Матвей 5
5
1Ас гӧгӧрсис уна йӧзӧс адззӧ́мсянь Исусыс кайис керӧс вылӧ. Велӧтчиссес ӧксисӧ Сы гӧгӧрӧ. Исусыс пуксис, 2пондіс велӧтны:
3«Шудаӧсь#5:3 шуда ─ счастливый, блаженный ловныслӧ кориссес:
нылӧн эм Енӧжись Юралӧ́м.
4Шудаӧсь горзіссес:
нійӧ бурӧтасӧ#5:4 бурӧтны ─ утешить.
5Шудаӧсь раммес#5:5 рам ─ кроткий:
нылӧ сетасӧ кӧсйӧм мусӧ.
6Шудаӧсь,
кӧдна сёя́н-юа́н моз кошшӧны Ен сьӧрті веськыта олӧ́мсӧ#5:6 Ен сьӧрті веськыта олӧ́м ─ праведность:
нія пӧтасӧ.
7Шудаӧсь небыт сьӧлӧмаэс:
Еныс сетас нылӧ небыт сьӧлӧмсянь.
8Сӧстӧм сьӧлӧмаэс шудаӧсь:
нія Енсӧ адззасӧ.
9Йӧзӧс ӧтамӧдкӧт бурӧтісь-лӧньсӧтіссес#5:9 бурӧтны-лӧньсьӧтны ─ примирить шудаӧсь:
Еныс нійӧ Аслас челядьӧ пуктас.
10Ен сьӧрті веськыта олӧ́м понда вашӧтӧммес шудаӧсь:
нылӧн эм Енӧжись Юралӧ́м.
11Тійӧ шудаӧсь, Ме понда кӧ тіянӧс пондасӧ видны, дзескӧтлыны-вашӧтлыны, тіян йылісь вӧвлытӧм умӧльсӧ пондасӧ висьтавлыны. 12Гажмӧ, гажӧтчӧ: енӧжас тіянлӧ лӧсьӧтӧм ыджыт козин. Сідз дзескӧтлӧмась-вашӧтлӧмась и Енсянь юӧртіссесӧ, кӧдна олісӧ тіян одзын».
Тійӧ сов да югдӧта́н
(Мк. 9:50; Лк. 11:33; 14:34-35)
13«Му вылас тійӧ ─ сов. Ӧштас кӧ солыс солала́н вынсӧ, мыйӧн сійӧ бӧр керан соланас? Сэк сія некытчӧ ни оз туй, сійӧ чапкасӧ отир кок увтӧ.
14Отирлӧ тійӧ ─ югдӧта́н. Керӧс вылын сулала́н кар сайӧвтчыны оз вермы. 15Ӧзтӧм бисӧ озӧ пуктывлӧ гырнич увтӧ, сійӧ сувтӧтӧны бивидза́н вылӧ. Сэк биыс керкуас быдӧнныслӧ югытсӧ сетӧ. 16Сідз и тіян югытныт ась югдӧтӧ. Отирыс ась адззӧны тіянлісь бурсӧ керӧ́мнытӧ да ошкӧны енӧжись Айнытӧ».
Туйдӧ́т#5:17 Туйдӧ́т ─ закон Моисея йылісь
17«Юраныт эд видзӧ, Ме пӧ локті вежны Туйдӧ́тсис тшӧктӧ́ммесӧ да Енсянь юӧртіссезлісь гижӧ́ммесӧ. Ме эг лок разьны, локті быдӧс керны ны сьӧрті. 18Ме тіянлӧ быльсӧ висьтала: енӧжыс да муыс ӧштӧдз Туйдӧ́тсис нельки ӧтік учӧт шыпас#5:18 шыпас ─ буква, ӧтік кырӧлок оз ӧш. Ги́жӧмыс быдӧс аркмас. 19Нія тшӧктӧ́ммезісь мортыс вежас кӧ нельки ӧтік учӧтик тшӧктӧ́м да сэтчӧ мӧдіккезӧс велӧтас, сійӧ Енӧжись Юраланінын медучӧт мортӧ пуктасӧ. А кин олӧ кӧ тшӧктӧ́ммес сьӧрті да отирӧс велӧтӧ ны сьӧрті овны, сійӧ Енӧжись Юраланінын ыджыт мортӧ пуктасӧ. 20Висьтала тіянлӧ: Тійӧ одӧ кӧ олӧ Еныс сьӧрті Туйдӧ́тӧ велӧтіссезся да фарисейезся буржыка, сэк одӧ пырӧ Енӧжись Юраланінӧ».
