kya Pasaka, ʉPilato ʉkʉvadɨndʉlɨla avaanu ʉnkʉngwa mpamato.#23:17 Inyandʉlʉ itsinge tsa katale tsa Vʉvɨge ʉVʉvalatse natsilɨ nalwo ʉlʉkɨndɨ ʉlʉ.
18Napeene, avaanu valya vooni, vakooveela siitso paninie vakata, “Ʉmuunu ʉjwa, abudwe! Tunogwa ʉtʉvopolele ʉBalaba!” 19ɄBalaba aakʉngilwe mu kɨkʉngwa, ʉlwakʉva aavombile imbatsa nyongosu mu vʉtsenge, nʉ vʉbudi.
20ɄPilato aanogwagwa ʉkʉmbopola ʉYɨɨsʉ, pwʉ akatsova navo ikange avaanu valya. 21Napeene, aveene vakoongeletsa ʉkwoveela siitso valɨkʉta, “Ʉntovelele pa kɨdamingʼanie! Ʉntovelele pa kɨdamingʼanie!”
22ɄPilato akakilivukila ʉlwa daatu, akatsova navo ikange akata, “Atovelelwagwe pa lɨlɨku? Ʉmuunu ʉjʉ, avombile vʉnangi vʉki? Ʉne nandikʉjɨvona ɨnongwa nɨmamato kʉ mwene ɨjyʉ jikʉmpelela abudwe. Lɨno itowa ni sikoti pwʉ ndikʉmbopola.” 23Aveene vakoongeletsa ʉkwoveela vakata, “Intovelele pa kɨdamingʼanie!” Kʉ vʉmalɨlo, ʉkwoveela kwa veene kʉkavapelela ʉkwɨdɨkiwa.
24Pwʉ ʉPilato akalamula ʉkʉvomba ndʉwʉ vaanʼdoovile. 25Akambopola ʉBalaba ʉvɨ vaannogilwe, nʉpwʉ jɨngave aakʉngilwe pa nongwa jya kʉvomba imbatsa nyongosu nʉ kʉbuda avaanu. Akavasupulila avasikali ʉYɨɨsʉ pakʉta vambombele ndʉwʉ vinogwa aveene.
ɄYɨɨsʉ itovelelwa pa kɨdamingʼanie
(Mataayo 27:32-44; Maliko 15:21-32; Yohana 19:17-27)
26Avasikali wʉ vikʉmmɨlɨka ʉYɨɨsʉ kukʉmʼbuda, vakaaganila nʉ muunu mpamato, ʉvɨ aatambʉlwagwa Simoni ʉmmolwa va kʉ vʉtsenge wa Kilene. Ʉmuunu ʉjwa aahʉmile kʉ silɨmɨla. Pwʉ vakamwibata, vakambegatsa ɨkɨdamingʼanie kya Yɨɨsʉ pakʉta agege, akapɨmba kʉnʉ ikonga kʉnsana kwa Yɨɨsʉ.
27Ɨkɨpʉga kya vaanu kɨkava kikʉnkonga ʉYɨɨsʉ. Pagati pa veene avo, vaalemwo avadala ʉwʉ vɨɨgumbaga isipambaga nʉ kʉlɨla kʉ nongwa jya Yɨɨsʉ. 28Pwʉ ʉYɨɨsʉ akavagalamukila, akavavʉʉla akata, “Ʉnyie nyɨ vadala va mu Yelusalemu! Mwɨlekelwe ʉkʉlɨla kʉ nongwa jyane! Apeene, mwɨlɨlɨlage jyʉnyie na vaana viinyo! 29Mulʉmanye vʉnonu ʉkʉta isigono isikwitsa, avaanu valaata, ‘Vagatalʉsu avadala ʉwʉ vagʉmba, ʉwʉ navaholili pange kwosa!’ 30Ʉnsɨkɨ ʉgwa,
‘Avaanu valateetsaga kʉ sidugala, “Mutʉhemukile!”
Valaata kʉ sidugala isidebedebe, “Mutʉgubikile!” ’#Hoseya 10:8
31“Lola, jɨngave vivomba sivi ndavʉle, kʉ mʼbɨkɨ ʉmwigu, pwʉ jɨlaava ndeeti kʉ mʼbɨkɨ ʉgwʉmile?”#23:31 Jɨngave vivomba sivi ndavʉle, kʉ mʼbɨkɨ ʉmwigu, pwʉ jɨlaava ndeeti kʉ mʼbɨkɨ ʉgwʉmile? Amamenyu aga kwʉ kʉta jɨngave avaanu ava vivomba sivi kwa Yɨɨsʉ, ʉvɨ inʼgolosu, aVayahudi valavombelwa sivi ʉkʉlʉtɨɨlɨla. Ava vanogye ʉkwʉpɨlɨla ʉvʉkʉvɨlwa ʉvʉlʉti ʉkʉhʉma kwa Ngʉlʉve.
