Матвей 12
12
1Ӧтпыр шоччися́н лунӧ Исусыс муніс сюа ыббез вылӧт. Велӧтчиссеслӧн пондӧм симавны кынӧмныс. Нія мунтӧнняныс пондісӧ нетшкыны шеппесӧ да сёйны туссесӧ. 2Сійӧ адззылісӧ фарисейез. Нія Исусыслӧ висьталісӧ: «Видзӧт! Тэнат велӧтчиссет керӧны сійӧ, мый оз туй керны шоччися́н лунӧ!» 3Исусыс нылӧ шуис: «Эдӧ разь тійӧ лыддьӧтлӧ Давидыс йылісь, мый сія керӧм аслас отиркӧт кынӧмныс сималӧ́м коста? 4Сія пырӧм Енлӧн Вежа Керкуӧ да аслас отиркӧт сёйӧм Енлӧ вайӧм няньсӧ. Нылӧ эз туй сёйны нійӧ няннесӧ, дзир вежауджаліссезлӧ туйис. 5Эдӧ разь лыддьӧтлӧ тійӧ Туйдӧ́тсис, вежауджаліссес шоччися́н лунӧ уджалӧны Вежа Керкуын. Но шоччися́н лунӧ уджалӧ́м понда нійӧ озӧ шуӧ умӧльсӧ кериссезӧн. 6Висьтала тіянлӧ: Татӧн Сія, Кӧда Вежа Керкуся ыджытжык. 7Тійӧ одӧ тӧдӧ, мый йылісь висьталӧны этна кыввес: "Небыт сьӧлӧмныт колӧ, озӧ колӧ езъяла́н козиннэс". Тӧдіт бы, сэк эдӧ бы осудитӧ нійӧ, кин эз кер умӧльсӧ. 8Морт Зоныс эд и шоччися́н лун вылын кӧзяин!»
Косьмӧм киа мортӧс веськӧтӧ́м
(Мк. 2:23-28; Лк. 6:1-5)
9Сэтісь мунӧ́м бӧрын Исусыс пырис синагогаӧ. 10Сэтӧн вӧлӧм косьмӧм киа морт. Фарисейес Исуссӧ мыйынкӧ кутӧм могись Сылісь юалісӧ: «Позьӧ я мортсӧ веськӧтны шоччися́н лунӧ?» 11Сія нылісь юаліс: «Тіян ӧтік баля, шоччися́н лунӧ сія усяс кӧ гуӧ, кин тіян коласісь оз лэбты сійӧ? 12Мортыс эд баляся унаӧн донажык. Сідзкӧ, шоччися́н лунӧ бурсӧ позьӧ керны». 13Сэсся Исус шуис шогалісьыслӧ: «Нюжӧт китӧ». Мортыс сідз и керис. Сылӧн киыс веськаліс, лоис мӧдыс кодь. 14Фарисейес сэтісь петісӧ. Нія баитчӧмась, кыдз бы вийны Исуссӧ. Этія йылісь тӧдікӧ Исусыс сэтісь муніс.
Енлӧн бӧрйӧм кысъялісь
15Исусыс бӧрсянь муніс уна отир. Сія нійӧ быдӧннысӧ веськӧтіс. 16Ас йывсис эз лэдз некинлӧ висьтасьны. 17Сідз керсис Енсянь юӧртісь Исайлӧн висьталӧ́мыс:
18─ То Менам Зонӧ,
сьӧлӧмшӧрӧ Менам, ола́н гажӧ,
Сійӧ Ме бӧрйи.
Ме сета Сылӧ Ассим Лолӧс.
Менчим веськыта судитӧ́мӧс
Сія юӧртас уна отирлӧ.
19Сія оз етшась#12:19 етшасьны ─ спорить, оз горӧт.
Сылісь баитӧ́мсӧ ӧтӧрын он кыв.
20Кусіньтчӧм шатьсӧ Сія оз чегӧт,
и чискан#12:20 чискан ─ тлеющий бисӧ оз кусӧт
суд вылын веськыта бӧрйисьӧмӧдз.
21Отирпӧлӧсыс#12:21 отирпӧлӧс ─ разные народы пондасӧ надейтчыны Сы вылӧ.
Кинсянь Исуслӧн выныс
(Мк. 3:20-30; Лк. 11:14-23; 12:10)
22Исус дынӧ вайӧтісӧ мортӧс, кӧдӧ видзӧм-маитӧм сэрпӧсь лов. Сія эз баит, нем эз адззы. Исусыс сійӧ веськӧтіс. Мортыс пондіс баитны да адззыны. 23Быдӧс отирсӧ диво кутіс. Нія ӧтамӧдныслӧ пондісӧ баитны: «Поди, Сія и эм Давид Зоныс». 24Фарисейес кылӧмась отирыслісь баитӧ́мсӧ. Нія шуисӧ: «Сэрпӧсь ловвеслӧн юралісь вельзевул вынӧн Сія вашӧтлӧ сэрпӧсь ловвесӧ».
25Исусыс тӧдіс нылісь юраныс пыртӧ́мсӧ. Сэтчӧ Сія висьталіс: «Ӧксу кипод увтын олісь йӧзыс ӧтамӧдкӧт янсӧтчас кӧ да пондас тышкасьны, сія муыс кушамас#12:25 кушамны ─ опустеть. Карын али керкуын оліссес ӧтамӧдкӧт кӧ озӧ лӧсялӧ, сія карыс да керкуыс дыр озӧ сулалӧ. 26Сотанаыс сотанасӧ кӧ вашӧтлӧ, сэк сія лэбтісис ас вылас. Сэк вермас разь сылӧн юралӧ́мыс видзсьыны? 27Ме кӧ вельзевул вынӧн вашӧтла сэрпӧсь ловвесӧ, кытшӧм вынӧн сэк нійӧ вашӧтлӧны тіян зоннэзныт? Нія лоасӧ тіянлӧ судитіссезнас. 28А Ен Лолӧн кӧ Ме вашӧтла сэрпӧсь ловвесӧ, сэк Енлӧн Юралӧ́мыс тіян дынын ни.
