От Луки 21
21
Угиңиӷам Тунуся̄
1Иисус Храмымысималюни, ысҳапакӣ аклъюңилңӯт тунусямыхның манилӷутагнун канаҳтилӷӣт. 2Та̄хкын ысҳапака̄ аклъюмалӷӣ угиңиӷақ манилӷутагнун канаҳтилӷӣ ма̄лӷугыгның монетаңӣҳа̄гның. 3Иисусым пикӣ: «Ипа уңипа̄тамси, уна аклъюмалӷӣ угиңиӷақ канаҳтиңӯқ угляӷатаӷаӷлюку тама̄куның аклъюңилңуӷның. 4Тама̄кут тунқӯгут аклъюңиҳлъягмыхның, иўырңа угиңиӷам аклъюмаҳлъягмини қамахлъюку тӯна̄ кияӷусиҳқақсяқыни».
На̄фқылъыҳқа̄ Храмым
5Иляңита малихся̄ҳтыңан акузиткыхка̄т Храм. Пиниӷьягуткӣт пиниӷнаҳлъягыт уйӷагыт, тунусятлъю тӯныхка̄т Кияӷныӷмун пиниӷнаҳся̄сиқыхкӣт Храмымун. Иўырңа Иисусым пикӣ: 6«Тама̄кут ысҳаҳтыӷаси, пилъыҳқақ ка̄сяҳқа̄гуқ талўа ата̄сиқ уйӷак таўанлыңуқ нымининъанӷитуқ, қамахлъютың улъыҳқуӷьяҳқа̄гут».
Сыӷлылӣлъҳытлъю, Амьюқыта̄ткылъҳытлъю
7Иляңита малихся̄ҳтыңан а̄птыка̄т: «Апыҳтуӷиста, қакун тама̄кут пияҳқа̄ўат? Сяңулъықа лӣсимакусиҳқаҳпут тама̄кут пияҳқа̄ҳтыката?»
8Кӣмсиқӣ: «Кылыңатык, пӯҳтыстыхпынаси, қаюҳлъяк угляқ тагинақңӯқ а̄тқа атуқлъюку хўатын пимаӷмың: “Хўаңа Христосыңӯңа!” пӣқылъықутлъю: “Пилъыҳқақ ка̄туқ!” Иўырңа малихсяқунаки. 9Какавыхпынаси нагақуқуфсики нунат пилъюгутңунилюки, нуналгуткулъҳӣтлъю пилъюгутңунилюки. Сивуклъюни тама̄на пияҳқапыста̄ӷуқ, иўырңа таўаниңинақ иқухтылъық пина̄нӷитуқ».
10Та̄хкын пикӣ: «Нунат пилъюгулъықут, атаныҳпагулъҳытлъю пилъюгутулъықут. 11Нани алңунак нунат увылыхтаҳлъяхлъықут, нықаңисяхлъяхлъықут, алъыгвикикаюгытлъю ақниӷныӷыт пилъықут. Югыт ысҳаҳлъықӣт сяңўа̄т қилягами, какава̄таӷналӷӣт, алъя̄ҳлъюхўаӷьюгналӷӣтлъю. 12Иўырңа қамахлъюки тама̄кут пистыхпынаки, тугулюси амьюқыта̄ткылъықӣси. Синагоганун агля̄лъюси нанқихлъықӣси ынка̄м анусимиңлъяҳлъықӣси. Агля̄лъықӣси умӣлыгнунлъю правителынунлъю нанқихтысқылъюси хўаңа апалъюқлъюңа. 13Та̄на пилъыҳқақаҳси уңипақысқылъюңа хўаңа. 14Ынка̄ңам сюмыҳтаӷа̄ткыкыстаҳпына̄н сямың пилъыҳқаҳси. 15Хўаңа акузиткаҳқалилъықамси, пыҳқинылъылилъықамсилъю рыпалъ аңуяхпыси кипулъхина̄ҳпагниңитӣт акузилъыси налиӷмың тымңиңунина̄нӷитӣт. 16Талўа аңаюқаҳпыси, аңлыгутыхпыси, илякўа̄ҳпыси, илякумта̄ҳпыси увыҳпагулъықӣси иглыӷутистынун, ынка̄м иляси туқулъықӣт. 17Хўаңа апалъюқлъюңа тамаҳаӷми югым угумикыра̄ҳлъықӣси. 18Иўырңа на̄сқуҳпысиның ата̄сиқ нуяқ ифлъяна̄нӷитуқ. 19Ухпықилъыси айыпсюгитыстыкуфсики алъхыҳлъықаҳси уңувалъыҳси».
