От Матфея 5
5
Иисус Апыҳтуӷилӷӣ Қымими
1Иисусым ысҳаӷлюки юлӷутыҳлъягыт малигулъҳӣт, қымимун маюӷлюни ақумыхкақ. Малихся̄ҳтыми такуляӷа̄сятни, 2апыҳтуӷикақ:
3«Тама̄кут лӣсимакилӷӣт аклъюкиңалъыӷмыхның Кияӷныӷым каюсилъҳаның қуястылъылгӯт, қаюҳлъяк юкӣ Атаныҳпагулъҳан Қилягым.
4Тама̄кут қивӷулӷӣт қуястылъылгӯт, қаюҳлъяк Кияӷныӷым илютуҳсяӷьяҳқақӣ.
5Тама̄кут қусывыгңалӷӣт қуястылъылгӯт, қаюҳлъяк Кияӷныӷым тӯньяҳқақа̄ нуна лъңитнун.
6Тама̄кут атуқиюпихлъыҳӣт Кияӷныӷым пиюкылъҳаның қуястылъылгӯт,
қаюҳлъяк Кияӷныӷым тӯньяҳқақӣ пиюкылъҳитның.
7Тама̄кут наңлъыхталӷӣт қуястылъылгӯт,
қаюҳлъяк Кияӷныӷым наңлъыгьягусяҳқақӣ.
8Тама̄кут умьюгақыхтат қуястылъылгӯт,
қаюҳлъяк ысҳаӷьяҳқақа̄т Кияӷнық.
9Тама̄кут ныкыхмылъыңыстикаюгыт югның қуястылъылгӯт,
қаюҳлъяк Кияӷныӷым авақутақнияҳқақӣ.
10Тама̄кут амью̄ткылъыңылӷӣт атуқутмыхның Кияӷныӷым пиюкылъҳа,
қа̄ткутңатмыхның қуястылъылгӯт,
қаюҳлъяк юкӣ Атаныҳпагулъҳан Қилягым.
11Қуястылъылгӯси югыт сыӷлықӯқаңиси, амью̄ткыхкаңиси, иқлъыңиқуткыхкаңиси малихся̄ҳтыңутыхпысиның хўаңамнун. 12Ынңа̄талъ қуяҳлъяхтык қаюҳлъяк қилягми пама акилыҳтӯсяҳқалыхлъягӯси. Амынқун, ныӷиӷлюку ӯкналиқистыт амью̄ткыхкӣт катам ма̄тын амью̄ткылъҳистун лъпыси».
Таӷьюқлъю, Ниӷуклъю
13«Таӷьюстун аюқуси нунам югани. Иўырңа таӷьюқ таӷьюӷниңӣскуни, алъя натын таӷьюӷниҳсяҳқа̄нӷитуқ. Атӯнаниҳлъықуқ сямун алңунак ынка̄м ыхлъықуқ та̄хкын югыт тутма̄сҳақылъықа̄т.
14Ниӷугыстун аюқуси нунам югани. Ныҳлъяк қымим қа̄йңанилңуқ талюӷңаяҳқа̄нӷитуқ. 15Талўа китум алңунак кынылӷутак кумаҳлъюкык сягныӷмун асиңӣнъа̄нӷита̄к. Итупилъ қӯлвақун лъилъықа̄к ниӷугутысқылъюкык тамаҳа̄нун илюңанилңуӷнун. 16Таўатыҳпигақ ниӷухси кӯкхутыстыху югнун ысҳӣсқылъюку аныӷныҳқилъыҳси, ынка̄м усюқнакаңат Атази қилягмылңуқ».
