Zon 1
1
Kameŋ guma guara gegap, gumgi gu mbigi rɨgar zergap, mben rɨgar ki.
Zazera mbara muuŋgiap ki bɨɨŋbɨɨn gumgi ga ndɨɨi Kameŋ, ne guma guara gegi.
1 #
Snd 8.22; 8.30; Zo 17.5; Fi 2.6; Kor 1.17; 1 Zo 1.1-2; VB 1.2; 19.13 Fhum fhum guarara, kha bigi hɨgi fhuvara. Kameŋ, ana ki. Kha Kameŋ Fhe Bakɨme phorga ki. Mba Kameŋ ne Fhe Bakɨmera fara muuŋgi. 2#Stt 1.1Fhum fhum guarara, kha bigi zumgum hɨgi, kha Kameŋ Fhe Bakɨme phorga ki. 3#Zo 1.10; 1 Ko 8.6; Ef 3.9; Kor 1.16-17; Hi 1.2Mba Kameŋra panan Fhe Bakɨme za kha bigi ga muuŋgi. Kha bigɨn the harigi tuav then hɨgi fhuvara. Zakɨra fhuvara! Kha bigi zam, kha Kameŋ za nta muuŋgim, nta hegi. 4#Zo 5.26; 8.12; 9.5; 1 Zo 5.11Ana bɨɨŋbɨɨŋ nɨɨŋge ma, mba bɨɨŋbɨɨŋ kha gumgi gu mbigir vhava ŋaar ma. 5#Zo 3.19Mba vhava ŋaar, ana gɨngɨnan kav shɨgi. Mba gɨngɨn ana vharav, ana ŋguigirga tuktɨgi fhuvara.
6 #
Mt 3.1; Mk 1.4; Ru 1.13-17; 1.76; 3.1-2; Zo 1.33 Guma mbe, ana niamuuŋ ana tegi, mba guma zɨ khare, Zon. Fhe Bakɨme Zon ga sarigim, ana fhara zɨgi. 7#FG 19.4Zon mba vhava ŋaar bun suan zav zɨgi. Ana mba vhava ŋaara bun suaŋrim, kha gumgi gu mbigi za mba vhava ŋaara kameŋ mbararagip, ne khothɨgɨrga. 8#Zo 1.20Zon, ana nduara, ana mba vhava ŋaar fhuvara. Zakɨra fhuvara! Zon mba vhava ŋaarar kameŋ bun suan zav zɨgi. 9#Ais 49.6; Zo 1.4; 8.12; 1 Zo 2.8Mba vhava ŋaar, ana vhava ŋaara guar ma. Mba vhava ŋaar, ana vhava ŋaarar za kha gumgi gu mbigir nɨɨn zav, kha nuianan zeri.
10 #
Zo 1.3; 17.25; Hi 1.2; 11.3 Fhe Bakɨmen Kameŋ ne kha nuianan ki. Mba Kamen panan Fhe Bakɨme kha nuiana muuŋgi. Kha nuianan ki gumgi gu mbigi, mbe ana garav mbe tuituigiap ana kaŋgi fhuvara. 11#Ru 19.14; FG 3.26; 13.46Ana vhɨra wo fhain wo ntɨɨri han zɨgim, mbe ana ndigi fhuvara. 12#Ro 8.15; Ga 3.26; 2 Pi 1.4; 1 Zo 3.1Gumgi gu mbigi mbari ana ndigi, mbe ana zɨ khothɨgi gumgi gu mbigi ma. Mbe guigira ana khothɨgim, ana kha zɨn mben kamɨnga tuktɨgi, mbe Fhe Bakɨmen tari kɨrga. 13#Zo 3.3-6; Ze 1.18; 1 Pi 1.23Mbe gumgi gu mbigi wari ga rɨgap tari ti tuavar, mbe ana tari ki fhuvara. Zakɨra fhuvara! Mbe ana khothɨgim, Fhe Bakɨme mbe muuŋgim, mbe ana tari ki.
