Matsiyù 4

Sùtana Yesù dzuun bo gbau min niì

(Marikì 1.12-13; Lukì 4.1-13)

1'Àyìwà, tà shɔ̀ùn, Ŋaablà re Dzia yè Yesù jaa ji be jènjàà kor'nà doùn, sànko Sànwɔbaà yè bè à dzuun bo siin mɔn.#Sɛdz 2.18; 4.15. 2Yesù yè bwèy dzyèè ko fen dzyèè fa suàn nà tɔ̀un. Tà shɔ̀ùn, dzu y'à kun. 3Tɔ̀un, dzuunbweyfabaà yè e kpɛrɛ̀ à ra, è dzin à ra ci: «Wo rìì ye ba Ŋaablà Dzin Kpir'la taki, dzin nèe kpàà ree reè rà, ci yè e lakere ba buru ì.» 4Yesù yè dzin à ra ci: «À sɛbɛɔ̀n Ŋaablà re Goomaa doùn ci:

"Mòdzin ne jaamabee na ni ɲwɛyn goo bàsɔùn suun waa. Ŋà gooma o gooma boò Ŋaablà dzu, à ni tɔ̀ sa suun."»#Sdk 8.3.

5Tɔ̀un, Sànwɔbaà yè bè Yesù ka Yerusalɛmùn wɔ̀ fɛnɛɛ doùn, è b'a tèyn tsìì Ŋaablà re gbà blàa sènfi. 6#Zab 91.11,12.È dzin à ra ci: «Wo rìì ye ba Ŋaablà Dzin Kpir'la taki, a tsyɛn ji dzɔn nɔ̀n, kàtsu à sɛbɛɔ̀n Ŋaablà re Goomaa doùn ci:

"Ŋaabla nà à ji e re mɛ̀rɛ̀kɛ rèè jɔun wo kàjaa tsɛ, ci yè wo sen e suun, wo sàn mà nà to zhɛ kpàa sɔn na."»#Zab 91.11-12.

7 # Sdk 6.16. Yesù yè dzin à ra ci: «À sɛbɛɔ̀n Ŋaablà re goomaa doùn kɔn ci:

"Maà dzin ci a y'a Tsifa Ŋaablà dzuun boò waa."»#Sdk 6.16.

8Tà shɔ̀ùn, Sànwɔbaà yè b'a ka kɔn jèn gbààn sɔn senfi. Tɔ̀un è dziɲaan màsà gane reè ko è nɔɔrɔɔ̀ sapɛ kpadè à ra.

9È dzin à ra ci: «Wo y'a tsiì w'a kuu mun bììn, w'e mun blàbe, mun nà twɛy sapɛ sin wo ra.»

10Yesù ci à ra tɔ̀un ci: «Bo n tɛyn Sùtana ! È ɲɛn à tsɛ, à sɛbɛɔ̀n Ŋaablà re Goomaa doùn ci:

"A Tsifa Ŋaablà rii blàbe, e goo fa tɔ̀ soo pe re."»#Sdk 6.13.

11Tɔ dèu min niì, Sànwɔbaà yè bo à tɛyn. Tɔ̀un, mɛ̀rɛ̀kɛ rèè swey yè e kpɛrɛ̀ à ra, y'à màgoo wube.

Yesù bèumaà Galile mar'la ɲàn

(Marikì 1.14-15; Lukì 4.14-15)

12Àyìwà, Yesù y'à myɛ̀un waatsi riì bwèy ci è Yùxanà kun jiɔ̀ kàsoò doùn, è dɔ̀n be Galile mar'lɔùn.#Mat 14.3; Mar 6.17; Luk 3.19-20. 13Àwà è Nazarɛtsì wɔ̀ɔ̀ bàto tɔ̀un, è bè e tsuù Kapɛrinaxumùn wɔ̀ rɔ̀n, Galile yu blàa dziire, Zabulɔnìn màr'là, ko Nɛfitalì màr'là ɲàn.#Yux 2.12. 14Tɔ fau, sànko kɛɛra Esayì na nìi deò, tɔ̀ yeè bo e shi tsɛ, nìi yɛ ci: 15«Zabulɔnìn màr'là ko Nɛfitalì màr'là, Galile yu blàa dziire, Yuridɛn baa kɛ̀yn màr'là, kun kpɛrɛ mòdzin neè rè Galile, 16mòdzin niì reè na tsùuŋnà tsitsiì rɔ̀n, twɛy vyevyee brìsi jàu. Nìì reè to na tsùuŋnà jàmaàn doùn, yè bà ni saàn tsitsiì rɔ̀n, vyevyee bou twɛy rè.»#Ekk 8.23–9.1.