Апыҳтӯсяқыхкаңи Лӣлиҳтӯсят
17«Сюмыҳтаӷа̄ткыхпынаңа та̄қысяҳтӯнилюки атуқныӷмың Моисейем Лӣлиҳтӯсӣлъю ӯкналиқистытлъю апыҳтӯсӣт. Тагиңӯңа апыҳтӯткынъалюки ипа сямың писиҳпига̄таңи. 18Ипа пӣмси, қилягылъю нунамлъю кынлытҳӯтылъҳыхкынун кынляңа, талўа сясқувыгаҳақ алъяңуҳна̄нӷитуқ Лӣлиҳтӯсянилңуқ кынляңа қамахлъютың Лӣлиҳтӯсянилңӯт апыӷӣлъҳитнун. 19Ынка̄ңам китум алңунак қа̄ткынӷилъкумигу ата̄сиқ Лӣлиҳтӯсяқ, апыҳтӯсяқыхкумигулъю югнун қа̄ткыфқа̄н писқылъюку, Кияӷныӷым пилъықа̄ укалиҳпига̄нилюку Атаныҳпагулъҳани Қилягым. Нақамынрақ китум алңунак қа̄ткыхкумики Лӣлиҳтӯсят, апыҳтуқумикилъю иляңи югыт қа̄ткысқылъюки, Кияӷныӷым пилъықа̄ а̄ңьяҳқа̄нилюку Атаныҳпагулъҳани Қилягым. 20Ынка̄м уңипа̄тамси, итыӷна̄нӷитуси Атаныҳпагулъҳанун Қилягым, ўыткуқун қа̄ткутңа̄ӷатаӷақуфси Кияӷныӷмун, апыҳтуӷикаюгның Лӣлиҳтӯсяның, Фарисеиныңлъю».
Юхталъықлъю, Сякшитылъықлъю
21«Нагақуқақаҳси сивунысиңуқ уңипа̄ткақӣт: “Юхтаҳпынаси. Кина алңунак юхталӷӣ нанқихсяқлъыгӯқ аӷью̄ӷьяҳқа̄люни”. 22Иўырңа хўаңа пӣмси, китум алңунак угумиягускумигу юлгутни, нанқихтивигмун агляҳсяқлъыгӯқ. Китум алңунак пикумигу юлгутни: “Уюқ налъюҳлъяк”, агӷистынун агляҳсяқлъыгӯқ. Китум алңунак сясӣнӷинъикумигу юлгутни, агляҳсяқлъыгӯқ кумаӷулӷӣмун геенамун. 23Ынка̄ңам аҳқыфигыгни Кияӷныӷмун тӯнинақумалютын тунусяҳпының, нықа̄скувгу сюгахсиманилюку юлгутын, 24тунусян унилъюку илялӣӷьяҳтуӷнакын. Та̄хкын тагилютың тунусян тӯнакын Кияӷныӷмун.
25Китум авуткумакаңатын сыӷлытун пиманилюни, илялӣӷаҳнакын агля̄сималютын нанқихтивигмун, лю̄рақ авуткистыхпык тӯнаюкаңатын нанқихтистымун. Та̄хкын нанқихтистым кылыңакистымун анусимиңлъяҳтыснаюкаңатын. 26Ипа пӣмкын, анусимиңлъяҳтысимакаңатын а̄на̄нӷитутын кынляңа нанқихтистым лъивикысқылъҳа қамахлъюку лъивикыхкувгу».
Гылгаӷнӣҳтыснанилъық
27«Нагақуқақаҳси хўатын пилъық:
“Гылгаӷнӣҳпынаси”.
28Иўырңа хўаңа пӣмси, китум алңунак ысҳаӷлюку аӷнақ қилӣқыхкумигу та̄ўа гылгаӷнӣӷӯқ қамагун илюмикун. 29Ынка̄м аӷынқигныӷым ийыхпык сыӷлыҳқыстыкаңатын, ӣклъюку ыхнакын! Итагнаӷьяҳқа̄гуқ югусин налиӷныӷитыӷңа̄ӷми, ӣңунаӷми геенамун милю̄тылъыҳқа̄ның. 30Аӷынқигныӷым ӣхыхпык сыӷлыҳқыстыкаңатын, кыплъюки ыхнакытын! Пиниӷатаӷаӷьяҳқа̄гуқ югусин налиӷныӷитыӷңа̄ӷми, ӣңунаӷми геенамун пилъыҳқа̄ның».
Пылъҳутутыснанилъық
31«Нагақуқақаҳси хўатын пилъық:
“Китум алңунак нулӣни пыхтыкумигу, игаңлъя̄нъакаңа кылгутусиҳқамың пыхсиманилюку”.
