Марк 3
3
Иисус пчкафты ваймамань шиня
(Матф. 12:9-14; Лук. 6:6-11)
1Иисус тага сась синагогав. Тоса ульсь коське кядь ломань. 2Фарисейхне вешендсть туфтал Иисусть муворгофтомс, сяс ванцть Сонь мельганза, пчкафтсы-аф тя ломанть ваймамань шиня. 3Иисус мярьгсь коське кядь ломанти: «Стяк и листь инголи». 4А фарисейхнень кизефтезень: «Койть коряс, мезе тиема ваймамань шиня, цебярь али кальдяв тев? Идемс ломанень эряфть али юмафтомс сонь?» Синь кашт ашесть моле. 5Иисус кяжиста варжакстсь лангозост, ризназевсь синь калгода седиснон инкса, и мярьгсь коське кядь ломанти: «Венептьк кядцень». Сон венептезе, и кядец арась шумбракс, омбоцеть лаца. 6Фарисейхне лиссть и Иродонь ширенц кирдиензон мархта эстокиге кармасть арьсема, кода шавомс Иисусонь.
Лама ломань моли Иисусонь мельге
7Но Иисус тусь Эсь тонафниензон мархта эрьхкть ширес. Мельганза мольсь пяк лама ломань Галилеяста, Иудеяста, 8Иерусалимста, Идумеяста, Иорданть омбокста, Тирть и Сидонть маласта. Синь мольсть Тейнза, сяс мес кулендсть оцю тевонзон колга. 9Иисус кошардозень тонафниензон анокламс Тейнза венч, сяс мес тоса кочкавсь пяк лама ломаньда: афольхть люпшта-тапа Эсонза. 10Вдь Сон пчкафтсь лама ломань, и сяс сярядихне сембе пяльде эцезь эцесть Иисусти, ёрасть токамс Сонь кядьса. 11И аф ару ваймопожфне Иисусонь няемста прашендсть инголенза и юватькшнесть: «Тон Шкайть Цёрацат!» 12Но Иисус кемоста кардазень азонкшнемда, кие Сон.
Кемгафтува апостолхне
(Матф. 10:1-4; Лук. 6:12-16)
13Иисус куцсь панда лангс и тердезень сятнень, кинь мялецоль тердемс, и синь састь Тейнза. 14И кочкась кемгафтува тонафни, конатненди фалу улема мархтонза, конатнень Сон кучселезень Пара кулять азондома 15и конатнень улель азорксшисна пчкафнемс урматнень и панцемс кяжи ваймопожфнень. 16Вов китольхть кемгафтувотне, конатнень кочказень Иисус: Симон, конанди макссь лем Пётр, 17Зеведеень цёрац Иаков и Иаковонь брадоц Иоанн, конатненди макссь лем Воанергес, лиякс «атямть цёранза», 18Андрей, Филипп, Варфоломей, Матфей, Фома, Алфеень цёрац Иаков, Фаддей, Симон Кананит 19и Иуда Искариот, кона мизе Иисусонь.
Иисусонь муворгофнесазь Сатанань вийть тевс нолдамаса
(Матф. 12:22-32; Лук. 11:14-23; 12:10)
20Мзярда Иисус и тонафниенза састь куду, тоза тага пуромсь лама ломань, сяс Иисусти и Сонь тонафниензонды ашель пинге ярхцамска. 21Мзярда Сонь мала ломаненза кулезь тянь, синь тусть сявомонза. Синь корхтасть: «Сон аф Эсь ёньцонза».
22А Иерусалимста саф койти тонафтыхне корхтасть: «Сонь эсонза Веельзевул!» и «Кяжи ваймопожфнень оцюняснон вийса Сон панцесыне кяжи ваймопожфнень!»
23Эста Иисус тердезень койти тонафтыхнень и кармась мархтост корхтама валвеляфксса: «Кода Сатанась панцы эсь прянц? 24Кда масторсь явови эсь эсьсонза, эста ся масторсь аф ванфтови; 25и кда кудса молихть тюремат-сялондомат, ся кудсь аф кирди, срады. 26И кда Сатанась кеподсь эсь каршезонза и явовсь эсь эсьсонза, эста сон аф кирди, тейнза сась пе. 27Кивок аф сувай вии ломанть кудс уликс-паронц салама, кда васенда аф сотнесы сонь. Аньцек эста салави кудстонза уликс-парось. 28Видеста корхтан тейнть: нолдавихть ломаттнень сембе пежесна и Шкайть лангс сембе сялдоматневок, 29но кие сялдсы Иняру Ваймопожфть, сянь пежец мзярдовок аф нолдави. Тя ломанць ули судендаф пефтома пингс».
30Иисус тяфта мярьгсь, сяс мес койти тонафтыхне корхнесть: «Сонь эсонза аф ару ваймопожф».
Кие Иисусонь тядяц и брадонза?
(Матф. 12:46-50; Лук. 8:19-21)
31Тяда меле састь Иисусонь тядяц и брадонза, синь ащесть ушеса и кучсть Иисусть тердема. 32Иисусонь перьфке озафоль лама ломань. Тейнза мярьгсть: «Тонь тядяце, браттне и сазорхне ушесот и тернихть эсот». 33Сон каршезост мярьгсь: «Кие Монь тядязе и кит Монь брадне?» 34Варжакстсь перьфканза озадотнень лангс и мярьгсь: «Вагот Монь тядязе и Монь брадне! 35Кие пяшкотькшнесы Шкайть мяленц, ся Монь брадозе, сазорозе и тядязе».
Attualmente Selezionati:
Марк 3: ОС16
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Библиянь ётафтома институтсь, 2016