If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

तां पवित्रात्मा ने तिस्सी बेल्ले यीशु जो बियाबान जगाह् जो भेज्जेया, ताकि शैतान तिन्हा जो परखी सको। जां यीशु चाली रोज अते चाली रात्तां तिकर ब्रत्त रख्खी बैठ्ठे तां तिन्हा जो भूख लग्गी। तां शैतान यीशु का आया अते बोलणे लग्गेया, “जे तू परमेश्वर रा पुत्तर है तां इन्हा बट्टेयां जो अपणे खाणे तांइ रोट्टी बणी जाणे रा हुकम देई करी साबित कर।” यीशु ने जवाब दित्तेया, “पवित्रशास्त्र बिच लिख्खे रा है, मणू सिर्फ रोट्टी कने ही नी पर से परमेश्वर रे हर इक्क वचन जो मनणे कने जिन्दा रैहन्दा।”
तां शैतान तिन्हा जो पवित्र सहर यरुशलेम बिच लेई गेया अते मन्दिर री चोटी पर खड़ा करी के, उसने यीशु जो बोल्लेया, “जे तू परमेश्वर रा पुत्तर है तां तू इत्ते का छाल मारी करी साबित कर किजोकी पवित्रशास्त्र बिच लिख्खे रा है:
तिसने तेरी रक्षा तांइ अपणे स्वर्गदूतां जो हुकम दैणा अते तिन्हा तिज्जो हत्थों हत्थ चुक्की लैणा,
ताकि तेरे पैरां पर बट्टे कने चोट भी ना लग्गो।”
यीशु ने तिसजो बोल्लेया, “पवित्रशास्त्र बिच ए भी लिख्खे रा है: तू प्रभु अपणे परमेश्वर जो मत परख।”
फिरी शैतान तिन्हा जो इक्क बड़े उच्चे पहाड़ पर लेई गेया अते दुनिया रे सारे राज अते तिन्हेरी महिमा दिखाई करी तिन्हा जो बोल्लेया, “जे तू मेरे अग्गे झुके अते मेरी अराधना करगा, तां मैं ए सारा किच्‍छ तिज्जो देई दैणा।” तां यीशु ने तिसजो बोल्लेया, “ओ शैतान, दुर होई जा किजोकी पवित्रशास्त्र बिच लिख्खे रा है,
‘तू प्रभु अपणे परमेश्वर जो ही प्रणाम कर अते सिर्फ उन्हेरी ही सेवा कर।’”
तां शैतान तिन्हा जो छड्डी करी चली गेया, अते दिख्खो, स्वर्गदूत आई करी यीशु री सेवा-टहल करणा लग्गे।


अते जां यीशु ने ए सूणेया कि यूहन्ना कैद करी लित्तेया गे रा है, तां से यहूदिया जिले का निकली करी गलील प्रदेश जो हटी गे। तां से नासरत कस्बे का निकली करी कफरनहूम कस्बे बिच रैह्णा लग्गे, जे जबूलून अते नप्ताली नां री जातियां रे इलाके बिच ते गलीली समुन्द्र रे किनारे पर थिया। ताकि जे यशायाह भविष्यद्वक्ता ने बोल्लेया थिया, से पूरा होई जाओ,
“ओ जबूलून ते नप्ताली रे इलाके बिच रैह्णे वाले लोक्कों,
जे यरदन नदी रे पार, गलीली समुन्द्र रे किनारे पर रैह्णे वाले गैर यहूदी लोक,
जे मणू न्याहरे बिच जिया करदे थिये तिन्हा ने इक्क महान ज्योति दिख्खी,
अते जे मणू मौत रे साये बिच रैह्‍न्दे थिये उन्हा पर से ज्योति चमकी।”
तिस बेल्ले का यीशु ने सुब बसेख रा प्रचार करणा सुरु करी दित्तेया, “पाप्पां का तौबा करी लेयो किजोकी स्वर्ग रा राज नेड़े आई गे रा है।”

जां यीशु गलील री झील का जाया करदे थिये तां तिन्हा ने दो भ्याल, शमौन जिस जो पतरस भी बोलदे, अते तिसेरा भ्याल अन्द्रियास जो झील अन्दर जाल पांदे दिख्खेया किजोकी से मणू मछुआरे थिये। यीशु ने तिन्हा जो बोल्लेया, “मेरा चेल्ला बणो मैं तुसा जो मणूआं जो पकड़ने वाला मछुआरा बणांगा।”
तिन्हा ने तिस्सी बेल्ले जाल छड्डे ते तिन्हेरे पीच्छे चली पे। ते तित्ते का अग्गे जाई करी दो भ्याल, याकूब ते यूहन्ना जो दिख्खेया जे जब्दी रे मुडें थिये ते किस्ती पर अपणे प्यो कने जाल जो साफ करेया करदे थिये; तिन्हा जो भी सद्देया। से तिस्सी बेल्ले किस्ती अते अपणे प्यो जो छड्डी करी तिन्हेरे पीच्छे चली पे।

यीशु सारे गलील प्रदेश रे सभास्थल अंदर स्वर्ग रे राज रे सुब बसेख री उपदेस दिंदे अते हर तरह री बिमारियां का खरा अते मणूआं री कमजोरी जो दुर करदे रे। अते गलीली जिले रे उत्तर दिसा बिच जे सीरिया इलाका थिया, तित्ते तिन्हेरी खबर फैल्ली गई ते मणू इदेय सब मणूआं जो, जे नेक-बनेक्की बमारियाँ अते दुखां अन्दर जकड़ित्तेरे थिये, जिन्हा अन्दर दुष्टात्मा थिया, जिन्हा जो मिरगी आंदी थी अते जे अधरगं रे मारे थिये यीशु का लियाणा लग्गे यीशु ने तिन्हा जो खरा कित्तेया। इधेरे तांइ यीशु रे पीच्छे मणूआं री इक्क भीड़ गलील जिले, दिकापुलिस, यरुशलेम सहर, यहूदियां ते यरदन दरिया रे पार का चली पेई।

Ascolta मत्ती 4