29Видзӧтӧ, вермас разь кинкӧ пырны вына мортлӧн керкуӧ да мыйкӧ петкӧтны, оз кӧ сійӧ домав? Мортсӧ домалас да вӧлись куштас керкусӧ. 30Кин абу Мекӧт, сія Ме вылӧ лэбтісьӧ. Кин Мекӧт оз ӧкты, сія куштӧ-паськӧтӧ.
31Сійӧн висьтала тіянлӧ: мортыслісь быд умӧль керӧ́м, умӧльтӧ́м проститасӧ. Вежа Лолӧс умӧльтісьсӧ озӧ проститӧ. 32Умӧльтан кӧ Мортлісь Зонсӧ, проститасӧ. Вежа Лолӧс умӧльтісьсӧ ӧння кадӧ озӧ проститӧ да и локта́нас озӧ».
Бур да умӧль пу
(Лк. 6:43-44)
33«Бур пу сетӧ бур воӧ́м, умӧль пу ─ умӧль воӧ́м. Пусӧ тӧдӧны воӧ́мыс сьӧрті. 34Кый увтыр! Верматӧ я бурсӧ висьтавны, асьныт кӧ лӧгӧсь? Мыйӧн эд мортыс тыртіс сьӧлӧмсӧ, сылӧн ӧмсис сія и петӧ. 35Бур мортыс бурсӧ видзанінсис петкӧтӧ бурсӧ. Лӧг мортыс лӧгсӧ видзанінсис лӧгсӧ и петкӧтӧ. 36Висьтала тіянлӧ: быд ковтӧмсӧ баитӧм понда Суд Лунӧ ковсяс кыв видзны. 37Аслат кыввет асьтӧ вермасӧ судитны, вермасӧ и мездыны».
Ионалӧн пас#12:38 пас ─ знак
(Мк. 8:11-12; Лк. 11:29-32)
38Сэк фарисейез да Туйдӧ́тӧ велӧтіссез коласісь мукӧдыс пондісӧ корны: «Велӧтісь, мийӧ бы адззылам Тэсянь мыччала́н пас#12:38 мыччала́н пас ─ знамение». 39Исусыс нылӧ висьталіс: «Ӧння кадӧ оліссес ылалӧм да лэдзчисьӧм отир. Нія корӧны мыччавны пас. Енсянь юӧртісь Ионалӧн пасся мӧдік пас нія озӧ адззылӧ. 40Ионаыс куим ой да куим лун вӧлӧм ыджыт чери кынӧмын. Сідз Морт Зон му сьӧлӧмас куим ой да куим лун чулӧтас. 41Ниневия карын оліссес Суд Лунӧ сувтасӧ ӧння оліссескӧт да судитасӧ нійӧ. Ионалісь висьталӧмсӧ кылӧмсянь нія дугдӧмась керны умӧльсӧ. А эстӧн эд Ионаысся ыджытжык. 42Лунлань муись иньӧксу#12:42 иньӧксу ─ царица Суд Лунӧ сувтас ӧння оліссескӧт да судитас нійӧ. Ылісянь сія вовлӧм Соломонлісь мывкыда сёрнитӧмсӧ кывзыны. А эстӧн эд Соломонся ыджытжык».
Сэрпӧсь ловлӧн бертӧ́м
(Лк. 11:24-26)
43«Сэрпӧсь лолыс мортісь петӧм бӧрын ветлӧтӧ ватӧминнэзӧт#12:43 ватӧмин ─ безводное место. Сія кошшӧ аслыс шоччисянін да оз адззы. 44Сэк шуӧ аслыс: "Бӧр берта сэтчин, кытісь петі". Локтӧ́м бӧрын адззӧ: керкуас быдӧс дзимлясьӧм, чышкӧм, олісьыс сэтӧн абу. 45Сэсся корӧ сьӧрас сизим сэрпӧсь лолӧс. Нія сысся лёкжыкӧсь. Быдӧнныс пырӧны овны сэтчӧ. Сэк сія мортлӧ лоӧ одззаысся умӧльжык. Сідз лоас и этія лӧг увтырлӧ!»
Исуслӧн мам да воннэз
(Мк. 3:31-35; Лк. 8:19-21)
46Отиркӧт Исуслӧн баитӧ́м коста Сы дынӧ локтӧмась Мамыс воннэскӧт. Нія сулалӧмась ӧтӧрас, мӧдӧмась Сыкӧт баитны. 47Ӧтік морт Исусыслӧ висьталіс: «Ӧтӧрас сулалӧны Тэнат Мамыт воннэткӧт, нія мӧдӧны Тэкӧт баитны». 48Исусыс сылӧ висьталіс: «Кин Менам мамӧ? Кин Менам воннэзӧ?» 49Кинас мыччаліс велӧтчиссес вылӧ да шуис: «Нія Менам мамӧ да воннэзӧ. 50Кин керӧ енӧжись Айӧлӧ колӧм сьӧрті, сія Меным вон, сой да мам».
Кӧдзись йылісь велӧта́н висьт
(Мк. 4:1-9; Лк. 8:4-8)
Attualmente Selezionati:
Матвей 12: КПБЮ
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Institute for Bible Translation, Finland