32Ʉnsɨkɨ ʉgwa, avasikali vakava vikʉvahɨlɨka avatulanongwa vavɨlɨ paninie nʉ Yɨɨsʉ kukʉvatovelela. 33Wʉ vasiike apoonu apaatambʉlwagwa Liheela lya Ntwe, vakantovelela ʉYɨɨsʉ pa kɨdamingʼanie. Naveene avatulanongwa valya vavɨlɨ, vakavatovelela pa sidamingʼanie, mpamato ʉlʉvasu lwa kʉndyo lwa Yɨɨsʉ, ʉjyʉnge ʉlʉvasu lwa kʉngʼɨgɨ.
34ɄYɨɨsʉ akata, “Gwe Daada, ʉvasyɨkɨle, ʉlwakʉva ʉgwʉ vivomba, navagamanyili.” Avasikali valya vakagavana ɨmisabwa gya Yɨɨsʉ, kʉ nzɨla jya kʉlagʉlɨla mu sigelelo sya veene. 35Avaanu vɨɨmile palya valɨkʉlola.
Avavaha va Vayahudi, vakatengʉla ʉkʉnʼjʉlʉlɨsa ʉYɨɨsʉ valɨkʉta, “Aavapokile avange! Lɨno, ɨngave ʉmwene vɨ Kɨlɨsiti ʉvahalilwe nʉ Ngʉlʉve, ɨpoke jyʉmwene!” 36Avasikali naveene, valɨkʉnkinila. Valɨkʉhegelela nʉ kʉmpa ɨdivai ɨngʼali, 37valɨkʉtsova valɨkʉta, “Ʉngave ʉve veeve nkʉlʉdeeva va Vayahudi, ɨpoke jyʉve!”
38Kange pakyanya pa ntwe gwa Yɨɨsʉ, paale nɨ kɨbavo ɨkyʉ kyavɨgilwe amamenyu aga, “ʉjʉ vɨ nkʉlʉdeeva va vayahudi.”
39Namwene mpamato mu vatulanongwa valya vavɨlɨ, akanʼdʉka ʉYɨɨsʉ akata, “Ʉve naveeve Kɨlɨsiti? Ɨpoke jyʉve, ʉtʉpoke nʉʉwe!” 40Ʉmwene ʉjyʉnge ʉlya ʉva vɨɨlɨ, akantanila ʉnnine akata, “Gwe! Navukʉnʼdwada ʉNgʉlʉve? Mbona twɨ vooni twingitsiiwe mu lʉvʉngʉ lʉlʉninie. 41Ʉwe tʉnogye ʉkwʉpɨlɨla ʉlʉvʉngʉ ʉlʉ, ʉlwakʉva tʉhɨgilwe kʉ nongwa jya galya ʉgwʉ tʉkagalwike. Ʉmwene ʉjʉ, navombili pange vʉnangi vʉninie.” 42Pwʉ akata, “Gwe Yɨɨsʉ! Ndidoova ʉlaava vukwingila mu Lʉdeeva lwako,#23:42 Mu Lʉdeeva lwako Mu vʉvɨge ʉvʉnge wa Kɨyunaani jɨvɨgilwe ndee Ʉpwʉ ʉlaava vukwitsa kwiva nkʉlʉdeeva. wiitse ʉngʼʉmbʉke!” 43ɄYɨɨsʉ akamwanda akata, “Tsa jɨlweli ndikʉkʉvʉʉla ʉkʉta, ɨleelo ɨjɨ vutsiiva paninie nʉʉne kʉkyanya kwa Ngʉlʉve.”
Ʉkʉswa kwa Yɨɨsʉ
(Mataayo 27:45-56; Maliko 15:33-41; Yohana 19:28-30)
44Ʉkʉtengʉla akavalɨlo ka ntanato (6) pamuunyi, ʉkʉsika akavalɨlo ka budikakʉpamato (9), ɨngʼiisi jɨkagwa mu kɨlʉnga kyoni, 45ɨlitsʉva pange lɨmulikage. Ɨlipasiya ɨlyale mu Vʉtaamo ʉVʉvalatse wa Ngʉlʉve,#23:45 Ɨlipasiya ɨlyale mu Vʉtaamo ʉVʉvalatse wa Ngʉlʉve Ɨlipasiya ɨlyo lyʉ lyene lyagavile Pavʉvalatse na Pavʉvalatse Siitso. Lola ɨpitsa jya tembile kwa Luuka 1:10. lɨkalendʉka pagati, lɨkɨgava pavɨlɨ ʉkʉhʉma kʉkyanya ʉkʉsika paasi.