14 #
Ais 60.1-2; Mt 1.16; 1.20; Ru 9.32; Zo 2.11; Ro 1.3-4; Ga 4.4; Fi 2.7; Kor 1.19; 1 T 3.16; Hi 2.11-16 Fhe Bakɨmen Kameŋ, ne guma guara gegap, zerav, nzan rɨgar ki. Fhe Bakɨme mba tara bavira ki. Anan tɨvir vhuuiŋ guarira gum ŋkasŋka bakɨme anan ki. Nza vhɨra ana tɨvir vhuuiŋ guarira gum ana ŋkasŋka bakɨme gangi. Anan tɨvir vhuuiŋ guarira gum kora muumbara bakɨme guigira anan ki. Ana vhɨra guigira Fhe Bakɨmen nza khɨvigi. 15#Mt 3.11; Ru 3.16; Zo 1.27-32; 8.58; Kor 1.17Zon ana bun mba gumgi gu mbigi ga nzuav kaav khaŋ nzuai, “Mba guma, gu fhum ana bun nde nzuav khaŋ suaŋgi, ‘Na zɨn zi guma, ana guigira na kambarigi. Ne khaŋ muuŋgi, ana fhum kim, gu zumgum hɨgi.’ ”
16 #
Zo 3.34; Ef 1.6-8; Kor 1.19; 2.9-10 Ana fhura nza kora mbui kora muumbar, ana khaŋ tɨgap guigira kɨvgiap, ana zazera tɨvir vhuuiŋra za nza mbui. 17#Kis 34.28; Lo 4.44; Zo 8.32; Ro 3.24; 6.14; 10.4Khueŋ guigi guarara, Fhe Bakɨme won tɨvir Moses ga nɨɨŋgim, ana mba tɨvir nza nɨɨŋgi. Fhe Bakɨme Zisas Kraisan panan, ana fhura kora mbui kora muumbar gum ana wo buni guarir nza khɨvigi. 18#Kis 33.20; Mt 11.27; Ru 10.22; Zo 6.46; 1 T 1.17; 6.16; 1 Zo 4.9; 4.12; 4.20Guma the Fhe Bakɨme gangi fhu. Zakɨra fhuvara! Kha Fhe Bakɨmen Kama bavira, ana nduara, ana Fhe Bakɨmera fara muuŋgi. Ana nduara won Ndia han ki. Ana nduara Fhe Bakɨmen nza khɨvigi.
Zon Gumgi Ruai Guma Fhe Bakɨme Kameŋ bun nzuai.
Matiu 3.1-12; Mak 1.7-8; Ruk 3.15-17
19 #
Zo 5.33
Mbe Zudaiŋ gumgir pani, mbe Fhe Bakɨme rotu gari gumgi mbari gum Rivaiiŋ mbari ga sarigim, mbe Zerusarem thav, zav Zonan nzai, “Ndu the guarara?” 20#Ru 3.15-16; Zo 3.28; FG 13.25Zon mbaram guigira mbe nzuai, ana buna thueŋ vhagi fhuvara. Ana khaŋ mbe nzuai, “Gu Fhe Bakɨme taagip won gumgi gu mbigi ndir zav suaŋgip sarigi guma fhuvara.” 21#Lo 18.15-18; Mal 4.5; Mt 11.14; 17.10-13; Zo 6.14; 7.40Mbe thav ana nzarigi, “Maaŋgi ma? Ndu Iraiza e?” Ana khaŋ mbe nzuai, “Gu Iraiza fhuvara!” Mbe khaŋ nzuai, “Ee, ndu nza mba rarga ki Fhe Bakɨmen kamthooŋ guma e?” Ana mbe ŋgarkarav khaŋ nzuai, “Fhuvara!” 22Mbe mbaram wom ana nzarigi, “Ndu the ma? Maaŋgi nza taagi ŋgɨp, ram muuŋgi kamen nza sarigi nza zegi gumgi ga suaŋrie? Ndu ram mbui suambarar wo mbui?” 23#Ais 40.3; Mt 3.3; Mk 1.3; Ru 3.4Zon mbaram khaŋ mbe nzuai, “Gu mba gumgi ki fhuv ŋanen kav kaai guman kamthooŋ ma. Gu kaav khaŋ nzuai, ‘Guma Bakɨme ndim tuavir muuŋv, nta ndiv thɨgar maaŋri.’ Kha kameŋ, Fhe Bakɨmen kamthooŋ guma Aisaia fhum ne suaŋgi.”
