1 Xa̱bo̱ Korínto̱ 1
1
Páblo̱ naraxi̱in tsí nanimbu̱únꞌ juyáá Jesús ná xuajen Korínto̱
1Ikhúúnꞌ ñajunꞌ Páblo̱. Watsaꞌwóꞌ rí ma̱nindxu̱ꞌ mbáa xa̱bo̱ tsí waxúngua̱a̱ꞌ neꞌne Jesukrísto̱ numuu rí xkuaꞌnii ndiyoo Ana̱ꞌlóꞌ. Ga̱jmi̱ꞌ dxájwalóꞌ Sóste̱ne̱s. 2Nu̱ra̱xi̱inxo̱ꞌ tsí nanimbu̱únꞌ juyáá Ana̱ꞌlóꞌ ná xuajen Korínto̱, ikháanꞌlaꞌ tsáanꞌ ni̱gu̱ma-jaꞌwáanꞌlaꞌ neꞌne Krísto̱ Jesús. Watsaꞌwálaꞌ rí ma̱nindxa̱ꞌlaꞌ xa̱bo̱ xuajñuu Ana̱ꞌlóꞌ gajmiálaꞌ mbá xúgíin tsí asndo náá máꞌ numbaa nu̱xri̱ga̱á mbiꞌyuu Tátiálóꞌ Jesukrísto̱, Táta̱ tsí naꞌthán-ñájúu̱n ikhii̱n jamí ikháánꞌlóꞌ.
3Ana̱ꞌlóꞌ Mikhuíí jamí Táta̱ Jesukrísto̱ gúne̱-tsakun-rámáaꞌlaꞌ jamí ikhii̱n máꞌ gúni̱i̱ rí ma̱juwalaꞌ tsímáá.
Páblo̱ narígu̱u la gamaku inuu Ana̱ꞌlóꞌ
4Jámba̱ miꞌtsú na̱rígu̱ulo̱ꞌ gamaku inuu Anu̱ꞌ Mikhuíí ga̱jma̱á numalaꞌ, numuu rí maphú mba̱a̱ rí máján nixnálaꞌ Ana̱ꞌlóꞌ ga̱jma̱á majñu̱u̱ Krísto̱ Jesús. 5Ga̱jma̱á majñu̱u̱ ikhaa̱ nijanálaꞌ mi̱ndaꞌkho mbá xúgíí inii rí guáꞌdáálaꞌ, ga̱nindxu̱u̱ ne̱ mbá xúgíí inii rí nu̱tha̱nlaꞌ jamí mbá xúgíí inii rí nu̱ne̱-nuwiinlaꞌ. 6Xkuaꞌnii nikujma rí ni̱ga̱nú ajngóo Krísto̱ ga̱jma̱á nindxa̱ꞌlaꞌ. 7Ikhaa jngó nánguá máꞌ iꞌyálaꞌ nimbá rí naxná Ana̱ꞌlóꞌ kajngó mu̱ne̱-mba̱a̱laꞌ, awúun máꞌ rí guáꞌthi̱ínlaꞌ rí ma̱ꞌkha̱a Tátiálóꞌ Jesukrísto̱. 8Ikhaa̱ máꞌ ma̱ꞌnii̱ rí ma̱wajún-gúkuálaꞌ asndo mbiꞌi rí ndámba̱wóo, kajngó ma̱xáríga̱ nimbá rí ra̱máján mi̱ꞌthán ga̱jma̱á numalaꞌ ído̱ rí ma̱ꞌkha̱a Tátiálóꞌ Jesukrísto̱. 9Numuu rí maphú jmbii Ana̱ꞌlóꞌ, tsí nindxaꞌwálaꞌ rí ma̱mbáxa̱ꞌlaꞌ gajmiálaꞌ A̱dée, ikhaa máꞌ tsí ñajuun Tátiálóꞌ Jesukrísto̱.
Nu̱xpi̱ꞌtha̱-mijná tsí nanimbu̱únꞌ juyáá Jesús ná Korínto̱
10A̱ngui̱nꞌ, na̱tha̱n-jáñalaꞌ ríge̱ꞌ ga̱jma̱á numuu Tátiálóꞌ Jesukrísto̱: rí mbóó awan gáwaꞌdáálaꞌ mbá xúgiáanꞌlaꞌ, jamí mu̱xúxpíꞌthá-mijnálaꞌ. Mbá ꞌnduꞌ gájuwalaꞌ ga̱jma̱á numuu mbóó ju̱ma̱, jamí mbóó máꞌ numuu rí gájuwalaꞌ. 11Na̱tha̱nꞌlaꞌ ríge̱ꞌ a̱ngui̱nꞌ, numuu rí mbá tikhuun xa̱bi̱i Kloé nithinꞌlo̱ꞌ rí na̱tsa̱ña̱ꞌlaꞌ. 12Mbá tikhuun tsí ikháanꞌlaꞌ nuthan: «Ikhúúnꞌ ñajunꞌ xa̱bi̱i Páblo̱». I̱ꞌwíin nuthan: «Ikhúúnꞌ ñajunꞌ xa̱bi̱i Apólo̱s». I̱ꞌwíin nuthan: «Ikhúúnꞌ ñajunꞌ xa̱bi̱i Pédro̱».#1.12 «Pedro» ñajuun ajngáa griégo̱ jamí «Cefas» ñajuun ajngáa araméo̱. I̱ꞌwíin nuthan: «Ikhúúnꞌ ñajunꞌ xa̱bi̱i Krísto̱».
