AkwaGalata 6
6
Mu cishimbithse oandu mipango
1Andengenu, ngeci munu yumweya ayepo waniwa o ku tenda thsivi, amwe mu di no Mupepo wa Nyambi mwaa roera ku huthsera oya munu mu dikuñwa dyowawa ko kuwamucima. Uno honi mu mamere ci katere mu tumauriwe namwe. 2Mu cishimbithse oandu mipango, ko ku tenda kengeyo mwaa yarithserera murao wa Krisitu. 3Inene ngeci yumweya aa cishimba ci mukuru mu thsivaka, aye o ku di thsikura pohuma, aa ciangera yothsinda. 4Munu no munu a tatufe etenda yenthzi mbeci nga a cinuneke ko kukana ku cishokithsa na muenthzenthzi. 5Inene munu no munu aa roera ku shimba mupango wenthzi.
6Oyu rongithsiwa diywi dya Nyambi aa roera ku ciera yoihe yoiwa na murongithsi wenthzi.
7Mwangeriwa, Nyambi tumba a varaeriwa, inene yoihe eyi a kuna munu yodiyo a ku cora. 8Yomuhe o ku kuna ku roerithsa erama yenthzi, kenge a ku wana dicora dyo ku nongithsiwa, unone o ku kuna ku roerithsa Mupepo, kenge a ku wana dicora dyo mwoyo o diyere. 9Twa aya ku tenda yoiwa, inene ko thsikati ethsi thsi na roera kenge twa ku wana dicora dyodiwawa ngeci atwepo tu kana ku huka munyima. 10Mweyo, uno tu di no thsikati, tu tende yoiwa kwa munu yomuhe, thsikurupo akwa mwanda ofoci netu mu thsitawo.
Eraerera yo mamaneneno
11Mu mone okuru o mataku aa ni cikwathsithsa ku mi ñorera ko dyoko dyange.
12Awa a fota ku roerithsa anu kerama, wodiyo awa mi ootera ci mu thze ku mukanda. Eyi a i tendera eyo po ku yapa ci katere a nyandithsiwe mukaci ko mbinda thza Krisitu. 13Inene shaanga akwamukanda ka shupwerire murao, unone aa fota ci amwe mu thze ku mukanda ci a cishangarere peyi i na kwamiwa perama yenu.
14Mbera na cishangarera yayo, shime yo mbinda thza Fumu wetu Yesu Krisitu. Inene ko mbinda, kaye na ka fu ku kwange, name na ni fu ku kaye. 15Inene munu shaanga yoyu thza nji ka a thzire ku mukanda, eyo ka i kwathsire thsimweya. Thsothsikuru po munu kwikara thsumbiwa thsothsipe. 16Kowa wahe awa a na shupwera ou murao mu myoyo thzo, naa amba ci: “Thsiyaro no ñeke ikareno, ikare na Isiraele wa Nyambi.”
17Ko ku manenena, ka ni fotire karo ci munu a ku ni cakanithse, inene ni di netwa perama yange eyi i monithsa ci no mupika Yesu.
18Thsihemo thsa Fumu wetu Yesu Krisitu thsikare no mupepo wenu mwaenthzange. Ameni.
Attualmente Selezionati:
AkwaGalata 6: mho
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
©2023 The Seed Company