Bapaizi 22
22
Zipaizyo zisalala
1Lino Mwami Leza wakalailila Mozesi kuti 2aambile Aloni abana bakwe kuti, “Azibambwe cabulemu zipaizyo eezyo Baisilayeli nzibapa kulindime mukuti batasampauli zina lyangu lisalala. Ndime Mwami Leza. 3Kuti naa umwi waciinga cako uutasalali mumulawo wasika afwiifwi acipaizyo cisalala, muntu ooyo teelede kubonwa alimwi kumbele lyangu alili pe.
4“Taakwe naba omwe waciinga ca Aloni uuciswa cinsenda weelede kulya zipaizyo zyazyakulya zisalala kusikila asalazigwe kweendelana amulawo. Mupaizi inga tasalali kuti waguma cintu citasalali, nuuba mutumba uufwide, naa walilotela, 5nikuba kuguma munyama uutasalali naba muntu. 6Kufumbwa muntu uuguma cili boobo uyookkala katasalali kusikila kumangolezya. Takonzyi kulya cilyo casalazigwa kusikila akasambe. 7Lyabbila buyo zuba ulasalala, eelyo nanga walya cilyo casalazigwa, zili nzezilyo zyakwe. 8Teelede kulya nyama yamunyama walifwida naba walumwa nkaambo ilamusofwaazya. Ndime Mwami Leza.
9“Alimwi bapaizi boonse baleelede kubamba milawo yoonse njendamupa, mukuti bataiubauli akufwa. Nkaambo ndime Mwami leza uubasalazya.
10“Taakwe naba omwe uutali waciinga camukwasyi wabapaizi, naba omwe ooyo uukkala amupaizi naba mubelesi wakwe weelede kulya zipaizyo zisalala. 11Pele kuti naa muzike wamupaizi ngwaakaula, naba wakazyalilwa muŋanda yakwe, aabo balakonzya kulya cilyo citambula mupaizi. 12Lino mwanaa mupaizi wakwatwa kumuntu uutali waciinga cabupaizi, ooyo teelede kulya cacipaizyo. 13Pele kuti kali mukamufu naa wakalekwa katazyede, kwamana wabweeda akuyookkala kuli wisi kuti akalelwe nkuko, ulakonzya kulya cacipaizyo capegwa wisi mupaizi. Uutali waciinga cabupaizi teelede kulya cilyo eeco pe.
14“Kuti naa muntu umwi uutali waciinga cabupaizi wacilya cakutaziba, uleelede kubweedezya cilyo eeco kumupaizi alimwi ayungizye cipaanzi casanu. 15Mupaizi teelede kusofwaazya cipaizyo cisalala 16mukuzumizya muntu uuteelede kucilya. Eeci ciletela mulandu acisubulo kumuntu uucita boobo. Ndime Mwami Leza uusalazya zipaizyo.”
17Lino Leza wakaambila Mozesi alimwi 18kuti aambile Aloni abana bakwe a Baisilayeli boonse malailile aaya, “Ciindi Muisilayeli naa wamasi uukkala mucisi ca Isilayeli napa cipaizyo cakutenta, naa cakuzuzikizya cikonke naa cakupa buyo cizwa mukuliyandila, munyama weelede kuba kabotu. 19Weelede kuba mupoho naa mugutu naa sijembwe uutakwe kampenda nkokuti atambulike. 20Pele kuti naa wapa munyama uujisi kampenda, Leza tamutambuli pe. 21Kuti naa muntu umwi wapa cipaizyo cakuliyandila ku Mwami Leza, naa ncakuzuzikizya cikonke, naa cipego cakuliyandila, munyama teelede kuti kajisi kampenda mukuti atambulike. 22Mutapaizyi munyama moofu, naa mulema, naa uujisi cilonda, naba uujisi cinkwankwa. Mutapaizyi banyama bali boobo acipaililo kuti cibe cipaizyo cacakulya ku Mwami Leza. 23Kucipaizyo cakuliyandila mulakonzya kupaizya munyama uukotede naa uulemene, pele munyama uuli boobo takonzyi kutambulika mukuzuzikizya cikonke. 24Alimwi mutapaizyi ku Mwami Leza munyama uuzibidwe uukoswedwe naa uucuzukide. Eeci tacizumizigwi munyika yanu pe.
25“Mutapi mbuli cipaizyo cacakulya munyama ngomwakapegwa amuzwamasi, nkaambo banyama bamusyobo uuli boobo bali mbuli bali aakampenda alimwi inga tabatambuliki.”
26Lino Mwami Leza wakaambila Mozesi kuti, 27“Ciindi mwanaa ŋombe, wambelele, awampongo naazyalwa, teelede kulesegwa mane kusikila mazuba aali ciloba. Kuzwa waawo inga watambulika kuba cipaizyo cakutenta ku Mwami Leza. 28Mutapaizyi ŋombe amwanaayo niiba mbelele amwanaayo mbubonya. 29Ciindi nimupa cipaizyo cakulumba ku Mwami Leza, mweelede kutobela malailile aaya kutegwa citambulike. 30Muleelede kucilya mubuzuba mbubonya, taakwe ceelede kusyaala kusikila buce. Ndime mwami Leza.”
31Leza waamba kuti, “Amutobele milawo yangu akwiibamba. Ndime Mwami Leza. 32Tamweelede kusampaula zina lyangu lisalala. Baisilayeli boonse baleelede kuziba kuti ndasalala. Ndime Mwami leza, neensalazya, 33alimwi ndime ndakamugwisya mu Ijipiti kuti mbe Leza wanu. Ndime Mwami Leza.”
Attualmente Selezionati:
Bapaizi 22: Tonga96
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tonga Bible © United Bible Societies, 1994.