AkwaEfese 5
5
Kuyoya mu mwethzi
1Mweyo, ko kwikara ana Nyambi awa a shima, mu mu temunune. 2Mu yoye o ku mu endithsiwa mu thsishimo, eci Krisitu oyu wa tu shimine mane no ku pa mwoyo wenthzi mukaci ketu kwikara thsiyambero, munuko o ku roerithsa Nyambi.
3Uno honi ruthziho neyi yo dithziro yoihe no rununa ka i roerire ku ambiwa mu kaci kenu, inene eyo ka i roerire mu kaci kanua Nyambi. 4Karo kwa ambiwa yo dithziro nji eambaura yotomba nji dipome dyo ku piterera, unone kwikare okanderero. 5Mu dimuke shemwa ci kwithsa munu o ruthziho nji o dithziro nji o rununa aye o ku rombera ekupuro, oyu wa ku tambura Kutumina kwa Krisitu na Nyambi. 6Mwa tawethza munu ku miangera ko maywi o mbango, inene mukaci keyo oanthzi wa Nyambi waa keya kowa a na kana ku mu yuvera. 7Mweyo, mwa vanda kwinu eyi a kwama.
8Pa kutanga mwekarire mirema, pano honi mwa mwethzi mwa Fumu. Mu yoye eci anu o mwethzi. 9Inene mwethzi ou u di mu mwenu waa reta pohuma yoiwa nowawa noshemwa. 10Mu fotithsithse nawa yo ku roerithsa Fumu. 11Mwa vanda kwinu yo mirema i shikwathsa thsimweya, unone mu i rete mu mwethzi. 12Inene yaa fithsa honyi shaanga ku ambaura enu eyi a na kwamanga kokumengi awa a na kana ku yuvera Nyambi. 13Uno honi thsinu thsothsihe yoihe thsi retiwa mu mwethzi, thsaa monahara. 14Inene thsinu thsothsihe ethsi thsi na monaharithsiwa po mwethzi. Eyi ngeyi ku na ambiwera ci,
“O pinduke, owe o na rara,
o pinduke kwafu,
no Krisitu kenge a ku munekera.”
15Mweyo, mu mamere omu mu yoyera. Mwa yoya eci etomba, unone mu yoye eci owanyanyami. 16Mu cikwathsithse nawa thsikati thsothsihe, inene ano mayuwa amango. 17Mweyo, mwa tenda eci etomba, unone mu ereke ku fotithsithsa eshima ya Fumu. 18Mwa penda waine, inene eyo kenge ya ku mipithsa. Unone mu yare Mupepo. 19Mu ambaure namweya ko membo o kwimbera Nyambi, membo o ku shangara Nyambi no membo o ku mupepo, mwimbere Fumu no ku mu shangara mu micima thzenu. 20Thsikati thsothsihe no mwinu yoihe mu kanderere kwa Nyambi Tata mu dithzina dya Fumu wetu Yesu Krisitu.
Anu nanuwo
21Mu cihuthse kushi oandu ku tunderera mu ku remeka Krisitu.
22Ambuyama, mu cihuthse kushi thzanuwenu, eci edi mu na kwamanga kwa Fumu. 23Inene mukwerume yodiyo mutwi wa munuwenthzi eci edi a di Krisitu mutwi o kereke, ayo erama yenthzi, karo aye mwene yodiyo Muyoyithsi wathzo. 24Eci edi thzi cihuthsa kushi thza Krisitu kereke, nambuyama nawo a cihuthse kushi mwinu yoihe kwanuwo.
25Akwerume, mu shime anuwenu, eci edi a shimine Krisitu kereke no ku cipa yothsinda mukaci kathzo. 26Wa kwamine kengeyo ku thzi kwama thzothzikenu, ku thzi kenithsa ko ku thzi yoa ko meyu ko diywi dyenthzi, 27ci nga a yareke kereke pa meho enthzi mu kutethzima kwathzo, thzo kupira dithziro nji tukonde nji ngara katamwethzi, unone thzothzikenu no kupira kapongonyi. 28Mofoci, akwerume aa roera ku shima anuwo eci edi a na shimanga erama yo athsinda. Mukwerume o ku shima munuwenthzi aa cishima yothsinda. 29Kwithsa o ku thzimba erama yenthzi, unone aa i korera no ku i vavarera, eci Krisitu edi a vavarera kereke, 30inene atwe po yerama yenthzi.
31Eci edi ku na ñoriwa ci: “Mweyo, mukwerume kenge a ku thsia tata wenthzi no mama wenthzi no ku cikwata na munuwenthzi, karo awo aidi kenge mba piruka thsirama thsofoci.” 32Edi po diano dyodikuru, unone naa monithsa edi a di Krisitu no kereke. 33Uno honi, mukwerume yomuhe a shime munuwenthzi eci edi a cishima thsinda, karo mbuyama a remeke munuwenthzi.
Attualmente Selezionati:
AkwaEfese 5: mho
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
©2023 The Seed Company