Матвей 10
10
1Исусыс корис дынас даскыкнан велӧтчисьсӧ, сетіс нылӧ вын вашӧтлыны сэрпӧсь ловвесӧ, веськӧтны быдкодь шогӧттэз да висьӧ́ммез.
2Даскык апостоллӧн#10:2 апостол ─ Сідз шуисӧ Исуслісь велӧтчиссесӧ. Сія кылыс лоӧ «ыстӧм морт». ниммезныс сэтшӧмӧсь: Симон, мӧд нимыс сылӧн Петра, сылӧн Ӧндрей вон, Зеведейлӧн Яков да Иоан зоннэз, 3Филип, Варфоломей, Фома, вот ӧктісь#10:3 вот ӧктісь ─ налогосборщик Матвей, Алфей Яков, Леввей, мӧд нимыс сылӧн Фаддей, 4Кананит Симон да Искариот Иуда, кӧда и вузаліс Исуссӧ.
Даскык велӧтчисьӧс удж вылӧ ыстӧ́м
(Мк. 6:7-13; 13:9-13; Лк. 9:1-6; 12:2-7; 21:12-19)
5Даскык велӧтчисьсӧ ыстікӧ Исусыс нійӧ велӧтіс: «Енсӧ тӧдтӧм отир дынӧт эд ветлӧтӧ, Самария каррезӧ эд пырӧ. 6Мунӧ Израильлӧн ӧшӧм баляэз дынӧ. 7Ветлӧтіканыт юӧртӧ: "Енӧжись Юралӧ́мыс матын ни". 8Шогаліссесӧ веськӧтӧ, проказаӧссесӧ сӧстӧмтӧ, кулӧммесӧ ловзьӧтӧ, сэрпӧсь ловвесӧ вашӧтлӧ. Тійӧ весь босьтіт, весь и сеталӧ.
9Туйӧ петікӧ зарни, эзы́сь, ы́ргӧн сьӧм#10:9 зарни, эзы́сь, ы́ргӧн сьӧм ─ золотая, серебряная, медная монета кушаканыт эд сюйӧ. 10Кӧзича#10:10 кӧзича ─ (кӧича) мешок, вежан паськӧм, кӧмкӧт, бедь эд босьтӧ. Уджалісьыс тшыгйӧн оз кольччы. 11Карӧ, посадӧ пыртӧн юасьӧ сэтісь туяна мортӧс, кӧда ордын позьӧ сувтчыны. Одзлань мунтӧдз олӧ сы ордын. 12Керкуас пыртӧн висьталӧ: "Лӧнь ола́н#10:12 лӧнь ола́н ─ мир этія керкуын оліссезлӧ!" 13Керкуын оліссес туяна отир кӧ, лӧнь ола́ныс сія керкуӧ пырас. Абу туянаӧсь кӧ, лӧнь ола́ныс тіянлӧ бертас. 14Тіянӧс озӧ кӧ лэдзӧ да озӧ кывзӧ висьталӧм кыввезнытӧ, сэк керкуись али карись петтӧн коккезсиныт буссӧ пыркӧтӧ. 15Ме тіянлӧ быльсӧ висьтала: Суд Лунӧ Содо́м да Гомо́рра каррезлӧ лоас кокнитжык нія каррезся».
Одзланься пессьӧ́м-мырсьӧ́м#10:16 пессьӧ́м-мырсьӧ́м ─ страдание йылісь висьталӧ́м
16«Ме тіянӧс ыста баляэзӧс моз кӧиннэз коласӧ. Кыйез моз лоӧ мывкыдаӧсь, дудіэз моз рамӧсь. 17Отиркӧт видзсьӧ видзӧтчӧмӧн: нія тіянӧс пондасӧ вайӧтны судитаніннэзӧ, синагогаэзын тіянӧс пондасӧ вартлыны. 18Ме понда тіянӧс сувтӧтасӧ юраліссез да ӧксуэз одзӧ, медбы тійӧ висьтасит нылӧ да ентӧдтӧммеслӧ Ме йылісь. 19Кӧр тіянӧс вайӧтасӧ судитанінӧ, юраныт эд видзӧ, мый пондат баитны. Сія кадӧ тіянлӧ лоас сетӧм, мый висьтавны. 20Сэк тійӧ одӧ пондӧ баитны асьныт, тіян пытшкын пондас баитны Ен Айнытлӧн Лолыс.
21Вон ассис вонсӧ сетас вийны, ай ─ ассис челядьсӧ, челядь лэбтісясӧ ай-мамныс вылӧ да нійӧ виясӧ. 22Ме понда быдӧнныслӧ тійӧ син вылӧ одӧ пондӧ ковны. Кин медбӧрӧдз вермас видзсьыны, сія мезмас.