Лӧгалӧ́м йылісь
(Лк. 12:57-59)
21«Тійӧ тӧдат важын олісь йӧзлӧ этӧ висьталӧ́мсӧ: "Эн вий, быд морт вийисьӧс суд вылас мыжьясӧ". 22А Ме висьтала тіянлӧ: кин воныс вылӧ абусис лӧгсӧ видзӧ, сылӧ ковсяс суд вылын кыв видзны. Аслас вонлӧ#5:22 вон ─ ӧтмоза веритісь мортыс шуас кӧ: "бӧбӧв тэ", сідз шуисьыс сюрас вылынжык суд вылӧ. Кин вонсӧ шуас: "вежӧрттӧм тэ", сія куслытӧм биӧ шедас. 23Тэ ваян езъяланін#5:23 езъяланін ─ жертвенник вылӧ Енлӧ козин. Сы коста тӧдвылат усяс вонытлӧн тэ вылӧ лӧгалӧ́мыс. 24Сэтчӧ козинтӧ коль да мун воныт дынӧ бурасьны. Сэсся вӧлись лок Енлӧ козинтӧ вайны.
25Тэнӧ нуӧтӧны кӧ судӧ, туй вылӧт мунӧ́мныт коста тэрмась бурасьны тэнӧ нуӧтісьыскӧт. Он кӧ сідз кер, сія сетас тэнӧ судитісьлӧ. Судитісьыс сетас тэнӧ видзӧтіссез киӧ да тшӧктас пуксьӧтны. 26Веськыта шуа тэныт: медбӧрья сьӧмтӧ#5:26 сьӧм ─ деньги сеттӧдз сэтісь он пет».
Гозъя коласын олӧ́м йылісь
(Мт. 18:8-9; 19:9; Мк. 10:11-12; Лк. 16:18)
27«Тійӧ кывліт, мый вӧлі висьталӧм одзжык оліссезлӧ: "Гозйӧн овтӧн ӧтамӧдныт сайсянь эд ветлӧтӧ". 28А Ме висьтала тіянлӧ: инька вылӧ видзӧтікӧ мортыс ӧзйӧтчис кӧ, сія сьӧлӧмас иньыс сайсянь кыскасис ни. 29Веськыт синыт тэнӧ ылӧтӧ кӧ, кыскы синтӧ да чапкы. Вывты́рсит ӧтік тор ӧштан кӧ, тэныт сысянь буржык. Сэк быдсӧн вывты́ртӧ озӧ чапкӧ адас. 30Веськыт киыт тэнӧ ылӧтӧ кӧ керны умӧльсӧ, сійӧ керав да дынсит чапкы. Вывты́рсит ӧштан кӧ ӧтік тор, сысянь тэныт буржык. Сэк быдсӧн вывты́рнат он шед куслытӧм биӧ.
31Вӧлі висьталӧм тай: "Инькаыскӧт кин янсӧтчӧ, ась сетӧ сылӧ янсӧтча́н гижӧ́т". 32А Ме тіянлӧ висьтала: инька жӧникыс сайсянь эз кыскась, а жӧникыс тай сыкӧт янсӧтчӧ. Сідз сія ачыс ыстӧ иньсӧ жӧник сайсянь кыскасьны. А кин босьтас кӧ янсалӧм инькасӧ, сія ачыс кыскасьӧ».
