Matayo 19
19
Yesu kayongweeza dzuu ya muke na muyume kutsayatsana
Marko 10:1-12
1Yesu epfokwisa kunena hivi, kanuka na ḍyimbo ḍya Galilaya kenda hat̯a ḍyimbo ḍya Yud̯aya, yombe jwa ḍanda ya mbo ya tsana ya Yorod̯ani. 2Hukuḍe, t̯ut̯a nkuu ya wantu ikimuuḅa, nae kawapfoza hawaḍe weokuwa wajwazi.
3*Mafarisayo wangine wamwendea na wekitsaka kumulevya Yesu na swali. Wamuuza wamwamba, “Ḅwana, ai *Sharia ya Musa inamuruhusu muntu kumuyatsa mukaziwe kwa saḅaḅu iḍeyonse?” 4Yesu kawambukuya kawamba, “Aya matsoro munamba ntamudzayasoma hat̯a? Yamba, ‘Ḍabvu Muungu kaumba muke na muyume.’ 5Na yamba, ‘Ndiyo maana muntu anamuyatsa ise na nina, anaungana na mukaziwe, nao wowii wanawa mwii mumodza.’ 6Ndookomu si wawii kawii, ela ni mwii mumodza. D̯ubva hikiḍe cha Muungu aunganyiyecho, mwanaad̯amu natsekit̯anya.”
7Hawa Mafarisayo wamuuza wamwamba, “Mani kut̯i Musa kanena kwamba muntu akitsaka kumuyatsa mukaziwe ni amumpe hat̯i ya kuyanga kwamba kamuyatsa, makisa amuyatse?” 8Yesu kawambukuya kawamba, “Musa kanena hivyo hivyo kwa dzambo ḍya vitswa vyenu vyumu. Ela hiyo iwa siyo miro ya Muungu hangu ḍabvu. 9Hachi nyakumwambiani kwamba, yuḍejwonse amuyatsiyee mukaziwe kwa tsowa ḍingine ḍiḍeḍyonse, isipfokuwa kwa tsowa ḍya kumugija na muyume yungine, kisa akihwaa muke yungine, huyo anawa kanjia rangani.” 10Hawa wanafund̯i wamba, “D̯ubva ikiwa kwamba nivyohivyo, mani si heri kutsahwaa muke?” 11Na Yesu kawambukuya kawamba, “Gula hivyo si kula muntu kwamba anaweza kuvikuḅali, lamud̯a hawaḍe wa Muungu awatsaniyeo. 12Koro wangine waḍyaalijwa kutsahwaa wake hangu kuvyajwani kwao, na wangine wahendezwa kutsahwaa wake kwa dzambo ḍya kwamba wat̯umwa ni wanaad̯amu. Na pia wangine wanadzitsania wao wenye kutsahwaa wake kwa dzambo ḍya kumuhumikia Muungu urembo. D̯ubva huyuḍe atsakiye kuvikuḅali hivi hivi, navikuḅali.”
Yesu kavodhya wana vichuchu
Marko 10:13-16; Luka 18:15-17
13Yesu kadza kayehejwa wana vichuchu awapfaze mikono na awayombeye. Ela hawa wanafund̯iwe wawavingira hawaḍe wawayeheyeo. 14Ela Yesu kawamba, “Wayatseni hao wana wadze kwangu. Namutsewavingira, koro Uhaju wa Mbinguni mbwa wantu weo dzao.” 15Makisa kawapfaza mikono kawayombea na kagonzowa.
Jabva ntaungize muntu Uhajuni mwa Muungu
Marko 10:17-31; Luka 18:18-30
16Nsiku modza kwenda muntu kwa Yesu na kamuuza kamwamba, “Mwaalimu, inanimala nihende dzambo dzema ga, ili niweze kuwa na maisha ya kuunga na yuungo?” 17Yesu kamwambukuya kamwamba, “Kut̯i kwakuniuzani dzuu ya dzambo dzema ḍya kuhenda? Muungu jeje heket̯u ndiye mwema. Ela ukitsaka kuwa na maisha ya kuunga na yuungo, ni had̯i uziuḅe hizi amuri.” 18Huyuḍe muntu kamuuza Yesu kamwamba, “Amuri zi?” Na Yesu kamwamba, “Hizi amuri zyambiyezo, ‘Nkudzoyage, nkudzonjie rangani, nkudzokwiwe, nkudzomuneneye mwenziwo nsuwe, 19muhile babajo na mamajo, mutsake mwenziwo dza udzitsakiyevyo mwenye.’ ” 20Huyuḍe muntu kamba, “Hizo hizo amuri nizit̯imiza zonse. Kuna chingine cha kwamba nihende?” 21Yesu kamwambukuya kamwamba, “Ukitsaka kuwa muhachi usoni kwa Muungu enda ukaguze vyonse wivyonavyo, makisa hizi fwedha ukaziwapfe masikini, nawe unawa kwamba kudziwekea nkandi mbinguni. Ukisa kuhenda hivi, d̯ubva nzoo uniuḅe.” 22Ela huyuḍe muntu epfosikia hivi, kanjijwa ni ngiru na kagonzowa, koro ewa ni jabva muno.
23Makisa Yesu kanena na hawa wanafund̯iwe kawamba, “Hachi nyakumwambiani, ni vyumu muno kwa muntu jabva kuunjia Uhaju wa Mbinguni! 24Nyakumwambiani kawii. Ni vivodho muno kwa ngamia kuchia na kwa anga ḍya lilima, kuliko kwa muntu jabva kuunjia Uhaju wa Muungu.”
25Hawa wanafund̯i wepfosikia hivi, wamaka muno na wauza wamba, “D̯ubva ikiwa kwamba ni dzevihivi mani ni ga jwa kupfona?” 26Yesu kawad̯eḍea gu makisa kawamba, “Gula ukiyowa na matso ya kiwanaad̯amu, hivi hivi ntaviwezekane meshi. Ela kwa Muungu ntaku ḍisiḍyowezekana.” 27Pet̯ero kamuuza kamwamba, “Ḅwana, swiswi huyatsa vyonse hukuuḅa wewe. D̯ubva hunapata kintu ga?” 28Yesu kambukuya kamba, “Hachi nyakumwambiani, hi ngera mpya idzepfofika, yani ngera yangu mimi *Mwana jwa Ad̯amu nidzeyokaa kitini mwa Uhaju, ḅasi nywinywi mwiwo wanafund̯i wangu mudzakaa viti kumi na viwii vya kihaju, mukihukumu vyeet̯i kumi na viwii vya Waisiraeli. 29Na kula amuyatsiye ise na nina ambu wanduguzwe, wanawe, madzumbaye ambu hat̯a makondeye kwa dzambo ḍyangu, huyo anapfokea myeedha gana zaid̯i na anapata maisha ya kuunga na yuungo. 30Ela wenji wa hawaḍe weo wa d̯ura yeo, wadzawa wa mwiso. Na wenji wa hawaḍe weo wa mwiso yeo, wadzawa wa d̯ura.”
Attualmente Selezionati:
Matayo 19: pkb
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2004, Bible Translation and Literacy