Матфей 28
28
Иисусонь вельмамац
(Марк 16:1-8; Лук. 24:1-12; Иоанн 20:1-10)
1Ваймамань шида меле, недляшиста шобдавакиге Магдаласта Мария и лия Мариясь састь калмоть ванома. 2Апак учсек, вииста шерьхкозевсь модась, сяс мес менельста валгсь Шкайть ангелоц. Сон маладсь калмоти, шашфтозе сувама вастста кевть и озась лангозонза. 3Ангелсь няема коряс ульсь, кода ёндол, а щамонза ульсть акшет, кода лов. 4Ванфтыхне эводемать эзда трнатозевсть и прашендсть модать лангс, кода кулофт.
5Ангелсь мярьгсь аватненди: «А тинь тяда пеле, мон содаса: вешендьсасть крёз лангс эськотьф Иисусть. 6Сон тяса аш, Сон вельмась, кода и корхтась. Маладода и ваность вастть, коса ащесь Азорсь. 7Арда куроконе и азость тонафниензонды: "Иисус вельмась кулофста и тиндедонт инголи моли Галилеяв, тоса Сонь няйсасть". Тя кулять мон пачфтине тейнть».
8Аватне курокста кадозь калмоть, синь эвотьфста и тяка пингть пяк кенярдезь ласьксть пачфтемс тянь колга Иисусонь тонафниензонды. 9Ина мзярда синь мольсть пачфтемс тянь тонафнихненди, вага, апак учентт, каршезост сась Иисус, мярьгсь: «Шумбратада!» Сят маладсть, ашкодсть пильгозонза и сюконясть Тейнза. 10Эста Иисус корхтай тейст: «Тяда пеле, арда азондость тянь Монь малавикс ялганенди#28:10 Тяса Христос корхтай Эсь тонафниензон колга, конат ульсть Тейнза пяк малат, брад лаца.: катк молихть Галилеяв, и тоса няйсамазь Монь».
Калмонь ванфтыхненди салава максыхть ярмак
11Мзярда аватне тусть, ванфтыхнень эзда кой-конатне састь ошу и азондозь озксвятиень оцюнятненди семботь, мезе лиссь. 12Сят кочкасть пуромкс ломаньтналонь оцюнятнень мархта, корхтасть и прасть фкя мяльс. Синь макссть ванфты ушматтненди лама ярмак 13и корхтасть тейст: «Мярьгода: "Сонь тонафниенза састь веть и, мзярс минь удоме, салазь ловажанц". 14А кда тя кулясь пачкоди Римонь оцюняти, тяда пеле, минь мархтонза корхтатама и тейнть тянкса мезевок аф ули». 15Ушматтне сявозь ярмакнень и тисть стане, кода и мярькфоль тейст. И тя корхтамась срадсь еврейхнень келес, и тячемс эряй еврейхнень ёткса.
Иисус максы тонафнихненди оцюдонга оцю тев: шарфтомс ломаттнень Шкайти
(Марк 16:14-18; Лук. 24:44-49; Иоанн 20:19-23; Апост. т. 1:6-8)
16Кефкие тонафнихне тусть Галилеяв, пандть пряс, коза Иисус мярьгсь самс тейст. 17Мзярда няезь Сонь, сюконясть пильгозонза, хуш конат-конат эздост педа-пес ашесть кема: тя Иисуссь. 18Иисус маладсь тейст и мярьгсь: «Тейне максф сембе азорксшись менельса и модать лангса. 19Сяс арда и тиесть сембе ломаньтналхнень Тейне тонафникс, кстиндасть синь Алять, Цёрать и Иняру Ваймопожфть лемса. 20Тонафтость синь ванфтомс семботь, мезе Мон мярьгонь тейнть. Содасть, Мон улян мархтонт сембе шитнень, пингть пенц самс». Аминь.
Attualmente Selezionati:
Матфей 28: ОС16
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Библиянь ётафтома институтсь, 2016