Иоанн 2
2
(Мт 4:18-22; Мк 1:16-20; Лк 5:2-11)
Каанада болоһон түрэ найр
1Хоёр хоногой удаа Галилей можын Каана хотодо түрэ найр болобо. Тэндэ Иисүүсэй эжынь байлсаа. 2Мүн Иисүүсшье шабинартаяа түрэдэ уригдаһан байна. 3Үзэмэй дараһан архиин дууһахада, Иисүүсэй эжынь хүбүүндээ:
– Эдэмнай архигүй болоод байнал, – гэбэ.
4– Эжымни, эндэ Минии хэрэг юуб даа? Сагни үшөө ерээгүй, – гэжэ Иисүүс харюусаба.
5– Энээнэйл хэхэ гэһэн юумэ хэгты, – гэжэ эхэнь зарасанарта хэлэбэ.
6Тэндэнь еврейнүүдэй арюудхалай заншал сахилгада хэрэглэгдэдэг зургаан томо уһанай шулуун тогоонууд табяатай байгаа. Тогоон бүридэнь наян литрһээ зуун хорин литр хүрэтэр багтадаг һэн.
7– Тогоонуудаа уһаар дүүргэгты, – гэжэ Иисүүс хэлэбэ.
Зарасанарынь тогоонуудые уһаар дүүргэбэ.
8– Зай, энээнһээ удхаад, түрэ найрые хүтэлэгшэдэ абаашагты, – гэжэ Иисүүс хэлэбэ.
Тэдэнь абаашаба. 9Хүтэлэгшэнь үзэмэй архи болошоһон уһанһаа амсаад үзэбэ. Иимэ үзэмэй дараһан архи хаанаһаа бии болооб гэжэ тэрэ хүн мэдээгүй, гансал уһа удхаһан зарасанар лэ энээн тухай мэдэжэ байгаа. Найрай хүтэлэгшэнь хүрьгэн хүбүүе дуудаад, 10тэрээндэ:
– Хүн бүхэн түрүүшээр һайн үзэмэй дараһан архияа аягалаад, айлшадайнгаа һогтоходо муушаг архи табидаг. Харин ши һайн архияа мүнөө болотор хадагалаад байбаш, – гэбэ.
11Иигэжэ Иисүүс Галилей можын Каана хотодо гайхамшаг үзэгдэлнүүдэйнгээ эхи табиба. Иигэжэ Иисүүс Өөрынгөө алдарые харуулһан, тиин шабинарынь Тэрээндэ этигэһэн юм.
12Энэ ушарай удаа Иисүүс эжытэеэ, аха дүүнэртэеэ, шабинартаяа хамта Капернаум ошоо. Тэндэ хэдэн үдэр байгаа һэн.
Һүмые арюудхалга
13Еврейнүүдэй Паасхын#2:13 Паасха болбол Египедһээ гараһан үдэрэй дурасхалда хабар бүхэн тэмдэглэгдэдэг еврейнүүдэй ехэ һайндэр мүн. һайндэрэй болохонь ойртожо байхада, Иисүүс Иерусалим ошобо. 14Һүмын хорёодо наймаашадай сар, хони, гулабхаа гэхэ мэтые худалдажа байхыень, нүгөөдэ зариманайнь мүнгэ танга андалдажа байхыень Тэрэ хараба. 15Аргамжаар ута ташуур минаа хээд, Иисүүс тэдэ наймаашадые хони малтайнь хамта бултыень Һүмын хорёоһоо намнажа гаргаба, мүнгэ һолигшодой шэрээнүүдые хүмэрюулхэдэнь, тэдэнэй мүнгэ алтань иишэ тиишээ бутаран унаба. 16Гулабхаа наймаалагшадта Иисүүс:
– Эдэнээ эндэһээ абаашагты! Минии Эсэгын Гэр наймаанай газар бү болгогты! – гэбэ.
17Нангин Бэшэг соо: «Танай Гэртэ дуратай байһамни Намайе дүлэн мэтээр бадараана!» – гэжэ бэшээтэй байһые Иисүүсэй шабинар һанаба.
18Теэд энэ үедэнь еврейнүүдэй ахамадууд оросолдон:
– Иимэ юумэ хэхэ эрхэтэй байһанаа гэршэлэн, Та ямар гайхамшагта үзэгдэлнүүдые харуулхабта? – гэжэ асууба.
19– Энэ Һүмэ һандаргагты, тиигээд Би энээниие гурбан үдэр соо дахин бодхоохоб, – гэжэ Иисүүс еврейнүүдэй ахамадуудта хэлэбэ.
20– Энэ Һүмэ дүшэн зургаан жэлэй туршада баригдаа, харин Та гурбан үдэр соо барихаб гэнэ гүт?! – гэжэ еврейнүүдэй ахамадууд хэлэбэ.
21Һүмэ тухай хэлэхэдээ, Иисүүс Өөрынгөө бэе тухай хэлэһэн байгаа. 22Иисүүсэй амидырһан хойно Тэрэнэй һурагшад эдэ үгэнүүдыень һанаад, эдэ үгэнүүдтэнь болон Нангин Бэшэг соо баһа энэ ушар тухай бэшээтэй байһанда этигэбэ.
Иисүүс бүхы хүнүүдые мэдэнэ
23Паасхын һайндэрэй үедэ Иерусалимда Иисүүсэй үзүүлһэн гайхамшаг үзэгдэлнүүдые олон хүнүүд хараад, Тэрээндэ этигээ. 24Теэд Иисүүс хэндэшье найдадаггүй һэн, ушарынь хадаа, Тэрэ болбол бүхы хүнүүдые мэдэдэг байгаа. 25Иисүүстэ ондоо хүнүүдэй хэлэһэнээр хүн тухай тухайлха хэрэггүй бэлэй, юундэб гэбэл, хүнэй сэдьхэл бодол Тэрэ Өөрөө мэдэдэг һэн.
Attualmente Selezionati:
Иоанн 2: BurBBL2024
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024