13Á nixpíꞌthá-mina̱ꞌ Krísto̱ dxe̱ꞌ. Á waꞌdujmaa Páblo̱ ná ixe̱ krúsi̱ ma̱ja̱ñúu ga̱jma̱á numalaꞌ dxe̱ꞌ. Á waxúꞌdu-maꞌáanꞌlaꞌ ná awúun iya rí ma̱nindxa̱ꞌlaꞌ xa̱bi̱i Páblo̱ dxe̱ꞌ. 14Núma̱aꞌ la Ana̱ꞌlóꞌ rí nimbáa tsí ikháanꞌlaꞌ táxu̱ꞌdú-máꞌáanlo̱ꞌ ná awúun iya, rí i̱ndo̱ó máꞌ Kríspo̱ ga̱jma̱á Gáyo̱. 15Kajngó nimbáa ma̱xáꞌthán rí waxúꞌdu-maꞌáan ná awúun iya rí ma̱nindxu̱u̱ xa̱bi̱ꞌ. 16Xúꞌkhue̱n máꞌ ni̱xu̱ꞌdú-máꞌíin ná awúun iya xa̱bi̱i Estéfa̱na̱s. Xómáꞌ tsí i̱ꞌwíin rá, na̱nguá gíwa̱a̱n a̱kui̱nꞌ xí ni̱xu̱ꞌdú-máꞌáan ná awúun iya i̱mba̱a̱ꞌ. 17Numuu rí táxungu̱únꞌ Krísto̱ rí ma̱xu̱ꞌdú-máꞌíin xa̱bo̱ ná awúun iya, rí nixúngúu̱nꞌ ma̱tha̱n-ráꞌa ajngáa máján. Jamí ra̱ꞌkhá ga̱jma̱á ajngúún xa̱bo̱ tsí na̱ma̱ñúú guéño ná numbaa ríge̱ꞌ, ra̱ꞌkhá ma̱ꞌne rí nda̱a̱ mbá jayu numuu nijáñuu Krísto̱ ná ixe̱ krúsi̱.
Ra̱mbéꞌtháán rí na̱ma̱ñuu Ana̱ꞌlóꞌ ga̱jma̱á rí na̱ma̱ñúú xa̱bo̱ numbaa
18Xa̱bo̱ tsí nandáti̱gi̱in nduyáa̱ rí ajngáa tsiskágu̱nꞌ ñajuun gisngáá ga̱jma̱á numuu Krísto̱ tsí nijáñuu ná ixe̱ krúsi̱. Xómáꞌ ikháánꞌlóꞌ rá, tsáanꞌ na̱ka̱-rajáwiáanꞌlóꞌ, nduꞌyáálóꞌ rí ski̱yu̱u̱ꞌ Ana̱ꞌlóꞌ ñajuun ajngáa rúꞌkhue̱n. 19Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:
«Ma̱snga̱jmá rí xa̱bo̱ tsí na̱ju̱mu̱ú rí na̱ma̱ñúú guéñúú, nda̱a̱ rí i̱ma̱ñúu̱,
Jamí ma̱ne̱ rí ma̱kujma rí xa̱bo̱ tsí na̱ju̱mu̱ú rí máján guéño idxu̱ún, nda̱a̱ rí ifruꞌúu̱n».#1.19 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 29.4.
20Náá inguanúu xa̱bo̱ tsí phú na̱ma̱ñuu rá. Náá inguanúu xa̱bo̱ tsí naꞌsngáá xtángoo rá. Náá inguanúu xa̱bo̱ tsí phú na̱ma̱ñuu naꞌthán ná numbaa ríge̱ꞌ rá. Ana̱ꞌlóꞌ nisngájma rí tsiskágu̱nꞌ ñajuun mbá xúgíí rí na̱ma̱ñúú xa̱bo̱ numbaa. 21Numuu rí ga̱jma̱á majñu̱u̱ rí na̱ma̱ñuu Ana̱ꞌlóꞌ, niꞌnii̱ rí mu̱xúne̱-nuwii̱n xa̱bo̱ numbaa ga̱jma̱á majñu̱u̱ rí na̱ma̱ñúu̱ ikhii̱n. I̱wa̱á máꞌ neꞌne a̱kui̱in Ana̱ꞌlóꞌ rí ma̱ꞌne-jáwíi̱n tsí nanimbu̱únꞌ juyáa̱ ga̱jma̱á majñu̱u̱ ajngáa rí nu̱tha̱n-ráꞌaxo̱ꞌ, ikhaa rí xómá tsiskágu̱nꞌ jaꞌnii.
