От Иоанна 4
4
Иисусылъю, Аӷнақлъю Самарияӷмӣ
1Фарисеит нагақӯмакаңат паляҳа̄ҳнилюки югыт тагиляӷа̄лъҳӣт Иоаннымун, нақам нулянилюки тагиляӷа̄лъҳӣт Иисусымун малихся̄ҳтыңуналютыңлъю, крестиӷысқылъютыңлъю. 2(Иўырңа Иисусым лъңан катам крестиӷалянӷилъкаңи, малиҳся̄ҳтыңита крестиӷаляқаңит.) 3Атанӷым лӣгиксямики Фарисеинун та̄на нагақӯманилюку, аӷуляқлъюни Иудеямың Галилеянъықихтыкақ. 4Тӯмкаҳқа̄нилңуқ Самария.
5Ка̄ткақ Сихарымун, Самариямылңуӷмун уявантыпахлъягунӷилңуқ пӣтысӣӷаӷвигмың Иаковым тӯныхка̄ның иӷныӷминун Иосифымун. 6Иаковымлъю мыҳтаӷвига таўанлыңуқ. Иисус иглыҳтыҳлъягым мыӷнулӷӣ ынка̄м ақумыхкақ ся̄ӷўакун мыҳтаӷвигым, аӷныӷым қука̄ни.
7-8Малихся̄ҳтыңи Сихарымун нықыңьяҳтуқа̄лӷӣт. Та̄хкын Самарияӷмӣ аӷнақ, Сихарымың мыҳтақақ. Иисусым пика̄: «Мыҳсӣҳтиңа». 9Аӷнам пика̄: «Иудейеңӯтын, хўаңа Самарияӷмӣңӯңа, сяңавык хўаңамнун мыҳсисқысин?» (Таўатын пикақыхкаңа қаюҳлъяк Иудеит талўа алыҳқуӷьяҳқақынӷилъкаңит Самарияӷмӣт.) 10Иисусым кӣмсиқа̄: «Гӯк, лӣсимаксяқувгу Кияӷныӷым тӯньяҳқа̄, лӣсимаксяқувгулъю кинаңутаңа мыҳсиңлъялӷӣ лъпынун, мыҳсиңлъяӷвикнаяӷан уңувалъыңыстикаюгмың мыӷмың». 11Аӷнам пика̄: «Югунӣқ, мыҳтаӷвик ӯсқапихтуқ, талўа қалътӣтутын. Накынңам уңувалъыңыстикаюгмың мыңылъықсин? 12Сивунымта Иаковым тӯныхкақа̄ уна мыҳтаӷвик хўаңкунъун. Лъңалъю, иӷныӷилъю, тыӷикусӣлъю қамахлъютың мыӷыхка̄гут та̄хкын. А̄ңўа̄ӷунилютын Иаковымың пиңузӣн?» 13Иисусым кӣмсиқа̄: «Кина алңунак мыӷылӷӣ хўакын мыӷмың алъя мықсюгьяҳқа̄гуқ. 14Мық хўаңа тӯньяҳқақа китум алңунак мыӷыхкумигу алъямыңлъю мықсюгна̄нӷитуқ. Мық тӯньяҳқақа лъңанун таўатын лъӣӷьяҳқа̄гуқ сыңъулӷӣстун, тывуӷалӷӣ лъңан илюңаның. Та̄на мық кынлыңилңуӷмың уңувалъыңусиҳқақа̄». 15Аӷнам пика̄: «Югунӣқ, та̄хкын мыӷмың мыҳсиңа ынка̄м алъя мықсюнӷилъяңа, талўа хўавык мыҳтаӷнаниӷляңа».
16Иисусым пика̄: «Угин ақфагу ынка̄м тагилӷа̄тын». 17Аӷнам пика̄: «Угиңитуңа». Иисусым пика̄: «Ипа угиңинъӣтын. 18Угикыхкақатын талъимат югыт. Ма̄тын та̄на ю̄к кияҳфигын угикынӷитан. Уңипа̄таҳпыңа ипапигмың».