Кыв сетӧ́м#5:33 кыв сетны ─ поклясться йылісь
33«Тійӧ кывліт, мый вӧлі висьталӧм отирыслӧ кӧркӧ: "Сетӧм кывтӧ видз! Дӧсвидзись одзын кытшӧм кыв сетін, кер сы сьӧрті!" 34А Ме висьтала тіянлӧ: Кыв сеттӧг ов! Енӧжӧн кыв эн сет. Сія ─ Енлӧн юрала́н пукӧ́сыс#5:34 юрала́н пукӧ́с ─ престол, трон. 35Муӧн кыв эн сет. Сія ─ Енлӧн кок увтыс. Ерусалим карӧн кыв эн сет. Сія ─ вына Ӧксулӧн карыс. 36Аслат юрӧн кывтӧ эн сет. Тэ эд он вермы нельки ӧтік юрси тылӧп пӧртны чочкомӧ, сьӧдӧ я. 37Тіян кывныт ась лоас чорыт: "сідз"-ныт ась лоӧ "сідз", "ог"-ныт ась лоӧ "ог". Ны дынӧ мӧдік содтӧм кыввес ылӧтлісьсянь ни».
Вештісьӧ́м йылісь
38«Тійӧ кывлітӧ, мый вӧлі висьталӧм: "Син понда син, пинь понда пинь". 39А Ме висьтала тіянлӧ: тэныт лёк керӧ́м понда эн вештісь. Веськыт пельбокат сӧтас кӧ, бергӧт шульгатӧ. 40Судитчӧ кӧ кинкӧ тэкӧт йӧрнӧстӧ босьтӧ́м могись, сет сылӧ и вевдӧрись паськӧмтӧ. 41Тшӧктӧ кӧ кинкӧ мунны сыкӧт ӧтік верста, мун сыкӧт кыкӧ. 42Тэнчит корисьлӧ сет, одзӧсалісь мортсӧ эн вашӧт».
Радейтӧ́м йылісь
(Лк. 6:27-36)
43«Тійӧ кывлітӧ сэтшӧм висьталӧ́мсӧ: "Ассит матісьтӧ радейт, но тэ вылӧ лэбтісисьсӧ#5:43 кинкӧ вылӧ лэбтісись ─ враг синнат эн адззы". 44А Ме тіянлӧ висьтала: Тіян вылӧ лэбтісиссесӧ радейтӧ. Бласлӧви́тӧ тіянӧс ёрдіссесӧ. Кӧдна синӧн озӧ вермӧ видзӧтны тіян вылӧ, нылӧ бурӧ керӧ. Енлӧ кеймӧ тіянӧс дзерӧтліссез да вашӧтліссез понда. 45Сэк лоат енӧжись Айнытлӧ челядьӧн. Сія тай тшӧктӧ Аслас шонділӧ ӧтмоза югытсӧ сетны и бур йӧзлӧ, и лёк йӧзлӧ. Сія ыстӧ зэрсӧ и Ен сьӧрті веськыта оліссезлӧ#5:45 Ен сьӧрті веськыта олісь ─ праведный, и Ентӧг оліссезлӧ. 46Тійӧ радейтат кӧ тіянӧс радейтіссесӧ, сэк мый понда тіянлӧ козинсӧ сетны? Озӧ разь сідз керӧ и вот#5:46 вот ─ налог ӧктіссес? 47Тійӧ кӧ бур кылӧн панталат дзир ассиныт воннэзнытӧ, сэк мый бурсӧ керат? Озӧ разь сідз керӧ и ентӧдтӧммес? 48Енӧжись Айныт быдсӧн бур#5:48 быдсӧн бур ─ совершенный! Сы моз и тійӧ лоӧ быдсӧн бурӧсь».
Отсасьӧ́м йылісь
Attualmente Selezionati:
Матвей 5: КПБЮ
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Institute for Bible Translation, Finland
