1 Timoti 4
4
Arongithsi o mbango
1Uno honi Mupepo Oukenu waa amba nawanawa ci mwikati yo mahurerero, amweya kenge a ku thsia thsitawo thso shemwa no ku yuvera mipepo thzo kwangera, karo kenge a ku shupwera erongithsa yo mathzimu. 2Kenge a ku pambanithsiwa kwanu o mahetaheta no kwangera, anu o mimoneno thzo ku fa.
3Aa kanithsa anu ku yeka no ku wa kanithsa ku dya edya imweya, eyi ombire Nyambi ci i diwe kokanderero kowa tawa no ku dimuka oshemwa. 4Inene yoihe eyi ombire Nyambi po iwa, kwithsa ethsi thsi na roera ku kaniwa ngeci athsopo thsi tamburiwa kokanderero, 5inene yaa kenithsiwa ko diywi dya Nyambi no thsirombero.
Ngamba o muwa wa Yesu Krisitu
6Eyi enu ngeci o wa ku i dimukithse aenthzetu, kenge wa kwikara ngamba o muwa wa Krisitu Yesu, oyu fundithsiwa ko maywi o thsitawo nerongithsa yoiwa eyi o shupwera. 7O tunde kwinu i shiremeka Nyambi no ku matangu a shikwathsa thsimweya o tukurukathzi totu mbuyama, unone o cifundithse ku yoya ko thsitawo. 8Inene shaanga ci ecifundithsa yo ku tanarithsa erama yaa kwathsa kamanana, uno honi mwoyo o thsitawo awo waa kwathsa mwinu yoihe, inene waa kumbwethza mwoyo mo thsino thsikati no mu thsikati ethsi thsi keya. 9Edi diambo po dya shemwa, karo dyaa roera ku tamburiwa ko kuyara. 10Inene eyi ngeyi i reta ci tu kwame nene no ku ootera, inene twaa kurupera kwa Nyambi oyu yoya, aye Muyoyithsi wanu wahe, thsikurupo kowa a tawa.
11O tumine no ku rongithsa eyi enu. 12Wa tawethza ci munu a ku shwahure pa kwikara mushumba, unone o monithse muro kwakwakutawa mu kuamba koe, mu mikarero thzoe, mu thsishimo thsoe, mu thsitawo thsoe no mu kukena koe. 13O koñomeke kengeyo ku varera anu Mañoro, ku karaethza no ku rongithsa shime ku ka kuma apa na ku na kumena.
14Wa thsierera thsipa thsoe ethsi wa piwire kokethzi ou a ku kambekire moko akwa nthzango thzakuru o kereke. 15O pakere maano eyi enu no ku cipa ku kwayo ko kuyara, ci anu wahe a mone kukura kwekwama yoe. 16O mamere edi o yoya nerongithsa yoe. O i ootere, inene ngeci owepo o tenda kengeyo, kenge wa ku ciyoyithsa owe no ku yoyithsa awa a na ku teerera.
Attualmente Selezionati:
1 Timoti 4: mho
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
©2023 The Seed Company