19Аӷнам пика̄: «Югунӣқ, та̄ўа лӣгикамкын ӯкналиқистыңуфтутын. 20Сивуныӷма манигуқақа̄т Кияӷнық хўани на̄йӷами, иўырңа лъпыси Иудеяни Иерусалимыңунӣқаҳси манӣгӯтфихкақ Кияӷныӷмун». 21Иисусым пика̄: «Аӷнами хўани, ухпықиңа, та̄кўаниңани югыт манигуӷнаниҳлъықа̄т Ата хўани на̄йӷами талўа Иерусалимыми. 22Лъпыси Самарияӷмӣни талўа налъюкаҳси кинаңутаңа манигуқаҳси. Хўаңкута Иудеяни лӣсимакаҳпут кинаңутаңа манигуқаҳпут, қаюҳлъяк Иудеитхун Кияӷныӷым акықусяқыхкақа̄ югулилъық. 23Иўырңа пилъыҳқақ ука тагиңӯқ, а̄қун ка̄лъюни аюқуқ манигӯтыпикаюгыт манигуҳлъықа̄т Ата Таӷныӷагныкунлъю, ипалъыҳқунлъю. Таўатылңӯт манигӯткаюгыт Атам манигӯтысюгақӣ лъңанун. 24Кияӷнық Таӷныӷа̄гуқ, тама̄кут манигӯлъҳӣт лъңанун манигуӷьяҳқақа̄т Таӷныӷагныкунлъю, ипалъыҳқунлъю».
25Аӷнам пика̄: «Лӣсимакақа Мессия тагилъықуқ, атилъқылӷӣ Христосымың. Тагикуми уңипа̄лъықӣлъю сямың тамаҳа̄ның».
26Иисусым пика̄: «Хўаңа та̄наңӯңа алыҳқуқын».
27Хўа̄лъю Иисусым малихся̄ҳтыңи утыӷниқат. Ысҳаӷлюкык Иисусылъю, аӷна̄млъю алыҳқӯлъҳӣк ынңа̄талъ сяӷӣӷаягуткахкыт. Иўырңа налиҳӣнӣта̄ пимаңилъкаңат аӷнақ: «Сямың пизин?» Налиӷмың Иисус а̄псимаңилъкаңат: «Сяңан аӷнақ алыҳқуҳсигу?»
28Та̄хкын аӷнам мылӷутагни унилъюкык, Сихарымун агляӷлюни югыт пикӣ: 29«Ысҳаӷьяҳтуқаҳтыхуқун мыҳтаӷвигмылңуқ ю̄к. Сялъымның тамаҳа̄ның уңипа̄та̄ңа. Қа̄ Христосыңӯқ?» 30Ынка̄м югыт та̄хкын нымың ысҳаӷьяҳтӯтка̄т Иисус.
31Сялин ка̄тылъҳилъюки малихся̄ҳтыңита Иисус пӣӷа̄тақа̄т: «Апыҳтуӷиста, сяңӣҳаӷмың нықа̄». 32Иўырңа пикӣ: «Хўаңа нықылгӯңа ныӷьяҳқамың лъпыси налъюкңўа̄қаҳпысиның». 33Малихся̄ҳтыт лъңитның а̄пқуӷа̄ӷуткат: «Қа̄ китум нықмың тагисима̄?»
34Иисусым пикӣ: «Нықыка қа̄ткутылъҳӯқ каяхтикамың хўаңамның, апыӷӣӷысқылъюкулъю қыпҳақақ тагивақани хўаңамнун. 35Нагатақаси югыт пилӷӣт: “Та̄хкын пӣтысиӷалъыӷмың стамат танқит атуӷлюки, унаталъыҳқақ ка̄тақуқ”. Уңипа̄таҳлъямси, ювӷӣӷўа̄қаҳтыкиқун пӣтысӣӷаӷвигыт, тама̄кут пӣткат унатаӷьяҳқа̄ҳтут. 36Ю̄к унаталӷӣ пшеницамың акилыҳтӯсяңьяҳқа̄гуқ қыпҳақаминун, ынка̄м қуяяҳқа̄гуқ малигулъюни пӣтысиӷақамун. Таўатыҳпигақ югым уңипалъыӷмикун кынлыңилңуӷмың уңувалъыңыстыкумики акилыҳтӯсяңьяҳқа̄гуқ. Та̄налъю қуяяҳқа̄гуқ малигулъюни уңипақиюхўа̄қанун хўаңамның. 37Та̄на акузилъық ипаңӯқ: “Ата̄сиқ ю̄к пӣтысӣӷаӷақуқ, иляңа ю̄к унатаӷақуқ”. 38Каяхтыкақамси унатӣсқылъюси пӣтысиӷаӷвигми пӣтысиӷа̄маңилъкыхпысиның. Иляңит пӣтысӣӷақа̄гут, иўырңа лъпыси унатақаюгӯси пӣтыстыкӣтның, ынка̄м лъпысилъю акилыҳтӯсяңылъықуси қыпҳақӣтның».
