ए किताब कर बारे में दम अकन गोएठ
ए सुघर खभेर ला ईसू कर चेला मत्ती हर लिखीस हवे। ए सुघर खभेर हर ईसू मसीह ला उद्धार देवईया कर रूप में बताथे, जेकर अगमबानी आगू ले करल गए रहीस, जेकर ढेरेच बछर ले मईनसे मन डगर देखत रहीन। परमेस्वर हर पुराना नियम में हजारों बछर पहिले जे करार ला करे रहीस, ओला एही उद्धार करोईया कर जरिये पूरा करीस। ए सुघर खभेर हर सिरिफ यहूदी मन बर ना लागे, जेमन जग ईसू जनमीस अऊ ओकर पालन पोसन करीन, बकिन समुचा संसार बरिक हवे।
ए सुघर खभेर कर ओर तो, ईसू मसीह कर जनम ले होथे। फेर ओकर बतिस्मा अऊ परीछा कर बारे में बताल हवे। तेकर गलील जिला में ईसू कर परचार, उपदेस अऊ चंगा करे कर सेवा कर बारे में बताल हवे। तेकर पाछू, ए सुघर खभेर में ईसू कर गलील ले लेके यरूसलेम तक जवाई अऊ ईसू कर आखरी दिन कर बात अऊ ओकर कुरूस में चघाए जाए कर बारे में अऊ ओकर मएर के जी उठे कर बारे में लिखल हे।
ए सुघर खभेर में ईसू ला एगोट महान गुरू कर रूप में बताल गईस हे; ओके परमेस्वर कर नियम कर मतलब बताए कर अधिकार हे अऊ ओ सरग कर राएज कर सिक्छा देथे। ओकर सिक्छा ला पांच हिसा में बांटल जाए सकत हे।
पहिला पहाड़ी उपदेस, जेहर सरग राएज कर मईनसे मन कर चाल सहूर, ओमन कर जिमेदारी, अधिकार अऊ आखरी असरा कर बारे में हवे। दूसरा, बारह चेला मन ला परमेस्वर कर सेवा बरीक उपदेस देथे। तीसरा, सरग राएज कर बारे में अहना। चौथा, चेला बने कर बारे में सिक्छा। अऊ पांचवा, सरग राएज कर बारे में बताल हे।
ए सुघर खभेर हर खालहे लिखल भाग में बांटल हवे
ईसू कर खानदान अऊ ओकर जनम 1:1—2:23
यूहन्ना बतिस्मा देवईया कर सेवकाई 3:1-12
ईसू कर बतिस्मा अऊ परीछा 3:13—4:11
ईसू गलील जिला में मईनसे मन कर सेवा करथे 4:12—18:35
ईसू गलील जिला ले यरूसलेम सहर में जाथे 19:1—20:34
यरूसलेम में ईसू कर आखरी हप्ता 21:1—27:66
परभू ईसू मरल में ले जी उठथे अऊ देखार देथे 28:1-20

Ascolta मत्ती ए किताब कर बारे में दम अकन गोएठ