Jénesii̱s 8

1Tichaa̱n jachó ni̱xtjin nga Néná katsꞌénkjó ni xi índajo̱ Noee̱, ko̱jo ngayeje cho̱ xi ma ꞌbítji̱e̱e̱, ko̱jo cho̱ kꞌijñá xi nijan síndojo̱ ngu̱i̱ya tjotso xi ta̱nisién ꞌniú jee̱, kuíni nga Néná katsꞌénkjaꞌa ngo tjo̱ ꞌniú, kósꞌe̱ jaꞌajen ndójoaa̱. 2Kó kixixió ndójoaa̱ ndáchíkoón xi tjitjó nguindie tꞌananguii̱, ko̱jo ti̱ kixixió ndójoa xi katjonni nkꞌaján. 3Kó ndójoa xi kisꞌikitsieni tꞌananguii̱ chíchi̱ chíchi̱ jaꞌajen, kó jaskan nguije jaꞌa úchán ichítié ni̱xtjin, 4tjotso xi ta̱nisién ꞌniú jeé jachókꞌíjñá tꞌanangui ki̱a̱ na̱xi̱ Araraa̱t. Kuí má ni̱xtjin tjiꞌún joó sá xí ma yitonii̱ kui xi ꞌmí Etanii̱n. 5Kó ndójoaa̱ inda inda jaꞌajen, ngaskande nga jachó sá xi ma tiee̱ kui xi ꞌmí Tébee̱t, kó ni̱xtjin tjoón kui saá má nga kamáyá to̱ko̱ na̱xi̱i̱.

6Nguije jaꞌa yichán ni̱xtjin, Noee̱ iskjíxꞌá nga̱ntjo̱a̱ masienkjaá tjotso xi ta̱nisién ꞌniú jee̱, 7kó katsanguiya ngo ni̱sie kuerbo̱, xi kijítji̱e̱n kó bo̱a̱ fí bo̱a̱ ndiboá katsꞌén, ngatꞌa̱ kasakojiín tꞌanangui kixí nínga ko̱siénsón se. 8Jaskan Noee̱ katsanguiya ngo tójo, tsi̱ꞌe̱ nga sku̱i̱e̱ tsi je kjifoaꞌajen ndójoaa̱. 9Ta̱nga kui tójoo̱ kijíꞌoyá nguiní ngu̱i̱ya tjotso xi ta̱nisién ꞌniú jee̱, nga kasakojiín nínga sa̱ꞌínkjaꞌyá, ngatꞌa̱ ndójoaa̱ to̱kó tjiꞌmaá tꞌananguii̱. Sꞌe̱ Noee̱ iskjíbé tójoo̱ kó katsꞌénkꞌasꞌien nguiní ngu̱i̱ya tjotso xi ta̱nisién ꞌniú jee̱.

10Nguije jaꞌa ngui yito ni̱xtjin, Noee̱ ti̱ katsanguiya nguiní tójoo̱. 11Kó kui tójoo̱ nguije kamánguixoón jachókoón Noee̱, kó ngo xka̱a̱ yáꞌolibo̱ tjítokó tsꞌoa, kó kjiꞌa boá nga je kamákjiín Noee̱ nga je tjíxí tꞌananguii̱. 12Ta̱nga ngui yito ni̱xtjin askoyá, kó ti̱ katsanguiya nguiní tójoo̱, kó kui tójoo̱ nguiti̱ jachókónꞌoyájiín Noee̱.

Bi̱ tsꞌén katsjájón nguiní tꞌanangui Noee̱

13Kuí má nó nga tsꞌasꞌien jun úchán ko̱jo ngo nó Noee̱, ni̱xtjin ngoo̱ sá xi tjoón kui xi ꞌmí Abii̱b nga kixíyá ndójoaa̱ nga̱són tꞌananguii̱, kó nga kamábe kui nii̱ Noee̱ jaꞌáxín nkꞌaa̱ tjotso xi ta̱nisién ꞌniú jee̱, kó kamábe nga je tikón kixí nga̱són tꞌananguii̱. 14Jaskan nguije jaꞌa jó sá, kixí kjin nga̱són tꞌananguii̱. 15Kósꞌe̱ Néná tsíchji̱a̱jo Noee̱ nga bi̱ katsoó:

16«Mejénna nga ku̱i̱tjaxi̱e̱jnú ngu̱i̱yaa̱ tjotso jee̱, ji ko̱jo chjóo̱n, ko̱jo ndíi̱, ko̱jo ínchjín kja̱ndáa̱. 17Ti̱ꞌinkjataxie ji ngayeje cho̱o̱ nga, ko̱jo cho̱ xi tjiín tsja̱nga̱, ko̱jo cho̱ xi ꞌbifé yojoo̱ kui xi síndojoo̱, tsi̱ꞌe̱ nga ka̱makjín ko̱jo ngasꞌikitsieni tꞌananguii̱».

18Kó bo̱a̱ tsꞌén jataxie Noee̱, ko̱jo chjo̱ón, ko̱jo ndií, ko̱jo ínchjín kja̱ndáa̱. 19Jataxie ngayeje cho̱o̱ nga, ko̱jo cho̱ xi tjiín tsja̱nga̱, ko̱jo cho̱ xi ꞌbifé yojoo̱ nga.

20Jaskan Noee̱ katsꞌénda ngo ṉchandikón nínga katsꞌéndikón Néná, kó iskjíbé jó cho̱ ko̱jo cho̱ xi tjiín tsja̱nga̱ xi tsꞌenjóꞌo Néná nga niꞌánkꞌasꞌiee̱n kjo̱a̱tjó, kó ítí kui cho̱o̱ nganda tsi̱ꞌe̱ Néná. 21Kó Néná nguije jaꞌándá sije̱n sije̱e̱n kui nii̱, bi̱ katsó ngu̱i̱jin ini̱ma̱a̱:

«Nda tsi xota̱ nga̱sondiee̱ ndajín ni xi tsꞌénkjó ngu̱i̱jin ini̱ma̱a̱ ndeskande koó nga kjindí, nguinijánjín kotijée̱ nga sa̱ꞌinkjié an tꞌananguii̱ ta̱ngatꞌanii̱ xota̱ nga̱sondiee̱, xikó je katsꞌen an.

22»Tji̱e̱nga kꞌuijñá tꞌananguii̱,

ngatsjé ni̱xtjin kꞌuié ni tjié ko̱jo cha̱n,

ngatsjé ni̱xtjin kꞌuié sibé ko̱jo nchꞌán,

ngatsjé ni̱xtjin kꞌuié cho̱ndoboá ko̱jo cho̱nchꞌán,

kó ngatsjé ni̱xtjin kꞌuié ni̱xtjin ko̱jo ni̱xtji̱e̱n».

Attualmente Selezionati:

Jénesii̱s 8: MAIX

Evidenziazioni

Copia