Mattaayo 10
10
Yeesso abattitiisti tomon ichoow lammee soobahsata ergata
(Marko 3:13-19, 6:7-13, Luuka 6:12-16, 9:1-6)
1Yeesso abattitiisti tomon ichoow lammee isiwahe, antohi icho ginnayyo enenyet goya kabahchaan ichoow ti icho sugeerre ichoow khannaatteti fil ittaawe tuumman kasamaachaan siiche. 2Ergaanoti tomon ichoow lammee magahenyeticho talla, ki oraat a Siimonhi Beetero layadeeh ichoow walaaliiski Andereeya layadeeh, Yaakoobohi inam Sebedaayee ichoow walaaliiski Yoohana layadeeh, 3Fiilif, Barꞌdolomaayo, Toomas, Mattaayohi kooddi goocho, inam Alfaayo ki Yaakoobo layadeeh, ꞌDaꞌdaayo, 4Siimonhi magahiis Yaaftiisꞌdoone layadeeh ichoow Yuuda Iskaariyoot, ki yomboka Yeessó ꞌdub gooche.
5Yeesso reera tomon ichoow lammee ili kharaat ierge, wihi us leefarme la a mehe ya, “Ili ꞌdooꞌdi yaafohi Yaꞌhuud ieheynan iiranna ommos ilkerengeettoo kaldaye Saamariya laka agelina. 6Nyaama ꞌdooꞌdi Issiraayele iꞌdi iiyti baabaatee iirda. 7Geedda atin ꞌdussaan la wora cheeka, wihi atin tadeehiin la, ‘Dakhi goobi Waakh kola a soodowwaate.’ 8ꞌDooꞌdi khakkhannan samaacha, ki tuume omoot kasookahcha, ki buꞌda sar kakhabo samaacha, ki ginnayyo dakhtaan la, ginnayyo kabahcha. An miigta iꞌdaanu atin siiche, taba waha yeela ꞌdooꞌd la walah akagutanna. 9Wihi chilimenye ꞌdahabe ommos lahaageete ommos birtoo addane akhaatanna, 10ommos urgo akhaatanna. Ubbaari deere atin sar kakhabtaan on menye, koo addan akhaatanna. Kobohoo addan akhaatanna. Wul laka akhaatanna. A mehe eti hil haaggicho golol a wihi usu muꞌdan.
11“Ilkerengeetbaaw atin geesseen ommos goobbaaw atin gesseen ka, etoo lakakhuufo yowda, minkiissa on fiddiya ichoowka intaas kabaha. 12Chirra atin min gessaan, ‘Waakh ba nebey atin kakaala,’ idaha. 13Minki atin gesseene atin martiiste, weysihaas ikataba, minki atin imartiisan la, Waakh nebey ma kakaalo. 14Chirri etoo atin imartiisanne, ommos yeediin idagansan, chaꞌatin goobaas ommos ilkerengeettaas kabahtaan, ebeeri luhlo atin fuulo sahda, saggi Waakh icho ihukkumo tusa. 15Rume atin icheeka, ibeenki Waakh ꞌdooꞌd hukkumo, sinati Waakh ꞌdooꞌdi ilkerengeetti Soodom yiil ichoow ki ilkerengeetti Goomorah yiil tuse iche deefta sinati Waakh ilkerengeettaas tuso ka.
Bolokkhi abatti latuso
(Marko 13:9-13, Luuka 10:3, 21:12-17)
16“An iꞌdi iiyti yaay goya liifahe iche atin ierga. Maantaka iꞌdi toof u yuubsada, toro la iꞌdi kutukuurrug u iꞌdi ꞌdooꞌdi eloo rucchul laka ikhabin ateeha. 17ꞌDooꞌda yuubsada, jaldaabohi Yaꞌhuude atin igeechaane, minassichoki weysiit ka atin jahaan. 18Jeenteteey u gaafanayyo ichoow karnato atin liigeecha, atin la garti Wori Haaggan icho ichoow yaafohi Yaꞌhuud ieheynan itateehiin. 19Iꞌdaasenyi chirri icho atin khabteen, wihi atin tadeehiin ommos saggi atin itadeehiin akawaꞌdwaaꞌdina. Chirraas wihi atin tadeehiin a atin lasiicha. 20A mehe atin mee yeyyeeddaan, iꞌdaasenyi Rubeyti Waakkhi Aabbahiinenye goytiin kasooyyeedda.
