Bapaizi 16
16
Buzuba bwakukombelezezya zinyonyoono
1Lyakamana lufu lwabana ba Aloni bobilo aabo bakapaizya zitasalali kuli Leza, Mwami Leza wakaambila Mozesi 2kuti, “Ambila mwanookwanu Aloni kuti atanoonjili lyoonse kusule lyacisitilizyo mukati kabusena busalalisya, nkaambo nkonkuko nkweboneka mukkumbi atala lyacivunisyo cabbokesi lyacizuminano. Kuti naa wacita oobo, ulafwa. 3Ulakonzya buyo kunjila mubusena busalala kuti naa waletelela akapoho kacipaizyo cakugwisya zinyonyoono alimwi akagutu kacipaizyo cakutenta.”
4Lino Mwami Leza wakaindilizya akwaamba kuti, “Aloni katananjila mubusena busalalisya, uleelede kusamba akusama zisani zyabupaizi, jansi lituba akabbudula kakunsi alutambo acingundu. 5Baisilayeli baleelede kupa Aloni basijembwe bobilo bacipaizyo cazinyonyoono, alimwi bamupe amugutu wacipaizyo cakutenta. 6Aloni uyoopa mupoho kuti cikabe cipaizyo cakugwisya zinyonyoono zyakwe azyamukwasyi wakwe. 7Eelyo akatole basijembwe bobilo ku Mwami Leza kumulyango watente lyakuswaanganina. 8Nkabela ooko akaume zisolo zyobilo, cimwi nca Mwami Leza, acimwi casijembwe wakuleka. 9Aloni akapaizye mpongo eeyo yasalwa a Mwami Leza mbuli cipaizyo cakugwisya cinyonyoono. 10Pele mpongo yasalwa kuti ilekwe iyoopegwa ku Mwami Leza mukugwisya zinyonyoono zyabantu. Iyootolwa munkanda mwiiyoolekelwa.
11“Ciindi Aloni napaizya mupoho wakugwisya zinyonyoono zyakwe azyamukwasyi wakwe, 12uyoobweza cikaye cizwide makala kuzwa kucipaililo amaanza obilo kajisi tununkilizyo akuzileta kubusena busalalisya. 13Ooko akabikke tununkilizyo amulilo kumbele lya Mwami Leza, nkabela busi bwatununkilizyo buyoovumba civunisyo cabbokesi lyacizuminano kuti atafwi. 14Akatolelezye abulowa bumwi bwapoho, akabusansaile amunwe wakwe kumbele lyacivunisyo, alimwi akasansaile abumwi bulowa ziindi zili ciloba kumbele lyabbokesi lyacizuminano.
15“Wamana kucita boobo, azwe akajaye ampongo yacipaizyo cakugwisya zinyonyoono zyabantu, mpoonya akalete bulowa bwampongo kubusena busalalisya akubusansaila atala lyacivunisyo kumbele lyabbokesi lyacizuminano mbubonya mbuli mbwaacita abulowa bwapoho. 16Acita boobo nkokuti wacita ciyanza cakukombelezezya bantu nkaambo kabusofwaazi abuzangi bwabo. Uleelede kucita mbubonya kutente lyakuswaanganina nkaambo liimvwi akati kabantu basofweede. 17Takweelede kuba muntu mukati katente lyakuswaanganina kuzwa ciindi Aloni ncayoonjila mubusena busalalisya kuyoocita ciyanza cakusalazya kusikila akazwe anze wamana kugwisya zinyonyoono zyakwe azyamukwasyi wakwe alimwi azyabantu boonse. 18Wamana akainke kucipaililo cazyakutenta akacisalazye acalo. Uleelede kutolelela abulowa bwapoho, abwampongo akubulamba kumeja oonse aacipaililo. 19Akasansaile bulowa amunwe wakwe ziindi zili ciloba. Mbombuboobu mbwayoocisalazya cipaililo kuzinyonyoono zya Baisilayeli, nkabela ciyoosalalisya ncobeni.
Mpongo yakuleka
20“Lino Aloni amana kusalazya busena busalalisya bwatente lyakuswaanganina, alimwi acipaililo, akatole sijembwe uupona kuli Leza. 21Akabikke maanza aakwe amutwe wasijembwe akaambe bubi abuzangi boonse bwa Baisilayeli, nkokuti zinyonyoono zyabo zyoonse ndendilyo zinyonyoono noziyooba amutwe wasijembwe. Waakumana kucita boobo muntu wasalwa akamubingile kunkanda sijembwe ooyo. 22Munzila eeyi sijembwe ooyu uyootola zinyonyoono zyabo zyoonse kunkanda nkwayoolekelwa.
23“Kuzwa waawo Aloni uyoonjila mutente lyakuswaanganina, akasamunune zisani zyabupaizi eezyo nzyaasamide ciindi katananjila mubusena busalalisya, akazisiye nkukonya ooko. 24Akasambe amubili mubusena busalala, aakumana kusamba akasame zisani zyakwe mwini. Mbwatikamanine buyo akazwe akuyootenta cipaizyo kuti akagwisye zinyonyoono zyakwe azyabantu. 25Alimwi uyootenta amafuta aamunyama wacipaizyo acipaililo. 26Muntu ooyo walikubinga sijembwe wakumuleka munkanda, uleelede kusanzya zisani zyakwe alwakwe mwini katanasika kuzivuka. 27Alimwi mupoho asijembwe zyabelesegwa kucipaizyo cakugwisya zinyonyoono zili aabulowa bwaletwa kubusena busalalisya, ziyootolwa kunze lyazivuka akutentwa, cikutu, nyama, abufumba zyoonse. 28Muntu uuzitenta uleelede kusanzya zisani zyakwe alwakwe mwini katanabweeda kuzivuka.
Kubamba buzuba bwakukombelezezya zinyonyoono
29“Ngaaya malailile aaelede kutobelwa kumazuba aaciboola. Mubuzuba bwakkumi mumwezi waciloba Baisilayeli boonse abamasi mbobakkala aabo baleelede kuliimya kulya akutabeleka. 30Nkabela mubuzuba oobo ciyanza cakugwisya zinyonyoono zyabo cikacitwe kuti bakasalale mumulawo kumbele lya Mwami Leza. 31Buzuba oobo buyooba buzuba busalala, bwakuliimya kulya akubeleka. Malailile aaya aleelede kutobelwa mane kukabe kutamani. 32Mupaizi wakasalwa kuyooba mupaizi mupati mubusena bwawisi, nguuelede kucita ciyanza eeci. Akasame zisani zyabupaizi, 33nkabela akacite ciyanza cakusalazya busena busalalisya, tente lyakuswaanganina, cipaililo, abantu boonse. 34Malailile aaya aleelede kutobelwa lyoonse alyoonse. Ciyanza eeci cakukombelezezya Baisilayeli zinyonyoono zyabo cileelede kucitwa ciindi comwe amwaka.”
Lino Mozesi wakacita mbubonya mbuli mbwaakalaililwa a Mwami Leza.
Attualmente Selezionati:
Bapaizi 16: Tonga96
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tonga Bible © United Bible Societies, 1994.