Senesi 3
3
Fakasala, siga, fakapapau
1Na poto lasi ake le gata i manu fuli o le vao ala na fakatupu e le Eteleno Atua. Na pati loa a ia ki le fafine : Pe na pati maoki atu le Atua : E leaise kolua kai loa ki laakau fuli o le oloto ? 2Na tali loa le fafine ki le gata : E ma kai ki fua o laakau o le oloto. 3Kae ki le fua o le laakau leia e tuu i loto malie o le oloto, na pati le Atua : E leaise kolua kai loa ki ai ti e leaise kolua fafa loa ki ai, talie e kolua mamate loa. 4Ti na pati loa le gata ki le fafine : E leaise kolua mamate loa ; 5kae e iloa e le Atua, i le aso leia e kolua kai loa ki ai, e mavaa loa okoulua mata, ti e kolua tatau loa mo le Atua, o kolua iloa loa le malie mo le veli.
6Ti na tio loa le fafine na malie le laakau ki le kai, mo fulumalie ki le mata, ti mo mauiga ki le fakamavaa o le atamai. Na taui loa e ia se fa fuai laakau, o kai, ti na toe soli foki e ia ki lona avaga, leia na tuu i ona tafa, ti na kai loa a ia ki ai.
7Ti na mavaa loa ola mata, ti na la iloa loa e la telefua. Na la tui loa ni lau fiki, o la lava loa ki ai. 8Ti na la logo loa ki le leo o le Eteleno Atua, leia na evaeva i le oloto i le afiafi, ti na mumuni loa le tagata mo lana avaga, o mamao i mata o le Eteleno, i loto o laakau o le oloto.
9Kae na kalagai loa e le Eteleno Atua le tagata, o pati kiate ia : Kofea a koe ? 10Na tali loa a ia : Na kau logo ki lou leo i le oloto, ti na kau i, talie e kau telefua, ti na kau mumuni loa. 11Ti na pati loa le Eteleno Atua : Ko ai na fakasa ia kiate koe e ke telefua ? Pe kua ke kai ki le laakau leia na kau tapui atu kiate koe ? 12Na tali loa le tagata : Ko le fafine leia na ke tuku mai ki oku tafa, na soli ia mai kiate au se fa fua o le laakau, ti na kau kai ki ai. 13Ti na pati loa le Eteleno Atua ki le fafine : Kolea na ke fai ai le nea lena ? Na tali loa le fafine : Na kakaai au e le gata, o kau kai loa ki le fua o le laakau.
14Na pati loa le Eteleno Atua ki le gata : Talie na ke fai le nea lena, e ke malaia loa o lasi ake i manu lalasi mo manu liliki fuli o le vao, e ke totolo loa i lou manava, ti e ke kai loa le efu i aso fuli o lou mauli. 15E kau tuku loa le vesia iate koe mo le fafine, i lou sakoga mo lona sakoga : E takafi loa e le sakoga o le fafine lou ulu, kae e ke uuti loa lona mulivae. 16Ti na pati loa a ia ki le fafine : E kau fakalasi loa le mamae o ou tinae, ti e ke fanau loa i le mamae, ti e ano loa ou oli ki lou avaga, kae e pule loa a ia kiate koe. 17Ti na pati loa a ia ki le tagata : O tupu na ke fakalogo ki le leo o lau avaga, ti na ke kai ki le fua o le laakau leia na kau fakatotonu atu kiate koe : E leaise ke kai loa ki ai ! E malaia loa le kele o tupu ko koe. E ke gaoi pakia loa ke maua ai lau nea kai i aso fuli o lou mauli. 18E tupu loa i le kele ni laakau talatala mo ni vao veli, ti e ke kai loa le mutie o faisaga. 19E ke kai loa lau pane i le kavakavaia o lou lae, o kaku ki le aso leia e ke toe liliu ai loa ki le kele, leia na ke too mei ai ; talie ko le efu a koe, ti e ke toe liliu loa ki le efu.
20Na soli loa e Atama ki lana avaga le igoa ko Eva : talie ko le tinana a ia o kakai mauli fuli. 21Na fau loa e le Eteleno Atua ni kofu mei ni kilii manu kia Atama mo Eva, ti na fakakofu loa e ia laua ki ai.
22Ti na pati loa le Eteleno Atua : Ko leinei, kua liliu le tagata ofaipe se tasi o tatou, talie kua iloa e ia le malie mo le veli. Koia ke tou taofi a ia i le aso nei ke aua na falo lona lima, o tau le laakau o le mauli o kai, ti ke mauli loa a ia o lee gato. 23Ti na tuku loa e le Eteleno Atua le tagata i le oloto o Eteni, ke gaoi ki le kele, leia na too a ia mei ai. 24I le oki o le kapu o Atama, na fakatuu loa e le Atua i le potu esite o le oloto o Eteni ni selupino, ke leo ia le ala ki le laakau o le mauli.
Attualmente Selezionati:
Senesi 3: FB2000
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Société Biblique de Genève, 2000-2020