24Mba gumgi, Fherasiŋ mbe sarigim, mbe Zon han zegi. 25#Mt 21.25; Zo 1.33Mbe kha nzambara Zon ga muuŋgi “Maaŋ muuŋgiap, ndu Fhe Bakɨme taagip won gumgi gu mbigi ndir zav farasarigi guma fhu, ndu vhɨra Iraiza fhu, ndu vhɨra mba Fhe Bakɨme kamthooŋ guma fhu, ndu thaŋ nzuav mba gumgi gu mbigi ruai?” 26Zon mbe ŋgarkarav khaŋ nzuai, “Gu mbɨn mbe ruai. Guma mbe nde rɨgar ki, nde ana kaŋgi fhuvara. 27#Zo 1.15; 1.30; FG 13.25; 19.4Mba guma, ana na zɨn zi. Gu vhɨra zɨ ki guman vhuuŋ fhuvara, gu ana ŋkari sharive mpiiŋ fhɨrgirga tuktɨgi fhuvara.” 28#Mt 3.6; Zo 10.40Zon Betanin Zordan mbɨ gaar ra ndai fhain, muen nderen kha kameŋ suaŋgi. Zon mba ŋanen mba gumgi gu mbigi ruai.
Zisas, ana Fhe Bakɨmen Sipsiva Ŋguk ma.
29 #
Kis 12.3; Ais 53.6-7; 53.11; Zo 1.36; FG 8.32; 1 Ko 15.3; 1 Pi 1.19 Mba mɨtimanera Zon Zisas garim, ana ana han zi. Zon mbara khaŋ nzuai, “Ganɨ. Fhe Bakɨme za kha nuianan ki gumgi gu mbigi muuŋgi tɨvi mbatɨgi vhɨzɨr zav farasarigi Sipsiva Ŋguk mbur zi. 30#Zo 1.15; 1.27Gu fhum mba guma ga nzuav khaŋ suaŋgi, ‘Na zɨn zi guma, ana guigira na kambarigi. Ne khaŋ muuŋgi, ana fhum kim, gu zumgum hɨgi.’ 31Gu nduara ana kaŋgi fhu. Gu fhura mbɨn kha gumgi gu mbigi ruai, gu maaŋ muunga, kha Isreriŋ mbe ana kaŋgirga.”
32 #
Mt 3.16; Mk 1.10; Ru 3.22 Zon wom nzuav khaŋ nzuai, “Gu Fhe Bakɨmen Ŋina Ŋaara garim, ana Hevenan kegap, fhomne fara muuŋgiap gega zerav, ana phorga ki. 33#Mt 3.11; Ru 3.2-3; FG 1.5; 2.4; 19.6Gu fhum ana kaŋgi fhu. Fhe Bakɨme mbɨn gumgi gu mbigi ruar zav na sarigim, gu zɨgi. Ana fhum khaŋ na suaŋgi, ‘Ndu Fhe Bakɨmen Ŋina Ŋaara ganɨrim, ana zirɨv, guma the phorga kɨrga, mba gumara, ana Fhe Bakɨmen Ŋina Ŋaarar gumgi gu mbigi ruarga.’ 34#Mt 3.17; 17.5; 27.54Gu ana gangiap, gu kha kameŋ bun nzuai, khe Fhe Bakɨmen Kam ma.”
Zisas guma phuni khegene farasarigim, mbe ana phorga rui gumgi ki.
35Mɨtimanera Zon wom thɨgap kim, ana phorga rui guma phuni ana phorgap thɨgap ki. 36#Zo 1.29Ana thɨgap kav Zisas garim, ana vui. Zon mbara khaŋ nzuai, “Mbur ganɨ, Fhe Bakɨme za kha nuianan ki gumgi gu mbigi muuŋgi tɨvi mbatɨgi vhɨzɨr zav farasarigi Sipsiva Ŋguk mbure.” 37Ana phorga rui gumani thɨgap kav, ana nzuai ne mbararagiap, mani Zisas zɨn vui. 38Mani Zisas zɨn vuim, Zisas dorgap mani garav, kha nzambarar mani ga muuŋgi, “Ŋko thagɨna ndi gari?” Mani mbara kha nzambarar ana muuŋgi, “Rabai, ndu maaŋgi phenan ki?” Kha zɨ Rabai, ana nɨɨŋge khaŋ nzuai, “Ndɨkndɨgir vhuuiŋ nza khɨvi guma rum.” 39Zisas mbaram khaŋ mani ga nzuai, “Ŋko zɨv ganɨ.” Mani mbara ana phorga vov ana ki phena gari. Mani mba raar ana phorga ki. Ne khaŋ muuŋgi, mba raar, ra vera vov fe ndi ra vhɨzgi.
