AkwaRoma 14
14
Wa ratura yumweya
1Mu tambure mukwakutawa o ku faratera mu thsitawo, uno honi mwa cikanyeka nenthzi keyi yo mianekerero thzenthzi. 2Inene munu yumweya aa tawa ci aa twethsa ku dya ngara thsinu, uno honi o thsitawo thso ku faratera aa dya pohuma miroho. 3Oyu dya ngara thsinu a shomorora oyu kana ku dya enu yoihe, karo oyu kana ku dya ngara thsinu a ratura oyu dya ngara thsinu, inene Nyambi na mu tambura. 4Yowe odye ci o rature ngamba wa munu wao? Ñathsire wenthzi yo na roera ku mu ratura nji aa tanara nji aa wa. Kenge a ku tanara, inene Fumu aa twethsa ku mu tanarithsa.
5Munu yumweya aa shimba ci diyuwa dimweya dikuru mu thsivaka ku pita amweya, unone yumweya aa anekera ci oahe mayuwa mofoci. Munu no munu a tende ethsi a rakwa shemwa mu maano enthzi. 6Oyu na hengeka diyuwa dyofoci kwikara dyodikuru mu thsivaka, aa kwama kengeyo ko ku remeka Fumu. Oyu dya ngara thsinu, aa tenda kengeyo ko ku remeka Fumu, inene aa pa okanderero kwa Nyambi o ku shime ku dya. Karo noyu kana ku dya ngara thsinu aa tenda kengeyo mukaci ka Fumu, karo aa pa okanderero kwa Nyambi. 7Inene ku kwetu kwithsa oyu na ciyoyera, karo kwithsa oyu na ciferanga. 8Inene ngeci twaa yoya, twaa yoyera kwa Fumu, ngeci twaa fa, twaa fera kwa Fumu. Mweyo, nji twaa yoya nji twaa fa, twakwa Fumu.
9Inene eyi yodiyo a fererire Krisitu no ku pinduka karo kwafu, ci nga ekare Fumu wafu nayumi. 10Ine eyi o ratwera muenthzoe mukwakutawa? Ine eyi o shomorwera muenthzoe mukwakutawa? Inene twahe kenge twa kwimana pa rupara ro thsipura thsa Nyambi thso ku ratwera. 11Inene ku na ñoriwa ci:
Ame ni yoya, Fumu aa amba,
munu no munu kenge a ku tongama pa rupara rwange,
karo dimi no dimi kenge thza ku citawera ci no Nyambi.
12Mweyo, munu no munu kenge a ku citawera pa meho a Nyambi.
Wa withsa muenthzoe mukwakutawa
13Mweyo, tu thsienu ku ciraturaratura honi, unone tu mone ci twa kwangithsa amweya nji kwikara thsiparaka thsa yumweya. 14Ni na dimuka karo naa rakwa shemwa mwa Fumu Yesu ci kwithsa thso dithziro athso thsothsinda. Uno honi thsa dithziro koyu na anekera ci thsa dithziro. 15Inene ngeci waa korithsa ku mucima muenthzoe kethsi o dya, apo honi ko endire mu thsishimo. Keyi o dya wepithsa mwoyo o munu oyu a fererire Krisitu. 16Mweyo, ethsi mu shimba ci thsiwa, mu mone ci kwithsa oyu thsi ninga ci thsimango. 17Inene Kutumina kwa Nyambi po kadi kwa ku dya no ku nwa unone kwa owawa no thsiyaro no thsinyanyu mu Mupepo Oukenu. 18Munu yomuhe o ku kwamena Krisitu kedi dikuñwa kenge a ku roerithsa Nyambi, karo anu kenge a ku mu tawethza.
19Mweyo, tu koñomekenu yo ku reta thsiyaro neyi yumba thsitawo thso munu no munu ku kwetu.
20Mwepithsa ekwama ya Nyambi mukaci kedya. Edya yoihe ikenu, uno honi kadi iwa ku dya ngara thsinu thso ku retithsera yumweya ku kuñuka. 21Ku di nawa ku kana ku dya nyama nji ku nwa waine nji ku tenda ngara thsinu ngeci thsaa twethsa ku withsa muenthzoe mukwakutawa.
22Eyi o na tawa keyi, o i cipakere mu kaci koe na Nyambi. Wa thsiyauthzi munu o kukana ku ciratura thsinda keyi a na mono ci yaa roera. 23Uno honi yomuhe o ku tamangera ci aa roera ku dya nji dyombo, ngeci ayepo dya a tenda thsivi. Inene ka a shupwerire omu a na tawera, karo enu yoihe yo kukana ku tunderera ku thsitawo po thsivi.
Attualmente Selezionati:
AkwaRoma 14: mho
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©2023 The Seed Company