Иисусым Акузиткыхкаңа Иерусалимым На̄фқылъыҳқа̄
20«Таўани ысҳақуфсигу Иерусалим каңлъюкаңат пилъюўаҳтыт, та̄ўа лӣсимакылъықаҳси қантаӷақун на̄фқылъыҳқа̄. 21Та̄хкын Иудеямылңӯт анагнӣҳа̄т на̄йӷанун, Иерусалимымылңӯтлъю аӷуляқылӷа̄т, ыслъята̄нилңӯтлъю итыфқа̄мың пилӷа̄т. 22Қаюҳлъяк тама̄куни аӷныӷни Кияӷныӷым аӷью̄ҳлъықӣ Иудеит. Ынка̄м ӯкналиқистыт игақуқӣт та̄куның аӷныӷның қамахлъютың апыӷӣҳлъықут. 23Сыӷлыӷўа̄ӷунақңӯт қумилгытлъю, мамаҳталгытлъю анагнӣӷнақуткылъыҳқӣт. Сыӷлылӣҳлъягым ка̄нъақңўа̄ Израилым нунаңа қаюҳлъяк Кияӷныӷым аӷью̄ӷнақңўӣ юги. 24Иляңи туқулъықӣт сявихпахкун, иляңи тугулюки аӷуляқулъықӣт тамаңанун нунанун. Ынка̄м язычнигыт кая̄лъқылъықа̄тлъю, иглыӷулъықа̄тлъю Иерусалим, кынляңа пилъыҳқа̄т кынлытҳӯтылъҳанун».
Тагилъыҳқа̄ Иӷныӷан Югым
25«Та̄кўаниңани сяңўа̄т алиңрӯӷналӷӣт пилъықут сиқиныҳқун, танқикун, иӷалықыта̄ҳтыхун. Нунами, нунатаҳа̄ни тамаҳа̄ни югыт алиңрӯҳлъяхлъықутлъю, кукшагьюхлъықутлъю сяңами кылъӣ қалъяҳтылъыҳлъяганыңлъю қагиңуҳтылъыҳлъяганыңлъю. 26Югыт ысҳақумыхтыки аҳтуӷьяҳқа̄нӷилъҳыт қилягами қапшаҳқыслъыҳӣт иглыӷныӷмыхның, тыгылъҳӣӷуткыҳлъяхлъықа̄т ся̄қутаңа нуна. Ынка̄м алиңрӯӷым туқура̄хлъықут. 27Та̄хкын ысҳаҳлъықа̄т Иӷныӷа Югым тагилӷӣ қилягўа̄ҳқун аҳтуӷьяҳқа̄нӷилъылиӷлюнилъю, ниӷуҳқылъылиҳлъяглюнилъю. 28Тама̄на таўатын пикыстақан, ныкывлюси сивухлъыҳа̄си, қаюҳлъяк югулилъыңьяҳтуңыстаҳтуси».
Уқфига Смоквам Лӣтусиҳқақ
29Та̄хкын Иисусым уңипаӷа̄ткӣ: «Ысҳақаҳтыху смоквам уқфига, қамахлъюкилъю уқфилӷутыт. 30Ысҳаныҳпысики қуқуңаңыкыстанӷата, лӣсимакақаҳси кӣгьяҳтулӷӣ. 31Таўатыҳпигақ қамахтыңъўа̄ӷлюки а̄пқанка ысҳақуфсики, лӣсимакылъықаҳси Атаныҳпагулъҳа Кияӷныӷым ка̄сяҳтуңысталӷӣ. 32Ипа уңипа̄тамси, ма̄тын уңувалӷӣт туқуляӷа̄тыстыхпынаки қамахлъютың тама̄кут пияҳқа̄гут. 33Қилягылъю, нунамлъю авӣӷусяҳқа̄гук, иўырңа хўаңа акузитынка авӣӷунъа̄нӷитут».
Кылыңалъыҳқақ
34«Кылыңалюси, аҳсяҳпа̄хтыхпынаси нықынӷаҳқымъың, мыӷӯтылъыӷмың, налиӷмың сюмыӷьялихпынаси нунам пиңаның. Таўатын пикуфси та̄м аӷныӷым ка̄тқаӷнаюкаңиси на̄плъыҳӣстун. 35Та̄на Аӷнық ка̄сяҳқа̄гуқ ӣңунаҳа̄нун югнун нунамылңуӷнун. 36Ынка̄м кылыңатык қӯнпың! Юӷаҳтык анагьяқлъыгысқылъюки тама̄кут қамахлъюки пиката, ныкывьяқлъыгысқылъюси сивуңакун Иӷныӷан Югым».
37Аҳутаңа тамаҳа̄н Иисус апыҳтуӷӣқылӷӣ Храмыми, иўырңа а̄ныӷмини унугми Елеоным найӷаҳанитақылӷи. 38Уна̄ңулюку югыт қамахлъютың агляҳтӯтақылӷӣт Храмымун наганъалюку.
Attualmente Selezionati:
От Луки 21: ess2
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2022, Wycliffe Bible Translators, Inc. All rights reserved.