46Pwʉ ʉYɨɨsʉ akalɨla kʉ limenyu ɨlivaha akata, “Gwe Daada! Ndigotola ɨnumbula jyango mu sivoko syako.” Wʉ atsovile ago, akaswa.
47Ʉmbaha va vasikali wʉ agaweene ʉgwʉ gahʉmye, akanʼginia ʉNgʉlʉve akata, “Tsa jɨlweli, ʉmuunu ʉjʉ akaale inʼgolosu!”
48Kange avaanu vooni ʉwʉ vaalʉndamiine palya, wʉ vagaweene ʉgwʉ gahʉmye, valɨkʉkilivuka kʉ nyumba tsa veene, valɨkwɨgumbagumba mu sipambaga sya veene kʉ lʉsʉsʉvalo. 49Ikange, vooni ʉwʉ vaamanyiine nʉ Yɨɨsʉ, paninie na vadala ʉwʉ vaakongaga ʉkʉhʉma kʉ Galilaya, vɨɨmile kʉvʉtale valɨkʉlola ʉgwʉ gaavombekaga.
Ʉkʉsɨɨlwa kwa Yɨɨsʉ
(Mataayo 27:57-61; Maliko 15:42-47; Yohana 19:38-42)
50-51Aalepwo ʉmuunu mpamato, ʉvɨ aatambʉlwagwa vɨ Yusufu, va kʉ Alimataya, mu kɨlʉnga kya Yuuda. ɄYusufu aale mpamato mu vavaha va Vayahudi. Ʉmwene nɨɨdɨngʼane na vanine pa kulongwi jya kʉmʼbuda ʉYɨɨsʉ, ʉlwakʉva aale inʼgolosu pamiiho ga Ngʉlʉve. Ikange, aahʉʉvɨlaga ʉkwitsa kwa Lʉdeeva lwa Ngʉlʉve.
52Pwʉ ʉmuunu ʉjʉ akalʉta kukʉnʼdoova ʉPilato ʉkʉta, antavʉle atoole ʉnsimba gwa Yɨɨsʉ pakʉta akasɨɨle. 53ɄPilato wʉ ɨdiike, pwʉ ʉmwene akalʉta kukwisa ʉnsimba pa kɨdamingʼanie. Akagʉbina mu sanda, akagʉgonia mu vʉguli#23:53 Vʉguli Lwale lwiho lwa Vayahudi va nsɨkɨ ʉgwa ʉkʉnotsa imanga tsive vʉguli mwa kʉsɨɨla avaswe. Tsyaveetsaga ʉngata ngumbwa mbaha. Pa wingililo wa manga vaadɨndaga nɨ liganga ɨlivaha. ʉwʉ waajavilwe mu lʉvasu lwa lʉnalaawe. Ʉvʉguli ʉwa, naagele ʉkʉsɨɨlwa ʉmuunu ʉjyʉnge. 54Ɨkɨgono ɨkyo, kyale kɨgono kya kwɨsaavʉla kʉ Sabato,#23:54 Kɨgono kya kwɨsaavʉla kʉ Sabato Ɨkyo kyale kɨgono kya Pakɨhaano. Pa kɨgono ɨkɨ aVayahudi vɨɨsaavʉlaga pa vʉsumbe wa kʉgʉngʉla ɨkɨgono kya veene ɨkɨvalatse ɨkya Sabato. ƗSabato ɨjyo jyatengʉlaga Pakɨhaano kʉmihe. ɨjyale piipi ʉkʉtengʉla.
55Avadala ʉwʉ viitsile paninie nʉ Yɨɨsʉ ʉkʉhʉma kʉ Galilaya, vakava paninie nʉ Yusufu kʉ vʉguli. Vakavʉvona ʉvʉguli, nʉ mwʉ vaagonehiitse ʉmmana gwa Yɨɨsʉ. 56Kʉmbele, vakakilivuka kʉ nyumba ʉkwʉ vaasikye, vakatetengʼania amafuta nʉ ntuguva ʉguvɨɨka ʉmmana gʉleke ʉkʉnuungʼa. Pwʉ ɨkɨgono kya Sabato vakagatalʉka, ʉkʉkongana ni ndagɨlo tsa Moose ʉmwʉ tsitsovela.
Nke Ahọpụtara Ugbu A:
Luuka 23: zga
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2019, Wycliffe Bible Translators, Inc. All rights reserved.