32Иўырңа хўаңа пӣмси, югым нулӣни пыхсяҳқақынӷита ўыткуқун гылгаӷнӣқан. Гылгаӷнӣнӷитыӷңа̄н пыхтыкумигу, гылӷаӷнӣҳтыслъықа̄ алъяның югмың угӣқан. Китум нулиҳкыхкумигу, та̄на ю̄к лъңалъю гылгаӷнӣӷулъықуқ».
Акықилъыӷмун Апыҳтӯсяқ
33«Нагақуқақаҳсилъю сивунысиңуқ уңипа̄ткақӣт: “Акықусян авылӷаҳпына̄н, иўырңа Атаныӷмун акықусян атуқақигу”. 34Иўырңа хўаңа пӣмси, акықихпынаң атуқлъюку Кияӷныӷым а̄тҳа, налиӷмың сякун алңунак. Акықихпынаң қиляхкун қаюҳлъяк ақумутақа̄ Кияӷныӷым иглыӷутилъыӷминун, 35налиӷмың нунакун қаюҳлъяк итыгаӷӣтақа̄ Кияӷныӷым, налиӷмың Иерусалимыкун қаюҳлъяк ныҳлъяка̄ Умӣлыхпахлъягым. 36Акықихпынаңлъю на̄сқуҳпыгун қаюҳлъяк талўа ата̄сиҳақ нуяқ қатыҳтысна̄нӷитан налиӷмың тагныҳтысна̄нӷитан. 37Йыӷлыги лыган “а̄ңӷа̄си”, налиӷмың “нака̄ҳа̄си”. Сяңўа̄т иляскуфсики та̄кугнун Туӷныӷаӷмың пиңӯт».
Акинӣҳтыснанилъық
38«Нагақуқақаҳси хўатын пилъық:
“Кина ӣйңиқувгу лъпыклъю ӣйңиӷьяҳқа̄гутын. Китум хӯтңа муӷугаҳтыкувгу лъпыклъю хутын муӷугаҳсяҳқа̄гуқ”.
39Иўырңа хўаңа пӣмси, сыӷлытун пистыси акитыхпынаки. Китум қасяҳтыкаңатын улъюңахпыгун иңлюңалъю тӯнакын. 40Ынка̄м китум агля̄скаңатын нанқихтистымун, хатыхкын лъми пиналюкык қа̄слъихкынлъю тӯнакыхкын лъңанун. 41Китум алңунак қылӷускагу акмахтани иглыӷутысқылъюку ата̄симун километрамун, алъя ата̄сиқ километра илянъакын. 42Китум сямың туңсиӷвикыхкаңатын, тӯнакын. Китум сямың навӷаӷвикыхкаңатын, навӷинъакын».
Пиниқлъюки Угумикыстыси
43«Нагақуқақаҳси хўатын пилъық:
“Пиниқлъюки илякумта̄си, угумиклъюки угумикилӷӣт лъпысинун”.
44Иўырңа хўаңа пӣмси: “Пиниқлъюки угумикилӷӣт лъпысинун, юӷа̄ткақитыкилъю амью̄ткистыси Кияӷныӷмун қуястысқылъюки”. 45Таўатын пикуфси югни лӣсимакылъықӣси авақутақутлъюси Атахпыси қилягмылңуӷмун. Ю̄к тамаҳа̄н таўатыҳлъюўа̄қ пӣқа̄. Сиқиныни пӣтыстақа̄ сыӷлыӷнунлъю пинилӷӣнунлъю. Таўатыҳпигақ ыслъялъюгуҳтыстақа̄ қа̄ткуткаюгнунлъю қа̄ткусигалңуӷнунлъю. 46Кияӷныӷым акилыҳтуҳлъықисӣи пиниқистыңинаҳаси пиниқыхкуфсики? Талўа налогмың қырңуҳтистыт пиниқақӣт пиниқистытың. 47Ынка̄м илякумтаҳӣнаси қуяка̄тақуфсики, натын алъяңулъықытси иляңитның югни? Талўа манигӯсигалңӯт Кияӷныӷмун қуякақӣт илякумта̄тың! 48Лъпыси авақутақңутаңаның Атахпыси қилягмылңӯм пиниҳтык таўатыҳпигақ Атахпыси пинилъҳатун».
Attualmente Selezionati:
От Матфея 5: ess2
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2022, Wycliffe Bible Translators, Inc. All rights reserved.