Bapaizi 19
19
Milawo iiindene-indene
1Lino Mwami Leza wakaambila Mozesi kuti 2azibye Baisilayeli makani aaya aakuti, “Amusalale, nkaambo mebo, nde Mwami Leza wanu ndasalala. 3Umwi aumwi wanu uleelede kulemeka banyina awisi, nkabela mubambe masabata. Ndime Mwami Leza wanu.
4“Mutatobeli mituni alimwi mutalipangili zibumbwa zyalubulo akuzikomba. Ndime Mwami Leza wanu.
5“Kuti naa mwapa munyama wacipaizyo calumvwano, mutobele malailile ngendakamupa, ndendilyo nenga ndacitambula cipaizyo canu. 6Nyama ileelede kuligwa mubuzuba oobo mbuyapaizigwa nimuba mubuzuba butobela. Kufumbwa nyama yasyaala kuyoosikila mubuzuba bwatatu, itentwe, 7nkaambo kakuti taicisalali mumulawo pe. Lino kuti naa umwi wiilya, ndakaka cipaizyo cakwe. 8Kufumbwa wiilya uyoopegwa mulandu nkaambo wasofwaazya cintu cisalala ca Mwami Leza. Nkaako takoobalwa limbi mubantu bangu.
9“Ciindi nomutebula myuunda yanu, mutasikili kumalomu, alimwi tamweelede kuvulula maila aasyeede mumuunda. 10Mutavululi myuunda yamisaansa yanu, mutabwezi nsaansa zyaloka ansi, muzisiile bacete abamasi. Mebo ndime Mwami Leza wanu.
11“Utabbi nikuba kucenga, naa kwaamba zyakubeja pe. 12Utakonki cintu muzina lyangu ncotakonzyi kucita, nkaambo ndime Mwami Leza.
13“Utapenzyi muntu naa kumubbida. Utajatilili kuvola kwasimilimo wako nikuba kwabuzuba bomwe. 14Utasinganyi musinkematwi, nikuba kubikka cintu kumbele lyamoofu kuti cimulebe. Kondiyoowa, nkaambo ndime Mwami Leza.
15“Amusyomeke akululama nomukosola milandu. Mutasalululi akati kabacete abavubi. Amubeteke cakululama. 16Utatamikizyi muntu zyakubeja alimwi utaambi cimwi cinjizya buumi bwakwe muntenda. Ndaamba, ndime Mwami Leza.
17“Utabi aankoto pe, pele muyanzane aawo mpomwaimpene. Ambila mweenzinyoko mpalubizizye mukuti utabisyi awe. 18Utabweedezyi bubi naa kufundilila umwi wabaluzubonyoko, pele uyande mweenzinyoko mbuli mboliyanda omwini. Ndime Mwami Leza.
19“Amutobele malailile aangu. Ŋombe zyanu zitatantwi abanyama bamusyobo uumbi. Mutasyangi mbuto zyamisyobo yobilo mumuunda omwe. Utasami zisani zyamisyobo yobilo.
20“Alimwi kuti naa muntu woona amukaintu muzike uukkalidwe kacili mukaintu muzike waumbi, katanaangununwa uli aamulandu pele tabakoojaigwa mukuti wakacili muzike buyo. 21Muntu ooyo uleelede kuleta mugutu kumulyango watente lyakuswaanganina uutibe cipaizyo camulandu wakwe. 22Acipaizyo eeco mupaizi uyoomukombelezezya cinyonyoono cakwe, ndendilyo Mwami Leza natimulekelele.
23“Lino mwaakusika ku Kenani mwaakusyanga kufumbwa misamu yamicelo yakulya, mukayeeye kuti micelo tiisalali mumulawo kusikila kwamyaka yotatwe. 24Lino mumwaka wane micelo yoonse iyooletwa kuti cibe cituuzyo cakulumba kulindime, nde Mwami Leza. 25Pele mumwaka wasanu mukailye micelo. Kuti naa mukacite oobo, misamu yanu iyoozyalisya. Ndime Mwami Leza wanu.
26“Mutakalyi nyama iijisi bulowa. Mutakasoli kusonda nikuba kulowa. 27Mutakageli goyooya lyaamubili, alimwi mutakayundi zilezu zyanu. 28Mutakalinengauli amibili yanu mukulila bafu, nikuba kuyasaulwa nsimbo. Ndime Mwami Leza.
29“Utasungilizyi mwanaako kuba muvuule, mukuti inga munyika mwaba bwaamu busofwaazya. 30Mubambe Sabata akulemeka tente lyangu lyakukombela. Ndime Mwami Leza.
31“Mutakainki kubanjilidwe naa baŋanga kuti naa mukacite boobo, muyoosofwaala. Ndime Mwami Leza wanu. 32Kamulemeka bamanene akubamvwida. Mbombuboobu mbomukonzya kulemeka Leza. Ndime Mwami Leza.
33“Mutakabapenzyi bamasi mbomukkala aabo. 34Amukababambe kabotu mbuli kuti Mbaisilayelinyoko, nkabela mubayande mbuli mbomuliyanda lwanu nobeni. Amuyeeye kuti anywebo mwakali beenzu mu Ijipiti. Ndime Mwami Leza wanu.
35“Tamweelede kucenga muntu nimweeleka naa nimupima. 36Amubelesye zipimyo zyeelede. Ndime Mwami Leza wanu wakamugwisya munyika ya Ijipiti. 37Amutobele akucita milawo amalailile aangu oonse. Ndime Mwami Leza.”
Attualmente Selezionati:
Bapaizi 19: Tonga96
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tonga Bible © United Bible Societies, 1994.