I Versetti Biblici più popolari da Matthew 6

Condividi

Siya otyan isosomokyu Mampangatan Apudyus ya masapuɏʼn koonyu cha piola, ked idchola cha losan un kasapuɏanyu.

Ked achi kayu machalagen si ligat un chumtong lu bigat. Oli ta lu bigat, asiyu sanguwon chi ligat un chumtong si hachiʼn eɏgew. Ti umalay cha ligat un laklak-amon taku si kacha eɏgew. Ked achi taku chogchog-an.”

“Siyad ibyegak kan chikayu, achi kayu machalagen mipanggop si mataguwanyu, un isun chi kalonyu, ilumonyu ya cha mansilupyu. Ti lapotpotog chi biyegyu lu ha makan ya lapotpotog bo long-egyu lu ha silup.

Ngim lu malluwalu kayu, lumlok kayu si kuwetuyu ya inyolobyu ked malluwalu kayu kan Amayu un achipun maila ked si Amayu un Apudyus un mangitutullong si pin-ayu koon, ked gunggulaan chikayu.

Kamatla in-ilonyuʼn malluwalu: ‘Amami un awed langit, machaychayaw otyan chi ngachenlu. Chumtong otyan chi Mampangatam utla pita ya makwa otyan chi piom utla pita un isun chi lakwaʼd langit.

Mangtodka si ileɏgew un kalonmi.

Ya pakawalom cha byasbyasuɏmi, ti pilakawanmi bo cha lakabyasuɏ kan chikami.

Ya achim ipalubus un masulisug kami ta achi kami makabyasuɏ, ngim ilisim chikami si lawwing.’ ”

Ot kalan bo Jesus, “Lu pakawalonyu cha mangwa si lawwing kan chikayu, pakawalon chikayu bo kan Amayuʼd langit.

Itullongyu ked cha sissiwit un sintatayap, achipuncha mammuɏa ya man-apit ya achipuncha malepon si aɏang. Ngim pakalan Amayuʼd langit chicha. Ha chakampun kamman un lapotpotog kayu kan Apudyus lu cha allaʼn sissiwit?

Kalala bo, “Achi kayu man-ummung si bilaklangyu utla pita un makwaʼn yam-alon chi lakoy, metiyan ya makwaʼn maakaw. Ngim siya otyan koonyu, man-ummung kayu si kilabyaklangyuʼd langit un lappun manyam-an, achipun metiyan ya lappun bo makaakaw. Ti ha katuttuwaala, lu silu potpotgonyu, kapilitan un siya bo isosomokyu.”

“Lappun tagù mansimbi si chuwaʼn ap-apu. Ti kapilitan un memeɏyed si osa ya mansasanga si osa. Ked potpotgola bo osa ya am-amsiwola osa. Achipun makwaʼn manchisalola un mansimbi kan Apudyus ya bilaklang.”

Lu katchi in-ilon Apudyus un mampabiɏu si luut lawa un sin-akitan chi inggewancha si sala ya lakyawcha bo ked lu bigat masgob, giluɏa kayu bo achila silupan? Ha lappun pammatiyu?

Ngim chikayu, lu awed idchonyu kan cha makasapuɏ, ilanyu ta achiyu ipatagammu ulay siluʼn tagu. Ngim iyaggakawyuʼn mangtod ked si Amayu un mangitutullong kan cha losan un achipun maila gunggulaan chikayu.”

Intuɏuy Jesus lantudtuchu un kalala, “Allachenyu ta achiyu ipappaila kan cha tagu lu mangwa kayu si bibiɏu, ti lu siya mangwaanyu pionyuʼn ichayaw chikayu kan cha tagu, achipun chikayu gunggulaan kan Amayuʼd langit.

Ot intuɏuy Jesus, “Lu mallaun kayu mipagapu si malluwaluwanyu, achi kayu aginchachauy un isun cha aginpapati. Ti pionchaʼn ipaila kan cha taguʼn lallaunchaʼn malluwalu. Ibyegak chi tuttuwa kan chikayu, gilamputcha ilawat chi gunggulacha. Ngim lu mallaun kayu, mancheup kayu ya malagaysay kayu, taplu achin cha tagu ammuwon un pin-a kayu mallaun ngim abus si Ama takuʼd langit un achipun maila chi sintagammu. Ked si Ama taku un mangitullong si cha litataɏuʼn koonyu, gunggulaan chikayu.”