39Сихарыми, Самарияӷмӣлӷутыт ухпықыхка̄т Иисус қаюҳлъяк аӷнам уңипа̄ткақыхкаңи: «Та̄м югым уңипа̄та̄ңа сялъымның тамаҳа̄ның». 40Самарияӷмӣт ка̄лъюку Иисус лъмыхнитысқыхка̄т. Иисус тама̄нтыкақ ма̄лӷук аӷныӷык, 41ынка̄м ўата ухпыҳтӯткат акузитаңи нагалъюки. 42Та̄на аӷнақ пика̄т: «Нагасюхўа̄ӷақңамкын ухпықыхкақапут акузитытын. Иўырңа ма̄тын хўаңкунъың катам нагалъюку лӣтаҳпут та̄на ю̄к ипа югулиӷистыкыфта̄ нунам юган».
Иисусым На̄лъҳускаңа Умӣлўа̄ӷым Иӷныӷа
43Ма̄лӷук аӷныӷык атуӷлюкык, Иисус Сихарымың аӷуляқыхкақ Галилеямун. 44(Иисус лъңаның катам пика̄лӷӣ: «Ӯкналиқиста нуналгутаңан тугуклъӣгата̄т ӯкналиқистыңулюку».) 45Ка̄сян Галилеямун, югыт тугуклъиқа̄т қаюҳлъяк ысҳапакақыхкаңат сялъҳа қамахлъюку Иерусалимыми, Пасхамун нықынӷаҳқыңъулютың.
46Ынка̄м Иисус аглянқихтыкақ Канамун, Галилеямылңуӷмун, мық виноңуҳтыстыфигминун. Та̄ўаңуқ кавымым умӣлўа̄ӷа, Капернаумыми иӷныӷа қинуюхлъяк. 47Нагақуӷьямигу Иисус тагиманилюку Иудеямың, Галилеямун такулюку манӣгӯткат на̄лъҳусяҳтуқӣсқылъюку иӷныни туқуяҳтуңысталӷӣ. 48Иисусым пика̄: «Ухпықина̄нӷитуси ўыткуқун ысҳапакуфсики а̄ңылӷӣт алъя̄ҳлъюхўаҳтилъҳыт». 49Умӣлўа̄ӷым пика̄: «Югунӣқ, малихтиңа таӷнуҳақа туқувагилган». 50Иисусым пика̄: «Агля̄, иӷныӷын уңувалъықуқ». Югым ухпықыхкӣ Иисусым акузитаңи ынка̄м агляқақ. 51Тумаңани та̄кўани қыпҳаҳтыңита налъяӷлюку уңипа̄тка̄т: «Иӷныӷын пинӣҳсима̄қ». 52А̄птыкӣ наникылъя̄гми пинӣҳсиматаңа. Пика̄т: «Иӷивгақ атасимикылъя̄гми пуқлъыӷаңӣтка̄гуқ». 53Атаңан лӣсимакыхкаңа таўани афлъюми Иисусым пикақыхкаңа: «Иӷныӷын уңувалъықуқ». Ынка̄ңам ныңлъюгуткулъҳӣт ухпыҳтӯткат.
54Та̄на тӯңлиқыхкаңа Иисусым алъя̄ҳлъюхўаҳтилъҳан тагилюни Иудеямың Галилеямун.
Attualmente Selezionati:
От Иоанна 4: ess2
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2022, Wycliffe Bible Translators, Inc. All rights reserved.