22Tsí xa̱bo̱ judío̱ nandúu̱n mbuyáa̱ rí phú wáá, jamí xa̱bo̱ griégo̱ nandúu̱n rí ma̱ma̱ñúu̱ i̱tha̱án xóó. 23Xómáꞌ ikháanꞌxo̱ꞌ, nu̱tha̱n-ráꞌaxo̱ꞌ ga̱jma̱á numuu Krísto̱ tsí waꞌdujmaa ná ixe̱ krúsi̱ ma̱ja̱ñúu. Maphú mate̱ꞌ gisngáá ríge̱ꞌ iyáá tsí xa̱bo̱ judío̱, jamí ajngáa tsiskágu̱nꞌ ñajuun ne̱ iyáá xa̱bo̱ tsí ra̱ꞌkháa judío̱ ñajúún. 24Xómáꞌ tsí nindxaꞌwúún Ana̱ꞌlóꞌ rá, xa̱bo̱ judío̱ jamí xa̱bo̱ griégo̱, nduyáa̱ rí Krísto̱ nasngájma ski̱yu̱u̱ꞌ Ana̱ꞌlóꞌ, jamí ikhaa̱ nasngájmee̱ rí phú na̱ma̱ñuu Ana̱ꞌlóꞌ. 25Numuu rí ikhaa rí xómá naskágu̱u̱nꞌ Ana̱ꞌlóꞌ jaꞌnii ná inúú xa̱bo̱, ikhaa rúꞌkhue̱n nasngájma rí phú i̱tha̱án na̱ma̱ñuu̱ ikhaa̱ xó rí xa̱bo̱ numbaa. Jamí ikhaa rí xómá wabaa Ana̱ꞌlóꞌ jaꞌnii ná inúú xa̱bo̱, ikhaa rúꞌkhue̱n nasngájma rí i̱wa̱á mba̱a̱ ski̱yu̱u̱ꞌ ikhaa̱ xó rí xa̱bo̱ numbaa.
26Ikhaa jngó a̱ngui̱nꞌ, gu̱ya̱á májánlaꞌ rí Ana̱ꞌlóꞌ nindxaꞌwálaꞌ, maske máꞌ ra̱mbáꞌáanꞌlaꞌ na̱ma̱ñalaꞌ xómá na̱ma̱ñúú i̱ꞌwíin xa̱bo̱, ni máꞌ ra̱mbáꞌáanꞌlaꞌ guáꞌdáálaꞌ tsiakhe̱ rí mu̱tha̱n-ñájunlaꞌ, ni máꞌ ra̱mbáꞌáanꞌlaꞌ ni̱gu̱máaꞌlaꞌ ná majñu̱ú xa̱bo̱ tsí gíꞌdoo numúú. 27Ikhiin tsí na̱nguá gíꞌdoo numúú ná numbaa ríge̱ꞌ niraꞌwíin Ana̱ꞌlóꞌ, kajngó ma̱ꞌne-matii̱nꞌ tsí na̱ma̱ñúú. Ikhiin tsí wabiin ná numbaa ríge̱ꞌ niraꞌwíin Ana̱ꞌlóꞌ, kajngó ma̱ꞌne-matii̱nꞌ tsí guáꞌdáá tsiakhe̱ rí muthan-ñajun. 28Ikhiin tsí tsíjmii jayu, tsí ndawa̱a̱ tsí iya-makúún, jamí tsí nda̱a̱ nitháan numúú, tsúꞌkhue̱n niraꞌwíin Ana̱ꞌlóꞌ kajngó ma̱ꞌne-matii̱nꞌ tsí gíꞌdoo numúú. 29Ikhaa jngó nimbáa ma̱xákúxe̱-mina̱ꞌ ná inuu Ana̱ꞌlóꞌ. 30Xómáꞌ ikhaa̱ niꞌnii̱ rí ma̱juwalaꞌ ga̱jma̱á nindxu̱u̱ Krísto̱ Jesús, tsí ninindxu̱u̱ rí na̱ma̱ñalóꞌ neꞌne Ana̱ꞌlóꞌ. Xúꞌkhue̱n máꞌ ga̱jma̱á numuu Krísto̱ niꞌthán Ana̱ꞌlóꞌ rí nánda̱a̱ aꞌkhánlóꞌ, ni̱gu̱ma-jaꞌwáanꞌlóꞌ, jamí waꞌtse̱-ri̱ñáaꞌlóꞌ. 31Ikhaa jngó, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Xí mbáa nandoo makúxe̱-mina̱ꞌ, gakúxe̱-mine̱e̱ꞌ ga̱jma̱á numuu Táta̱».#1.31 Ajngáa ríge̱ꞌ na̱ꞌkha̱ ná I̱yu̱u̱ꞌ Jeremía̱s 9.24.
Attualmente Selezionati:
1 Xa̱bo̱ Korínto̱ 1: tcf
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2025 SIL Global. Creative commons license CC BY-SA.