21“Etoo walaaliissa ꞌdub goocha, dahanohi nahab gessa ꞌdee layagiis. Ooyo laka weeliis iꞌdaas yeela. Nyaakhut ꞌdooꞌdi dele yeedicho ꞌdiiꞌda, dahanohi ꞌdooꞌdoo addan gessaane ꞌdee layagiis. 22Enenyet tuumman a atin ꞌdiiꞌda jeenteti atin abattiteey itahiin u. Iꞌdaasenyi, eti garrahsate ichoowka sinata ꞌdubiche eleele a lariba. 23Chirri ilkerengeettoo ka sina atin loomhicho, ilkerengeettoo addan ifirda. Rume atin icheeka, geeddi atin hiliin ilkerengeetohi ili Issiraayel tuumman ka imassin, iche Ínam Aadam soonokhta.”
24Yeesso wihi us yidah, “Iyookkoka, abatti etiiski walah abcho ma kaweene, ilbooy la kamuriis ma kaween. 25Abatti etiiski walah abcho ibaha, ilbooy la kamuriissa ibaha. Chirri ooyohi min leh ba, Beelsebuul lakawaho, ꞌdooꞌdi minkiis la geeddoo meheenye magahenyeti ꞌdaꞌddaran kawahaan?
26“ꞌDeerka ꞌdooꞌdi atin tirrimo akaroorina. Walah oboobsane liisoonyiikhin mala, ommos walah dagsane enenyet liiabin mala. 27Wihi an mugꞌdi ka atin iadeeh, maalim cheeka, wihi nabah ka atin liicheeke atin daagteen minan sarcho ka cheeka. 28ꞌDooꞌdi sar on yagiise iꞌdaasenyi rubey iꞌdoo iidaahan akaroorina. Waakkhi sar ichoow rubey ba baabiicho, meessi ꞌdabi armaanjireen kalugꞌdo karoora. 29Chimbir lamma chilimmetoo rucchul ma lagato? Iꞌdaasenyi chimbirtoo kaldaye Aabbahaah igaranne tamuut ma jirto. 30At laka, tinti matah kaajirto tuumman Waakh geeddi iche tahe a garta. 31ꞌDeerka roorro akhabina, atin Waakh ortiis ka chimbirohi ittaawe a kakhummantahiinee.
32“Eti tuummane ꞌdooꞌd ortiis ka saggi us keey iyahe cheeko, ani laka usu Aabbaheeyki goobi Waakh kijiro ortiis ka saggi us keey iyahe a cheeka. 33Iꞌdaasenyi eti tuummane enenyet ortiis ka saggi us keey iyahe ꞌdiiꞌdo, an laka usu Aabbaheeyki goobi Waakh kijiro ortiis ka a ꞌdiiꞌda.
34“Kol an harra imiyye an nebey keene akoogeynana. An nebey ma keenine, iꞌdaasenyi seleyhi an birlab ka atin fido iimiy. 35A mehe an a imiyye,
“ínam ichoow ooyo ba isichiiyoocha,
inám ichoow abarche ba isichiiyoocha,
inám ichoow seyyohtiche ba isichiiyoocha.
36Toro la eti uuraahe on chiiy kiyateeh.#10:36 Miika 7:6.
37“Eti tuummane ooyohiis ichoow abartiis ꞌdiriheey ꞌdoono, abattiteey ma imaline, toro la eti tuummane yeeletiis ommos albehiis ꞌdiriheey ꞌdoono, abattiteey ma imalin. 38Eti tuummane massalaabatiis ikhaatine sina iumhane ani isooraahin, abattiteey ma imalin. 39Eti tuummane jirotiis khuccho jiroti rummaat a waaya. Eti tuummane harrata ka jirotiis ani iwaayo la, jiroti rummaat a ꞌhela.
40“Eti tuummane atin khaatti, ani ikhaatta. Eti ani ikhaatti la, Waakkhi ani isooerge iche khaatta. 41Eti tuummane eti Waákh íyeyyeedo jeenteeti us eti Waákh íyeyyeedo iyahuu martiiste, Waakh kalaꞌddi us eti Waákh íyeyyeedo guto, iche etaas addan laka guta. Toro la, eti etoo fissan jeenteti us ifissanyahuu martiiste, Waakh kalaꞌddi us etaas fissan guto, iche etaas addan laka guta. 42Chiꞌ etoo kooboo biccheete khobee laka ꞌdooꞌdaar kichokoo siiche jeenteti us abattiteey iyahuu, rume atin icheeka, etaas koloo kalday laka kalaꞌddiis ma waayo.”
Attualmente Selezionati:
Mattaayo 10: rel
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2018, Wycliffe Bible Translators, Inc. All rights reserved.