Mattaayo 2
2
Makhaaballetoo bakkaalle yeyto Yeesso yowatta
1Yeesso ilkerengeetti Beꞌdeleheeme boroofenhi Yaꞌhuudiya kijirto iche lakadele. Maantaas la, ꞌHeroode karnati ilaase. Inkoo Yeesso desse, makhaaballetoo bakkaalle walah kaabatti iloo beri katimiyye, ilkerengeetti weene Yeerusaleem timiy. 2Iche la wihi iche worsatte, “Weeli desse karnati Yaꞌhuud yateeh mee? Iꞌdi tahe bakkaali delmaattiis tuso usuhi beri kasookore a agarre, nah la usu nimiyye wahannaa.”
3Karnati ꞌHerood layadeeh uus yeedaas daage, weyti mal gele, ꞌdooꞌdi ilkerengeetti weene Yeerusaleem kijiro tuumman laka mal gele. 4Inkoo us kuhaaniyyohi wewween ichoow tagaammeti amurre tuumman tol iwahe ka, inti Ki Lasubhe lakadelo worsate.
5Icho la wihi icho ilaabeen, “Ilkerengeetti Beꞌdeleheeme boroofenhi Yaꞌhuudiya kijirto iche lakadela. Iꞌdi tahe waha a wihi goorat etoo Waákh íyeyyeedo chiire.
6“‘Iꞌdaasenyi atihi ilkerengeetti Beꞌdeleheemenye boroofenhi Yuuda kijirto,
ilkerengeetohi addane Yuuda ma karucchul.
A mehe berri karnat intane lakadela,
ki ꞌdooꞌdeeyki Issiraayel yaakhicho.’#2:6 Miika 5:2.”
7ꞌHerood ꞌdeerka makhaaballeti bakkaalle yeyto dagsi ka wahe, ibeenki bakkaal soobahe kaabte. 8Ilkerengeetti Beꞌdeleheem ierge, toro la wihi us iyidah, “Nyaama, weel mujjum soohiisda. Maanti atin ꞌhesseen, amiita ani laka isoocheeka, ꞌdee an laka a irdi a wahdi.”
9Inkoo icho yeedi karnat daageen ka, jit khabteene, bakkaali kootte beri kasokoore icho sooraaheen la orcho raahe, ichoowka meessi weel kijiro sartiis ka tolossate. 10Chirri icho toro bakkaal argeen ka weyti hamaadeen. 11Chirri icho min geleen ka, weel ichoow Maariyati abartiise argeene, jilbo il kaguꞌddeene weel wahteen. Urgohicho fureene, gaalkahsihi weyti gato miigenye icho sookhaateen soobahcheene, siicheen. Gaalkahsiha la a ꞌdahab ichoow halalle ichoow miricchinye. 12Inkoo Waakh issillo ka tootooche, ꞌHerood iinokhanna iyidah ka, jitoo addan tabeene, ilicho inokhteen.
Yuussuf Maariya ichoow Yeesso khaata ili Miissiri ifirda
13Inkoo makhaaballeti bakkaalle yeyto nokhatte ka, hertoo Kamur Yuussuf issillo ka isoobahte. Wihi iche itidah, “Kahe weel ichoow abartiis ba khaate ili Miissiri ifirid. Intaas fiddiye ichoowka ani a kisoocheeko. A mehe ꞌHerood dowwanoha weel ogoose yowtaa.” 14Yuussuf ꞌdeerka ibeen on kahe, weel ichoow abartiis ba leefirde ili Miissiri leemiinsate. 15Intaas on fiddiyeene ichoowka ꞌHeroodhi karnate yumuy. ꞌDeerka wihi goorat Kamur etoo Waákh íyeyyeedo ka cheeke labuuhiche, “Weeleey ili Miissiri kasoowahe.”#2:15 ꞌHoseeya 11:1.
Ilkerengeetti Beꞌdeleheem ka nyaakhuti lallab labakkicha
16Inkoo ꞌHerood saggi makhaaballeti bakkaalle yeyto iekkeysatte kase ka, weyti hollowe. Amur bahche nyaakhuti lallabe guꞌh lamma khabo ichoow ki guꞌh lamma ieleelinne, ilkerengeetti Beꞌdeleheem ichoow ilkerengeetohi isoodow kajiro tuumman a labakkicho yidah. Guꞌhassa lammee ichoow maanti makhaaballeti bakkaalle yeyto karnat icheekte a israahaan. 17ꞌDeerka wihi eti Waákh íyeyyeedo Yeeremiya layadeeh ka lacheeke labuuhiche,
18“Hooyoo ilkerengeetti Raamah ka a ladaage.
Hooyi etoo ooyo, weyti uuwwicho.
Raaccheel nyaakhuticheeda ooyta,
ichehi uur lakhoboocho ꞌdiiꞌdda.
Iꞌdi tahe icho tuumman kola a tuumeen.”#2:18 Yeeremiya 31:15.
Yuussuf ichoow Maariya ichoow Yeesso ili Miissiri kasoonokhtaan
19Inkoo ꞌHerood yumuy ka, hertoo Kamur ili Miissiri ka Yuussuf issillo goyaka isoobahte, 20wihi iche itidah, “Kahe, weel ichoow abartiis ba khaate, ili Issiraayel inokho. Iꞌdi tahe ꞌdooꞌdi goorat weel ogoos yowti, a tuume.”
21Yuussuf ꞌdeerka kahe, weel ichoow abartiis ba khaate, ili Issiraayel inokhte. 22Iꞌdaasenyi Yuussuf chirri us saggi inam ꞌHeroodhi Arkeelawus layadeeh boroofenhi Yaꞌhuudiya ka karnat iyitahye meel aabbahiis igele daage ka, intaas iran karoore. Yuussuf issillo ka latootooche, ꞌdeerka boroofenhi Gaalilaaya irte, 23ilkerengeettoo Naasaret layadeeh furte. Iꞌdaas ka wihi goorat ꞌdooꞌdi Waákh íyeyyeedo ka lacheeke labuuhiche, “Usu berri eti Naasarete layadeeh.”
Attualmente Selezionati:
Mattaayo 2: rel
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2018, Wycliffe Bible Translators, Inc. All rights reserved.