17Àwà Yesù yè e maaŋ tɔ̀ rii ɲàn, è waajibia faa è dziàn mòdzian nà ci: «Ye e tsiì e re gooɲaan nà, ye e re jaamabee fau'n kur'la lakere, kàtsu Jìrànxɔɔ̀ Màsàbee waatsi tsyɛnbeò.»#Mat 3.2.

Yesù jikunbaa mòkun naàlen kiri bàu e re kàràndzin min niì

(Marikì 1.16-20; Lukì 5.1-11)

18Àwà sii sɔn see, Yesù jììkɔɔn Galile yu blàa dziire, è keresima mokun fii jà. Soo tsoo Shimɔ̀n, yè bà à kir'là sa Piyɛrì, soo tsoo yè bà Andère, Shimɔ̀n naa keresia. Twɛy na ni yɔ̀ maa rii là yu rɔ̀n, kàtsu è na jikunbaa ì rìì. 19À yè dzin è ra ci: «Ye e gban mun kpɛyn. Mun nà ye bà mòdzìn gaabaa ì, a ci ye na ji rèè kuàn nìi tsuru.» 20Tɔ̀ nɔ̀nkɔɔrɔn, twɛy yè e raa yɔ̀ rèè bàto mɔn, yè e gban à kpɛyn. 21È kpɛrɛ̀ bèu jɔun kɔn, è keresima fii kpɛrɛ jà. Soo tsoo Yàkubà, soo tsoo yè bà Yùxanà, è fàà tsoo Zhebedè. Twɛy na ni e fa Zhebedè ka konkor'na doùn, yè bà e re yɔ̀ rèè lamɔn'na. Tɔ̀un, Yesù yè è kiri. 22Tɔ̀ nɔ̀nkɔɔrɔn, twɛy yè konkor'na ko e faà sa to mɔn, yè e gban Yesù kpɛyn.

23Àwà, Yesù na tsyeere beè Galile mar'la min niì sapɛ, è mòdzian kàràn beè è re ŋaablabegba rèè doùn. À Ŋaablà re Màsàbee kùnàgoo dziɔ̀ dè beè, è mòdzian rè ɲìn'nèè kuan sapɛ cɛrɛmabeè, ko è byɛnma rèè sapɛ, jàmaà fi.#Mat 9.35. 24À tsoò yè bo, è dzi Siiri jamaan min niì sapɛ. Tɔ̀un, yè nàa ɲìnìnkɔɔn sapɛ ka à re, à yè è cɛrɛmabeè, ɲìnìnkɔɔn kaatsià sapɛ, ko tɔɔrɔkɔɔn kaatsià sapɛ: kweykɔɔn reè, ko kìnìnkìnìnsànkɔɔn reè, ko mùrùku reè. 25Jàma brìsi na gbaɔn Yesù kpɛyn, yè bo Galile mar'la ɲàn, ko wɔ̀ tsyeùn nèè màr'là, ko Yerusalɛmùn, ko Yude mar'la, ko Yuridɛn baa kɛ̀yn nɔn.

Nke Ahọpụtara Ugbu A:

Matsiyù 4: BDZU

Mee ka ọ bụrụ isi

Kesaa

Mapịa

Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye

Mụtakwuo maka Bible Dzùùngoo Unicode

Matsiyù 4

Amaokwu Akwụkwọ Nsọ Ndị Ama Ama siteré na
Matsiyù 4

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Matsiyù 4

Matsiyù 4

Amaokwu Akwụkwọ Nsọ Ndị Ama Ama siteré na Matsiyù 4

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Matsiyù 4

Amaokwu Akwụkwọ Nsọ Ndị Ama Ama siteré na
Matsiyù 4