23Ӧтік карись тіянӧс вашӧтасӧ кӧ, пышшӧ мӧдік карӧ. Веськыта тіянлӧ висьтала: Израились и быдӧс карресӧ одӧ ештӧ кытшӧвтны, кыдз Морт Зоныс локтас.
24Велӧтчись велӧтісься абу сувтӧтӧм вылынжыка, сідз и кысъялісь аслас кӧзяинся. 25Велӧтчисьлӧ тырмӧ велӧтісьыс кодьӧдз быдмыны. Кысъялісьлӧ тырмӧ кӧзяиныс кодьӧн лоны. Керкусис кӧзяинсӧ шуисӧ кӧ вельзевулӧн#10:25 вельзевул ─ кульыслӧн ӧтік нимыс, сылісь гортіссесӧ эшӧ умӧльжыка нимкодяласӧ».
Повтӧг овны велӧтӧ́м
26«Но тійӧ эд полӧ тіянӧс умӧльӧ пуктіссезісь. Быдӧс сайӧ́втӧмыс оссьӧ, быд гусьӧна керӧ́м йылісь пондӧны тӧдны. 27Мый Ме тіянлӧ висьтала пемытӧн, тійӧ висьталӧ югытӧн. Пеллезаныт шушкӧ́мсӧ отирлӧ висьтасьӧ керку вывсянь. 28Эд полӧ вывты́р вийиссезісь, ловнытӧ эд нія вийны озӧ вермӧ. Полӧ Сыись, Кин вермӧ лов и вывты́р куслытӧм биын сотны. 29Оз я вузалӧ кык учӧт пышкайӧс ӧтік учӧт сьӧм вылӧ? Пышкайес#10:29 пышкай ─ воробей коласісь нельки ӧтікыс оз усь му вылас, оз кӧ лэдз Айныт. 30А тіян и юрси тылӧппэзныт лыддьӧмӧсь. 31Сідзкӧ, эд полӧ: тійӧ эд пышкайезся донажыкӧсь!
Ассит крест босьтӧ́м йылісь
(Мк. 9:41; Лк. 12:8-9,51-53; 14:26-27)
32Кин отир одзын оз повзьы Менӧ тӧдӧ́м йылісь висьтасьны, сійӧ Ме пукта Аслам мортӧ енӧжись Айӧ одзын. 33Йӧз одзын кин суськисяс Менӧ тӧдӧ́мись, сійӧ и Ме енӧжись Айӧ одзын пукта тӧдтӧм мортӧ».
34«Юраныт эд видзӧ, Ме пӧ локті вайны му вылӧ лӧнь ола́н. Ме локті вайны не лӧнь ола́н, но шыпурт#10:34 шыпурт ─ меч. 35Ме локті янсӧтны зонсӧ айкӧт, нывсӧ мамкӧт, моньсӧ анькӧт. 36Мортыс вылӧ лэбтісясӧ гортіссес.
37Мортыс ассис ай-мамсӧ радейтӧ кӧ Менӧся буржыка, Меным сія абу туяна морт. Кин ассис нывсӧ али зонсӧ радейтӧ кӧ Месся буржыка, Меным сія абу туяна морт. 38Кин ме бӧрсянь мунӧ Ассис крестсӧ босьттӧг кӧ, Меным сія абу туяна морт. 39Кин мӧдӧ видзны ассис ола́нсӧ, сійӧ ӧштас. Кин Ме понда ӧштас ассис ола́нсӧ, сійӧ адззас».
Козин сетӧм йылісь
40«Кин тіянӧс гортас лэдзӧ, сія Менӧ лэдзӧ. Кин Менӧ лэдзӧ, сія лэдзӧ Менӧ Ыстісьсӧ. 41Кин Енсянь юӧртісьсӧ гортас лэдзӧ кыдз Енсянь юӧртісьӧс, сія козинсӧ босьтас кыдз Енсянь юӧртісь. Ен сьӧрті веськыта олісьӧс гортас лэдзисьлӧ лоас козиныс кыдз Ен сьӧрті веськыта олісьлӧ. Сія эд тӧдіс, мортыс Ен сьӧрті веськыта олісь да лэдзис гортас. 42Быльсӧ висьтала тіянлӧ: кин кӧдзыт ваӧн юкталас учӧтӧ пуктӧм мортсӧ кыдз Менчим велӧтчисьӧс, сія козинтӧг оз кольччы».
Пыртісь Иоанлӧн юалӧ́м
(Лк. 7:18-23)
Attualmente Selezionati:
Матвей 10: КПБЮ
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Institute for Bible Translation, Finland