40 #
Mt 4.18-20
Andru, ana Saimon Pita phorge rɨgi ne ma. Ana mba guma mbe ma. Ana Zon suaŋgi kameŋ mbararagiap, Zisas zɨn vugi. 41#1 Sml 2.10; Sng 2.2; Zo 4.25Ana Zisas thav vov, ana za vov wo phorge rɨgi ne Saimon ndi gari. Ana vov Saimon gangiap, khaŋ Saimon ga nzuai, “Gu Mesaia gangi.” Kha zɨ Mesaia, ana nɨɨŋge khaŋ nzuai, “Fhe Bakɨme taagia wo gumgi gu mbigi ndir zav farasarigi guma ma.” 42#Mt 16.18; Mk 3.16Andru vov Saimon ga suaŋgiap, ana kov Zisas han vui. Ana ana kov vuim, Zisas ana garav khaŋ ana nzuai, “Ndu Saimon, Zonan kam. Mbe zumgum kha zɨn ndun kamɨnga, Sifas.” Kha zɨ Sifas, ana nɨɨŋge khaŋ nzuai, “Pita.” Mba zɨn nɨɨŋge khaŋ nzuai, “Kɨm.”
Zisas wo zɨn ŋgɨr zav Firip gu Natanier kamgi.
43 #
Mt 8.22; Mk 2.14 Mba mɨtimanera, Zisas Garirin ŋgirɨr za mbui. Ana vov Firip gangiap, khaŋ ana nzuai, “Ndu na zɨn zɨ.” 44Firip, ana Betsaida ŋgun ki guma ma. Ana vhɨra Andru gum Pitar ŋgu guma ma. 45#Stt 3.15; 49.10; Lo 18.18; Ais 7.14; 9.6; Jer 23.5; Ese 34.23; Sek 6.12; Mt 2.23Firip mbara vov Natanier gangiap khaŋ ana nzuai, “Nza Moses fhum mba guma bun nzuai buni khergim, nta Moses suaŋgi tɨvi ki gavar ki. Mba Fhe Bakɨmen kamthooŋ gumgi, mbe vhɨra ana bun nzuai buni, mbe nta khergi. Nza mba guma, nza ana gangi. Zisas Nasaret guma ma. Ana Zozevan kam ma.” 46#Zo 7.41; 7.52Ana ne nzuaim, Natanier kha nzambarar ana muuŋgi, “Maaŋ muuŋgim, bigɨna vhuuŋ the Nasaretan kegap hɨgɨrga thi?” Firip mbara khaŋ ana nzuai, “Ndu zɨv ganɨ.”
47 #
Sng 32.2; Zo 8.39; Ro 2.28; 9.6 Mani zim, Zisas Natanier garav, khaŋ nzuai, “Ganɨ, mbur zi guma, ana guigira Isrer guma guar ma. Ana guiguigi buni gum guiguigi tɨva thueŋ ana ki fhuvara.” 48Natanier mbara kha nzambarar Zisas ga muuŋgi, “Ndu ram muuŋgiap na kaŋgi?” Zisas ana ŋgarkarav khaŋ ana nzuai, “Firip, ana zumgum ndun kamgi, gu fharav ndu garim, ndu fik khage nɨɨn ki.” 49#Mt 14.33; 16.16; 27.42; Mk 3.11; Zo 12.13Natanier mba kameŋ mbararagiap khaŋ nzuai, “Guman Rum, ndu Fhe Bakɨmen Kam ma. Ndu Isrerin ŋgui vhɨrve gari guman pan ma.” 50Zisas ana ŋgarkarav khaŋ nzuai, “Gu khaŋ ndu nzuai, gu ndu garim, ndu fik khage nɨɨn kegi, ndu maaŋ muuŋgiap na khothɨgi. Ndu zumgum bigi bakɨvira ganɨnga, mba bigi kha bigeŋ kambararga.” 51#Stt 28.12; Mt 4.11; Ru 2.9; 2.13Zisas mbara wom khaŋ ana nzuai, “Gu guigira khar ndu nzuai, ndu zumgum Heven ganɨrim, ana fhogɨrga, ndu Fhe Bakɨme enseri ganɨnga, mbe Fhe Bakɨme Guma Guarar naaŋv zirɨrga fara muuŋgirga.”
Attualmente Selezionati:
Zon 1: KirNT
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The copyright is jointly held by:
Copyright © 2004 by the Bible Society of Papua New Guinea
Copyright © 2004 by Pioneer Bible Translators